थु़र्मा 19
19
पावल एफिससडा
1अपोल्लोस कोरिन्थ शहरडा बाइडालो पावल हालाङ्मी इलाकामिमलामका एफिसस शहरडा रोक्फाड्डा। मेसिन्डा गुका थो़रलु़पामिमलाई डार्रु़मी। 2गुका मेर्मिमनुङ हिलाबु़डु़, “गानी थो़र लु़न्निमा माम्चु़नी-पेल इनीमाडा योम्डी?” मेर्मिमका र्वाम्डी, “माम्चु़नी-पेल बुमी र्वाक्पा ने गुकु थो़त्तोकोम वो मिबु।”
3मेकोतिमा पावलका मेर्मिमनुङ र्वाक्ता, “मा हेप्माम रु़दु़म रन्नी?” मेर्मिमका र्वाम्डी, “यूहन्नाकु कु-रु़दु़म रत्तोको।”
4पावलका र्वाक्ता, “यूहन्नाका ग्वाक्तु़मिम कु-रु़दु़म ने छु़लमिम न-गोलाम मिम्सिक्साका माम्चु़नीडा ख्लोक्पा रु़दु़म बाइडा। यूहन्नाका मु़चु़मिमलाई उ त्वापडाम चङडा रोक्पाडा थो़र लु़नी बु़डु़मिम येशूडा सो़।”#मत्ती ३:११; लूक ३:४,१६; यूह १:२६-२७ 5ओराम ल्वा थो़म्डिमा मेर्मिमका ङाचो़ येशूकु नङडा कु-रु़दु़म रम्डी। 6पावलका मेर्मिमडला उ ल्वा जु़ल्लु़लो माम्चु़नी-पेल योम्डिमा मेर्मिम वाङसामा ल्वाडा जेम्डी, मा माम्चु़नीलाम वो जेम्डी। 7मेर्मिम खोत्ले को-न (१२) कोति बाम्डी।
8पावल यहूदीमिमकु घ्रो़म्दीनेमगोडा लस्तामा सु मुनामसम्म मेङिसाका मु़चु़मिमलाई सीड्डु़मी। गुका माम्चु़नीकु किब्दीकु दुथाम जो़होमका सीत्तो मेर्मिमलाई थेसिथेन्बेड्डु़मी। 9लावो कोङ-कोङका लुङ होप्माम उनी न-गो बेम्डिमा थो़र मेलु़साका माम्चु़नीकाम सिजेमकु कोर्थो़लाम खोत्लेकु ङादोडा मेजो़पा जेमु चो़म्मिडी। मेम्मिमका पावल सीसिपामिमनुङ मेलामका लुक्ल्याड्डा, मा टुरान्नसकु सीखोप नेमगोडा लक्साका हेल्लो लोवो सीथाल्लु़मी। 10नक थसम्म आरेसाकाङा दोस्ताम बाइडामका एशियाडा बाट्पामिम खोत्ले यहूदीमिम नुङ ग्रीकमिमका येशूकु दुथाममिम सिजेम थो़म्डी।
11पावललामका माम्चु़नीका छो़म डोक्पु यु़मखारी बेम्डी, 12कोङ-कोङका ने पावलका लु़प्डु़म रुमाल नुङ थ्वाक्पुरी ङा वो लम्डिमा नो़पामिमडला जु़ल्मिडिलो मेर्मिम सम्थाल्मिडी, मा मुनाङपेलमिम वो मेर्मिमलाम लुम्डिमा लम्डी।
13मुनाङ पेल कोल्पा कोङ-कोङ यहूदीमिम वो होनो आथो़ खिर्सिक्तो ङाचो़ येशूकु नङ रसाका मु़चु़मिमलाम मुनाङपेलमिम कोल्मु माल्मिडी। मेर्मिमका मुनाङ पेललाई “पावलका जेस्ताम मेराम ङा येशूकु नङडा गो गानालाई र्वाङु, लुकामा लक्सा” बेम्डी। 14स्केवास र्वाक्मा कोङ यहूदी ङाउ डु़म्लाचो़कु येतले तारापाचो़मिमका वो आरे बेम्थाल्मिडी। 15कोलेम मुनाङपेलका मेर्मिमनुङ र्वाक्ता, “येशू छेपु, मा पावल वो छेपु, सु़ गानी?” 16मेकोतिमा मे मुनाङपेलका हुपा मु़चु़ मेर्मिमडला प्रोक्तो रोक्तामा मेर्मिम खोत्लेलाई घ्ल्वास्तु़मिमा लेब्बोक्तु़मी। मेर्मिम मेराम नेमलामका खालिन्ते नुङ पारनुङमा दु़म्मिडिमा स्वाम्डी।
