Jâan 7
7
Arə̂mâ ndə̂ Jezü zâbo su andjê sə̈ tchë-a
1La tchêngbâ nə̈ Jezü sə̂ lakə̂ ro kulə̂ agö ndə̂ Galilë. Tche nyîâbo ndə̂kə̂ nə lə̂ agö ndə̂ Judë-a, bëte ajuîfu kä lakə̂ pu köbo ndə̂kə̂ won tchë. 2Dëkë kpülü ndə̂ andokʉ̈#7.2 Kpülü ndə̂ adokʉ̈: Nyë wün rə̂ lə̂ bakalë. ndə̂ ajuîfu ndô nə̂. 3Arə̂mâ ndə̂ yê tô rə̂ sə̈ tchë päkëdə̂: «Amö alafô tchâtə kə̈ rô atə̂ Judë, käko adjisîpili ndə̂ zə̈ wun ndjë arə ndə̂ mo mbo rə̂. 4Âdə ngâ akrə ânyində̂ nə̈ pä azü wunsə̂ yê, tchê mboabô rə lə̂ küwû nə̈ tee-a. Batə̂ rə̂ ndə̂ mo mbo arə kâkë âtə, amö nyisə̂ tə̂ zə̈ ndə̂kə̂ pa azü pâ cho wunsə̂ zə̈.» 5Bëte arə̂mâ ndə̂ Jezü la tə̂ andjê zâbo su andjê sə̈ tchë-a. 6Jezü tô rə̂ sə̈ andjê päkëdə̂: «Lö mê wûtuabô dämba nə̂-a, andə̂ nye nə̈, lö nyê kä tâ logbɛ̂. 7Azü tchêbêche âtə wâbo ndə̂kə̂ kosə̂ nyê-a, andə̂ me nə̈, andjë kösə̂ mê, bëte më tö pö pâ andjê pä, akua ndə̂ andjë mbo rə̂ wätə̂ ngbongbo nə̈. 8Nyë ë andə̂ nye nə̈ ndə̂ kpülü nə̈, mëmê ndə̂ me nə̈ më êâbo-a, bëte lö mê wûtuabô dämba-a.» 9Pânə̈ ndə̂ tche tô rə̂ käko, tche sə̂ andə̂ ye nə̈ po bhâ Galilë.
Jezü ë ndə̂ kpülü ndə̂ andokʉ̈
10Ndə̂ arə̂mâ ndə̂ yê ê ndə̂ kpülü nə̈, Jezü ê ndjë, praâbalë tche nyîâbo sə̂ tə̂ yê sə̈ azü-a, tche zätə̂ yê wü. 11Ajuîfu sə̂ lakə̂ pu tchë lə̂ kpülü nə̈ lakə̂ to rə̂ päkëdə̂: «Tche sə̈ bhâ tchêbâ?» 12Angbängbä azü lə̂ kpûlû nə̈ sə̂ lakə̂ po lə̂ ma andjê tə̂ pö ndə̂ Jezü tə̂ gbölösə̂nə̈. Angânə̈ tö rə̂ päkëdə̂: «Tche wätə̂ tchôtchô akrə.» Angânə̈ tô andə̂ andjë nə̈ päkëdə̂: «Tche kä lakə̂ mbo rə̂ pä köbo azü yu.» 13Praâbalë ngâ akrə ndə̂ tche tô pö tə̂ yê kraâ lə̂ la azü sə̂âbo-a, bëte wawa ajuîfu kä lakə̂ mbo andjê.
