रोमी 16
16
पावलकु सेव
1गो आकीमा रिचो़ ल्वाक फिबीनुङ छेबेनिनी, उहेमका किंक्रिया मण्डलीडा ख्लो़यु़मी। 2माम्चु़नीकु सेपा मु़चु़ होम्साकाङा गुलाई ङाचो़डा जो़होमका हुनाखाना बेनी र्वाक्साका गो र्वाङु। गुलाई खेरेला दु़म्पा ल्वाडा ख्लो़नी, हेङालोने गुका हापा मु़चु़मिमलाई ख्लो़यु़डु़मी मा गोलाई वो ख्लो़ङ्डिम बु। 3गोनुङङा खारी बेपा प्रिस्का नुङ अकिलासलाई वो आमा सेव र्वाङ्साङनी।#थु़र्मा १८:२ 4मेर्चिपका गोलाई गेमु लागि उची त्वापङा र्वाप्डा सिच्चिम बाइडा। मेर्चिपलाई गो कोङङा मेएँ, लावो वाङसामाडाम मण्डलीमिमका वो आला र्वाम्डी। 5मेर्चिपकु नेमडा खोम्सिक्पा मण्डलीमिमलाई सेव र्वाङ्साङनी। आमा द्वादीबुङ ङोप्सो़ एशियाडा खोत्लेडाम ङादोम थो़रलु़पा इपेनितसलाई सेव बु। 6इनीमा लागि हापा ब्राम्दु़ल्वा बेपा मरियमलाई वो आमा सेव बु र्वाक्नी। 7एन्ड्रोनिकस नुङ यूनियस र्वाक्मा आमा त्वाकु मु़चु़चिप मा गोनुङङा चसिक्पा यहूदी ङोप्सो़मिमलाई आमा सेव र्वाङ्साङ्नी। थु़र्मामिमगोडा मेर्मिमकु नङ हापा दोस्ताम बाइडा। मेम्मा गो थो़रलु़मु हापा ङादोङा मेर्मिमका ख्रीष्टडा थो़र लु़म्डिम बाइडा। 8एम्प्लीआतसलाई आमा सेव बु। गुका ङाचो़डा थो़र लु़डामका गो गुलाई रिखाम बेउ। 9गोनुङ कोयोङा ख्रीष्टकु खारी बेपा उर्बानस नुङ द्वादीबुङ ङोप्सो़ स्ताखुसलाई सेव र्वाङ्साङनी। 10ख्रीष्टकु खारीडा थो़रलु़इमिम अपोल्लोसलाई सेव र्वाङसाङ्नी। अरिस्तोबुलसकु नेमडाममिमलाई वो सेव बु। 11आमा त्वाकु मु़चु़ हेरोदियनलाई सेव बु मा ङाचो़डा थो़रलु़पा नर्किससकु नेमडाम खोत्लेलाई सेव र्वाक्ताम बु र्वाक्साका खोत्लेलाई थो़बेन्साङनी। 12ङाचो़कु खारी बोमुडा हेल्लो वो मेघ्रु़म्पा त्रुफेना नुङ त्रोफोसालाई सेव। ङाचो़कु खारीडा छो़म ब्राम्दु़ल्वा बेपा द्वादीबुङ रिचो़ ल्वाक परसीसलाई सेव र्वाङसाङनी। 13ङाचो़का थुट्मिडिम रुफसलाई सेव। आमा त्वाकु माम होप्माम ङा रूफसकु मामलाई वो सेव बु।#मर्क १५:२१ 14असिंक्रितस, फ्लेगन, हर्मेस, पत्रोबास, हर्मास, मा मेर्मिमनुङ बाट्पा वाङमिम वा-ल्वाकमिमलाई वो आमा सेव बु। 15फिलोलोगस, युलिया, नेरियस मा उमा जाउमो ल्वाक नुङ ओलिम्पास मा मेर्मिमनुङ बाट्पा माम्चु़नीकु खोत्ले सेपा मु़चु़मिमलाई आमा सेव बु। 16गानी कोलेका कोङमीलाई सेपा रिखामनुङमा दु़म्साका सेव साट्नी। आसिन्डाम सेपा खोत्ले मण्डलीका गानीलाई सेव र्वाम्डिम बु।
