थु़र्मा 15
15
मण्डलीडाम ङाउमिम यरूशलेमडा घ्रो़म्मिडिम
1यहूदियालामका कोङनिम मु़चु़मिम#१५:१ यहूदी थो़रलु़पामिम एन्टिओखियाडा रोम्डी, मा वाङसामा थो़रलु़पामिमलाई आरे र्वाम्डिमा सीट्मिडी, “मोशाकु डु़म्लाका र्वाक्ताम होम्साका गानी खिरिरि-क्रिप्सी#१५:१ माम्चु़नीकु मु़चु़ र्वाक्साका रेम्बेपा छेखोप। मेबेनिवा माला सेल्सिमु मेचाम्नी।”#लेवी १२:३ 2मेकोतिमा पावल, बारनाबास मेर्मिमनुङ मेराम ल्वाडा छो़म मेदु़मिवा। मेकोतिमा मेसिन्डाम थो़र लु़पामिमका पावल नुङ बारनाबास मा वाङमिम कोले-नलेलाई ओराम ल्वा ख्रिप्डा थु़र्मामिमनुङ एल्डरमिमकाडा यरूशलेमडा थु़र्मुलाई छेट्मिडी। 3एन्टिओखिया मण्डलीडाम मु़चु़मिमका मेर्मिमलाई मेलामका थु़र्सोम्डी। मेकोतिमा मेर्मिम फोनिके नुङ सामरियालामका लम्डिलो वाङसामामिमका येशूडा थो़र लु़म्डिम ल्वा खोत्ले थो़रलु़पामिमनुङ सो़म्डी। ओराम थो़म्डिमा मेसिन्डाम थो़रलु़पामिम छो़म गेर्सिम्डी। 4मेर्मिम यरूशलेमडा रोम्फाम्डिमा मण्डलीडाम मु़चु़मिम, थु़र्मामिम नुङ एल्डरमिमका मेर्मिमलाई सेव साट्मिडी। मेकोतिमा पावल, बारनाबासनुङ रोक्पामिमका माम्चु़नीका मेर्मिमनुङ बेम्डिम खोत्ले खारीमिमकु दुथाम सो़म्डी।
5फरिसीमिमगोडाम चङडा थो़रलु़पा दु़म्पामिम कोङनिमका बम्डिमा र्वाम्डी, “वाङसामामिमकाम खिरिरि-क्रिप्सी दु़म्मु बासी, मा मेर्मिमलाई मोशाकु डु़म्ला होम्साका दोबेन्मुमि बासी।”
6ओराम ल्वाकु दुथाम मुलु़ ख्रिमुलाई थु़र्मामिम नुङ एल्डरमिम खोम्सिम्डी। 7थामासम्म ल्वा जेम्डिमा पत्रुसका येम्स्तामा र्वाक्ता, “ए वा-ल्वाकनी, ङादोम थारीका वाङसामामिमलाई जो़पा-सेला थो़बेन्मु गानीगोलामका माम्चु़नीका गोलाई थुट्ङिडिमी, मा मेर्मिमका जो़पा-सेला थो़म्डिमा येशूडा थो़र लु़म्डिम ल्वा गानी चनिमिम ङा बु।#थु़र्मा १०:१-४३ 8न-गोडाम ल्वा चक्पा माम्चु़नीका मेर्मिमलाई वो गुइलाई होम्साका ङा उनी पेलका लु़ट्मिडी, मा गुमीका मेर्मिमलाई रम्डिम ल्वा रेम्बेम्डी।#थु़र्मा २:४; १०:४४ 9गुमीका वाङसामामिम नुङ गुइलाई मेफ्वाक्सामिवा, लावो मेर्मिमका थो़र लु़म्डिमका गुमीका खोत्लेकु न-गो सेपा दु़म्बेट्मिडी। 10मेम्मिमका सीसिपामिमकु बालामडला ओराम जुवा जु़ल्साका हेङा गानी माम्चु़नीकु न छाम्निमिम? ओराम ने ना इकी ङाउ-खुउमिमका ङा कुर्मु चाप्मिडी, ना गुइ ङा चाप्सी। 11लावो मेर्मिम नुङ गुइ ङाचो़ येशूकु दिदामका सेल्सिड्डिम बु र्वाक्साका गुइ थो़र लु़इडिम बु।”
12वाङसामामिमगोडा माम्चु़नीका पावल नुङ बारनाबासलामका हेल्लो वो मेल्वामिवाम खारीमिम नुङ छेखोपमिम रेम्बेम्डिम ल्वा मेर्चिपका सो़च्ची। घ्रो़म्दीडा रोम्डिम खोत्ले मु़चु़मिम लिबा बाम्डिमा मेर्मिमका ओराम ल्वा जो़होमका थो़म्डी।