17ओराम ल्वा एफिससडा बाट्पा यहूदीमिम नुङ ग्रीकमिमका थो़म्डी। मेकोतिमा मेर्मिम खोत्ले छो़म ङा ङिम्डी, मा ङाचो़ येशूकु नङ कोम्डी। 18थो़रलु़पामिम छो़म सेर्पा मेसिन्डा रोम्डी, मा मेर्मिमका बेम्डिम मेजो़पा खारीमिम खोत्ले उनी न-गोलामका मिम्सिम्डी, मा खोत्लेकु ङादोडा सो़म्डी। 19मेर्मिमगोडाम बैदाङ डाट्पामिमका उनी खाजेममिम खोप्मिडिमा रेट्मिडी, मा खोत्लेकु ङादोडा चाम्डी। मेर्मिमका मेर्मिम खाजेमकु थि ङार्मिडिलो ङो सङसङ (५०,०००) मतोकु खउलुङकाम बाइडा। 20आरेसाका माम्चु़नीकु सीसि यु़मनुङमा दु़म्साका फोन्सिक्तो नुङ बर्तो लस्ता।
21ओर्मिम ल्वा दु़स्ताम चङडा पावलका माकेडोनिया नुङ अखैया दु़म्तो यरूशलेम लक्पा मुलु़ बु़डु़। गुका र्वाक्ता, “यरूशलेम लङुमा गो रोम शहरडा वो लमु बासी।” 22मेकोतिमा गुलाई ख्लो़पाचिप तिमोथी नुङ इरास्तसलाई पावलका माकेडोनियाथो़ थु़र्डु़ची। लावो गु ने कोलेम-नलेम एशियाडा ङा बाइल्याड्डा।
एफिससडा ङाटा बनेपामिम पावलकु कोर्थो़लाम ङाल्मिडिम
23मेराम थारीबिलि ङा एफिसस शहरडा ख्रीष्टकु लाम्दीकु दुथाम छो़म येम्डी-दुम्डी। 24हेङालोने मतोकु खारी बेपा डेमेत्रियस नङकाम कोले मु़चु़ बाइडा। मेरामका आर्तेमिस नो़पमाकु#१९:२४ एफिससडा पुजेबोमिमिम ग्रीक नो़पमा (देवी)। याक्के-याक्केतो मतोकु सो़रनेम होप्माम बनेबु़थाल्लु़, मा मत्तोकु खारी बेपामिमलाई छो़म खउलुङ डु़प्साड्डु़मिम बाइडा। 25गुका मतोकु खारी बेबेड्डु़मिम मेर्मिम नुङ मेप्माम ङा खारी बेपा वाङमिम मु़चु़मिमलाई खोप्डु़मिमा आरे बु़डु़मी, “ङोप्सो़नी, ओराम खारीलाम गुइ छो़म खउलुङ डु़प्तोङा बिइमिम ल्वा ने गानी चनिमिम बु। 26लावो पावलका हाम बेत्तोङा लेडु़, मेराम गानी खोत्लेका ल्वात्तो नुङ थो़त्तो बोनी। पावलका मु़चु़कु ल्वाका बनेबोमिमिम ने माम्चु़नी मेएँ र्वाक्तो ङा बु़मिम बु। गुका ओ एफिसस नुङ एशियाडा बाट्पा हापा सेर्पा मु़चु़मिमलाई लेम्डु़मिमा फाल्मु खाप्डु़मिम बु। 27मु़चु़मिमका इकीमा ब्यापार जो़पा मिम्मिडिम बु। मेराम मेद्वामी र्वाक्पा ङिम कोङङा मेएँ, डोक्पु नो़पमा आर्तेमिसकु सो़रनेम वो हाम ना हामकाम दु़म। मेम्मा एशिया नुङ खोत्ले सु़म्दिसेरडाम मु़चु़मिमका डोक्पु मिम्मु डिन्मी।”
