थु़र्मा 21
21
पावल यरूशलेम लाम्दीडाम
1मे एफिससडाम एल्डरमिमनुङ ब्र्वासिक्तोकोमा गुकु डोक्पु कुबी-बोक्साडला हुसाका आनो-मेनो मेलुक्साका कोस टापुडा रोक्तोको। उ दिकाम नेम रोडस टापुडा लुक्तोको, मा मेलामका पटारा शहरडा रोक्फात्तोको। 2मेकोतिमा फोनिकेथो़ लक्पा कोले डोक्पु कुबी-बोक्सा डार्तोको, मा गुकु मेरामडा ङा हुसाका लक्तोको।
3साइप्रस टापु फार्डा रोक्फात्तोकोमा मेरामकु रायलालाम दु़म्साका सिरियालामका टुरोस शहरडा लुक्तोको। हेङालोने डोक्पु कुबी-बोक्साडाम मोमसोजाम मेसिन्डा पार्जो़ल्मु बासिक्पा बाइडा। 4मेसिन्डा सीसिपामिमलाई माल्साका डार्तोकोमी, मा मेर्मिमनुङ गुकु येतलेम बात्तोको। मेर्मिमका माम्चु़नी-पेललामका पावललाई यरूशलेमडा मेलक्नी बेम्डी।
5मेलामका आकी लाम्दिमु थारीका मेर्मिम उनी नाइमे नुङ चो़मिम खोत्लेका गुकुलाई शहरकु पाखानो दिरिदिन फार्डा सोक्थिक्तिकिमी। मेम्मा गुकु मेसिन्डा क्रचु़खुम बेसाका सो़म्दी बेत्तोको, मा मेर्मिमनुङ ब्र्वासिक्तोको। 6मेकोतिमा गुकु डोक्पु कुबी-बोक्साडा हुत्तोको, मेर्मिम ने उनी नेम ख्लोम्सिम्डी।
7टुरोसलामका डोक्पु कुबी-बोक्साडा गुकु टोलेमाइस शहरडा रोक्फात्तोको। मेसिन्डा थो़रलु़पामिमलाई क्रो़म्तोकोमा मेर्मिमनुङ कोलेम बात्तोको। 8उ दिकाम नेम मेलामका ब्र्वासिक्तोकोमा कैसरिया शहरडा रोक्तोको, मा जो़पा-सेला थो़बेट्पा फिलिपकु नेमडा लक्तोको। गु यरूशलेमडा माम्चु़नीकु सो़रलोले बेपा थुट्मीडिम येतलेमिमगोडाम कोले बाइडा, मा गुकु मेराम नुङङा बात्तोको।#थु़र्मा ६:५; ८:५ 9मेरामकाम लालीकुन्दा मेबेथिङा बाट्पा ब्लले जाउमोचो़मिम बाम्डी, मेर्मिमका माम्चु़नीलाम जेम्थाल्मिडी।
10मेसिन्डा गुकु कोलेम-नलेम बात्तोकोलो यहूदियाडाम अगाबस नङकाम माम्चु़नीलाम-जेपा कोङ मु़चु़ मेगोडा योक्ता।#थु़र्मा ११:२८ 11अगाबस आकीमाडा रोक्तामा पावलकु थ्वाक्पुरी रसाका अगाबसका उ त्वाकु ल्वा-खेल बड्डु़मा र्वाक्ता, “माम्चु़नी-पेलका आरे र्वामी ‘ओराम थ्वाक्पुरीकु मु़चु़लाई यरूशलेमडा यहूदीमिमका आरेसाकाङा बन्मिमा वाङसामामिमकु ल्वाड्डा ग्वामी’।”
12ओराम ल्वा थो़त्तोकोमा मेसिन्डाम मु़चु़मिम नुङ गुकु खोत्ले बासित्तोकोमा पावललाई यरूशलेम मेलक्नी र्वाक्तोकोम-र्वाक्तोकोम ङा बेत्तोको। 13लावो पावलका र्वाक्ता, “गानी हेङा आरेसाका ख्राम्नीमा आमा न चनिमिम? गो ङाचो़ येशूकाम लागि यरूशलेमडा बन्ला सो़म्सिमु कोङङा मेएँ, सिमु ङा वो हाम होङ्ङा मेलु़ङु।” 14पावललाई गुकु लेम्मु मेचाप्कुवा मा, “माम्चु़नीकु न होङङा दु़म्नु़” र्वाक्तोकोमा वाय-वाय बात्तोको।
15आकोतिमा कोलेम-नलेम चङडा गुकु यरूशलेम लमु झो़म्सिक्तोकोमा लाम्दित्तोको।