14Ndə̂ andjë mbô kpülü nə̈ âwûtu lə̂ gûgû nə̈, Jezü ê atə̂lə̂ gbölö nda Ndjapä, kə̈ sə̂ lakə̂ nyisə̂ rə sə̈ azü. 15Ndə̂ ajuîfu djê pö lâme, tchə̂lə̂ küma andjê djîngɨli, andjë tô rə̂ päkëdə̂: «Köchë âtə wünsə̂ mbëtï atöko ndə̂ tche mândabô mbëtï mânda âtə?» 16Jezü tô rə̂ ndə̂nə̈ sə̈ andjê päkëdə̂: «Rə ndə̂ mê nyisə̂ nə̈ tôâbo bhândə̂ mê-a, praâbalë ätö bhândə̂ akrə ndə̂ tche wân mê. 17Akrə ndə̂ tche nyîndə̂ kə̂ mbo rə ndə̂ su Ndjapä nyîndə̂ nə̈, tchê wun-adje sə̂nə̈ pä rə ndə̂ mê nyisə̂ nə̈, tö bhândə̂ Ndjapä, âdəndjë rə̂ ndə̂ mëmê kä ndə̂ âto pö ndə̂ mê la tə̂ mê. 18Akrə ndə̂ tche tô pö ndə̂ yê la tə̂ yê, tche pü köbo ndə̂kə̂ pa azü lusə̂ yê. Praâbalë akrə ndə̂ tche nyîndə̂ nə̈ pä azü lusə̂ akrə ndə̂ tche wân tchë, tche tö lëge pö, ânyë mbə̈lï wâbo lə̂ yê-a. 19Möyîze zâbo ndïɛ̈ alême sə̈ nyê? Praâbalë ngâ akrə balë lə̂ gûtə̂ nyê mbôâbo rə gundə̂sə̂ ndïɛ̈ nə̈-a. Bëte giamâ kä ndə̂ nyê pu köbo ndə̂kə̂ won mê?» 20Kpûlû azü nə̈ tô rə̂ ndə̂nə̈ sə̈ tchë päkëdə̂: «Ngbongbo tchozö kä lə̂ zə̈. Tchabâ kä ndə̂ âpû köbo ndə̂kə̂ won mö?»
21Jezü tô rə̂ ndə̂nə̈ sə̈ andjê päkëdə̂: «Më mbö kütû ngâ kua balë, ânyë tchə̂lə̂ küma nyê gbɛ̂ djîngɨli âtə! 22Möyîze zä köbo sə̈ nyê alême ndə̂kə̂ wa gasa. Âtôâbo bhândə̂ Möyîze-a#7.22 Nyë dɨ̈ Lev 12.3; Jen 17.10-13., praâbalë ätö tə̂ araâta nyê, ânyë nyë kä lakə̂ wa aköchë la gasa lə̂ lö sabäa. 23Âdə nyê âwa ngâ köchë la gasa lə̂ lö sabäa, ndə̂kə̂ pa nyë ndɨabô tchə̂lə̂ ndïɛ̈ ndə̂ Möyîze ndɨ̂-î, ndə̂ âdə̂ käko lâme, bëte giamâ kä ndə̂ su nyê kʉ̂ nyê tə̂ mê bëte rə̂ ndə̂ më tchâ ngâ earə̂ tə̂kömbô la ndundu tə̂ yê gbɛ̂ lə̂ lö sabäa? 24Âwâbo pä nyë wa ngbanga tə̂ pö ndə̂ la akrə-a, äwäpä nyë wa djîrə̂ ngbanga.»
Jezü wätə̂ Krîsiti?
25Angâ azü gö ndə̂ Jerûzalêmo tö rə̂ päkëdə̂: «Âdə̂âbo köchë ndə̂ a pu tchë ndə̂kə̂ won tchë lâme kä âtə? 26Tche kä sa âtə, ndə̂ tche to pö kraâ lə̂ la azü gbɛ̂ âtə, ânyë andjë tôâbo ngâ pö balë sə̈ tchë-a! Agbölö azü ndə̂ azə̂ wûn-âdje sə̂nə̈ nə̂ pä tche wätə̂ Krîsiti? 27Praâbalë tchanə̈ âtə, azə̈ wûnsə̂ tchô ndə̂ tche tô tâ nə̂, praâbalë âdə Krîsiti ânə, ngâ akrə balë ndə̂ tche wunsə̂ tchô ndə̂ tche tô tâ səabô tee-a.»
