थु़र्मा 7
7
स्तिफनसकु सिजेम
1मेकोतिमा डोक्पु ङाउ डु़म्लाचो़का स्तिफनसनुङ हिलाबु़डु़, “हाम, मेर्मिमका इमा बुइडला उट्मिडिम ल्वा आच्छाङा?”
2स्तिफनसका र्वाक्ता, #उत १२:१“माम-पाप नुङ वा-ल्वाकनी, आनो थो़नी! इकी ङाउ-खुउ अब्राहाम हारानडा बुमु ङादो मेसोपोटामियाडा बाइडालो गुनुङ यु़म-झ्वाक्सीकु माम्चु़नी ल्वाला सो़म्सिम्डिम बाइडा। 3माम्चु़नीका अब्राहामनुङ र्वाम्डिम बाइडा, ‘गाना इमा नेब्दी नुङ इमा मु़चु़मिम डिट्जो़ला, मा उहेम बाय गो रेम्बेनी मेसिन्डा लक्सा।’
4“मेकोतिमा अब्राहाम कल्दीमिमकु नेब्दीलामका लुक्साका हारानडा रोक्तामा बाइडा। मेसिन्डा उ पाप सिडाम चङडा मेलामका माम्चु़नीका ओम्लो बात्तोङा बिइमिम बायडा रेट्मिडिम बाइडा।#उत ११:३१; १२:४ 5मेकोतिलो माम्चु़नीका अब्राहामलाई ओराम नेब्दीडा उ खेल देम्खोपसम्म वो बाय मेग्वाक्मिवा। लावो माम्चु़नीका ‘ओराम नेब्दी गाना नुङ इमा चो़-चु़सु़मिमलाई ग्वानिनी’ बेम्डिम बाइडा। माम्चु़नीका आरे र्वाम्डिलो अब्राहामकु चो़ मेदु़म्थेङा बाइडा।#उत १२:७; १३:१५; १५:१८; १७:८ 6माम्चु़नीका अब्राहामनुङ आरेसाका र्वाम्डी, #उत १५:१३-१४‘इमा चो़-चु़सु़मिम वाङमिमकु नेब्दीडा लमिमा बुमी। मेसिन्डाम मु़चु़मिमका मेर्मिमलाई डु़ल्चो़ जु़ल्मी, मा ब्ल सङ (४००) थसम्म छो़म दु़खा ग्वामी।’ 7माम्चु़नीका र्वाम्डी, ‘लावो उहेम सामाका मेर्मिमलाई डु़ल्चो़ जु़ल्मी, मेराम सामालाई गो देन्दे ग्वाक्पु। मेकोतिमा इमा चो़-चु़सु़मिम मेलामका लुमिमा आसिन्डा रोमी, मा मेर्मिमका आमा नङ कोमी।’#प्रस ३:१२ 8गुमीका अब्राहामनुङ खिरिरि-क्रिप्सीकु सो़रख्रेप्मिडिमा अब्राहामकु तारापाचो़ इसहाक दु़स्ता, मा लेतले नेम अब्राहामका इसहाककु खिरिरि क्रिप्साड्डु़।#७:८ माम्चु़नीकु मु़चु़ र्वाक्साका छेमु लागि क्रिप्मिडिम छेखोप: शब्दावलीडा रेप्नी इसहाककु तारापाचो़ याकूब दु़स्ता, मा याकूबकु उ चो़मिम को-न (१२) सामा दु़म्मिडी।#उत १७:१०-१४; २१:२-४; २५:२६; २९:३१–३५:१८
9“मेर्मिमगोडाम कोले योसेफ बाइडा। योसेफकु वामिमकाम उनी नो़ मेनु़यावामका योसेफलाई मिश्र नेब्दीडा भ्रेट्मिडी। लावो माम्चु़नी योसेफनुङ बाम्डी।#उत ३७:११,२८; ३९:२,२१ 10माम्चु़नीका खोत्ले उ दु़खालामका वाङ बेम्डी, मा न-थो़म रेम्बेसाका योसेफलाई मिश्रडाम हप फारोकु न घ्ल्वापा नेप्ची ग्वाम्डी। मेम्मा फारोका गुलाई मिश्र नेब्दी नुङ उ ओगानेमडाम खोत्लेकु साखामचो़ थुड्डु़।#उत ४१:३९-४१