16कैसरियाडाम कोले-नले थो़रलु़पामिम वो गुकुनुङङा लम्डी। मेकोतिमा मेर्मिमका गुकुलाई साइप्रस टापुडाम कोले माकेवाम थो़रलु़पा मनासोन र्वाक्मा मु़चु़कु नेमडा ख्लुक्तिकिमी, मा मेसिन्डा गुकु बात्तोको।
पावल यरूशलेम रोक्थिड्डाम
17गुकु यरूशलेमडा रोक्थित्तोकोमा खोत्ले थो़रलु़पामिमका गुकुलाई छो़म गेर्सिक्तो क्रो़म्तिकिमी। 18उ दिकाम नेम पावलनुङ गुकु याकूबकाडा लक्तोको। मेसिन्डा खोत्ले एल्डरमिम खोम्सिम्डिम बाइडा। 19मेर्मिमनुङ घ्रो़म्मिडिमा पावलका वाङसामामिमलाई जो़पा-सेला थो़बेड्डु़मिलो माम्चु़नीका हे-हेप्माम खारीमिम बेम्डी, मेर्मिम खोत्ले पेन्तिका सीड्डु़मी।
20ओराम थो़म्डिमा मेर्मिमका माम्चु़नीकु नङ कोम्डी। मेकोतिमा मेर्मिमका पावलनुङ र्वाम्डी, “रेप्नी छारी, यहूदीमिमगोडा थो़रलु़पामिम छो़म सेर्पा बुमी, मा मोशाकु डु़म्ला होम्साका खारी बोमु मेर्मिम चङको-चङको बुमी। 21मेर्मिमका इनीमा दुथाम कोङनिम ल्वा थो़म्डिम बु, मेराम ल्वा ‘वाङसामामिमकु थेतेडा बाट्पा यहूदीमिमलाई गानी मोशाकु डु़म्ला ङेट्नी, इनीमा चो़च्चो़मिमकाम खिरिरि मेक्रिम्साट्नी,#२१:२१ माम्चु़नीकु मु़चु़ र्वाक्साका रेम्बेपा छेखोप। मा बेप-पापका बेम्खेम्डिम डु़म्ला होम्साका मेबेनी’ र्वाक्साका सीट्निम बु ए। 22हाम बोमुमा, गानी रोनिम बु र्वाक्पा मेर्मिमका थो़म्ल्याट्मी। 23#गन्ती ६:१३-२१मेम्मिमका गुकु र्वाकुमिम थो़नी, माम्चु़नीनुङ ङादो र्वाम्डिम होम्साका सेम खुर्पा ब्लले मु़चु़मिम आसिन्डा बुमी।
24“लक्निमा गानी वो ओर्मिमनुङ कोयोङा सेपा दु़म्पा रु़दु़म बेनी, मा ओर्मिमलाई चाहेदु़म्पा खउलुङ ने गानी ङा सोन्साट्नी, मा ओर्मिमका उनी सेम खुर्मिनु़। आरेसाका गानी मोशाकु डु़म्ला होम्साका बोनिमिम ल्वामी, मा इनीमा दुथाम थो़म्डिम ल्वा आच्छाङा मेएँ रेछा र्वाक्पा खोत्लेका चमी।#२१:२४ यहूदीमिमका माम्चु़नीकु ङादोडा पेम्डिम कसम हुक्ता र्वाक्पा रेम्बोमु। 25लावो थो़रलु़पा वाङसामामिमलाई गुकु आरेप्माम सेलाखाजेम र्याक्तोकोमा थु़र्तोकोम बु गानी ङाटालाई सासेट्मा पोमु-डुमु, लक्चा रिम्साका सेट्मा सो़ नुङ सिसि मेपेनी, मा नाम्सु़रु़ मेबेनी।”#थु़र्मा १५:२९
26पावलका मे ब्लले मु़चु़मिम लडु़मी, मा उ दिकाम मेर्मिमनुङ गु वो सेपा दु़म्पा खारी बु़डु़। मेकोतिमा सेपा दु़म्मुकु दुथाममिम उपास हाम्सी हु, मा मे खोत्ले सेपा दु़म्मिमिमकु दुथाम हाम्सी सासेन्मु बासी र्वाप्डा पावल सो़रनेमगोनो हुङ्डा।
सो़रनेमगोडा पावललाई चु़म्मिडिम
27सेपा दु़म्मुकु दुथाममिम उपास येतलेम लिसाका हुमु खाप्स्तु़लो एशियालामका रोक्पा यहूदीमिमका सो़रनेमगोनो पावललाई ल्वाम्डी, मा सेर्पा मु़चु़मिमलाई कोम्डिमा गुलाई चु़म्मिडी।
