थु़र्मा 1
1
येशू पाह्रीथो़ कोम्सिम्डिम
1द्वादीबुङ ङाचो़ थियोफिलस, येशूका सीमु नुङ खारी बोमु चो़म्मिडिम आरेम,#लूक १:१-४ 2नुङ गुमी उनी त्वाका ङा थुट्मिडिम थु़र्मामिमनुङ गुमीका माम्चु़नी-पेललाम र्वाम्डिम, मा पाह्रीथो़ कोम्सिम्डिम थारीसम्मकाम खोत्ले ल्वा गो गानीलाई ङादोम खाजेमडा र्याक्तोम बु।#१:२ लूकाका र्याक्तु़म जो़पा-सेलाकु खाजेम। 3क्रूसडा सिम्डिम चङ्डा गुमीका हापा ल्वामिमलामका मेर्मिमकु ङादोडा सिमुलाम बम्गेम्डिम र्वाक्पा रेम्बेम्डी। मेर्मिमनुङ गुमी ब्ल धु़म (४०) नेमसम्म ल्वाला सो़म्सिम्डी, मा माम्चु़नीकु किब्दीकु दुथाम सीट्मिडी।
4कोलेम येशू उनी सीसिपामिमनुङ ग्रुला पेप्डा गन्मिडिलो गुमीका आरे र्वाम्डिम बाइडा, “माम्चु़नीका गानीलाई हाम ग्वानिनी र्वाक्साका याचे जेम्डिम बाइडा, मेरामकु दुथाम गो गानीलाई ङादो ङा र्वाङडोम बु, गानी यरूशलेमडाम वाङथो़ मेलक्साका लन्थाट्नी।#लूक २४:४९ 5यूहन्नाका ने कु-रु़दु़म ग्वाक्तु़मी, लावो आनेपकु कोलेम-नलेमका गानी माम्चु़नी-पेलकु रु़दु़म रनी।”#मत्ती ३:११; मर्क १:८; लूक ३:१६; यूह १:३३
6मे थु़र्मामिम खोम्सिम्डिमा येशूनुङ हिलाबेम्डी, “ए ङाचो़, हाम गानी इस्राएल किब्दी ङादोम होप्माम ङा आथावो बनेबोनिमिम?”#१:६ याङका रोमीकु साखामलाम वाङ दु़म्मु, मा वाङमिमका ने ख्रीष्ट योमिमा साखाम थो़मी र्वाक्साका लन्थाट्मिडी।
7गुमीका मेर्मिर्मनुङ र्वाम्डी, “माम्चु़नीका उनी त्वाकु साखामलामका र्वाम्डिम थारीकु दुथाम गानी थेन्मुम बुमु मेबासी। 8लावो माम्चु़नी-पेल गानीगोडा योमिमा यु़म ल्वानी। मेकोतिमा यरूशलेमडा, खोत्ले यहूदियाडा, सामरियाडा, मा सुबु बिर्खोपसम्म गानी आमा दुथाम सो़पा दु़म्नी।”#मत्ती २८:१९; मर्क १६:१५; लूक २४:४७-४८
9येशूका ओराम ल्वा र्वामु डु़म्मिडिमा मेर्मिमका रेप्मिडी होङ्ङा गुमी धामुथो़ कोम्सिम्डी, मा खासेडा मेर्मिमकु मिक्सीलामडा दाम्मिडी।#मर्क १६:१९; लूक २४:५०-५१ 10येशू मेम्साका लम्डिम मे उनी सीसिपामिमका रेप्मिडिम-रेप्मिडिम ङा बेम्डी। मेकोतिलोङा बुबुया ये फतासिट्पा नले मु़चु़ कोचोत्ति मेर्मिमकु ङादोडा रेम्बेसिक्ची। 11मेकोतिमा मेर्चिपका मेर्मिमनुङ र्वाक्ची, “ए गालीलडाम मु़चु़नी, गानी हेङा येम्तासिनिमा धामुथो़ रेम्थानिमिम? गुमी गानीगोलामका पाह्रीथो़ कोम्सिम्डी, ओम्लो गानी येशू हेसाका ओलामका पाह्रीथो़ कोम्सिम्डिम ल्वान्नी मेम्साका ङा आथावो गुमी योमी।”
यहूदाकु खोमडा मतियास थुट्मिडिम