11“मेकोतिमा मिश्र नेब्दी नुङ कनान नेब्दीडा खोत्लेथो़ ङा मा-के हुक्तामा छो़म डोक्पु दु़खा दु़स्ता। मेम्मा इकी ङाउ-खुउमिमका पोमु मेल्वामिवा।#उत ४२:१-२ 12याकूबका मिश्र नेब्दीडा मा-के बु र्वाक्पा थो़स्तु़मा इकी ङाउ-खुउमिमलाई ङादोम थारीका मेसिन्डा थु़र्स्तु़मी। 13मेकोतिमा मेरामकु चङडा घ्रो़म्मिडिलो योसेफ उ वामिमनुङ छेला सो़सिड्डा, मा योसेफकु वामिम वो फारोका छेड्डु़मी।#उत ४५:१,१६ 14मेम्मा योसेफका उमा त्वाकु पाप याकूब नुङ उमा वा-ल्वाकमिम मा मेर्मिमकु नेमडाममिमलाई उमाडा येड्डु़मी। मेर्मिम खोत्ले येत-ङोले (७५) बाम्डी।#उत ४५:९-१०; १७:१८; ४६:२७
15“याकूब मिश्र नेब्दीयु़ लस्तामा मेसिन्डा ङा उ साम लस्ता, मा इकी ङाउ-खुउमिमकाम वो मेसिन्डा उनी साम लस्ता।#उत ४६:१-७; ४९:३३ 16मेकोतिमा इकी ङाउ-खुउमिमकाम सिपा रो़म शकेमडा लम्डी, मा अब्राहामका शकेमडा हमोरकु चो़मिमलामका थि सोक्साका भ्रेइजो़ल्लु़म सु़लु़मगोनो क्लु़म्मिडी।#उत २३:३-१६; ३३:१९; ५०:७-१३; यहो २४:३२
17 #
प्रस १:७-८
“माम्चु़नीका अब्राहामनुङ जेम्डिम ल्वा रोक्थिट्पा थारी रोक्फाड्डालो मिश्र नेब्दीडा इकी मु़चु़ इस्राएलीमिम छो़म बर्मिडी, मा हापा दु़म्मिडी। 18हापा थ चङ्डा मिश्र नेब्दीडा योसेफलाई मेछेपा वाङमी ङा हप दु़स्ता। 19मेरामका इकी ङाउ-खुउमिमलाई मेजो़पा नका दु़खा ग्वाक्तु़मी। मेकोतिमा मेरामका इकी ङाउ-खुउमिमलाई उनी चो़च्चो़मिम खोत्ले पाखाडा जु़ल्बेड्डु़मी, मा मालो गक्पा चो़च्चो़मिम खोत्लेङा सिम्डी।#प्रस १:१०-११,२२
20“ओराम थारीका ङा मोशा गस्ता। गु माम्चु़नीकु मिक्सीलामडा छो़म ङा जो़पा बाइडा। गुलाई सु मुनामसम्म उ माम-पापका डु़ल्ची। 21मेकोतिमा गुलाई पाखानो पार्जो़ल्मिडिम चङ्डा फारोकु मेसेमचो़का लडु़मा उ त्वाकु चो़ होम्साका डु़ल्लु़। 22मिश्रा नेब्दीडाम मु़चु़मिमका थेट्मिडिम खोत्ले ल्वा मोशालाई सीट्मिडी, मा मोशा जेमुडा नुङ खारी बोमुडा नेप्चीनुङमा दु़स्ता।
23 #
प्रस २:११-१५
“मोशा ब्ल धु़म (४०) थकाम दु़स्तालो उ त्वाकु वा-ल्वाक इस्राएलीमिमनुङ घ्रो़म्मु न बु़डु़। 24कोलेम मोशाका कोङ मिश्रीका कोङ इस्राएलीलाई याल्तोङा बेपा ल्वास्तु़मा गुका भोप्डु़। मेम्मा गु इस्राएलीलाम बासिक्साका मिश्री मु़चु़लाई सेड्डु़मा उ छोक्चो हाड्डु़। 25माम्चु़नीका इस्राएलीमिमलाई सेल्ला मोशा थु़र्मीडिम बाइडा। ओराम ल्वा उ मु़चु़ इस्राएलीमिमका थेसिथेन्मी र्वाक्पा मोशाका मिम्डु़म बाइडा। लावो मेर्मिमका थेसिमेथेट्मिवा। 26मेरामकु दिकाम नले इस्राएलीचिपका क्वाल्बा बेत्तोङा लेच्चिलो मोशा रोक्ता, मा मेर्चिपकु न-घ्रो़म्बेन्मु नका आरे बु़डु़ची, ‘वा-ल्वाकची, गाची ने कोले सामाडाम वा-ल्वाक डे मा हेङा इची त्वाप-त्वापडा ङा मेजो़पा बेबोचिमिम?’