पावलकु चक्थो़म लु़म्ला
17द्वादीबुङ वा-ल्वाकनी, गानीगोडा गो-फ दु़म्पा मा रिबुसी किन्बेट्पा मु़चु़मिमडाम चङचङया बानी र्वाक्साका गो गानीलाई छो़म र्वाङु। मेर्मिमका इनीमा सीसिकु कोर्थो़लाम जेमी। मेप्माम मु़चु़मिमडाम वाङ बानी। 18हेङालोने मेर्मिमका ने ङाचो़कु खारी बेपा मेएँ लावो त्वाकु ख्वाचेपकाम लागि कोङङा बोमी सो़। मेर्मिम ने ड-ड जो़पा लिसीमिमा भ्रपा जेमी मा जो़पा न-गोकाम मु़चु़मिमलाई गोलामका वायम डमी। 19गानी माम्चु़नीका र्वामिमिम थो़नी र्वाक्पा ल्वा खोत्लेका थो़म्डिम बु। मेम्मिमका ओराम ल्वाकु दुथाम गो गेर्सिक्पा बुङु। गानी जो़पा खारी बोमुडा नेप्चीनुङमा दु़म्नी मा मेजो़पा खारी बेसीडा मुमा मान्थिम दु़म्नी र्वाक्पा आमा न बु। 20न-गो भ्रसिबेट्पा माम्चु़नीका शैतानलाई दालाङा इनीमा फेम-खेलगोयु़ दु़म्बेन्मी। इकीमा ङाचो़ येशूकु दिदाम गानीडला दु़म्नु़। 21गोनुङङा खारी बेपा तिमोथी मा आमा यहूदी ल्वाकमिम लुकियस, यासोन नुङ सोसिपात्रोसका वो गानीलाई सेव र्वाम्डिम बु।#थु़र्मा १६:१
22ओराम सेलाखाजेम र्याक्पा गो तर्तियसका ङाचो़कु नङडा सेव र्वाङु। 23आमा चापेडुपे बेपा मा खोत्ले मण्डलीलाई हुनाखाना बेपा गायसका गानीलाई सेव र्वाक्ताम बु। गायसकु नेमडा खोम्सिक्पामिम खोत्लेकाम सेव बु। ओराम शहरडाम कोषाध्यक्ष इरास्तस नुङ क्वार्टस ल्वाकचिपका वो गानीलाई सेव र्वाक्चिम बु।#थु़र्मा १९:२९; १ कोर १:१४; २ तिमो ४:२० 24इकीमा ङाचो़ येशू ख्रीष्टकु दिदाम गानीडला दु़म्नु़म बुनु़। आमेन।
25येशू ख्रीष्टकु दुथाम गो दो़उतोम जो़पा-सेलालाम माम्चु़नीका इनीमा थो़रलु़सीडा सोनुङमा दु़म्बेनिमी। ओराम ल्वा सु़म्दिमोलो आथामङा थक्मा बाइडा र्वाक्साका छ्याङलो छ्याङलो रेम्बु़डु़म बु। 26लावो ओम्लो माम्चु़नीलाम जेपामिमका र्याम्डिम खाजेमडा थेसीथेट्पा बेसाका र्याक्मा बु। हेल्लो लोवो दु़म्पाम बाट्पा माम्चु़नीका र्वाम्डिम होम्साका खोत्ले मु़चु़का ख्रीष्टडा थो़रलु़साका गुमीका र्वामिमिम थो़पा दु़म्मिनु़ र्वाक्साका ओराम थक्मा जो़पा-सेला खोत्ले सामाकाम मु़चु़मिमगोडा थो़बेट्मा बु। 27खोत्लेम थोक थेट्पा चक्पा माम्चु़नीकाम येशू ख्रीष्टलाम हेल्लो लोवो यु़म-झ्वानु़म बुनु़। आमेन।
Currently Selected:
रोमी 16: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.