यूहन्ना 15
15
आच्छाङाकाम अङ्गूरकु रो़ल
1“गो आच्छाङाकाम अङ्गूरकु रो़ल सो़, मा अङ्गूर रेपा आमा पाप बुमी। 2मा मेसिट्पा आमा खोत्ले ग्रेममिम गुमीका फल्मी। मा सिट्पा खोत्ले ग्रेममिमलाई आथावो हापा मा सिट्नु़ र्वाक्साका स्याङमी। 3गो गानीलाई र्वाङ्डोम सिजेमका गानी बासीङा सेपा दु़म्मु दु़म्निम बु। 4आमा गोगोडा दु़म्नी, मा गो गुमीडा दु़म्ङु। अङ्गूरकु ग्रेममिम उ रो़लडा मेदु़प्सावा माला मा सिन्मु मेचाप्सु़। मेम्साकाङा आमाडा मेदु़म्निवा माला गानी वो मा सिन्बेन्मु मेचाम्नी।
5“गो अङ्गूरकु रो़ल सो़, मा गानी ग्रेममिम। कोङनिम मु़चु़ गोगोडा दु़म माला गो गुगोडा दु़म्ङुमा मेरामका हापा मा सिन्बेडु़। गोडाम फ्वासिक्साका गानी हाम वो बोमु मेचाम्नी। 6गोगोडा मेदु़म्पा मु़चु़ घ्रोला सो़सिक्पामा साट्पा ग्रेममिम होप्माम दु़म। आरेप्माम ग्रेममिम मु़चु़मिमका खोम्मिमा मुगोडा घ्रोम्सोमी, मा मेराम घ्रु़। 7गानी गोगोडा दु़म्निमा आमा सिजेम गानीगोडा बु माला हाम न बोनी, मेराम बिनी, मा गानी ल्वानी। 8गानी हापा मा सिन्बेसाका गानी आमा सीसिपा र्वाक्पा रेम्बेनी, मा मेरामका आमा पापकु यु़म झ्वा।
9“आमा पापका गोलाई रिखाम बेङ्डिमिम होङ्ङा गो वो गानीलाई रिखाम बेन्निनिम बु। गानी आमा रिखामडा बानिहोम बानी। 10गानी गो र्वाङ्डोम थो़नी माला आमा रिखामडा गानी बुनी, हेसाका गो वो आमा पापका र्वाम्डिम थो़उतो, मा उनीमा रिखामडा बुङु। 11आमा न-भ्रसी गानीगोडा दु़म्नु़, मा इनीमा न-गो भ्रम्सिमु हाम वो मेबासिक्पा दु़म्नु़ र्वाक्साका गो गानीलाई ओराम ल्वा र्वाङडोम।
12“गो र्वाङुमिम ल्वा ओरामङा: गो गानीलाई रिखाम बेन्निनिम होम्साकाङा गानी वो रिखाम बेबेनी।#यूह १३:३४; १५:१७; १ यूह ३:२३; २ यूह ५ 13त्वाकु ङोप्सो़काम लागि त्वाकु साम फ्यामुडाममा डोक्पु रिखाम सु़काम वो मेदु़म। 14गो गानीलाई हाम र्वाङ्डोम बु, मेराम होङ्ङा बोनी माला गानी आमा ङोप्सो़मिम। 15आथा ने गो गानीलाई डु़ल्चो़ मेर्वाङु, हेङालोने उमा नेमहपका हाम बु़, मेराम डु़ल्चो़का मेच। मेम मेर्वाक्साका गो गानीलाई ङोप्सो़नी र्वाङु, हेङालोने आमा पापलामका थो़उतोम खोत्ले ल्वा गानीनुङ सो़उतोम बु। 16गानी गोलाई छेट्ङिडिनिम मेएँ, गो गानीलाई छेट्निनी, मा गानी लक्निमा मा सिन्बेट्नी, मा इनीमा दु़म्नु़म बुनु़ र्वाक्साका गो गानीलाई थुट्निनी। मेम्मा आमा नङडा गानी हाम बिनी मेराम पापका गानीलाई ग्वानिमी। 17गो गानीलाई र्वाङुमिम ल्वा ओरामङा सो़: रिखाम बेबेनी।
सीसिपामिमलाई सु़म्दिसेरकु मेद्वाक्सी
18“सु़म्दिसेरडाम मु़चु़मिमका गानीलाई मेद्वानिवा माला ङादो गोलाई मेद्वाङिमी र्वाक्पा गानी चन्जो़ल्नी। 19गानी सु़म्दिसेरकु मु़चु़ दु़म्निवाम माला मेर्मिमका गानीलाई त्वाकु मु़चु़ मिम्निवामा रिखाम बेनिवा। लावो गानी ने सु़म्दिसेरकु मु़चु़ मेएँ। गानीलाई सु़म्दिसेरलामका गो छेट्निनी मेम्मिमका गानीलाई सु़म्दिसेरडाम मु़चु़मिमका मेद्वानिमी। 20गो गानीलाई र्वाङडोम सिजेम मिम्नी, ‘डु़ल्चो़ नेमहपडाम डोक्पु मेदु़म।’ मेर्मिमका आमा ने थो़मतेर्मी माला इनीमा वो थो़मतेर्मी। मेर्मिमका आमा सीसि थो़मी माला इनीमा सीसि वो थो़मी।#मत्ती १०:२४; लूक ६:४०; यूह १३:१६ 21गानी आमा सीसिपा दु़म्निमका मेर्मिमका गानीलाई मेम बोनी, हेङालोने मेर्मिमका गोलाई थु़र्पा पापलाई मेछेमी। 22गो मेयोङुवा, मा मेर्मिमनुङ मेर्वाङुवाम माला मेर्मिम उनी छु़लकु मुमा बेन्ला मेसो़म्सिप्मिवा। लावो आथा ने मेर्मिमका छु़ल मेबेमिवाम लिसिक्पा ल्वा मेर्मिमनुङ हाम वो मिबु। 23उहेम मु़चु़का गोलाई मेद्वाङी, मेराम मु़चु़का आमा पापलाई वो मेद्वाकु़। 24मेर्मिमकु ङादोडा वाङमिम सु़का वो मेबेमिवाम खारीमिम गो मेबेउवाम माला मेर्मिम छु़लकु मुमा बेन्ला मेसो़सिप्मिवा। लावो मेर्मिमका यु़मखारीमिम ल्वाम्डिम बु, मा वो गो नुङ आमा पापलाई मेद्वाचिकी। 25लावो डु़म्लाडा आरेसाका र्याक्मा ल्वा होङ्ङा रोम्थिमु लागि आरेप्माम दु़स्ताम बाइडा: ‘मेर्मिमका गोलाई मेडेङा मेद्वाङमिवा।’#भज ३५:१९; ६९:४
26“जेप्साक्पा योमी, उहेमलाई पापलामका गो गानीडा थु़रु। पापलामका योक्पा आच्छाङाम पेल गुमी, गुमीका आमा दुथाम सो़मी। 27ङादो आथामङा गानी गोनुङ बुनिमिमका गानी वो आमा दुथाम सो़पा दु़म्नी।”
Currently Selected:
यूहन्ना 15: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