27“लावो मे उ साउखोरेडला मेजो़पा बेपाका मोशालाई आरे बु़डु़मा क्र्वाङ उड्डु़, ‘गुचुकुडला निया बेपा नुङ साखाम थो़पा दु़म्मु गानालाई सु़का थुट्ना? 28बास्ताका मे मिश्री मु़चु़ सेट्नाम होङ्ङा गोलाई वो सेन्मु माल्ङिमिम?’ 29ओराम ल्वा थो़स्तु़मा मोशा स्वाङडामा मिद्यान नेब्दीडा वाङथो़लामका रोक्पा मु़चु़ दु़म्साका बाइडा। मेसिन्डा नले उ तारापाचो़चिप गक्ची।#प्रस १८:३-४
30“ब्ल धु़म (४०) थ चङडा सीनै पोप्चङकु र्याङगो-र्याङगोडाम घ्रु़पामबाट्पा झोरीडा कोङ पाह्रीचो़ मोशानुङ ल्वाला सो़स्ता। 31मोशाका मेराम ल्वास्तु़मा ङाङाया दु़स्ता, मा मेराम रेप्डा उ फार्डा लस्तालो माम्चु़नीकु लो़लामका आरे र्वाम्डी, 32‘गो इमा ङाउ-खुउ अब्राहाम, इसहाक नुङ याकूबकु माम्चु़नी।’ ओराम थो़स्तु़मा मोशा उ ङिमुका रुड्डु़मा गुका मेरामथो़ रेम्मुङा मेचाप्सु़वा।
33“मेकोतिमा मिप्रङमाका मोशानुङ र्वाम्डी, ‘इमा खेलयु़म सो़लो़प#७:३३ जुत्ता प्लु़सा, हेङालोने गाना उहेम बायडा येम्तासिनामिम बु, मेराम बाय माम्चु़नीकु नङका साट्मा सो़। 34मिश्र नेब्दीडा बाट्पा आमा मु़चु़मिमकु दु़खा गो ल्वाउतो, मा मेर्मिम येत्तो-ख्राप्तो बेम्डिम वो थो़उतो। मेर्मिमलाई बोप्डा-थार्डा गो योङडोम बु। मेम्मिमका लक्सा गो गानालाई मिश्र नेब्दीयु़ थु़र्नी।’#प्रस ३:१-१०
35“इस्राएलीमिमका ‘गानालाई निया बेपा नुङ साखाम थो़पा दु़म्मु सु़का थुट्ना’ र्वाक्साका नाप्छु़ट्मिडिम ओराम मोशालाई माम्चु़नीका झोरीडा रेम्बेसिक्पा पाह्रीचो़लामका साखामचो़ नुङ बोपा-थार्पा मु़चु़ थुसाका थु़र्मिडिम बाइडा।#प्रस २:१४ 36ओराम मोशाका ङा मिश्र नेब्दीडाम लालाम दिरिदिनडा नुङ र्याङगो-र्याङगोडा ब्ल धु़म (४०) थसम्म हेल्लो वो मेल्वामिवाम खारी नुङ छेखोपमिम बेसाका मेलामका मेर्मिमलाई खेड्डु़मिम बाइडा।#प्रस ७:५; १४:२१; गन्ती १४:३३
37“मेराम मोशाका ङा, इस्राएलीमिमनुङ र्वाक्ताम बाइडा, ‘माम्चु़नीका गोलाई थुट्ङिडिमिम होम्साका ङा इनीमा वा-ल्वाकगोलामका इनीमा लागि माम्चु़नीलाम-जेपा कोङ मु़चु़ थुमी।’#व्य १८:१५,१८ 38इकीमा ङाउ-खुउ इस्राएलीमिम र्याङगो-र्याङगोडाम सीनै पोप्चङ फारगोयु़ कोदेप खोम्सिम्डिलो मोशा मेर्मिमनुङङा बाइडा। सीनै पोप्चङडा पाह्रीचो़ गुनुङङा जेस्थाल्ला मा मेराम त्वारो़म ग्वाक्पा माम्चु़नीकु सिजेम गुका ल्वास्तु़, मा इस्राएलीमिमलाई थो़बेड्डु़मी।#प्रस १९:१–२०:१७; व्य ५:१-३३
