लूका 9
9
येशूका सीसिपामिमलाई जो़पा-सेला थो़बेड्डा थु़र्मीडिम
(मत्ती १०:५-१५; मर्कूस ६:७-१३)
1येशूका को-न उनी सीसिपामिमलाई कोयोङा येट्मिडी। मेम्मा मेर्मिम खोत्लेलाई मुनाङपेल कोल्पा मा सोमोरीलामका सबेट्पा यु़म नुङ साखाम ग्वाम्डी, 2मा खोत्ले मु़चु़मिमलाई माम्चु़नीकु किब्दीकु दुथाम थो़बेड्डा नुङ नो़पा मु़चु़मिमलाई सबेड्डा थु़र्मिडी। 3गुमीका मेर्मिमलाई र्वाम्डी, “गानी लाम्दिनिलो डु़लु़म्चो़, फाजी, पोमु-डुमु, अन्सिक्पा ये-सेम नुङ खउलुङ हाम वो मेकुर्नी। 4उहेम नेमडा लनिलो गानीलाई हुनाखाना बोमी, मेराम शहरलामका वाङथो़ मेलनिमिमसम्म मेराम नेमडा ङा बानी। 5कोङनिम शहरडाम मु़चु़मिमका गानीलाई हुनाखाना मेबोनिमी माला गानी मेराम शहरलाम लुनिलो मेर्मिमका देन्दे ल्वामी र्वाक्साका रेम्बोमु इनी फेमखेलडाम फुर्कु थेम्जो़ल्नी।”#लूक १०:४-११; थु़र्मा १३:५१ 6मेम्मिमका सीसिपामिम खोत्ले लम्डिमा जो़पा-सेला थो़बेत्तो नुङ नो़पा मु़चु़मिमलाई सबेत्तो देल-देलडा खिर्सिम्डी।
येशूकु दुथाम हेरोदकु न जेस्ताम
(मत्ती १४:१-१२; मर्कूस ६:१४-२९)
7 #
मत्ती १६:१४; मर्क ८:२८; लूक ९:१९ येशूका बेम्डिम खोत्ले खारीकु दुथाम थो़स्तु़मा गालीलडाम साखामचो़ हेरोदकु न जेस्ता। हेङालोने याङ-याङका कु-रु़दु़म ग्वाक्पा यूहन्ना सिमुलाम बग्गेड्डाम र्वाक्तोङा बेम्डी, 8मा याङका “एलिया रोक्ताम”#९:८ माम्चु़नीलाम-जेपा माकेम-माकेम मु़चु़ बाइडा। गु येशूडाम ९०० थ ङादोम (ई.पू. ९००) मु़चु़ बाइडा। र्वाम्थाल्मिडी, मा वाङमिमका “माके-माकेम माम्चु़नीलाम-जेपामिमगोडाम कोले सिमुलाम बग्गेड्डाम” र्वाम्थाल्मिडी। 9साखामचो़ हेरोदका र्वाक्ता, “यूहन्नाकाम ने उ बुइ क्रिम्बेत्तोमिम बाइडा। लावो ओराम मु़चु़ सु़ रेछा? ओरामकु दुथाम हापा ल्वामिम थो़त्तो लेट्पु।” मेकोतिमा गुका येशूलाई क्रो़म्मु न बु़डु़।
येशूका ङो धु़मसङ (५,०००) मु़चु़मिमलाई पोमु ग्वाम्डिम
(मत्ती १४:१३-२१; मर्कूस ६:३०-४४; यूहन्ना ६:१-१४)
10थु़र्मामिमका जो़पा-सेला थो़बेट्मिडिमा ख्लोसिम्डिम चङडा मेर्मिमका बेम्डिम खोत्ले खारीकु दुथाम येशूनुङ सो़म्डी। येशू मेर्मिमनुङ कोयोङा बेथसेदा र्वाक्मा शहरडा लम्डी। 11लावो ओराम ल्वा चम्डिमा सेर्पा मु़चु़मिम येशूकु चङचङ लम्डी। गुमीका मेर्मिमलाई हुनाखाना बेम्डिमा माम्चु़नीकु किब्दीकु दुथाम थो़बेट्मिडी, मा सु़ मु़चु़मिमलाई सबेन्मु बासिक्पा बाइडा मेर्मिमलाई सबेट्मिडी।
12नेप्सुङ गाम्मु खाप्डु़म बाइडा, मा मे को-न (१२) सीसिपामिम रोम्डिमा गुमीनुङ र्वाम्डी, “सेर्पा मु़चु़मिमलाई थु़र्सोट्नी। मेर्मिम देलगुथा नुङ होनो आथो़बाडे लमिनु़मा पोमिनु़-डुमिनु़ मा अम्मिनु़। हेङालोने ओम्लो गुइ सु़ वो मेबाट्पा बायडा बुइमिम बु।”
