थु़र्मा 23
23
1पावलका मे डोक्पु घ्रो़म्दीथो़ किकिर्या रेप्डु़मा र्वाक्ता, “वा-ल्वाकनी, आनेपसम्म गो माम्चु़नीकु ङादोडा खोत्ले ल्वाडा जो़पा न-गोका ङा गो उनीमा खारी बेउतोम बु।”
2ओराम ल्वा थो़स्तु़मा डोक्पु ङाउ डु़म्लाचो़ हननियाका पावलकु फार्डा येम्सिक्पामिमलाई पावलकु सिड्डा याल्बेड्डु़मी। 3पावलका हननियानुङ र्वाक्ता, “ए जाख्ली क्वाका क्लक्मा ब्रो़लुङ!#२३:३ मु़चु़मिमकु ङादोडा जो़पा लिसिक्पा, लावो न-गोडा मेजो़पा ल्वा जु़ल्थाक्पा मु़चु़ रेम्बु़। गानालाई वो माम्चु़नीका यानामी। गाना डु़म्ला होम्साका आमा निया बेप्डा गन्ना, मा हेङा डु़म्लाकु कोर्थो़लाम गोलाई याल्बेन्ङिमिम?”#मत्ती २३:७-२८ 4पावलकु फार्डाङा येम्सिक्पामिमका पावलनुङ र्वाम्डी, “हाम गाना माम्चु़नीकु डोक्पु ङाउ डु़म्लाचो़लाई डक्साका जेनामिम?” 5मेकोतिमा पावलका र्वाक्ता, “वा-ल्वाकनी, गुमी डोक्पु ङाउ डु़म्लाचो़ र्वाक्पा गो चक्तोम मेबायावा। हेङालोने माम्चु़नीकु सिजेमडा आरेसाका र्वाक्मा बु, ‘त्वाकु मु़चु़मिमकाम साखामचो़कु कोर्थो़लाम जेसी मेनु़’।”#प्रस २२:२८ 6लावो मेराम डोक्पु घ्रो़म्दीडा याङ सदुकी नुङ याङ फरिसी बुमी र्वाक्पा पावलका चडु़मका डोक्पु लो़लामका आरे र्वाक्ता, “वा-ल्वाकनी, गो ने फरिसीकु चो़ फरिसी ङा सो़। सिपा मु़चु़ सिमुलाम बगे र्वाक्पा ल्वाडा थो़र लु़ङडोमका आसिन्डा हिलाहिसी बेप्डा गो रेट्ङिडिमिम बु।”#थु़र्मा २६:५; फिलि ३:५ 7पावलका आरे र्वाक्ताम थो़म्डिमा फरिसीमिम नुङ सदुकीमिम उनी त्वाप-त्वापडा ङा गो फ दु़म्मिडिमा फ्वासिम्डी।
8हेङालोने मु़चु़ सि, मा आथावो बगे र्वाक्पा ल्वाडा सदुकीमिमका थो़र मेलु़म्थाल्मिवा, मा पाह्रीचो़ नुङ पेल मेदु़म र्वाम्थाल्मिडी। लावो फरिसीमिमका ने ओर्मिम सुले ल्वाडा ङा थो़र लु़म्थाल्मिडी।#मत्ती २२:२३; मर्क १२:१८; लूक २०:२७
9मेसिन्डा छो़म येम्डी-दुम्डी, मा फरिसीमिमगोडाम डु़म्ला सीपा पातु़म्रीमिमका बम्डिमा आरे र्वाम्डी, “ओराम मु़चु़काडा गुकु मेजो़पा ल्वा हाम वो मेर्डाकुवा। पेल नुङ पाह्रीचो़लामका वो ओराम जेस्ताम दु़म्मु चाप्सु़।” 10मेसिन्डा सदुकीमिम नुङ फरिसीमिमगोडा छो़म डोक्पु रिबुसी गस्ता, मा मेर्मिमका पावललाई रोबोमिलो सेन्मी र्वाक्साका मे कमाण्डर छो़म ङिस्ता। मेकोतिमा मेरामका सिपाहीमिमलाई मेर्मिमकु थेतेलामका रो़न्थु़ट्निमा पावललाई ब्यारेकडा रेट्नी बु़सोड्डु़मी।
