Jâan 8
8
1Jezü kênga atə̂lə̂ küma aga ndə̂ a-Olivï. 2Praâbalë po mbatchâ, Jezü kâ dôtə̂ yê atə̂lə̂ gbölö nda Ndjapä. Azü nə̈ gbɛ̂ nə̂ pu tchë. Tche sə̂ bêche lakə̂ nyisə̂ rə sə̈ andjê. 3Käko a-earə̂ kə̂ nyisə̂ ndïɛ̈ la afarizïɛ̈n zâ ngâ ɛ̈chë ndə̂ a gbô tchë la ngâ köchë, andjë nə̂ la tchë, kə̈ zâ tchë ëlə̂ kpûlû nə̈. 4A-earə̂ kə̈ nyisə̂ rə la afarizïɛ̈n lâme tô rə̂ sə̈ Jezü päkëdə̂: «Earə̂ kə̂ nyisə̂ rə, ârâ gbö ɛ̈chë âtə ndə̂ tche sə̂ lakə̂ pu köchë ndə̂ ngâ akrə. 5Lə̂ Mbëtï-ndïɛ̈, Möyîze zäma sə̈ ârâ pä äwäpä a nye ngoa ɛ̈chë kâkë la täme tche tchu-î. Andə̂ zə nə̈ mo tö rə̂ tâ atöko?» 6Andjë tö rə̂ käko ndə̂kə̂ vu tchë ânyë andjë za pö lə̂ küma yê. Praâbalë Jezü chî küma yê lakə̂ mbo mbëtï bêche la küma ɛ̈ könô yê. 7Ndə̂ gbô andjê ndə̂po lakə̂ yu Jezü, tche kênga tə̂ yê, kə̈ tô rə̂ sə̈ andjê päkëdə̂: «Akrə lə̂ gûtə̂ nyê ndə̂ tche mbôâbô ngâ ngbongbo rə mbô balë, äwäpä tche dokʉ̈tchê tə̂kə̂ nye tchë la täme nə̈.» 8La tchêngbâ nə̈ Jezü kâ chî küma yê, kə̈ sə̂ lakə̂ mbo mbëtï bêche. 9Ndə̂ andjë djê pö nə̈ käko, andjë sə̂ lakə̂ gbo balë balë, ätö tə̂ akpôkpô azü. Jezü sə̂ la kütû yê la ɛ̈chë nə̈ ndə̂ tche krʉ̂ tchâtchu yê. 10Käko Jezü kênga tə̂ yê, kə̈ tô rə̂ sə̈ tchë päkëdə̂: «Ɛ̈chë, andjë sə̈ bhâ tchêbâ? Ngâ akrə balë wâbo ngbanga lə̂ küma zə̈?» 11Ɛ̈chë lâme tô rə̂ ndə̂nə̈ sə̈ tchë päkëdə̂: «Gbölö Gbïɛ̈, ngâ akrə balë sə̂âbo-a.» Jezü tô rə̂ päkëdə̂: «Mëmê ndjë gbɛ̂ më wâbo ngbanga lə̂ küma zə̈-a. Amö gûgü, praâbalë amö ka mbôâbô ngâ ngbongbo rə mbô-ê.»]
Jezü wätə̂ ngbänga ndə̂ tchêbêche
12Jezü kâ tô rə̂ sə̈ kpûlû azü lâme päkëdə̂: «Më wätə̂ ngbänga ndə̂ tchêbêche âtə. Akrə ndə̂ tche zâ tchêngbâ mê, tchê nə bata lə̂ bübü tchô balë tee-a, praâbalë tchê gboadje ngbänga ndə̂ âza tchîsûwu sə̈ tchë.» 13Pâ pö lâme, afarizïɛ̈n tô rə̂ sə̈ tchë päkëdə̂: «Momö, mo tô pö pâ zə̈ la tə̂ zə̈ ânyë pö ndə̂ zə̈ nə̈ wabô tə̂ lëge nə̈-a.» 14Jezü tô rə̂ sə̈ andjê päkëdə̂: «Âdə mê âto pö ndə̂ mê la tə̂ mê, pö ndə̂ mê to rə̂ wätə̂ lëge pö, bëte më wünsə̂ tchô ndə̂ më tô tâ, kə̈ wûn ndjë sə̂ tchô ndə̂ mê e tâ. Praâbalë nyënyê ndə̂ nye nə̈, nyë wûn-âbo sə̂ tchô ndə̂ më tô tâ âdəndjë sə̂ tchô ndə̂ mê e tâ-a. 15Nyënyê, nyë wä ngbanga ndə̂ nyê batə̂ andə̂ azü. Andə̂ me nə̈, më wâbo ngbanga lə̂ küma ngâ akrə balë-a. 16Âdə mê âwa ngbanga, kə̂ wa ngbanga ndə̂ mê nə̈ wä gundə̂sə̂ lëge pö, bëte më də̂âbô la kütû mê ndə̂kə̂ wa ngbanga-a. Praâbalë Bha ndə̂ tche wân mê kä la mê. 17Lə̂ Mbëtï-ndïɛ̈ ndə̂ nyê, a mbö rə̂ päkëdə̂: ‹Âdə azü bïchuû âto pö ânyë pö ma andjê wâ balë, dëkë pö nə̈ lâme wätə̂ lëge nə̈#8.17 Nyë dɨ̈ Det 19.15..› 18Më tö pö pâ pö ndə̂ mê la tə̂ mê, Bha mê ndə̂ tche wân mê tö ndjë pö pâ mê.» 19Käko afarizïɛ̈n nə̈ yû tchë päkëdə̂: «Bha zə̈ nə̈ sə̈ bhâ tchêbâ?» Jezü tô rə̂ ndə̂nə̈ päkëdə̂: «Nyë wûn-âbo sə̂ mê âdəndjë Bha mê-a. Âdə nyê âwunsə̂ mê dëkë nyê wun-adje ndjë sə̂ Bha mê.»