13लावो येशूका मेर्मिमनुङ र्वाम्डी, “गानी ङा मेर्मिमलाई पोमु-डुमु ग्वाक्नी।”
मेकोतिमा मेर्मिमका र्वाम्डी, “गुकुनुङ ने ङोले सो़बेम नुङ नले ङो कोङङा बु, आकोम सेर्पा मु़चु़मिमकाम लागि लक्साका पोमु-डुमु भ्रेकुनु़ र्वाक्पा गानी न बोनिमिम?” 14सेर्पा मु़चु़मिम#९:१४ वोस्चो़मिम ङो धु़मसङ (५,०००) कोति बाम्डी।
मेकोतिमा गुमीका उनी सीसिपामिमलाई र्वाम्डी, “मेर्मिमलाई ङो धु़म, ङो धु़म बेसाका गट्नी।” 15सीसिपामिमका मे सेर्पा मु़चु़मिमलाई मेम्साकाङा गट्मिडी। 16मेकोतिमा गुमीका मे ङोले सो़बेम नुङ नले ङो झेट्मिडिमा पाह्रीथो़ रेप्तो सो़बेम नुङ ङोकाम लागि माम्चु़नीलाई आलासो़ ग्वाम्डी, मा मे सो़बेम नुङ ङो चक्साका मु़चु़मिमलाई दो़न्साट्नी बेम्डिमा उनी सीसिपामिमलाई ग्वाम्डी। 17मेकोतिमा खोत्लेका खोहोम पेम्डी, मा सीसिपामिमका घ्लेट्पा सो़बेममिमकु फ्वाक्चो़ल खोप्मिडिलो को-न (१२) खचा दु़स्ता।
येशू ङा ख्रीष्ट र्वाक्साका पत्रुसका नड्डा रङडु़
(मत्ती १६:१३-२३; मर्कूस ८:२७-३३)
18कोलेम येशू उनी त्वापङा सो़म्दी बेत्तोङा लेट्मिडी। गुमीनुङ उनी सीसिपामिम कोङङा बाम्डी, मा गुमीका मेर्मिमनुङ हिलाबेम्डी, “मु़चु़मिमका गोलाई सु़ र्वामी?”
19मेकोतिमा सीसिपामिमका र्वाम्डी, “याङका कु-रु़दु़म ग्वाक्पा यूहन्ना र्वामी, याङका एलिया, मा वाङमिमका माके-माकेम माम्चु़नीलाम-जेपामिमगोडाम कोले बग्गेड्डाम रेछा र्वामी।”#मत्ती १४:१-२; मर्क ६:१४-१५; लूक ९:७-८
20मेम्मा गुमीका मेर्मिमलाई हिलाबेम्डी, “मा गानी गोलाई सु़ र्वानी?” पत्रुसका र्वाक्ता, “गानी माम्चु़नीका थु़र्निमिम ख्रीष्ट सो़।”#९:२० माम्चु़नीका थुट्मिडिम सेल्पा।#यूह ६:६८-६९
येशूका उनी सिमुकु दुथाम सो़म्डिम
(मत्ती १६:२४-२८; मर्कूस ८:३४–९:१)
21मेकोतिमा येशूका उनी सीसिपामिमलाई र्वाम्डी, “मामासो़! ओराम ल्वा गानी सु़नुङ वो मेसो़नी।” 22मेकोतिमा गुमीका र्वाम्डी, “मिनीचो़का#९:२२ मिनीचो़ र्वाक्मा: खोत्ले मु़चु़काम लागि सेल्पा दु़म्मु माम्चु़नीका गुमीलाई थुट्मिडिम बु र्वाक्पा रेम्बोमु येशूका उनी त्वापलाई ङा र्वाम्डिम नङ (दानिएल ७:१३-१४) बाइडा। छो़म दु़खा ल्वासु़। ङाउमिमका, ङाउ डु़म्लाचो़मिमका मा यहूदीमिमकु डु़म्ला सीपा पातु़म्रीमिमका गुलाई मेद्वामिमा सेन्मी। लावो सुलेमनेम सिमुलाम गु बगे।”