11मेरामकु दिकाम नेम्थाका ङाचो़ येशू पावलकु ङादोडा रेम्बेम्सिम्डिमा र्वाम्डी, “मेङिसा पावल, यरूशलेमडा हेसाका आमा दुथाम सो़न्ना, मेम्साका ङा रोम शहरडा वो गाना आमा दुथाम सो़मु बासी।”
यहूदीमिमका पावललाई सेन्मु मेजो़पा मुलु़ बेम्डिम
12उ दिकाम नेमसोङडाम चङडा यहूदीमिम कोङ सि दु़म्मिडिमा पावलकु साम मेफ्याक्थु़म हाम वो मेपेपा-मेडुपा कसम पेम्डी। 13आरेसाका सेन्मु मुलु़ बेपा मु़चु़मिम ब्ल धु़म (४०) डाम वो हापा बाम्डी। 14मेकोतिमा मेर्मिम डोक्पु ङाउ डु़म्लाचो़मिम नुङ ङाउमिमकाडा लम्डी मा र्वाम्डी, “गुकु पावलकु साम मेफ्याक्थु़म हाम वो मेपोकु र्वाक्साका कसम पेत्तोकोम बु। 15मेम्मिमका डोक्पु घ्रो़म्दी नुङ गानी दु़म्साका कमाण्डरकाडा लनी। मेम्मा मेराम रिबुसी ल्वाकु दुथाममिम मुलु़ आथावो जो़होमका बोमु बासी र्वाक्पा लिन्सिट्नीमा पावललाई घ्रो़म्दीडा रेट्नी। पावल घ्रो़म्दीगोडा रोक्तो ङा बु़लो गुकु सेन्कु।”
16पावलकु रु़चु़का ओराम ल्वा थो़स्तु़मा ब्यारेकगोनो लक्साका पावललाई थो़बेड्डु़।
17मेकोतिमा पावलका कप्तानमिमगोडाम कोलेलाई येड्डु़मा र्वाक्ता, “ओराम स्वालालाई इनीमा कमाण्डरकाडा सोन्थिट्नी, हेङालोने ओरामका गुमीनुङ कोसि-नक्सि जेमु बासिक्पा बु।” 18मेकोतिमा मेरामका पावलकु रु़चु़लाई लडु़मा उनीमा कमाण्डरकाडा लस्तामा र्वाक्ता, “चक्मा पावलका गोलाई येट्ङिडिमा ओराम स्वालालाई इनीमाडा सोथिबेट्ङिडी, ओरामका गानीनुङ हाम-हुम सो़मु बासिक्पा बु ए।”
19मे कमाण्डरका मेरामकु ल्वाड्डा झेड्डु़मा कोर्थो़ लक्साका हिलाबु़डु़, “गाना गोनुङ हाम सो़मु इमा न बु?”
20मेकोतिमा मेरामका र्वाक्ता, “यहूदीमिमका पावलकु दुथाम ल्वा आथावो जो़होमका हिलाहिसी बेपा लिसिसाका दिका पावललाई डोक्पु घ्रो़म्दीडा रेट्नी र्वाक्साका गानीनुङ र्वामु मुलु़ बेम्डिम बु। 21लावो गानी मेर्मिमकु ल्वा मेथो़नी वो! हेङालोने मेर्मिमगोडाम ब्ल धु़म (४०) डाम वो हापा सेर्पामिमका पावलकु साम मेफ्याक्थु़म हाम वो मेपेपा कसम पेम्डिम बु। मेम्मा गुलाई सेन्मु र्वाक्साका चो़पा बोम्थाट्मिमिम बु, मा ओम्लो मेर्मिमका गानी र्वानिमिम ल्वा लम्थाट्मिमिम बु।” 22मेकोतिमा मे कमाण्डरका मेराम स्वालालाई आरे बु़डु़मा थु़र्सोक्तु़, “गाना गोनुङ सो़न्नाम ओराम ल्वा सु़नुङ वो मेसो़या वो!”