28ओराम थो़म्डिमा मेर्मिम उनी छोक्चोका प्लोडु़मी, मा “एफिसीमिमकु आर्तेमिस डोक्पु बुमी!” र्वाक्तो येम्डी। 29खोत्ले शहरडा मु़चु़मिम येम्डी-दुम्डी, मा मेर्मिम खोत्ले खोम्सिम्डिमा पावलनुङ लाम्दिपा माकेडोनियाडा बाट्पा गायस नुङ अरिस्तार्खसलाई चु़म्मिडी, मा रङ्गशाला#१९:२९ मु़चु़मिम घ्रो़मखोप, नाटक रेम्बेखोप, चाम्सिखोप डोक्पु खोम। गोनो थु़त्तो लम्डी। 30पावल वो सेर्पा मु़चु़मिमकु ङादोडा लमुमा मु़चु़मिमनुङ जेमु न बु़डु़, लावो सीसिपामिमका गुलाई मेथु़र्मिवा। 31एशियाडाम कोङनिम साखामचो़मिम वो पावलकु ङोप्सो़ बाम्डी, मा मेर्मिमका पावल मेसिन्डा मेलमिनु़ र्वाक्साका सेला थु़र्सोम्डी।
32मेसिन्डा घ्रो़म्पा खोत्ले मु़चु़मिम छो़म येम्डी-दुम्डी, कोङनिम मु़चु़मिम कोले ल्वा सो़साका मा वाङमी मु़चु़मिम ने वाङमी ङा ल्वा सो़साका येम्डी। लावो मेसिन्डा रोक्पामिमगोडा हापाका ने हेङा खोम्सिम्डिम र्वाक्पा वो चम्डिम मेबायावा। 33मे यहूदीमिमका अलेक्जेन्डर र्वाक्मालाई खोत्ले मु़चु़मिमकु ङादोनो येम्सिबेट्मिडी। मेकोतिमा मेर्मिमगोडाम कोङ-कोङका हाम-हुम सो़नी र्वाक्साका गुनुङ र्वाम्डी। अलेक्जेन्डरका उ ल्वा थो़त्तो मे मु़चु़मिमनुङ हाम-हुम सो़मु माल्लु़। 34लावो मेर्मिमका गु ने यहूदी र्वाक्पा चम्डी, मा खोत्ले कोङ सि दु़म्साका नक घण्टासम्म, “एफिसीमिमकु आर्तेमिस डोक्पु बुमी!” र्वाक्तो डोक्पु लो़लामका येम्डी।
35चङडा शहरडाम सचिवका मे सेर्पा मु़चु़मिमलाई लिबा बाबेड्डु़मी, मा बु़डु़मी, “एफिससडाम मु़चु़नी, एफिसीमिमकु शहर ने घ्ल्वापा आर्तेमिसकु सो़रनेम नुङ धामुलाम आल्पा उ ङाटा जो़होमका बोपा-थार्पा र्वाक्पा ल्वा सु़का मेचवाम बु मा? 36ओराम ल्वा सु़का वो मेएँ र्वामु मेचाम्मी र्वाक्पा ल्वा ने गानी चनिमिम ङा बु, मेम्मिमका गानी मेङाल्नी, इम्निमा बानी। 37हेङालोने गानी रेट्निम ओर्चिप मु़चु़का सो़रनेम वो पिच्चिम मिबु, मा इकी नो़पमा आर्तेमिसकु कोर्थो़लाममिम ल्वा हाम वो जेच्चिम मिबु। 38डेमेत्रियस नुङ गुनुङ खारी बेपामिमकाडा कोङनिमकु कोर्थो़लाममिम रिबुसी-ल्वा बु माला, अदालतडा नुङ निया बेपामिमकाडा लमिनु़मा उनी त्वाप-त्वापडा मेसिन्डा खाल्बोमु चाम्मी। 39लावो ओरामडाम आथावो जेमु न बोनी माला, डु़म्लानुङ घ्रो़म्पा निया बेखोप शहरडाम घ्रो़म्दीडा ओराम ल्वाकु मुलु़ दु़म। 40आनेपमिम ओराम रिबुसी-ल्वाकु देन्दे इकीमा बुइडला रो र्वाक्पा ङिम लु़डाम बु। हेङालोने ओराम हाम ना हामकु रिबुसी-ल्वाकु दुथाम गुइ हाम वो र्वामु मेचाप्सी।” 41आकोति र्वाक्तामा मेलामका मेर्मिम खोत्लेलाई थु़र्सोक्तु़मी।
Currently Selected:
थु़र्मा 19: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