23गुमीका खोत्ले मु़चु़लाई र्वाम्डी, “कोङनिमका गोनुङ लाम्दिमु न बु़ माला मेरामका ङादो उ त्वाप कोङङा नु़ङुनु़ र्वाक्पा न मेबु़नु़, मा हेल्लो लोवो उ त्वाकु क्रूस कुर्नु़मा आमा चङचङ लाम्दिनु़।#मत्ती १०:३८; लूक १४:२७ 24हेङालोने उहेम मु़चु़का उ साम जु़ल्मु न बु़ मेरामका त्वारो़म मेल्वासु़। लावो उहेम मु़चु़का आमा लागि उमा साम फ्याक्सु़ मेरामका त्वारो़म ल्वासु़।#मत्ती १०:३९; लूक १७:३३; यूह १२:२५ 25कोङनिम मु़चु़का खोत्ले सु़म्दिसेरङा उ ल्वाडा बेसाका वो मु़चु़ उ त्वापङा दाम्स्ता, मेएँ लोवो पुयु़ लुस्ता माला गुका हाम ल्वासु़ मा? 26कोङनिम मु़चु़गोडाम नुङ आमा सिजेमडाम उ क्रो़म लु़ माला मिनीचो़ वो उ यु़म-झ्वाक्सीडा, उ पापकु यु़म-झ्वाक्सीडा मा उनी नङका साट्मा पाह्रीचो़मिमकु यु़म-झ्वाक्सीडा योलो मेराम मु़चु़डाम उ क्रो़म लु़। 27आच्छाङा गो गानीलाई र्वाङु, आसिन्डा येम्सिक्पामिमगोडाम कोङ-कोङका माम्चु़नीकु किब्दी मेल्वाथु़म उनी साम मेल।”
येशूकु ङाली ख्लोसिड्डाम
(मत्ती १७:१-८; मर्कूस ९:२-८)
28 #
२ पत्र १:१७-१८
येशूका आरे र्वाम्डिम र्वाप्डा लेतलेम (८) नेम को-को चङडा पत्रुस, यूहन्ना मा याकूबलाई उनी त्वापनुङ कोयोङा सो़म्दी बेप्डा पोप्चङडला लम्डी। 29येशूका सो़म्दी बेम्डिम बाम्डिलो उनी ङाली ख्लोस्तामा उनीमा ये ब्ल्याक्ची ओप्डु़म होप्माम बुबुया दु़स्ता। 30मेकोतिलो कोचोति नले मु़चु़ रेम्बेसिक्ची, मा येशू नुङ ल्वा बोमु चो़म्ची। मेर्चिप मोशा नुङ एलिया बाच्ची।#९:३० मोशा: येशूडाम १५,०० (ई.पू. १५,००) थ ङादोम मु़चु़। मिश्र नेब्दीयु़ इस्राएलीमिमलाई डु़ल्चो़ बनेसाका जु़ल्मिडिमलाम गुका ख्लुक्साका खेड्डु़मिम बाइडा, मा माम्चु़नीलाम ल्वास्तु़म ङो धु़म (१०) डु़म्लामिम इस्राएलीमिमलाई ग्वाक्तु़मिम बाइडा। एलिया: येशूडाम ९०० (ई.पू. ९००) थ ङादोम इस्राएलडाम माम्चु़नीलाम-जेपा डोक्पु मु़चु़। 31मेर्चिप पाह्रीलाम यु़म-झ्वाक्सीडा रेम्बेसिक्ची, मा यरूशलेमडा येशू सिमिमिमकु दुथाम सो़त्तोङा लेच्ची। 32पत्रुस नुङ उ ङोप्सो़ अम्चेट्मिडिम बाइडा। लावो मेर्मिम ङोसिम्डिलो येशूकु यु़म-झ्वाक्सी, मा गुमीनुङ येम्तासिक्पा नले मु़चु़ ल्वाम्डी। 33मेकोतिमा मे नले मु़चु़चिप गुमीनुङ ब्र्वासिक्चिमा लमु खाप्चिलो पत्रुसका येशूनुङ र्वाक्ता, “ङाचो़, गुकु आसिन्डा बुमु छो़म जो़पा दु़म। गुकु सुले बाखोप बनेबोकु, कोले इनीमा लागि, कोले मोशाकाम लागि, मा कोले एलियाकाम लागि।” लावो गुका र्वाक्ताम ल्वा उ त्वाका ङा मेचवा।