28मेकोतिमा मेर्मिम आरे र्वाक्तो येम्डी, “इस्राएलडाम वा-ल्वाकनी, ख्लो़किनी! मु़चु़मिमलाई बान्तेमेनो इकीमा सामा, इकीमा डु़म्ला मा इकीमा सो़रनेमकु कोर्थो़लाम सीप्बाल्पा मु़चु़ ओराम ङा सो़। मेकोति कोङङा मेएँ, ओरामका ग्रीक वाङसामामिमलाई वो सो़रनेमगोडा रेड्डु़मी, मा माम्चु़नीकु सो़रनेमलाई मेसेपा दु़म्बेड्डु़म बु।” 29हेङालोने एफिससलामका रोक्पा वाङसामा त्रोफिमसलाई मेर्मिमका पावलनुङ कोयोङा शहरडा बाच्चिम ल्वाम्डिम बाइडा, मा पावलका मेरामलाई सो़रनेमगोनो रेड्डु़ र्वाक्पा मिम्मिडिम बाइडा।#थु़र्मा २०:४
30आरेसाका येम्डिम-दुम्डिम ल्वा शहरडा खोत्लेथो़ थो़म्डी, मा मु़चु़मिम खोत्लेलामका मेसिन्डा ओन्तो रोम्डी। मेर्मिमका पावललाई सो़रनेमगोलामका रो़-रो़न्थु़त्तो पाखानो ख्लुम्डी, मा सो़रनेमकु लाम्चोको चम्ल्याम्डी। 31मेर्मिमका पावललाई सेन्मु खाप्मिडिम बाइडा। मेकोतिलो यरूशलेम शहरडा मु़चु़मिम येम्डिम-दुम्डिम ल्वा रोमी पल्टनडाम कमाण्डरका थो़स्तु़। 32गुका सिपाहीमिम नुङ कप्तानमिम रेड्डु़मिमा ओन्तो मेसिन्डा रोक्ता। मेर्मिमका कमाण्डर नुङ सिपाहीमिम ल्वाम्डिमा पावललाई याल्मु डिट्मिडी।
33उ फार्डा रोक्तामा मे कमाण्डरका पावललाई चु़म्डु़, मा नले सेल रिवाका बन्बेड्डु़मी। मेकोतिमा मे सेर्पा मु़चु़मिमलाई गुका, “सु़ ओराम, मा ओरामका हाम बु़डु़?” र्वाक्तामा हिलाबु़डु़मी। 34लावो मे सेर्पा मु़चु़मिमगोडाम याङका कोले ल्वा, याङका वाङमी ङा ल्वा र्वाम्डिमा येम्डी। मेम्मा मेर्मिम येम्डिमका गुका हाम वो ल्वा थेसिथेन्मु मेचाप्सु़वा। मेकोतिमा पावललाई सेनामिमकु ब्यारेकडा लनी बु़डु़मी। 35सिपाहीमिमका पावल लम्डिमा लम्डिलो सेर्पा मु़चु़मिमका चङचङ खात्तो लम्डी। देम्कुलीलाम गेले गेमु खाप्मिडिलो सेर्पा मु़चु़मिमका पावललाई सेन्मु माल्मिडिमका सिपाहीमिमका पावललाई कोम्डिमा लम्डी। 36हेङालोने सेर्पा मु़चु़मिमका “मेरामलाई सेट्नी!” र्वाक्तो येत्तो उ चङचङ खाट्मिडिम बाइडा।
37सेनामिमकु ब्यारेकडा रेन्थिमु खाप्मिडिलो पावलका मे कमाण्डरनुङ र्वाक्ता, “ङाचो़, गो कोले-नले ल्वा गानीनुङ जेमु चापु?” गुका र्वाक्ता, “हाम गाना ग्रीक ल्वा जेमु थेना? 38बास्ता-नेहोनेम ङा रिबुसी किन्मु चो़म्पा मा ब्ल धु़मसङ (४,०००) रिबुसी किट्पामिमलाई सो़ब्दीथो़ लक्पा मिश्री गाना ङा मे डे?” 39पावलका र्वाक्ता, “गो किलिकियाकु डोक्पु शहर टार्ससडाम नागरिक यहूदी सो़। गो गानीनुङ र्वाङु, ओर्मिम मु़चु़मिमनुङ कोले-नले ल्वा जेमु ग्वाङ्नी।” 40कमाण्डरका पावललाई जेमु ग्वाक्तु़मका, देम्कुलीडा येम्स्तामा उ ल्वा थो़त्तो मे सेर्पा मु़चु़मिमलाई लिबा बाबेड्डु़मी। मु़चु़मिम लिबा बाम्डिम चङडा गुका मेर्मिमनुङ हिब्रू ल्वालाम आरे र्वाक्ता,
Currently Selected:
थु़र्मा 21: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
