यूहन्ना 10
10
जो़पा रेपा-क्रिपा येशू
1“आच्छाङा गो गानीलाई र्वाङु, उहेम मु़चु़ भेन्दाकु गोठागोनो लाम्चोकोलाम मेहु, लावो कोङमीलामङा हु मेराम मु़चु़ ने खुचु़वा नुङ मु़चु़लाई रोट्पा मु़चु़ सो़। 2लावो लाम्चोकोलामका गोनो हुपा मु़चु़ ने भेन्दामिमकु रेपा-क्रिपा मु़चु़ सो़। 3लाम्चोको लपा मु़चु़का रेपा-क्रिपा मु़चु़काम लागि लाम्चोको होल्साडु़, मा भेन्दामिमका उमा लो़लाम थो़मी। गुका उमा भेन्दामिमलाई नङलामका येडु़मी, मा पाखाथो़ क्रियु़मी। 4गुका खोत्ले उमा भेन्दामिम पाखानो ख्लुमु दु़म्सु़मा गु भेन्दामिमकु ङादो-ङादो लाम्दी। मेम्मा भेन्दामिम उमा चङचङ लाम्दिमी, हेङालोने मेर्मिमका उमा लो़लाम छेमी। 5लावो मेछेट्मा मु़चु़कु चङचङ मे भेन्दामिम मेलाम्दिमी, मेराम मु़चु़डाम स्वामी। हेङालोने मेछेट्मा मु़चु़कु लो़लाम मेर्मिमका मेछेमी।” 6येशूका मेर्मिमनुङ ओराम सीसि-सो़म्दी र्वाम्डी, लावो गुमीका र्वाम्डिम ल्वा मेर्मिमका थेसिमेथेट्मिवा।
7मेम्मिमका येशूका आथावो मेर्मिमलाई र्वाम्डी, “आच्छाङा गो गानीलाई र्वाङु, भेन्दामिमकु हुखोप लाम्चोको गोङा सो़। 8गोडाम ङादो रोक्पा खोत्ले मु़चु़ खुचु़वा नुङ मु़चु़लाई रोट्पा मु़चु़ बाम्डी। लावो भेन्दामिमका मेर्मिमकु ल्वा मेथो़मिवा। 9हुखोप लाम्चोको गोङा सो़, उहेम मु़चु़ गोलामका गोनो हु मेराम सेल्सी। नेमगो-पाखा हुपा लुक्पा बु़ मा जाखोप ल्वासु़।
10“खुचु़वा ने खुप्डा, सेड्डा नुङ पुयु़ लुबेड्डा कोङङा रो। लावो गो ने मेर्मिमका त्वारो़म ल्वामिनु़, मा मे त्वारो़म हापा ल्वामिनु़ र्वाक्साका योङडो। 11जो़पा रेपा-क्रिपा गो। जो़पा रेपा-क्रिपाका उमा भेन्दामिमकाम लागि उ त्वापलाई सासेडु़। 12लावो खउलुङ ग्वाक्साका जु़ल्मा मु़चु़ ने त्वाकु भेन्दामिम बाट्पा रेपा-क्रिपा मु़चु़ होप्माम मेएँ। मेरामका बडि रोक्पा ल्वासु़लो भेन्दामिमलाई पार्जो़लु़मा स्वा। मेम्मा बडिका भेन्दामिमलाई ङाघ्रकु़मी, मा फोरु़मी। 13मेराम मु़चु़ स्वा, हेङालोने मेराम मु़चु़ ने खउलुङ ग्वाक्साका जु़ल्मा, मेरामका भेन्दामिमलाई जो़होमका मेरेप्डु़मी।
14“गो जो़पा रेपा-क्रिपा। भेन्दामिमलाई गो छेपुमी, मा आमा भेन्दामिमका गोलाई छेङिमी। 15आमा पापका गोलाई छेङिमी, मा पापलाई गो छेपुमिम होङ्ङा भेन्दामिमकाम लागि आ त्वापलाई सासेट्पु।#मत्ती ११:२७; लूक १०:२२
16“आमा वाङमिम भेन्दामिम वो बुमी, मेर्मिम ओराम गोठाडाम मेएँ। मेर्मिमलाई वो गो रेन्मु बासिक्पा बु। मेर्मिमका आमा लो़लाम थो़मी, मा मेर्मिम कोलेङा बगाल दु़म्मी। मेम्मा कोलेङा रेपा-क्रिपा दु़म। 17आमा पापका गोलाई रिखाम बोङिमी हेङालोने गो त्वापलाई सासेट्पु, मा चङडा आथावो नु़मु चापु। 18सु़का वो गोलाम आमा साम रमु मेचाप्सु़। गो आमा त्वाकु नका आ त्वापलाई सासेट्पु। हेङालोने आ त्वापलाई सासेट्पा नुङ आथावो बम्गेमु आमा मुलु़गोडा बु। आमा पापका आरे बोमु गोलाई बेबेट्ङिडिमिम बु।”
19येशूका आरे र्वाम्डिमका यहूदीमिमगोडा आथावो गो-फ दु़स्ता। 20मेर्मिमगोडाम हापाका आरे र्वाम्डी, “ओरामलाई मुनाङका हुप्डु़म बु, मा उ न मान्थिम दु़स्ताम बु। हेङा मेरामकु ल्वा थो़नी?”