34पत्रुस जेत्तोङा बु़डु़लो खासे रोक्तामा मेर्मिमलाई हुप्डु़मी, मा खासेगोनो दु़म्मिडिलो मेर्मिम छो़म ङिम्डी। 35मेकोतिमा खासेलामका कोले लो़लामका आरे र्वाक्ता, “ओराम आमा तारापाचो़, गुलाई गो छेत्तोम सो़। ओरामका र्वामिम थो़नी वो।” 36मेराम लो़लाम जेमु डिड्डु़म चङडा मेसिन्डा मेर्मिमका येशूलाई कोङङा ल्वाम्डी। मेर्मिम लिबावा बाम्डिमा मेर्मिमका ल्वाम्डिम ल्वामिम मेम बिलि सु़नुङ वो मेसो़मिवा।
येशूका मुनाङपेलका हुप्डु़म कोले स्वालालाई सबेट्मिडिम
(मत्ती १७:१४-२३; मर्कूस ९:१४-३२)
37उ दिकाम येशू नुङ उनी सीसिपामिम पोप्चङलामका योम्डी, मा गुमीलाई क्रो़म्डा छो़म सेर्पा मु़चु़मिम रोम्डी। 38मे सेर्पा मु़चु़मिमगोलामका कोले मु़चु़का डोक्पु लो़लामका र्वाक्ता, “ङाचो़, गो गानीनुङ र्वाङु, आमा तारापाचो़डला न-थो़म रेम्बेनी। मेराम ने आमा कोलेङा तारापाचो़ सो़। 39मेरामलाई मुनाङपेलका हुप्डु़लो कोचोत्ति ये, मा काकार्या दु़म। मेम्मा उ सिलामका जाजाब्लु़म ख्लुकु़। मेरामलाई छो़म लेप्ले बोकु़मा बमुङा मेचापा दु़म्बेसाका डिडु़। 40मे मुनाङपेल कोल्साङ्नी र्वाङडोमा इनी सीसिपामिमलाई वो र्वाङडो, लावो मेर्मिमका कोल्मु मेचाप्मिवा।”
41येशूका मेर्मिमलाई र्वाम्डी, “ए थो़रमेलु़पा नुङ लु़म्ला मेबेडिचो़नी, गो हाम्सिसम्म गानीनुङ बुङु, मा हाम्सिसम्म इम्मु? इमा तारापाचो़ आसिन्डा फिडा।”
42येशूकाडा मे स्वाला मु़चु़ बिक्तो-बिक्तोङा मुनाङपेलका क्वायु़ लेप्बोक्तु़, मेम्मा काकार्या बु़डु़। लावो येशूका मे मुनाङपेललाई भुर्मिडी, मेम्मा स्वाला मु़चु़लाई सबेट्मिडिमा उ पापलाई ग्वाम्डी।
43माम्चु़नीकु छो़म डोक्पु यु़म ल्वाम्डिमा मे सेर्पा मु़चु़मिम ङाङाया दु़म्मिडी।
येशूका बेम्डिम खोत्ले खारीडा मेर्मिम ङाङाया दु़म्मिडिम बाम्डिलो गुमीका उनी सीसिपामिमलाई र्वाम्डी, 44“गो र्वाङुमिम ल्वा किङकिङया थो़नी वो, मिनीचो़ उ स्वाक्चिमो मु़चु़मिमकाडा भ्रेन्सिमु खाप्डु़म बु।” 45लावो गुमीका र्वाम्डिम ल्वा सीसिपामिमका थेसिमेथेट्मिवा। ओराम हाम र्वाक्मा र्वाक्पा मेर्मिमका थेसिमेथेन्मिनु़ र्वाक्साका ङा थक्मा बाइडा। मेर्मिमका ओराम ल्वाकु दुथाम गुमीनुङ हिलाबोमु ङिम्डी।
येशूका र्वाम्डिम खोत्लेडाम डोक्पु मु़चु़
(मत्ती १८:१-५; मर्कूस ९:३३-४०)
46मेकोतिमा को-न (१२) सीसिपामिमका खोत्लेडाम डोक्पु सु़ दु़म र्वाक्साका उनी त्वाप-त्वापगोडा हिलाहिसी बेबेम्डी।#लूक २२:२४ 47लावो येशूका मेर्मिमकु नगोडाम ल्वा चम्डिमा कोले चो़च्चो़लाई रेट्मिडिमा उनी फार्डा येम्सिबेट्मिडी। 48मेम्मा मे सीसिपामिमलाई र्वाम्डी, “उहेमका गोडला थो़रलु़डामका ओराम चो़च्चो़लाई हुनाखाना बु़, मेरामका गोलाई हुनाखाना बोङि, मा मेराम मु़चु़का गोलाई थु़र्पा माम्चु़नीलाई वो हुनाखाना बु़। गानीगोडाम खोत्लेडाम याक्के सु़ बु, मेराम मु़चु़ङा खोत्लेडाम डोक्पु दु़म।”#मत्ती १०:४०; लूक १०:१६; यूह १३:२०
