PURA' 15
15
Nani Musa
1 #
Lin 15.3
Kareb ineh Musa idi lun Israil nemenani nani ini kuan Tuhan:
“Ui sikal menani kuan Tuhan,
ngaceku rayeh tu laludNeh;
pangeh Ieh nemepet kuda dengan
lun luk maya' ineh bang abpa'.
2 #
Nani 118.14; Yes 12.2 Tuhan ineh tuehku;
idi Ieh luk nengulun negku.
Ieh ineh Allahku, idi ui sikal ngubur Neneh.
Ieh Allah tamanku, idi ui sikal ngerayeh Neneh.
3Idi Tuhan ineh Lun Rayeh Baweh;
Tuhan, ieh ineh ngadanNeh.
4“Amung baweh Masir dengan kerétadeh pangeh tila'Neh bang abpa' rayeh.
Idi lun rayehneh luk meluun tueh pangeh tiremNeh bang Abpa' Pisui#15.4 Abpa' Pisui, ieh ineh Abpa' luk Mesia'..
5Abpa' rayeh pangeh nengereb nedeh.
Ideh mepad kudeng tarem batu bang ribaruh.
6O Tuhan, rayeh lalud langenMu pa tinueh.
Ku ineh Iko pangeh nengelaya' amung bunu'!
7Dengan rayeh laludMu, Iko pangeh nengaté amung bunu'Mu.
UsehMu mebudung pad ngeseb nedeh,
mepad kudeng uduh luk tekering.
8Iko nengiup luun abpa' rayeh, pad abpa' kemubul.
Idi abpa' ineh tuped mepad kudeng alad;
amung lipak nugkeng uned abpa' ineh.
9Idi kebala bunu' ineh, ‘Ui ngerada' nedeh, pad ngigket nedeh;
ui mabpat binawehdeh, idi ngalap luk pianku.
Ui ngangat pelapetku; langenku miak ngaté nedeh.’
10Iamo' Iko nemebper buiMu, pad lun Masir ineh nened.
Ideh neturem mepad kudeng semara' bang lipak luk rayeh.
11“O Tuhan, idé luk mepad kudeng Iko arang amung allah?
Idé luk mepad kudeng Iko, luk rayeh bang ligan?
Idé luk nganau' tanu' idi kekamen luk melalud mepad kudeng luk inau'Mu?
12Iko natang langenMu pa tinueh,
pad tana' nenelen bunu' kai.
13Dengan awaMu Iko nguyut pupu luk pangeh inuli'Mu.
Dengan tuehMu Iko nguyut nedeh macing inan su luk inanMu luk meligan.
14Amung pupu ninger, pad ideh megegker.
Idi lun Pilistin pelaba tot.
15Idi lun rayeh-rayeh Edom matot;
idi lun rayeh-rayeh Moab pana' megegker;
idi lun Kanaani pana' na mekuu' peh.
16Gagap idi gegker macing nedeh.
Ideh nier tuehMu O Tuhan,
pad ideh melaya' ku totdeh,
pad macing amung pupuMu guta, O Tuhan,
idi amung pupuMu semuet bang bawang Kanaan.
17Iko nguit nedeh semuet idi ngeletep nedeh luun surudMu,
su luk pijani'Mu inanMu mudeng, O Tuhan,
Su luk Meligan luk pangeh riniput ticu'Mu.
18O Tuhan, Iko raca' macing ruked-ruked.”
Nani Miriam
19Lun Israil nenalan su luk netekering nan uned abpa' ineh. Iamo' kareb keréta lun Masir, dengan kuda idi lun luk ngimet ineh nacing bang abpa', idi Tuhan nengelubed abpa' pa luundeh.
20Idi Nabi Miriam, kinanak Arun luk decur ineh, nengalap karingneh, idi amung decur pana' nemaya' neneh, idi ngura' karing idi ngalai. 21Idi Miriam menani kuandeh, kenanineh,
“Ngubur Tuhan ngaceku pelaba
rayeh laludNeh.
Kuda idi lun luk tudo luunneh,
pangeh tila'Neh bang abpa'.”
Bued Abpa' Luk Mepét
22Pangeh ineh idi Musa nenguit nelun Israil nalan rat Abpa' Pisui#15.22 Abpa' Pisui,ieh ineh Abpa' luk Mesia'. ineh, macing déi' su luk ali-ali luk titen Sur. Idi ideh nenalan déi' su luk ali-ali ineh teluh aco kinioneh. Iamo' na luk idi abpa'. 23Idi ideh nacing déi' Mara, su luk inan abpa' luk mepét pad na miak rupen. Ngaceku ineh ideh neneten ngadan su ineh Mara. 24Kareb ineh idi pupu ineh ngedureng ni Musa, kebaladeh, “Anunké luk rupen tau?” 25Idi Musa nesembayang inan Tuhan. Idi Tuhan nemada' su sirenneh aceh kayuh. Idi ieh nenganau' ineh bang abpa'. Petacu abpa' ineh metalang.
Idi su ineh Tuhan nemaré ukum nedeh, idi su ineh teh Ieh nenutun nedeh. 26KebalaNeh nedeh, “Kudeng matu-matu muyuh maya' balaKu idi nganau' luk matu pa kiungKu idi ngimet amung ukumKu, na Ui ngukum nemuyuh ku ét luk icingKu kuan lun Masir ineh. Ui ini Tuhan luk ngedo' ét muyuh.”
27Idi ideh nacing déi' Elim. Su ineh inan pulu' dueh bued abpa' idi tudu' ngepulu' lawa piasau. Idi ideh nelupo su ineh muneng ku abpa' ineh.
Currently Selected:
PURA' 15: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