28Käko Jezü sə̂ lakə̂ nyisə̂ rə sə̈ andjê bhâlə̂ gbölö nda Ndjapä, kə̈ tô pö ngbôô päkëdə̂: «Nyë wûnsə̂ mê nə̂! Kə̈ wûnsə̂ tchô ndə̂ më tô tâ nə̂! Praâbalë më nə̂âbo pâ küma mê-a. Akrə ndə̂ tche wân mê, tche də̈ akrə ndə̂ tche to lëge pö, ânyë nyë wûn-âbo sə̂ yê-a. 29Më wûnsə̂ yê nə̂, bëte më tö bhândə̂ yê, tchetchë kä ndə̂ âwân mê.» 30Käkö, andjë pû köbo ndə̂kə̂ za tchë, praâbalë ngâ akrə balë grʉ̂âbo tchë-a, bëte dalo ndə̂ yê wûtuabô dämba-a. 31Lə̂ gûtə̂ kpûlû azü nə̈ lâme, angbängbä angânə̈ zâ su andjê sə̈ tchë. Andjë tö rə̂ päkëdə̂: «Âdə Krîsiti ânə, tchê mboadje akpɨ̈ngbɨ̈ arə âro anə̈ ndə̂ tchanə̈ âtə mbô rə̂ âtə?»
Afarizïɛ̈n wän aturûgu ndə̂ gbölö nda Ndjapä ndə̂kə̂ za Jezü
32Ndə̂ afarizïɛ̈n djê kpûlû azü nə̈ ndə̂ andjë sə̂ lakə̂ po lə̂ ma andjê tə̂ pö ndə̂ Jezü, agbölö a-earə̂ kə̂ wa ngela sə̈ Ndjapä la afarizïɛ̈n wân aturûgu ndə̂ gbölö nda Ndjapä#7.32 Aturûgu ndə̂ gbölö nda Ndjapä: Andjë wätə̂ azü pâ mawo ndə̂ Levï ndə̂ kua ndə̂ andjê wâ ndə̂kə̂ mbo kua lə̂ gbölö nda Ndjapä, ndjë ndə̂kə̂ bata arə ndə̂ âwâ lə̂nə̈. Andjë kä ndə̂ a wân angânə̈ ndə̂kə̂ za Jezü lâme. ndə̂kə̂ za tchë. 33Jezü tô rə̂ päkëdə̂: «Gbô mê kä lə̂ gûtə̂ nyê ngbâ kpîɛ̂kpîɛ̂ lö, la tchêngbâ nə̈, më âka atə̂ndə̂ tchanə̈ ndə̂ tche wân mê. 34Nyê puadje mê, praâbalë kə̂ gboabô mê tee-a, bëte sə̂nə̈ ndə̂ mê sə tâ, nyë wâbo ndə̂kə̂ wutu bhâsə̂ tchô nə̈ lâme-a.» 35Ajuîfu tô rə̂ lə̂ gbâtə̂ andjê päkëdə̂: «Tche âe bhâ tchêbâ ânyë azə̂ gboabô tchë gbô-ê? Tche âe bhândə̂ ajuîfu ndə̂ andjë krʉ̂ tchə̂lə̂ tə̂ andjê lə̂ gbâtə̂ agerêke lâme ndə̂kə̂ nyisə̂ rə sə̈ agerêke nə̈? 36Pö ndə̂ tche tô rə̂ âtə nyïndə̂ kə̂ to rə̂ atöko? Nyê puadje mê, praâbalë kə̂ gboabô mê tee-a, bëte sə̂nə̈ ndə̂ mê sə tâ, nyë wâbo ndə̂kə̂ wutu bhâsə̂ tchô nə̈ lâme-a.»
Pö ndə̂ ngû ndə̂ âza tchîsûwu sə̈ azü
37Ndə̂ adɨ̂ balë lö kpülü nə̈ âsə̈ wûtu, ndə̂ âwâtə̂ gbölö lö, Jezü krʉ̂ lafô kə̈ tô rə̂ ngbôô päkëdə̂: «Âdə gʉ ngû ânyu ngâ akrə, äwäpä tche nə pu mê, kə̂ ndjo ngû nə̈. 38‹Akrə ndə̂ tche zâ su yê sə̈ mê, ngû ndə̂ âza tchîsûwu sə̈ akrə toadje bhâtə̂ su yê ânyë kə̂ bro› batə̂ rə̂ ndə̂ Mbëtï Ndjapä tô rə̂.» 39Pö ndə̂ Jezü tô rə̂ lâme, tche nyïndə̂ kə̂ to rə̂ pä, azü ndə̂ andjê zadje su andjê sə̈ tchë, andjê gboadje Yingö ndə̂ Ndjapä. Bëte tə̂ lö nə̈ lâme, Yingö wâbo tâ dämba-a, bëte Ndjapä lûâbo sə̂ Jezü dämba-a.