49मेकोतिमा यूहन्नाका र्वाक्ता, “ङाचो़, कोले मु़चु़का इनीमा नङडा मुनाङपेलमिम कोल्तोङा लेड्डु़म गुकु डार्तोको। लावो गुकु मेराम मु़चु़लाई मेम बोमु मेग्वाक्कुवा। हेङालोने मेराम मु़चु़ गुइनुङ लाम्दिपामिमगोडाम मेएँ।”
50लावो येशूका र्वाम्डी, “मेरामलाई मेम बोमुडाम मेभोप्नी। हेङालोने उहेम मु़चु़ इनी कोर्थो़लाम मेजे, मेराम मु़चु़ गानीलाम ङा बासी।”
सामरियाडाम मु़चु़मिमका येशूलाई हुनाखाना मेबेमिवाम
51येशू पाह्रीथो़ लक्पा थारी रोक्फाड्डालो#९:५१ सिमु थारी गुमी यरूशलेमथो़ ङा लक्पा मुलु़ बेम्डी। 52मेकोतिमा गुमीका सेलाचो़मिमलाई गुमी लमुडाम ङादोङा थु़र्मिडी। मेर्मिम लम्डिमा उनीमा लागि खोत्ले झो़म्सिबेड्डा सामरीमिमकु देलडा लम्डी। 53लावो येशू मेलामका यरूशलेमथो़ङा लमी र्वाक्पा चम्डिमा सामरियाडाम मु़चु़मिमका गुमीलाई हुनाखाना मेबेमिवा। 54याकूब नुङ यूहन्नाका ओराम ल्वाच्चिमा येशूनुङ र्वाक्ची, “ङाचो़, हाम गुकु सो़म्दी बेसाका पाह्रीलामका मु योनु़मा ओर्मिम मु़चु़ ख्यामिनु़ र्वाक्पा गानी न बोनी?”#२ राज १:९-१६ 55लावो येशू पिख्लोम्सिम्डिमा मेर्चिपलाई भुर्मिडी। 56मेकोतिमा येशू नुङ उनी सीसिपामिम वाङमिम देलथो़ लम्डी।
येशूकु सीसिपा दु़म्पा मु़चु़
(मत्ती ८:१९-२२)
57येशू नुङ उनी सीसिपामिम लाम्दीडा लक्तोङा बेम्डिलो कोले मु़चु़का येशूनुङ र्वाक्ता, “ङाचो़, गानी बान्ते लनी, मेनो-मेनो गो वो इनीमा चङचङ लङु।”
58लावो येशूका मेरामलाई र्वाम्डी, “सेरुलीमिमकाम वो उनी बाखोप रोङगा बु, मा चक्पुमिमकाम वो उनी पान्जी बु। लावो मिनीचो़काम ने ङेसिखोप वो मिबु।”
59येशूका कोङमी मु़चु़लाई र्वाम्डी, “आमा चङचङ लाम्दिया।” लावो मेराम मु़चु़का र्वाक्ता, “ङादो आमा पापलाई क्लु़म्डा लमु ग्वाङ्नी।”
60गुमीका मेरामलाई र्वाम्डी, “हेल्लो वो मेसिपा त्वारो़म मेल्वासाका सिपामिमका ङा उनी सिपा रो़म क्लु़म्मिनु़। लावो गाना ने लक्सामा माम्चु़नीकु किब्दीकु दुथाम जो़पा-सेला थो़बेडामी।”
61कोले मु़चु़का गुमीनुङ र्वाक्ता, “ङाचो़, गो वो इनी चङचङ लाम्दिङु, लावो ङादो आमा नेमडाम मु़चु़मिमनुङ ब्र्वाम्सिमु ग्वाङनी।”#१ राज १९:२०
62लावो येशूका मेराम मु़चु़लाई र्वाम्डी, “झोमु चो़म्डु़लो उ ल्वा ताकुलाडला जु़ल्साका चङथो़ ख्लोसिक्पा मु़चु़ माम्चु़नीकु किब्दीकाम लागि घ्रेट्पा मेदु़म।”
Currently Selected:
लूका 9: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
