थु़र्मा 12
12
पत्रुस झ्यालखानडा
1ओराम थारी बिलि हेरोद अग्रिपा#१२:१ हेरोद अग्रिपा: मत्ती २:१ डाम डोक्पु हेरोदकु चु़सु़। हपका मण्डलीडाम कोङ कोङ मु़चु़मिमलाई छो़म दु़खा ग्वामु चो़म्डु़मी। 2गुका यूहन्नाकु वा याकूबलाई कातु़रु़का सेन्बेड्डु़। 3ओराम खारीका यहूदीमिम गेर्सिम्डिम ल्वास्तु़, मा हेरोदका सेल्सिमुनेमकु चाडकाम सो़बेम पोमु थारीका पत्रुसलाई चु़म्डु़। 4हेरोदका पत्रुसलाई झ्यालखानडा चक्तु़मा को-रुले (१६) सिपाहीमिमकाम ब्ल टोली बनेबेसाका मेर्मिमलाई रेम्बेड्डु़मी। सेल्सिमुनेम चाड थारीकु चङ्डा हेरोदका पत्रुसलाई यहूदीमिमकु ङादोडा रेट्पामा हिलाहिसी बेपा न बु़डु़म बाइडा।#प्रस १२:१-२७ 5पत्रुस झ्यालखानडा चम्डिलो मण्डलीका उमा लागि माम्चु़नीनुङ छो़म सो़म्दी बेम्डिम बाम्डी।
माम्चु़नीका पत्रुसलाई झ्याखानलामका ख्लुम्डिम
6हेरोदका पत्रुसलाई मु़चु़मिमकु ङादोडा रेन्मुनेमकु ङादोम नेम्था पत्रुस नले सिपाहीचिपकु थेतेडा अम्ल्याक्पा बाइडा। गुलाई नले सेल रिवाका बन्थाट्मा बाइडा। नले सिपाहीचिपका झ्यालखानकु लाम्चोकोडा लथाक्चिम बाइडा। 7मेकोतिलोङा कोचोत्ति मिप्रङमाकु कोङ पाह्रीचो़ मेसिन्डा रेम्बेसिड्डा, मा पत्रुस चसिड्डाम बाखोपडा ओल झ्वाक्ता। मेकोतिमा पाह्रीचो़का पत्रुसलाई उ फेट-फेटडा याक्तु़, मा “दाला बका” र्वाक्तामा फक्तु़। मेकोतिलोङा सेल रिवाचिप पत्रुसकु ल्वालामका भ्रोसिक्चिमा आल्सिक्ची।
8पाह्रीचो़का पत्रुसनुङ र्वाक्ता, “इमा ये फसा, मा सो़लो़प ख्लु़सा।” मेकोतिमा गुका मेमङा बु़डु़। पाह्रीचो़का गुनुङ र्वाक्ता, “इमा हुम-ये फसामा गोनुङ लाम्दिया।” 9पाह्रीचो़कु चङचङ लाम्दिडामा पत्रुस झ्यालखानलामका पाखा लुक्ता। लावो पाह्रीचो़का बु़डु़म ओराम आच्छाङाकाम खारी र्वाक्साका गुका मेचवा। पत्रुसका ने मिक्सीलाम डे ल्वाउहोमबुङु र्वाक्पा मिम्डु़म बाइडा। 10पाह्रीचो़ नुङ पत्रुस नक टोली सिपाहीमिम बाखोप ख्वाक्लेच्चिमा शहरडाम डोक्पु सेलकु लाम्चोकोडा रोक्फाट्ची। मेराम सेलकु लाम्चोको उ त्वाप ङा होल्सिड्डामा मेर्चिप पाखानो लुक्ची। मेकोतिमा कोङ लाम्दी ख्वाक्चिम चङडा पत्रुसलाई डिट्जो़ल्लु़मा पाह्रीचो़ लस्ल्याड्डा।
11उ न छ्याङ्स्तामा पत्रुसका र्वाक्ता, “हेरोद हपकु ल्वाड्डाम नुङ यहूदीमिमका हाम बोमु माल्ङिमिडिम बाइडा, मेर्मिम खोत्लेडाम माम्चु़नीका उनी पाह्रीचो़ थु़र्साका गोलाई बोड्ङिडिमी-थार्ङिडिमी र्वाक्पा आच्छाङा ओम्लो गो चक्तो।” 12ओराम ल्वा पत्रुसका चडु़मा गु मर्कूस र्वाक्मा यूहन्नाकु माम मरियमकु नेमडा लस्ता। मेसिन्डा हापा मु़चु़मिम खोम्सिम्डिमा सो़म्दी बेत्तोङा लेट्मिडिम बाइडा। 13पत्रुसका मु़चु़ येन्मु लागि लाम्चोको ढकढक बु़डु़, मा रोदा र्वाक्मा डु़ल्चो़मे लाम्चोको होल्डा रोक्ता।
14गुका पत्रुस उ लो़लामडा ङा छेड्डु़मा छो़म गेर्सिद्वाक्तो लाम्चोको मेहोल्साका ङा ओन्तो नेमगोनो ख्लोस्ता, मा “पत्रुस पाखानो येम्तासिट्पा बु” र्वाक्तामा खोत्लेनुङ सो़यु़डु़।
15मेर्मिमका रोदालाई र्वाम्डी, “गाना न मान्थिम दु़म्नाम बु!” लावो गुका ओराम आच्छाङा र्वाक्साका घ्ल्वाम फिस्ता। मेकोतिमा मेर्मिमका र्वाम्डी, “मेम माला मेराम पत्रुसलाई रेपा पाह्रीचो़ रो ओ!”