13मेर्चिप जेमु डु़म्चिमा याकूबका आरे र्वाक्ता, “वा-ल्वाकनी, आमा ल्वा थो़नी, 14हेसाका माम्चु़नीका ङादो वाङसामामिमडला उनी न-थो़म रेम्बेसाका मेर्मिमगोलाम उनीमा लागि मु़चु़मिम छेट्मिडिम ल्वा सिमोन पत्रुसका गुइनुङ र्वाक्ताम बु। 15ओराम ल्वानुङ माम्चु़नीलाम-जेपामिमकु सिजेम वो घ्रो़म, मेराम आरेसाका र्याक्मा बु:
16‘ओर्मिम ल्वा दु़म्मिम चङडा गो ख्लोङ्सिङु,
मा फाल्ल्यासिट्पा दाऊदकु बाखोप#१५:१६ ओराम र्वाक्मा दाऊद उ त्वाकु नेम ने मेएँ, इस्राएलकु किब्दीकु दुथाम र्वाक्मा सो़। (आमो ९:११,१२) आथावो गो बनेबेउ,
मेरामकु झार्पा नेम आथावो गो बनेबेउ, मा फक्पु,
17मेकोतिमा डिन्जो़ल्मिडिम मु़चु़मिम नुङ आमा नङ रपा वाङसामामिम खोत्लेका
मिप्रङमालाई माल्मु चाम्मिनु़’
र्वाक्साका ओर्मिम खोत्ले बेपा माम्चु़नीका र्वामी,
18उहेमका माके-माके आथाम ओर्मिम ल्वा सो़म्डिम बाइडा।#आमो ९:११-१२
19“मेम्मिमका गो र्वाङु, माम्चु़नीथो़ ख्लोसिक्पा वाङसामामिमलाई गुइ दु़खा मेग्वाकिमी। 20लावो मेर्मिमलाई ओराम ल्वा र्याकिमा थु़र्सी– ङाटाकु नङ बेम्मामिम हाम वो मेपेनी, नाम्सु़रु़ मेबेनी, लक्चा रिम्साका सेट्मा नेब्दीपोमिमकु सो़ नुङ सिसि मेपेनी।#प्रस ३४:१५-१७; लेवी १७:१०-१६; १८:६-२३ 21हेङालोने मेराम र्याक्मा मोशाकु डु़म्ला ङाउ-खुउमिम बाम्डिलोम आथामङा शहर-शहरडा सीत्तोङा गेट्मिडिमका, मा खोत्ले घ्रो़म्दी नेमडा खोत्ले ङेम्सिमु-ङेम्सिमुनेम मेराम डात्तोङा लेडिमिम बु।”
वाङसामा थो़रलु़पामिमलाई सेलाखाजेम
22मेकोतिमा थु़र्मामिम, एल्डरमिम नुङ खोत्ले थो़रलु़पामिमका उनी त्वाकु मु़चु़मिमगोडाम कोले-नले थुमुमी, मा मेर्मिमलाई पावल, बारनाबासनुङ एन्टिओखिया शहरथो़ थु़र्मु मुलु़ बेम्डी। मेर्मिमका थो़रलु़पामिमगोडाम उनी ङाउचिप बारसाबास र्वाक्मा यहूदा नुङ सिलासलाई थुट्मिडिची। 23मेकोतिमा मेर्मिमका मे ब्ललेमिमकु ल्वाडा ओराम सेलाखाजेम थु़र्सोम्डी:
“एन्टिओखिया, सिरिया नुङ किलिकियाडा बाट्पा वाङसामा थो़रलु़पामिमलाई थु़र्मामिम नुङ एल्डरमिमकाम सेव! 24गुकुगोडाम लक्पा कोङ-कोङ मु़चु़मिमका वाङमी-वाङमी ङा ल्वा सीसाका गानीलाई छो़म दु़खा ग्वानिमिमा हाम बोमु-बोमु दु़म्बेट्निमी ए र्वाक्पा ल्वा गुकु थो़त्तोकोम बु। लावो मेर्मिम मु़चु़लाई गुकु थु़र्तोकोमिम मेएँ। 25मेम्मिमका गुकु खोत्ले घ्रो़म्तोकोमा बेत्तोकोम मुलु़ होम्साका कोङ-कोङ मु़चु़मिमलाई थुमुमी, मा मेर्मिमलाई गुकु द्वाक्तोकोम बारनाबास, पावलनुङ थु़र्मु न बेत्तोकोम बु। 