20Jezü tö apö lâme ndə̂ tche sə̂ lakə̂ nyisə̂ rə lə̂ gbölö nda Ndjapä sə̂ tchô ndə̂ a za sandûgu-makətche tâ. Ngâ akrə balë zâbo tchë-a, bëte dalo ndə̂ yê wûtuabô dämba-a.
Tchô ndə̂ mê e tâ nyë wâbo ndə̂kə̂ e tâ-a
21Jezü kâ tô rə̂ sə̈ andjê päkëdə̂: «Mê âgûgü, nyê puadje mê, praâbalë nyê tchuadje lə̂ ngbongbo rə ndə̂ nyê. Nyë wâbo ndə̂kə̂ e atə̂sə̂ tchô ndə̂ mê e tâ âtə-a.» 22Käko ajuîfu tô rə̂ lə̂ gbâtə̂ andjê päkëdə̂: «Tche âwontə̂ yê wön la tə̂ yê? Bëte tche tö rə̂ pä nyë wâbo ndə̂kə̂ e sə̂ tchô ndə̂ anyë e tâ âtə-a.» 23Jezü tô rə̂ sə̈ andjê päkëdə̂: «Nyë də̈ azü tchêbêche, më tö bhâ lafô ânyë kə̈ nə̂. Nyë wätə̂ azü tchêbêche, më də̂âbo akrə tchêbêche âtə-a. 24Bëte rə̂ kä ndə̂ më tô rə̂ sə̈ nyê pä nyê tchuadje lə̂ ngbongbo rə ndə̂ nyê. Bëte âdə nyë âgambabô rə̂ gâmba pä: ‹Më kä tâ›, nyê tchuadje lə̂ ngbongbo rə ndə̂ nyê.» 25Andjë yû tchë päkëdə̂: «Mo də̈ tchabâ?» Jezü tô rə̂ sə̈ andjê päkëdə̂: «Tchanə̈ ndə̂ më tô pö ndə̂ yê sə̈ nyê lə̂ kêsâ nə̈ lâme. 26Më kä la apö tə̂ gbölösə̂nə̈ ndə̂kə̂ to rə̂, ânyë kə̈ wâ ndjë la apö ndə̂kə̂ wa ngbanga lə̂ küma nyê tə̂ gbölösə̂nə̈. Praâbalë tchanə̈ ndə̂ tche wân mê tö lëge pö. Kütû pö ndə̂ më djê rə̂ lə̂ ma yê kä ndə̂ më tô rə̂ sə̈ azü tchêbêche.»
27Andjë djêâbo tchə̂lə̂ nə̈ pä tche sə̈ lakə̂ to pö pâ Bha nə̈ sə̈ andjê-a. 28Käko Jezü tö rə̂ sə̈ andjê päkëdə̂: «Âdə nyê âi Modô ndə̂ Akrə bhâ lafô nə̂, nyê wun-adje sə̂nə̈ päkëdə̂: ‹Më kä tâ.› Nyê wun-adje sə̂nə̈ pä më mbôâbo rə la tə̂ mê-a, praâbalë më tö kütû pö ndə̂ Bha mê nyîsə̂ nə̈ sə̈ mê. 29Tchanə̈ ndə̂ tche wân mê kä la mê. Tche gbôâbo tə̂ mê la kütû mê-a, bëte më mbö rə ndə̂ âfû tə̂ yê logbɛ̂.» 30Ndə̂ Jezü tô pö nə̈ käko, angbängbä azü zâ su andjê sə̈ tchë.