21लावो वाङमिमका र्वाम्डी, “मुनाङका हुपा मु़चु़का आरेप्माम ल्वा मेजे। मिक्सीका मेल्वापा मु़चु़कु मिक्सी हाम मुनाङका होर्मु चाप्सु़?”
येशूका उनी त्वापलाई माम्चु़नीकु तारापाचो़ र्वाम्डिम
22यरूशलेमडा माम्चु़नीकु नङका सो़रनेम सान्बेट्पा चाड रोक्ताम बाइडा। ओराम जु थारीका बाइडा। 23सो़रनेमगोनो सोलोमनकु पिन्दीडा येशू लाम्दिम्बाल्मिडिम बाइडा। 24यहूदीमिम उनी होनो-आथो़लाम खोम्सिम्डिमा हिलाबेम्डी, “हाम्सिसम्म गुकुलाई इनीमा दुथाम सो़मुडाम थनिमिम? गानी ख्रीष्टङा माला गुकुनुङ जो़होमका सो़नी।”
25येशूका मेर्मिमलाई र्वाम्डी, “गो गानीनुङ र्वाङ्डोम बु, लावो गानी थो़र मेलु़नी। आमा पापकु नङडा बेउमिम हेल्लो वो मेल्वाम्मा खारीकाङा आमा दुथाम सो़यु़। 26लावो गानी थो़र मेलु़नी, हेङालोने गानी आमा भेन्दामिम मेएँ।
27“आमा भेन्दामिमका आमा लो़लाम थो़मी, मेर्मिमलाई गो छेपुमी। मेम्मा मेर्मिम आमा चङचङ लाम्दिमी। 28मेर्मिमलाई मेसिपा त्वारो़म ग्वाक्पुमी, मा मेर्मिम हेल्लो वो पुयु़ मेलुमी, मा सु़का वो मेर्मिमलाई आमा ल्वालामका रोसाका लमु मेचाप्सु़। 29आमा पापका गोलाई ग्वाङ्डिमिम भेन्दामिम खोत्लेडाम घ्ल्वापा बुमी। सु़का वो मेर्मिमलाई आमा पापकु ल्वाडाम रोसाका लमु मेचाप्सु़। 30गो नुङ पाप कोलेङा।”
31यहूदीमिमका येशूलाई आथावो लुङका ओमु लुङ डो़म्डी। 32लावो येशूका मेर्मिमनुङ र्वाम्डी, “हापा यु़मखारीमिम आमा पापलाम गो गानीलाई रेम्बेट्निनी। मेर्मिमगोडाम उहेम खारीकाम लागि गानी गोलाई लुङका ओम्ङिनिमिम?”
33यहूदीमिमका र्वाम्डी, “जो़पा खारीकाम लागि गुकु गानालाई लुङका मेओम्कु, लावो माम्चु़नीलाई डक्साका जेन्नामका, हेङालोने गाना मु़चु़ दु़म्साका वो इ त्वापलाई माम्चु़नी र्वाक्ना।”#लेवी २४:१६
34येशूका मेर्मिमलाई र्वाम्डी, “हाम इनीमा डु़म्लाडा ‘गो र्वाङडो, गानी नो़पमिम’ र्वाक्साका र्याक्मा मिबु?#भज ८२:६ 35माम्चु़नीकु सिजेमका र्वाक्ताम ल्वा हेल्लो लोवो आच्छाङा बु र्वाक्पा गुइ च। उनी सिजेम ग्वाक्मा मु़चु़मिमलाई माम्चु़नीका नो़पमिम र्वामी। 36‘गो माम्चु़नीकु तारापाचो़’ र्वाङ्डोमका माम्चु़नीलाई डक्साका जेन्ना र्वाक्साका हेङा गानी र्वानी? गोलाई माम्चु़नीका थुट्ङिडिमिमा सु़म्दिसेरडा थु़र्ङिडिमी। 37आमा पापका बोमिमिम होप्माम खारी गो मेबेउ माला गोलाई थो़र मेबेङिनी। 38लावो मेराम खारी गो बेउ माला गोलाई थो़र मेबोङिनी लोवो हेल्लो वो मेल्वाम्मा खारीडा थो़रबेनी। मेम्मा पाप आमागोडा बुमी, मा गो पापगोडा बुङु र्वाक्साका गानी चनी, मा थेसिथेनी।” 39मेर्मिमका आथावो गुमीलाई चु़म्मु माल्मिडी, लावो गुमी मेर्मिमलामका स्वाम्डी।
40मेकोतिमा येशू यर्दन ब्लोकु होम्बुनोम, ङादो यूहन्नाका कु-रु़दु़म ग्वाक्थाल्लु़म बायडा लम्डी। मेम्मा गुमी मेसिन्डा बाम्डी।#यूह १:२८ 41मेसिन्डा हापा मु़चु़मिम उनीमाडा रोम्डिमा र्वाम्डी, “यूहन्नाका ने हेल्लो वो मेल्वाम्मा छेखोपमिम रेम्मेबु़वा, लावो ओराम येशूकु दुथाम गुका सो़यु़डु़म खोत्ले ल्वा आच्छाङा रेछा।” 42मेम्मा मेसिन्डा हापा मु़चु़का येशूडा थो़रबेम्डी।
Currently Selected:
यूहन्ना 10: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