16लावो पत्रुसका ने ढकढक बु़डु़होम ङा बाइडा, मा लाम्चोको होल्मिडिलो गुलाई ल्वाम्डिमा मेर्मिम ङाङाया दु़म्मिडी। 17पत्रुसका मेर्मिमलाई उ ल्वा थो़साका लिबा बाबेड्डु़मी, मा माम्चु़नीका हेसाका गुलाई झ्यालखानलामका पाखा ख्लुम्डी र्वाक्पा ल्वा मेर्मिमनुङ सो़यु़डु़। “याकूब#१२:१७ येशूकाम ल्वाक, यरूशलेम मण्डलीडाम ङाउ नुङ थो़रलु़पा वाङमिमलाई वो ओराम ल्वा थो़बेट्निमी” र्वाक्तामा पत्रुस मेलामका वाङथो़ ङा लस्ल्याड्डा।
18उ दिकाम नेमसोङडाम चङडा “पत्रुस हे दु़स्ता” र्वाक्तो सिपाहीमिम छो़म ङिम्डिमा उनी त्वाप-त्वापडा छो़म हिलाहिसी बेबेम्डी। 19हेरोदका पत्रुसलाई माल्लु़, मा वो मेल्वासु़वालो सिपाहीमिमनुङ हिलाहिसी बु़डु़, मा मेर्मिमलाई सेड्डु़मी। मेराम चङ्डा हेरोद ने यहूदियालामका कैसरिया शहरडा लस्तामा मेन्सिडा ङा बाइडा।
हेरोद हप सिडाम
20टुरोस नुङ सीदोन शहरडाम मु़चु़मिमनुङ हेरोद हपकाम छो़म उ छोक्चो बक्ताम बाइडा। लावो मेर्चिप शहरडाम मु़चु़मिम कोले दु़म्साका उमाडा रोम्डी। हेङालोने मेर्मिमका हेरोद हपकु नेब्दीलाम मा-के ल्वाम्थाल्मिडी। मेम्मिमका हेरोद हपनुङ न-थो़म घ्रो़म्बेन्मु लागि हेरोदका थो़र बु़डु़म उ डु़ल्चो़ बलस्तसलाई उनी ल्वाडा बेसाका जेबेट्मिडी।
21हेरोद हपका मेर्मिमनुङ घ्रो़म्मु ल्वा बु़डु़म नेम गु उ हप-ये फस्तामा हप गन्खोपडा गन्साका मु़चु़मिमकु ङादोडा जेस्ता। 22मेकोतिमा “गानी जेनिमिम ने मु़चु़ जेपा होङ्ङा मेएँ, नो़प जेपा होङ्ङा थो़कु” र्वाक्तो मेर्मिम मु़चु़ येम्डी। 23लावो माम्चु़नीकु नङ मेकोक्सु़वामका मेकोतिलोङा माम्चु़नीकु पाह्रीचो़का हेरोद हपलाई याक्तु़, मा क्रोडी छाम्डिमा सिडा।
24लावो माम्चु़नीकु सिजेम बर्तो नुङ फोन्सिक्तो लस्ता। 25बारनाबास नुङ शाऊलका यरूशलेमडा उची खारी डु़म्चिमा एन्टिओखिया शहरथो़#१२:२५ कोङनिम बाइबलडा यरूशलेमथो़ ख्लोसिक्ची र्वाक्पा बु। उची खारी थु़र्मा ११:२९-३० ख्लोसिक्ची। मेर्चिपनुङ मर्कूस र्वाक्मा यूहन्ना वो बाइडा।
Currently Selected:
थु़र्मा 12: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