26पावल नुङ बारनाबासका उनीमा लाले-पाङके बोमु उचीमा मिरो़म ङा इकीमा ङाचो़ येशू ख्रीष्टकु ल्वाडा ग्वाक्चिम बु। 27मेम्मिमका गुकु यहूदा नुङ सिलासलाई इनीमाडा थु़र्तोकोम बु। मेर्चिपका वो गुकु र्याक्तोकोम ल्वा ङा सो़ची सो़। 28ओराम ल्वाडाम वाङमिम हाम वो मेझापा-खारी गानीलाई बेबेसी मेनु़ र्वाक्पा ल्वा माम्चु़नी-पेल नुङ गुकु जो़पा लु़त्तोकोम बु। 29ङाटालाई सासेट्मा पोमु-डुमु, लक्चा रिम्साका सेट्मा नेब्दीपोमिमकु सो़ नुङ सिसि गानी मेपेनी, मा नाम्सु़रु़ मेबेनी। ओर्मिम खोत्ले ल्वामिमडाम वाङ बान्नी माला छो़म ङा जो़पा दु़म, लौ आकोति ङा।”
30यरूशलेमलामका ब्र्वाम्सिम्डिम मे ब्लले मु़चु़मिम एन्टिओखिया शहरयु़ योम्डी। मेकोतिमा मेर्मिमका मण्डलीडाम खोत्ले थो़रलु़पामिम कोदेप येट्मिडिमी, मा मेर्मिमलाई मे सेलाखाजेम ग्वाम्डी। 31सो हन्बेट्पा ओराम सेलाखाजेम डाट्मिडिमा खोत्ले थो़रलु़पामिम छो़म गेर्सिम्डी। 32यहूदा नुङ सिलास उची त्वापङा वो माम्चु़नीलाम-जेपा बाच्चिमका थो़रलु़पामिमलाई हापा सिजेमलामका सीट्चिमिमा उनी सो हन्बेसाक्चिमी। 33सिलास नुङ यहूदा मेसिन्डा हापा बाच्ची। मेकोतिमा मेसिन्डाम थो़रलु़पामिमका न-गो भ्रसिक्पा जि ग्वाक्तो मेर्चिपलाई थु़र्पामिमकाडा थु़र्सोम्डी। 34[लावो सिलासका ने मेसिङा बुमु न बु़डु़।]#१५:३४ माकेम ग्रीक बाइबलमिमगोडा याङ-याङडा ओराम पद मेडार्सी। 35पावल नुङ बारनाबास वाङमी हापा मु़चु़मिमनुङ येशूकु दुथाममिम जो़पा-सेला सीत्तो नुङ सो़त्तो एन्टिओखिया शहरडा बाच्ची।
पावल नुङ बारनाबास फ्वासिक्चिम
36कोलेम पावलका बारनाबासनुङ र्वाक्ता, “गुची माम्चु़नीकु जो़पा-सेला थो़बेट्चिमिम खोत्ले शहरडाम थो़रलु़पामिमकामबाडे ख्लोसिन्चिमा लची। मेकोतिमा मेर्मिमका हाम बोम्थाल्मी र्वाक्पा ल्वा गुची थो़ची।” 37बारनाबासका मर्कूस र्वाक्मा यूहन्नालाई उची त्वापनुङ लमु न बु़डु़। 38लावो पावलका मर्कूस र्वाक्मा यूहन्नालाई उची त्वापनुङ लमु न मेबु़वा। हेङालोने गु पामफिलियालामका पावल नुङ बारनाबासडाम फ्वास्तामा लस्ताम बाइडा, मा मेर्चिपनुङ कोयो खारी बेप्डा मेलक्सावाम बाइडा।#थु़र्मा १३:१३ 39पावल नुङ बारनाबास छो़म डोक्पु गो फ दु़म्ची, मा मेर्चिप फ्वासिक्ची। मेकोतिमा मर्कूस र्वाक्मा यूहन्ना नुङ बारनाबास कुबी-बोक्सालामका साइप्रस टापुथो़ लक्ची। 40लावो पावलका ने उ त्वाप ख्लो़पा सिलासलाई छेड्डु़। मेकोतिमा मेसिन्डाम थो़रलु़पामिमका माम्चु़नीकु ल्वाड्डा ग्वाम्डिम चङ्डा मेर्चिप लक्ची। 41मण्डलीडाम मु़चु़मिमलाई उनी सो हन्बेसाक्तो पावल सिरिया नुङ किलिकियाबाडे लस्ता।
Currently Selected:
थु़र्मा 15: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