12मेकोतिमा मेर्मिम जैतून र्वाक्मा पोप्चङलामका यरूशलेम ख्लोम्सिम्डी। यरूशलेमलामका ओराम पोप्चङ को किलोमिटर को-कोडा बेडु़।#१:१२ (शब्दावलीडा रेप्नी) 13मेकोतिमा मेर्मिम शहरगोनो हुम्डिमा मेर्मिम बाथाल्पा नेमडलाम बाखोपडला हुम्डी। मेर्मिम पत्रुस, यूहन्ना, याकूब, अन्द्रियास, फिलिप नुङ थोमा, बारथोलोमाइ नुङ मत्ती, अल्फयसकु तारापाचो़ याकूब, सिमोन कनानी#१:१३ ओराम सिमोन र्वाक्मा रोमीकु साखामलामका वाङ दु़म्मु क्वाल्बा बेपा यहूदीमिमगोडाम कोले सो़। नुङ याकूबकु तारापाचो़ यहूदा मेसिन्डा बाम्थाल्मिडी।#मत्ती १०:२-४; मर्क ३:१६-१९; लूक ६:१४-१६ 14येशूकु माम मरियम, येशूकु ल्वाकमिम नुङ वाङमी मेसेममिम खोत्ले कोले नकाम दु़म्साका हेल्लो लोवो सो़म्दी बेम्थाल्मिडी।
15मेकोतिमा पत्रुस को सङ न धु़म (१२०) थो़रलु़पामिमकु थेतेडा येम्स्तामा र्वाक्ता, 16“वा-ल्वाकनी, माम्चु़नीकु सिजेम रोम्थिमुङा बासिट्पा बाइडा, मेराम सिजेम येशू चु़म्पामिमलाई क्रिपा यहूदाकु दुथाम दाऊदकु सिलाम ङादो ङा माम्चु़नी-पेलका जेम्डिम बाइडा। 17हेङालोने मेराम वो गुइनुङ ङा ङार्स्ताम बाइडा, मा ओराम लाले-पाङ्केडा ङा मेरामका वो दो़दो़वा डार्स्तु़म बाइडा। 18#मत्ती १७:३-८मेरामका मेजो़पा खारी बेसाका कोले ब्याङसी भ्रेयु़डु़, मा मेसिन्डा सिसिर दु़म्साका आल्स्ता, मा उ ख्वाचेप बिडा। मेकोतिमा खोत्ले उ चिङ्गेल ङा लुक्ता। 19ओराम ल्वा यरूशलेमडा बाट्पा खोत्लेका थो़म्डी। मेकोतिमा मेर्मिमका मेराम ब्याङसीकु नङ उनी ल्वालामका ‘आखेल्दामा’ जु़ल्मिडी। आखेल्दामा र्वाक्मा सिसिकु ब्याङसी सो़।”
20पत्रुसका र्वाक्ता, “हेङालोने कोमु काम्सोकु खाजेमडा आरेप्माम र्याक्मा बु,
‘मेरामकु बाखोप र्याङगो-र्याङगो दु़म्नु़,
मा मेसिन्डा सु़ वो मेदु़म्मिनु़,
मेरामकु खुन्चु़म वाङमिमका खुम्सिमिनु़।’#भज ६९:२५; १०९:८
21मेम्मिमका गुइगोडा बाट्पा कोले आरेप्माम मु़चु़ थुमु बासिट्पा बु, मेराम मु़चु़ ने गुइ येशूनुङ लाम्दिडिलो नुङ 22यूहन्नाका कु-रु़दु़म ग्वाक्तु़म थारीका मा येशू गुइलाम पाह्रीथो़ कोम्सिम्डिम थारीसम्म गुइनुङ बाट्पा दु़म्मु बासी। मेम्मा येशू सिमुलाम बम्गेम्डिम ल्वापा दु़म्मु बासी।”#मत्ती ३:१६; मर्क १:९; १६:१९; लूक ३:२१; २४:५१
23मेकोतिमा मेर्मिमका नलेकु नङ जु़ल्मिडी। मेर्चिप बारसाबास र्वाक्मा योसेफ नुङ मतियास बाच्ची। (योसेफलाई युस्तस वो र्वाम्थाल्मिडी) 24मेकोतिमा मेर्मिमका आरे र्वाम्डिमा सो़म्दी बेम्डी, “खोत्ले मु़चु़मिमकु न-गो ल्वापा माम्चु़नी, ओर्चिपगोडा गानी उहेमलाई छेट्निम बु, मेराम गुकुनुङ रेम्बेनी। 25मेराम लाले-पाङकेडा नुङ थु़र्मामिमकु खारीडा रोमु चाप्सु़नु़, उहेम लाले-पाङकेलामका यहूदा ख्लोस्तामा उ त्वाकु खोमडा सिडा।” 26मेम्मा मेर्चिपकु नङडा चिठ्ठा ओप्मिडी, मा मतियासकु नङडा दु़स्ता, मा मेराम को-कोङ (११) थु़र्मामिमनुङ काम्सिड्डा।
Currently Selected:
थु़र्मा 1: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
