मर्कूस 5
5
येशूका मु़चु़लामका मुनाङपेल ख्लुम्डिम
(मत्ती ८:२८-३४; लूका ८:२६-३६)
1मेकोतिमा येशू उनी सीसिपामिमनुङ दिरिदिनकु होनोहोम्बुथो़म गेरासेनस देलडा रोम्थिम्डी। 2गुमी कुबी-बोक्सालामका पाखानो लुम्डी मेडे सु़लु़मदुडाम बुड्खुमडा मुनाङपेलका हुपा कोले मु़चु़का गुमीलाई क्रो़म्डा रोक्ता। 3मेराम मु़चु़ सु़लु़मदुबाडे बाइथाल्ला मा सु़का वो मेरामलाई सेल रिवाकाङा वो बन्थामु मेचाप्मिवाम बाइडा। 4हेङालोने मेरामलाई हापाखेपङा सेल रिवाका उमा ल्वा-खेल बसाका जु़ल्मिडिम बाइडा। लावो मेरामका मे उमा ल्वा-खेलडाम सेलकु रिवामिम रो़-रो़ फ्यास्थाल्लु़, मा मेरामलाई ल्वाडा जु़ल्मु चापा सु़ वो मेबामिवा। 5मेराम नेम्फु-सिन्था पोप्चङ नुङ सु़लु़मदुबाडे येत्तो-दुक्तो, उ त्वाका त्वापलाई ङा लुङका पार फक्तो लाम्दिथाल्ला।
6मेरामका येशूलाई होनोवाम ङा ल्वास्तु़मा ओन्तो लस्तामा क्रचु़खुम बेत्तोङा गुमीलाई सेव साड्डु़। 7मेकोतिमा मेरामका डोक्पु लो़लामका येत्तोङा र्वाक्ता, “खोत्लेडलाम साखामनुङमा माम्चु़नीकु चो़ येशू, गानी गोलाई हाम बोमु माल्ङिनिमिम? गो माम्चु़नीकु नङडा र्वाङु, गोलाई दु़खा मेग्वाङनी।” 8हेङालोने येशूका मेरामलाई आरे र्वाम्डिम बाइडा, “ए मेक्षेपा लो़म! मेराम मु़चु़लामका लुक्ल्याडा।”
9गुमीका मेरामलाई, “इमा नङ हाम?” र्वाम्डिमा हिलाबेम्डी।
मेरामका र्वाक्ता, “आमा नङ फौज, हेङालोने गुकु छो़म सेर्पा बुकु।” 10मेरामका येशूनुङ, “ओराम देललामका गुकुलाई मेख्लुक्किनी” र्वाक्ताम-र्वाक्तामङा बु़डु़होम बाइडा।
11मेकोतिलो मेसिन्डाङा मे पोप्चङ फारबाडे छो़म सेर्पा ब्वामिम जात्तोङा बेम्डी। 12मेकोतिमा मुनाङपेलमिमका येशूनुङ र्वाम्डी, “गुकुलाई होनो ब्वामिमगोनो हुमु ग्वाक्किनी, मा गुकु मेर्मिमगोनो हुकु” र्वाम्डिम-र्वाम्डिमङा बेम्डी। 13मेकोतिमा येशूका मेर्मिमलाई ब्वामिमगोनो हुमु ग्वाम्डी, मा मे मुनाङपेलमिम पाखा लुम्डिमा ब्वामिमगोनो हुम्डी। मेसिन्डा न धु़मसङ (२,०००) ब्वामिम मेराम पोप्चङ धालीङा ओन्तो लम्डिमा खोत्ले ङा दिरिदिनगोयु़ प्लु़म्सिम्डिमा सिम्डी।
14मे ब्वा रेपामिम मेलामका स्वाम्ल्याम्डी, मा शहर नुङ देलगुथाबाडे लम्डिमा मेराम ल्वा थो़बेट्मिडी। मेकोतिमा मेसिन्डा हा-हाम दु़स्ताम बाइडा र्वाक्साका मु़चु़मिम रेप्डा रोम्डी। 15मेर्मिम येशूकाडा रोम्फाम्डिलो मे मुनाङपेलनुङमा मु़चु़, उहेमनुङ ङादो छो़म सेर्पा मुनाङमिम बाम्थाल्मिडिम बाइडा, मेराम मु़चु़ ये फतासिड्डामा उ ननुङमा ङा गन्तासिट्पा ल्वाम्डी। मेम्मिमका मेर्मिम छो़म ङिम्डी। 16ओराम ल्वापामिमका मे मुनाङपेलनुङमा मु़चु़ नुङ ब्वामिमलाई हा-हाम दु़स्ताम बाइडा मेर्मिमनुङ सो़म्डी। 17मेम्मा मेर्मिमका येशूलाई मे उनी देललामका वाङथो़ङा लक्नी र्वाम्डिम-र्वाम्डिमङा बेम्डी।