पावललाई कैसरियाडाम किब्दी साखामचो़ फेलिक्सकाडा थु़र्मीडिम
23मेकोतिमा मे कमाण्डरका कप्तानमिमगोडाम नलेलाई येड्डु़ची मा आरे बु़डु़ची, “आनेप सिन्था गु (९) जेमिम थारीका न सङ (२००) सिपाहीमिम, येत धु़म (७०) घोडाडला हुपा सिपाहीमिम मा नक सङ जाते जेट्पा सिपाहीमिमलाई कैसरियाथो़ लमु रेट्जो़ल्ची। 24पावलकाम लागि वो घोडा रेची, मा गुलाई जो़होमका किब्दी साखामचो़ फेलिक्सकाडा रेथिक्ची।” 25गुका आरेप्माम सेलाखाजेम वो र्याक्तु़:
26“किब्दी साखामचो़ फेलिक्स, गो क्लौडियस लुसियसकाम सेव! 27पावल र्वाक्मा मु़चु़लाई यहूदीमिमका चु़म्मिडी, मा सेन्मु माल्मिडिम बाइडा। लावो ओराम रोमी नागरिक र्वाक्पा गो थो़उतोमा सिपाहीमिमनुङ मेसिन्डा लक्साका ओरामलाई मेर्मिमलाम फ्वाक्साका गो बोत्तो-थार्तो। 28यहूदीमिमका हेप्माम मेजो़पा मुमा ओरामलाई बेट्मिडिम रेछा र्वाक्पा जो़होमका थेसिथेन्मु नका गो ओरामलाई मेर्मिमकु डोक्पु घ्रो़म्दीकु ङादोडा लक्तो। 29मेर्मिमका ओरामलाई उनीमा डु़म्लाकु दुथाम मेजो़पा ल्वामिम उमा बुइडा उट्मिमिम रेछा। लावो सेन्मु, चमु बासिक्पा मेजो़पा ल्वा ओरामका बु़डु़म गो मेडारुवा। 30ओराम मु़चु़ सेन्मु मुलु़ बेत्तोङा बोमी र्वाक्पा गो थो़उतो, मा ओरामलाई दालाङा इनीमाडा थु़र्तोम बु, मा ओरामकु कोर्थो़लाम बक्पामिम वो इनीमा ङादोडा ङा जेमिनु़ बेउतोमिम बु।”
31मे कमाण्डरका र्वाक्ताम होम्साका ङा सिपाहीमिमका पावललाई सिन्थाङा एन्टिपाट्रिस शहरडा रेन्थिम्डी। 32उ दिकाम नेम घोडाडला लक्पा सिपाहीमिमलाई पावलनुङ थु़र्सोम्डी, मा लाम्दिसाका लक्पा कप्तान नुङ वाङमी सिपाहीमिम ने यरूशलेम ख्लोम्सिम्डी। 33कैसरिया रोम्थिम्डिमा मेर्मिमका किब्दी साखामचो़ फेलिक्सलाई सेलाखाजेम ग्वाम्डी, मा पावललाई वो उ ल्वाड्डा ग्वाम्डी। 34गुका सेलाखाजेम डाड्डु़मा पावल उहेम जिल्लाडाम र्वाक्साका हिलाबु़डु़। गु किलिकियाडाम र्वाक्पा थो़स्तु़मा गुका र्वाक्ता, 35“गानालाई मुमा बेट्पामिम रोमिमा इमा रिबुसी ल्वाकु दुथाम गो थो़उ।” मेकोतिमा हेरोदका बनेबु़डु़म ओगानेमगोडा पावललाई लनी बु़डु़मी।
Currently Selected:
थु़र्मा 23: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