Abechë ndə̂ Abrahâmo la abechë ndə̂ Jâbolo
31Käko Jezü tô rə̂ sə̈ ajuîfu ndə̂ andjë zâ su andjê sə̈ tchë päkëdə̂: «Âdə nyê âsə lə̂ pö ndə̂ mê, dëkë tə̂ lëge nə̈ nyë wätə̂ adjisîpili ndə̂ mê. 32Nyê wun-adje sə̂ lëge pö, ânyë lëge pö nə̈ lâme jiadje nyê tchâtchâ ngbâa.» 33Andjë tô rə̂ sə̈ tchë päkëdə̂: «Ârâ də̈ azü pâ mawo ndə̂ Abrahâmo, ârâ mbôâbo ngbâa tchâtchâ ngâ akrə lo balë-a. Atöko kä ndə̂ mo tô rə̂ sə̈ ârâ pä ârâ wutuadje tchâtchâ ngbâa?» 34Jezü tô rə̂ ndə̂nə̈ sə̈ andjê päkëdə̂: «Ɛn-ɛn, tə̂ lëge nə̈, akrə balë balë ndə̂ tche mbô ngbongbo rə tche wätə̂ ngbâa ndə̂ ngbongbo rə. 35Ngbâa sə̂âbo tchê tchâalê logbɛ̂-a, modô nə̈ kä ndə̂ âsə tchâalê logbɛ̂. 36Âdə Modô nə̈ âji nyê tchâtchâ ngbâa, nyê wadje tə̂ azü ndə̂ nyë wûtu tə̂ lëge nə̈ tchâtchâ ngbâa. 37Më wûnsə̂ nə̈ nə̂ pä nyë wätə̂ azü pâ mawo ndə̂ Abrahâmo. Praâbalë nyë kä lakə̂ pu köbo ndə̂kə̂ won mê, bëte pö ndə̂ mê gbôâbo tchô bhâlə̂ su nyê-a. 38Më to pö ndə̂ arə ndə̂ më wûn rə̂ bhândə̂ Bha mê. Praâbalë nyënyê ndjë gbɛ̂, äwäpä nyë mbo rə gundə̂sə̂ apö ndə̂ nyë djê rə̂ dəndə̂ Bha mê!» 39Andjë tô rə̂ sə̈ tchë päkëdə̂: «Bha ârâ də̈ Abrahâmo.» Jezü tô rə̂ sə̈ andjê päkëdə̂: «Âdə nyê âwa alême tə̂ abechë ndə̂ Abrahâmo, dëkë nyë âmbo akua ndə̂ Abrahâmo mbô rə̂. 40Praâbalë angaâtə nyë kä lakə̂ pu köbo ndə̂kə̂ won mê, mëmê ndə̂ më tô lëge pö sə̈ nyê, ndə̂ më djê rə̂ dəndə̂ Ndjapä. Abrahâmo mbôâbo tə̂ ngâ rə käko-a. 41Praâbalë nyënyê, nyë mbö kua ndə̂ bha nyê.» Andjë tô rə̂ ndə̂nə̈ sə̈ tchë päkëdə̂: «Ârâ wâbo tə̂ abechë ndə̂ a zɨ̂ andjê də sûwu-a, ârâ wä kütû la Bha ârâ balë, tche də̈ Ndjapä.» 42Jezü tô rə̂ sə̈ andjê päkëdə̂: «Âdə Ndjapä âwa alême tə̂ Bha nyê, nyê nyiadje ndə̂ mê, bëte më tö lə̂ Ndjapä ânyë kə̈ nə̂. Mëmê, më nə̂âbo la tə̂ mê-a, praâbalë tchetchë kä ndə̂ âwân mê. 43Bëte giamâ kä ndə̂ nyë djêâbo tchə̂lə̂ pö ndə̂ mê to rə̂ sə̈ nyê djê-ê? Bëte nyë wâbo la gbôgbô ndə̂kə̂ dje pö ndə̂ mê-a. 44Bha nyê də̈ Jâbolo, nyë nyïndə̂ kə̂ mbo arə gundə̂sə̂ arə ndə̂ su bha nyê nyîndə̂ nə̈. Tche də̈ earə̂ kə̂ won azü alême lə̂ kêsâ nə̈. Tche krʉ̂âbo balë lə̂ lëge pö-a, bëte lëge pö wâbo lə̂ yê-a. Âdə tche âmo yepa, tche tö pö la känyï ndə̂ yê la tə̂ yê, bëte tche də̈ earə̂ yepa, kə̈ wâ ndjë tə̂ bha yepa. 45Âdə andə̂ me nə̈, bëte rə̂ ndə̂ më tô lëge pö kä ndə̂ nyë gâmbabô pö ndə̂ mê gâmba-ê. 46Tchabâ lə̂ gûtə̂ nyê kä ndə̂ âwâ ndə̂kə̂ nyisə̂ ngâ ngbongbo rə balë ndə̂ më mbô rə̂? Âdə mê âto lëge pö, bëte giamâ nyë gâmbabô pö ndə̂ mê gâmba-ê? 47Akrə ndə̂ tche wâtə̂ tchandə̂ Ndjapä, tche djë apö ndə̂ Ndjapä. Âdə nyê âdjeabô apö ndə̂ mê djê-ê, dëkë nyë wâbo tə̂ azü ndə̂ Ndjapä-a.»