39“लावो इकी ङाउ-खुउमिमका मोशाका र्वाक्ताम ल्वा मेथो़मिवा। मेर्मिमका गुलाई डिसाका मिश्र नेब्दीथो़ ङा ख्लोम्सिमु न बेम्डी। 40मेकोतिमा मेर्मिमका मोशाकु वा हारूनलाई आरे बेम्डी, ‘गुकुलाई क्रिपा कोङनिम नो़पमिम बनेबेसाट्की, हेङालोने गुकुलाई मिश्र नेब्दीयु़म ख्लुक्खेट्पा मे मोशा हे दु़स्ता र्वाक्पा गुकु चक्तोकोम मिबु।’#प्रस ३२:१ 41मेकोतिमा मेराम थारीका मेर्मिमका कोङ बाछाकु ङाटा बनेबेम्डी। मेरामडला सासेसाका उनी त्वाकु ल्वाका बेम्डिम खारीडा मेर्मिम छो़म गेर्सिद्वाम्डी।#प्रस ३२:२-६ 42मेम्मिमका माम्चु़नी मेर्मिमकु कोर्थो़लाम बम्डी, मा मेर्मिमलाई धामुलाम सोरलुङमिमकु सो़रलोले बेपा दु़म्बेट्मिडी। माम्चु़नीलाम-जेपामिमकु खाजेमडा आरेप्माम र्याक्मा बु,
‘ए इस्राएलडाम मु़चु़नी, हाम ब्ल धु़म (४०) थसम्म र्याङगो-र्याङगोडा
गानी हादी-बारामिम आमा नङडा सासेट्निमा ग्वाङ्डिनी?
43गानी मोलोख नो़पकु सो़रनेम नुङ रेफन नो़पकु सोरलुङ,
मा सो़रलोले बोमु लागि बनेन्निम नो़पकु ङालीमिम कुर्खेट्नी।
मेम्मिमका गो गानीलाई बेबिलोनडाम वो होनोवा खान्सोनिनी।’#आमो ५:२५-२७; लेवी १८:२१
44“र्याङगो-र्याङगोडा इकी ङाउ-खुउमिमनुङ माम्चु़नी रेम्बेसिक्पा बाखोप बाइडा। ओराम मोशालाई माम्चु़नीका रेम्बेट्मिडिमा बेबेट्मिडिम होम्साका ङा मोशाका बनेबु़डु़म बाइडा।#प्रस २५:९,४० 45चङ्डा इकी ङाउ-खुउमिमका मे माम्चु़नी रेम्बेसिक्पा बाखोप उनी बेब-पापलामका रम्डी। मेर्मिम यहोशूनुङ लम्डिलो मेराम कुर्मिडिमा लम्डिम बाइडा। मेम्मा माम्चु़नीका वाङसामामिमलाई मेर्मिमडाम ङादोङा खान्सोम्डिमी। गुमीका ग्वाम्डिम नेब्दीडा मेर्मिम लम्डिलो वो मे माम्चु़नी रेम्बेसिक्पा बाखोप मेर्मिमनुङ बाइडा। मेकोतिमा दाऊदकु साम बाइडामसम्म माम्चु़नी रेम्बेसिक्पा बाखोप मेसिन्डा बाइडाम बाइडा।#यहो ३:१४-१७ 46दाऊदकाडा माम्चु़नीकु दिदाम बाइडा, मा गुका याकूबकु माम्चु़नीकाम लागि कोले सो़रनेम बनेबोमु गुमीनुङ ल्वा बु़डु़।#२ शमू ७:१-१६; १ इति १७:१-१४ 47लावो माम्चु़नीकाम लागि सो़रनेम ने सोलोमनका बनेबु़डु़।#१ राज ६:१-३८
48“मेम लावो ल्वाका बनेम्मा सो़रनेममिमबाडे पाह्रीलाम माम्चु़नी मेबुमी, माम्चु़नीलाम-जेपाका आरेसाका र्वाक्ताम बु:
49‘पाह्री आमा गन्खोप,
मा सुबु आमा खेल जु़ल्खोप बु,
आमा लागि गानी जो़पा बाखोप बनेबोमु चाम्नी मा?