Tchə̂lə̂ kpûlû azü krʉ̈ tchə̂lə̂ tə̂ yê tə̂ pö ndə̂ Jezü
40La tchêngbâ nə̈ ndə̂ azü nə̈ djê apö ndə̂ Jezü lâme, angânə̈ lə̂ kpûlû nə̈ tô rə̂ päkëdə̂: «Tə̂ lëge nə̈, tchetchë kä ndə̂ âdə̂ earə̂ ndə̂ma Ndjapä!» 41Angânə̈ tô rə̂ päkëdə̂: «Tche wätə̂ Krîsiti!» Praâbalë angânə̈ tô ndjë rə̂ päkëdə̂: «Krîsiti nə̈ âto bhâ Galilë ânyë kə̂ nə? 42Mbëtï Ndjapä tôâbo rə̂ pä Krîsiti nə̈ ânə pâ mawo ndə̂ Davîdi, ndə̂ tche də̂ akrə gö ndə̂ Bêtelehêmo, ndə̂ âwâtə̂ yɛ̈yɛ̈ gö ndə̂ Davîdi lâme?#7.42 Nyë dɨ̈ Mich 5.1; 2 Sam 7.12.» 43Tchə̂lə̂ kpûlû azü nə̈ krʉ̂ tchə̂lə̂ tə̂ yê tə̂ pö ndə̂ Jezü. 44Angânə̈ lə̂ gûtə̂ andjê nyîndə̂ kə̂ za Jezü, praâbalë ngâ akrə balë grʉ̂âbo tchë-a.
Gbôgbô su ndə̂ agbölö azü ndə̂ ajuîfu
45Aturûgu ndə̂ gbölö nda Ndjapä nə̈ dôtə̂ andjê pu agbölö a-earə̂ kə̂ wa ngela sə̈ Ndjapä la afarizïɛ̈n. Andjë yû aturûgu nə̈ päkëdə̂: «Bëte giamâ nyë kâbô kâ la tchë-ê?» 46Andjë tô rə̂ ndə̂nə̈ sə̈ andjê päkëdə̂: «Ngâ akrə balë tôâbo pö batə̂ köchë lâme-a.» 47Afarizïɛ̈n yû andjê päkëdə̂: «Nyënyê ndjë gbɛ̂, tche yû köbo nyê nə̂? 48Ngâ akrə lə̂ gbâtə̂ amakündji ndə̂ ajuîfu, âdəndjë ngâ farizïɛ̈n kä tâ ndə̂ tche zâ su yê sə̈ tchë? 49Praâbalë kpûlû azü nə̈ lâme ndə̂ andjë wûn-âbo sə̂ ndïɛ̈ ndə̂ Möyîze wûn lâme, ngbongbo pö kä pâ andjê!»
50Nîködême ndə̂ tche wâtə̂ farizïɛ̈n, ndə̂ tche ê alême dokʉ̈tchê kə̈ gbô Jezü, tche tô rə̂ sə̈ andjê päkëdə̂: 51«Ndïɛ̈ ndə̂ azə̂ wä ngbanga lə̂ küma ngâ akrə dokʉ̈tchê ndə̂kə̂ pa a dje tchë, kə̂ wunsə̂ rə ndə̂ tche mbô rə̂#7.51 Nyë dɨ̈ Det 1.16.?» 52Andjë tô rə̂ ndə̂nə̈ sə̈ tchë päkëdə̂: «Mo də̈ ndjë ngâ akrə gö ndə̂ Galilë? Amö pu rə̂ lə̂ Mbëtï Ndjapä, kə̂ wun-adje rə̂ pä ngâ earə̂ ndə̂ma Ndjapä balë tôâbo bhâ Galilë-a.»
Jezü la ɛ̈chë ndə̂ tche pû köchë ndə̂ ngâ akrə
[53La tchêngbâ nə̈ akrə balë balë gû atə̂ndə̂ yê#7.53 Apö ndə̂ âwâ lə̂ yɛ̈yɛ̈ da 7.53 ëtə̂ 8.11 lâme wâbo lə̂ angâ abəndɨ Mbëtï Ndjapä la ma gerêke-a, âdəndjë latɛ̈n-a, âdəndjë sïrïâke-a..
Currently Selected:
Jâan 7: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