18मेकोतिमा येशू कुबी-बोक्साडला हुत्तोङा बेम्डिलो ङादो मे मुनाङपेलमिमका हुप्डु़म मु़चु़का वो गुमीनुङङा लङु र्वाक्ताम-र्वाक्तामङा बु़डु़। 19लावो येशूका मेरामलाई गुमीनुङ लमु मेग्वाक्मिवा, मा र्वाम्डी, “गाना इमा नेम लक्सा, मा इमा लागि ङाचो़का हाङको छो़म खारी बेम्डिम बु, मा हाङकोम न-थो़म रेम्बेम्डिम बु, मेर्मिम खोत्लेङा इमा नेमडाममिमनुङ सो़या।” 20मेकोतिमा मेराम मेलामका लस्तामा येशूका गुडला हा-हाम बेम्डिम बाइडा, मेर्मिम खोत्ले ङा डेकापोलिसडाम खोत्ले मु़चु़मिमनुङ सो़मु चो़म्डु़। मेराम ल्वा थो़पा मु़चु़मिम खोत्ले ङा ङाङाया दु़म्मिडी।
याइरसकु चो़ नुङ येशू लु़पा मेसेम
(मत्ती ९:१८-२६; लूका ८:४०-५६)
21आथावो येशू कुबी-बोक्साडलामका दिरिदिन होनोहोम्बु लम्डिलो उनी होनो-आथो़ छो़म सेर्पा मु़चु़मिम खोम्सिम्डी, मा येशू ने मे दिरिदिन फारबाडेङा बाम्डी। 22घ्रो़म्दीनेमगोडाम उनी ङाउमिमगोडाम कोले याइरस र्वाक्मा मेसिन्डा रोक्ता, मा येशूलाई ल्वास्तु़लो कुम्स्तामा उनीमा खेलडा सेव साड्डु़। 23मेकोतिमा “आमा नानी सिमुङा खाप्डु़म बु। मेम्मिमका गानी बिक्नीमा गुडला इनीमा ल्वा जु़ल्नी। मेकोतिमा गु सनु़, मा नु़नु़” र्वाक्ताम-र्वाक्तामङा बु़डु़। 24मेम्मिमका येशू मेनुङ लम्डी।
मेकोतिलो छो़म सेर्पा मु़चु़मिम वो उनी होनोलाम आथो़लाम क्र्वाङ-क्र्वाङ उन्बेत्तो गुमीनुङ लम्डी। 25को-न (१२) थ ङादो आथामङा रो़मलामका सिसि लक्पा सोमोरीनुङमा कोङ मेसेम वो मेगोडा बाइडा। 26मेराम मेसेम हापा डाक्टरमिमकाडा लब्डा-लब्डा छो़मङा दु़खा ल्वामुदु़म्स्तु़म बाइडा। गुनुङ बाट्पा खोत्लेङा हुमु दु़म्स्तु़म बाइडा, मा वो गु समु ने मेएँ छो़म मेजो़होमका नो़त्तो लस्ताम बाइडा। 27गुका येशूकु दुथाम थो़स्तु़म बाइडा। मेम्मिमका मे सेर्पा मु़चु़मिमकु गोलामका बिक्तामा येशूकु चङलाम उनी हुम-ये लु़प्डु़। 28हेङालोने मेरामका उमा नगोडा, “गो उनी ये कोङङा लु़म्मु ल्वाउतो माला वो सङु” र्वाक्पा मिम्स्ताम बाइडा। 29मेकोतिलो ङा मेरामकु सिसि लक्पा सोमोरी सस्ल्याड्डा, मा मेरामका उमा रो़मडाम सोमोरी सेल्सिड्डाम लु़लेड्डु़।
30मेकोतिलोङा येशूका उनीमा यु़म गुमीलामका लुक्पा लु़लेट्मिडिमका मे सेर्पा मु़चु़मिमथो़ ख्लोम्सीम्डिमा र्वाम्डी, “गोलाई सु़का लु़प्ङिडी?”