Jezü la Abrahâmo
48Ajuîfu tô rə̂ ndə̂nə̈ sə̈ Jezü päkëdə̂: «Ndə̂ ârâ tô rə̂ pä mo də̈ akrə gö ndə̂ Samarï, ânyë ngâ ngbongbo tchozö kä lə̂ zə̈ lâme, lëge pö də̂âbo rə̂?» 49Jezü tô rə̂ sə̈ andjê päkëdə̂: «Ngbongbo tchozö wâbo lə̂ mê-a. Praâbalë më lüsə̂ Bha mê ânyë nyënyê, nyë tälusə̂ mê. 50Më pûâbo köbo ndə̂kə̂ pa azü lusə̂ mê la tə̂ mê-a, ngâ akrə kä ndə̂ âpu köbo nə̈ bëte mê, tche də̈ earə̂ kə̂ wa ngbanga. 51Ɛn-ɛn, tə̂ lëge nə̈ më tö rə̂ sə̈ nyê: Âdə ngâ akrə âbata pö ndə̂ mê, tchê tchuabô balë tee-a.»
52Käko ajuîfu tô rə̂ sə̈ tchë päkëdə̂: «Kêsâ nə̈ kä ndə̂ ârâ wûnsə̂ nə̈ pä ngâ ngbongbo tchozö kä lə̂ zə̈. Abrahâmo tchû nə̂, a-earə̂ ndə̂ma Ndjapä tchû ndjë nə̂, ânyë momö, mo tô rə̂ päkëdə̂: ‹Âdə ngâ akrə âbata pö ndə̂ mê, tchê tchuabô balë tee-a.› 53Momö kä ndə̂ âwâ gbölö kə̈ rô âta ârâ Abrahâmo ndə̂ tche tchû lâme? A-earə̂ ndə̂ma Ndjapä tchû ndjë nə̂, ânyë mo wüntə̂ zə̈ pä mo də̈ tchabâ?» 54Jezü tô rə̂ ndə̂nə̈ sə̈ andjê päkëdə̂: «Âdə mëmê la tə̂ mê kä ndə̂ âlusə̂tə̂ mê la tə̂ mê, kə̂ lusə̂tə̂ mê nə̈ lâme wâbô tə̂ ngâ rə-a. Bha mê kä ndə̂ âlusə̂ mê, tchetchë ndə̂ nyë tô rə̂ päkëdə̂: ‹Tche wätə̂ Ndjapä ndə̂ ârâ lâme.› 55Nyë wûn-âbo sə̂ yê-a, mëmê kä ndə̂ âwûnsə̂ yê. Âdə mê âto rə̂ pä më wûn-âbo sə̂ yê-a, dëkë mê wadje tə̂ earə̂ yepa batə̂ nyê. Praâbalë më wûnsə̂ yê nə̂, ânyë kə̈ bâta pö ndə̂ yê. 56Abrahâmo ndə̂ tche wâtə̂ âta nyê wä alême la mômô bëte tche krʉ̈ ndə̂kə̂ wun lö mê. Tche wûn rə̂ ânyë kə̈ wâ la mômô.» 57Käko ajuîfu tô rə̂ sə̈ tchë päkëdə̂: «Mo wâbo ndjë la ngû tə̂ azü bïchuû la lə̂ könô gbɛ̂-a, (50) kə̈ tô rə̂ pä mo wûn Abrahâmo nə̂?» 58Jezü tô rə̂ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê: Dokʉ̈tchê ndə̂kə̂ pa a zɨ Abrahâmo, ‹Më kä tâ›.» 59Andjë rʉ̂â atäme ndə̂kə̂ nye Jezü la rə̂, praâbalë tche zatə̂ yê wü, kə̈ wûtu lə̂ gbölö nda Ndjapä nə̈.
Currently Selected:
Jâan 8: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
