मत्ती 28
28
येशू सिमुलामका बम्गेम्डिम
(मर्कूस १६:१-११; लूका २४:१-१२; यूहन्ना २०:१-१८)
1ङेम्सिमुनेमकु उ दिकाम, हप्ताकु ङादोमनेम नेमसोसोकाङा मरियम मग्दलिनी नुङ कोङमी मरियम येशूकु सु़लु़म रेप्डा लक्ची।
2मेसिन्डा कोचोत्ति सुबुरुक्सी लस्ता, हेङालोने पाह्रीलामका मिप्रङमाकु कोले पाह्रीचो़ योक्ता। मेम्मा सु़लु़मकु ख्रेमलुङ रिल्लु़मा मेडला गन्डा। 3मेरामकु ङाली ब्ल्याक्ची होङङा वाक्ता, मा उ ये फोमु होप्माम बुबुयाम बाइडा। 4लपा सिपाहीमिमका पाह्रीचो़ ल्वाम्डिमा उनी ङिमुका रुड्डु़मी, मा उनी न ना थो़मकाम दु़म्मिडी।
5मेकोतिमा पाह्रीचो़का मे मेसेमचिपलाई र्वाक्ता, “मेङिची, क्रूसडा चेट्मिडिम येशूलाई माल्तोङा लेन्ची र्वाक्पा गो चक्पु। 6गुमी आसिन्डा मेबुमी, गुमीका र्वाम्डिम होम्साका गुमी सिमुलाम बम्गेम्डिम बु। बिक्ची, उनी रो़म बाइडाम खोम रेप्ची। 7दाला लक्चिमा उनी सीसिपामिमलाई आरे र्वाक्ची, ‘गुमी सिमुलाम बम्गेम्डिम बु, मा गानीडाम ङादो गालील क्षेत्रनो लक्तोङा बोमी। गुमीलाई गानी मेनो ल्वानी’ गानीलाई गो र्वाङ्डोम मिम्नी वो।”
8मेसेमचिप मे सु़लु़मलामका लक्ल्याट्ची। मेर्चिप ङिपा नुङ भ्रसिद्वाक्पा बाच्ची। येशूकु सीसिपामिमलाई सेला थो़बेड्डा मेर्चिप ओन्ची।
9येशूका कोचोत्ति मेर्चिपलाई डार्मिडिमा “सेव!” र्वाम्डी। मे मेसेमचिप येशूकाडा रोक्चिमा उनी खेल चु़म्साका गुमीलाई सेव साट्ची। 10मेकोतिमा येशूका मेर्चिपलाई र्वाम्डी, “मेङिची, लक्चिमा आमा ल्वाकमिमलाई गालील क्षेत्रनो लक्नी बेचिमी, मा मेसिन्डा मेर्मिमका गोलाई ल्वाङिमी।”
सिपाहीमिमकु सेला
11मे मेसेमचिप लाम्दीडा लक्तोङा बेच्चिलो सु़लु़म लपा याङ सिपाहीमिम वो शहरथो़ ख्लोम्सीम्डिमा मेसिन्डा दु़स्ताम खोत्ले ल्वाकु दुथाम ङाउ डु़म्लाचो़मिमनुङ सो़म्डी। 12ङाउ डु़म्लाचो़मिम ङाउमिमनुङ घ्रो़म्मिडिमा मेर्मिमका मुलु़ बेम्डी। मेम्मा मेर्मिमका सिपाहीमिमलाई हापा खउलुङ ग्वाम्डी, 13मा र्वाम्डी, “गानी आरे र्वाक्नी वो, ‘सिन्था गुकु अम्चेट्पा बात्तोकोलो येशूकु सीसिपामिम रोम्डिमा उ रो़म खुम्ल्याम्डी रेछा।’ 14किब्दी साखामचो़का ओराम ल्वा थो़स्तु़ माला गुकु गुलाई बिसिबेन्कु, मा गानी हाम वो मेदु़म्नी।” 15मे सिपाहीमिमका खउलुङ रम्डिमा यहूदी ङाउमिमका बेबेट्मिडिम होङङा मेर्मिमका बेम्डी। आथामबिलि वो यहूदीमिमगोडा ओराम ल्वा फोन्सिड्डाम बु।
डोक्पु खुन्चु़म
(मर्कूस १६:१४-१८; लूका २४:३६-४९; यूहन्ना २०:१९-२३; थु़र्मा १:६-८)
16मेकोतिमा येशूका लक्नी बेम्डिम गालीलडाम पोप्चङडला को-कोले (११) सीसिपामिम लम्डी।#मत्ती २६:३२; मर्क १४:२८ 17मेर्मिमका गुमीलाई ल्वाम्डिमा सेव साट्मिडी, लावो याङका ने मुर्मिडी। 18येशू मेर्मिमकाडा रोम्डिमा र्वाम्डी, “सुबु नुङ पाह्रीडला खोत्ले साखाम माम्चु़नीका गोलाई ग्वाङ्डिमिम बु। 19मेम्मिमका लक्निमा खोत्ले सामाडाम मु़चु़मिमलाई आमा सीसिपा दु़म्बेट्नी, मा पाप, तारापाचो़ नुङ सेपा पेलकु नङडा मेर्मिमलाई कु-रु़दु़म ग्वाक्निमी,#थु़र्मा १:८ 20मा गो गानीलाई बेबेट्निनिम होम्साका खोत्ले ल्वा होङङा दोमु मेर्मिमलाई सीनिमी। रेप्नी, सु़म्दिसेर हुक्पा थारीसम्म वो गो गानीनुङ दु़म्ङुम बुङु।”
Currently Selected:
मत्ती 28: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