31उनी सीसिपामिमका र्वाम्डी, “आकोम छो़म सेर्पा मु़चु़मिमका इनीमा हानोलाम आथो़लाम क्र्वाङ-क्र्वाङ उन्बेत्तोङा बेपा ने ल्वानिमिमङा बु, मा वो ‘सु़का लु़प्ङिडी’ र्वानिमिम?”
32लावो गुमीलाई लु़पा मु़चु़ छेमु गुमीका होनो-आथो़ खिर्सिक्तोङा रेम्मु चो़म्मिडी। 33मेकोतिमा मे मेसेमका उ त्वापलाई हाम दु़स्ताम बु र्वाक्पा चडु़। मेम्मा येशूकाडा रोक्तामा उनीमा खेल चु़म्डु़मा ङिमुका रुक्तोङा आच्छाङाकाम खोत्ले ल्वा गुमीनुङ सो़यु़डु़। 34मेकोतिमा येशूका मेराम मेसेमलाई र्वाम्डी, “ए यु़म्पी, इमा थो़रकाङा गाना सन्नाम बु, मेम्मिमका इमा न भ्रसित्तो लक्सा, मा इमा सोमोरी वो हेम्सिनु़।”
35गुमी जेत्तोङा बेम्डिलो याइरसकु नेमलामका बिक्पा कोङनिम मु़चु़मिमका याइरसलाई र्वाम्डी, “इनी चो़ ने सिम्ल्यामु दु़म्स्तु़म बु, आथा ने ङाचो़लाई दु़खा मेग्वानिमी।”
36लावो मेर्मिमका र्वाम्डिम ल्वाथो़ न मेसोक्साका ङा येशूका याइरसलाई र्वाम्डी, “मेङिसा, थो़र कोङङा लु़या।”
37मेकोतिमा येशूका पत्रुस, याकूब नुङ उमा ल्वाक यूहन्नाडाम वाङमी सु़ वो गुमीनुङ लमु मेग्वाक्मिवा। 38गुमी याइरसकु नेमडा रोम्फाम्डिलो मेसिन्डा येपा-दुक्पा मा ख्राप्तोङा बेपामिम नुङ येत्तो-ख्रापामिम ल्वाम्डी। 39येशू गोनो हुम्डिमा मेर्मिमलाई र्वाम्डी, “हेङा गानी ख्राम्नी, येनी-दुनिमिम? ओराम चो़च्चो़ ने सिडाम मिबु, अम्चेड्डाम कोङङा बु।” 40लावो उनीमा ल्वा थो़म्डिमा मेर्मिम रिम्साम्डी।
मेकोतिमा गुमीका मेर्मिम खोत्ले ङा पाखानो ख्लुम्डिमी, मा मेराम चो़च्चो़कु मामपाप नुङ गुमीनुङ बाट्पा उनी सीसिपामिम मेराम चो़च्चो़ बाट्पागोनो लम्डी। 41मेकोतिमा गुमीका मे चो़च्चो़कु ल्वाडा जेट्मिडिमा मेरामलाई र्वाम्डी, “तालिता कुमी” मेराम र्वाक्मा “ए यु़म्पी! गो गानालाई र्वाङु, बका।” 42मेकोतिलो ङा मेराम चो़च्चो़ बक्ल्याड्डा, मा होनो आथो़ लाम्दिमु चो़म्डु़। मेम्लो गु को-न (१२) थकाम बाइडा मेराम ल्वाम्डिलो मेसिन्डा बाट्पामिम खोत्ले ङा ङाङाया दु़म्मिडी। 43गुमीका मेर्मिमलाई र्वाम्डी, “मा-मासो़! ओराम ल्वा सु़कावो मेथो़मिनु़ वो।” मेकोतिमा मे चो़च्चो़लाई हाम-हुम पोमुथोक ग्वाक्नी बेम्डिमी।
Currently Selected:
मर्कूस 5: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
