PURA' 11
11
Musa Maré Kali' Ratnan Até Anak Luk Atun
1Idi kebala Tuhan ni Musa, “Sebuleng teh dereh luk ruenKu ngacing kuan raca' Masir idi anak itinneh. Pangeh ineh ieh miak nima' nemuyuh nalan. Setuneh ieh miak ngusu nemuyuh rat ieni. 2Idi nekini do' ngecuk nelun Israil mutuh rat nelun luk inandeh pekalai, amas idi pirak.” 3Idi Tuhan nemaré nedeh ineh inan lun Masir méi'. Meluun teh Musa ineh selemulun luk mebala bang bawang Masir, ieh ineh pa kiung amung tareh raca' idi anak itin raca' pana'.
4Idi kebala Musa nan raca', “Bala Tuhan kudeng ini: Kareb tangal dacem Ui sikal remuat ngelibut bawang Masir. 5Idi amung anak luk atun bang bawang Masir ineh maté, ratnan anak raca' luk miak ngelibal raca' macing inan anak decur luk demulun luk tupeh déi' lepo, idi amung anak pung luk atun teh. 6Idi miak inan tangi' luk rayeh maput bawang Masir, na luk kudeng ineh mangun atun mepad kudeng tido ineh, idi muci pana' nateh luk kudeng ineh. 7Iamo' arang amung lun Israil sebuleng uko' pana' nateh mekuu' mangang, do' inan lemulun, idi inan pung pana', pad muyuh kali' Tuhan nganau' baken arang lun Masir idi lun Israil.” 8Idi kebala Musa, “Amung lun tarehmu ini miak amé' negku idi tekeradung negku idi pebala, ‘Buro iko, dengan amung anak itin luk maya' namu.’ Pangeh ineh miak ui buro.” Idi Musa neremuat rat pa kiung raca' dengan megateh niat.
9Kebala Tuhan ni Musa, “Raca' na tu sikal maya' balamu, pad tanu'-tanu'Ku luk melalud meluun mula' bang bawang Masir.” 10Musa idi Arun pangeh nenganau' mula' tanu' luk melalud pa kiung raca', iamo' Tuhan nengetueh niatneh pad ieh na nemaré nelun Israil remuat rat bang bawangneh.
Currently Selected:
PURA' 11: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