गानी आमा लागि ङेसिखोप बनेबोमु चाम्नी मा?
50ओर्मिम खोत्ले गो आमा त्वाकु ल्वाका ङा प्रङतोमिम मेएँ मा?’#यशै ६६:१-२
51“ए लु़म्ला मेबेडिचो़नी, लुङ होप्माम न-गो नुङ नोफ्लाका मेथो़पानी, गानी हेल्लो लोवो माम्चु़नी-पेलकु कोर्थो़लाम येम्सिनी। इनीमा ङाउ-खुउमिमका हाम बेम्डी, गानी वो मेम ङा बोनी।#यशै ६३:१० 52इनीमा ङाउ-खुउमिमका दु़खा मेग्वाक्मिवाम माम्चु़नीलाम-जेपा सु़ बुमी मा? माम्चु़नीकु नङका साट्मा मेराम उनी डु़ल्चो़#७:५२ येशू ख्रीष्ट रोक्तोङा बोमी र्वाक्साका सेला थो़बेट्पा माम्चु़नीलाम-जेपामिमलाई वो मेर्मिमका सेट्मिडी। गानी ने माम्चु़नीकु डु़ल्चो़कु कोर्थो़लाम बक्निमा सेट्नी।#मत्ती ५:१२ 53पाह्रीचो़मिमका गानीलाई माम्चु़नीकु डु़म्ला ग्वानिमी, मेम लावो गानी मेराम होम्साका मेबेनिवा।”
स्तिफनस लुङका याम्डिमा सेट्मिडिम
54मेर्मिमका ओराम ल्वा थो़म्डी, मा छो़म उनी छोक्चो बक्ता, मा छोक्चोका उनी लि ख्रेन्मु चो़म्मिडी। 55लावो स्तिफनस ने माम्चु़नी-पेलका लु़न्स्तामा पाह्रीथो़ किकिर्या रेप्डु़। मेकोतिमा गुका माम्चु़नीकु यु़म-झ्वाक्सी नुङ माम्चु़नीकु जो़पलाम येम्तासिट्मिडिम येशूलाई ल्वास्तु़। 56मेकोतिमा गुका र्वाक्ता, “रेप्नी, पाह्री ह्वासिट्पा मा मिनीचो़#७:५६ मिनीचो़ र्वाक्मा: खोत्ले मु़चु़काम लागि सेल्पा दु़म्मु माम्चु़नीका गुमीलाई थुट्मीडिम बु र्वाक्पा रेम्बोमु येशूका उनी त्वापलाई ङा र्वाम्डिम नङ (दानिएल ७:१३-१४)। माम्चु़नीकु जो़पलाम येम्सिमु र्वाक्मा: माम्चु़नीका येशूलाई डोक्पु मिम्मिडी मा साखाम थो़मु ग्वाम्डिम र्वाक्पा थेसिथेन्थाल्मिडी। माम्चु़नीकु जो़पलाम येम्तासिन्मिमिम गो ल्वाउ।”
57मेकोतिलोङा मेर्मिम छो़म डोक्पु लो़लामका येम्डिमा खोत्लेका उनी नोफ्ला ड्याम्डी, मा स्तिफनसलाई चोघ्रु़प्मिडी।
58मेर्मिमका स्तिफनसलाई शहरलामका पाखा ख्लुम्डी, मा गुलाई सेन्मु लागि लुङका ओम्मु चो़म्मिडी। मेकोतिमा स्तिफनसकु कोर्थो़लाम लिमा थेट्पामिमका उनी हुम-येमिम शाऊल नङकाम कोले स्वालाकु खेलफार्डा जु़ल्मिडी।
59मेर्मिमका स्तिफनसलाई लुङका ओप्मिडिम बाम्डिलो ङा स्तिफनसका सो़म्दी बु़डु़, “ङाचो़ येशू, गो गानीनुङ दु़म्ङुनु़।” 60मेकोतिलो ङा गुका क्रचु़खुम बु़ल्याड्डु़मा डोक्पु लो़लामका येस्ता, “येशू, ओर्मिमका हाम बेम्डी, मेरामकु देन्दे मेग्वाक्निमी।” आकोति र्वाक्तामा उ साम लस्ता।
Currently Selected:
थु़र्मा 7: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
