PURA' 21
21
Ratnan Demulun
(Bad 15.12–18)
1“Do' maré nelun Israil amung ukum ini: 2#Uk 25.39–46 Kudeng iko melih aceh demulun lun Iberani, anem lak kinioneh ieh miak ngakem kuanmu. Iamo' bang lak luk ketudu' do' ieh puatin, dengan na ngua' anun-anun. 3Kudeng ieh macing dengan na awan idi ieh remuat dengan na awan teh. Kudeng ieh inan awan, do' awanneh ineh simén maya' neneh muli'. 4Kudeng tuanneh pangeh nemaré awan kuanneh, idi decur ineh pangeh nenganak anak deléi idi decur teh, idi decur ineh dengan anak-anakneh kuan tuanneh, idi deléi ineh sebuleng muli'. 5Iamo' kudeng demulun ineh pebala dengan megala', “Ui méi' inan tuanku, idi awan, idi anakku. Na ui sikal mepuit,” 6idi do' tuanneh nguit neneh pa kiung Allah, idi nguit neneh amé' munung tanga' ruma'neh kian iring diri tanga'. Idi do' tuanneh nebpek lalidneh, pad ieh mangun ku demulun seruked ulunneh.
7“Idi kudeng selemulun masui anakneh luk decur, idi na ieh miak mepad kudeng demulun deléi. 8Kudeng ieh na pinian tuanneh, luk pangeh nemili' neneh kuan bururneh sebuleng, do' tuanneh ineh nima' neneh uen nguli'. Tuanneh ineh na inan lalud masui neneh kuan lun pupu baken, ngaceku lawéneh ineh na mesiri. 9Idi kudeng ieh tinuduk dengan anakneh luk deléi, idi do' ieh ngerawé neneh mepad kudeng anakneh sebuleng. 10Kudeng seburur deléi ngapid, na ieh miak ngetenga' akan awanneh luk atun ineh idi ayungneh, idi na ieh miak ugka' pamung rudap neneh. 11Idi kudeng ieh na nganau' kudeng ini, miak decur ineh muli' dengan na nguli' belih bururneh.
Ukum Sala' Luk Ruen Rungen
12 #
Uk 24.17
“Idé'-idé luk necat seburur lemulun macing maté, na miak na ieh pitayen. 13#Iap 35.10–34; Bad 19.1–13; Yus 20.1–9 Iamo' kudeng na inau' rungen, ngaceku na ieh sikal ngaté neneh, ieh miak buro amé' su luk litepKu kuan muyuh. Idi su ineh ieh uen ngelibung peh. 14Iamo' kudeng seburur lemulun ngaté lun denganneh dengan inau' rungen, idi na miak na ieh pitayen, sagan pana' ieh buro amé' pa atun bubpunKu pian uen ngulun.
15“Idé-idé luk necat taman kian tinanneh, kali' rungen ieh pitayen.
16 #
Bad 24.7
“Idé-idé luk naban lemulun, kudeng ieh masui neneh, kian kudeng ieh ngimet neneh ku demulunneh, na miak na ieh pitayen.
17 #
Uk 20.9; Mat 15.4; Mrk 7.10 “Idé-idé luk ngediman taman kian tinanneh, na miak na ieh pitayen.
18“Idi kudeng inan lemulun luk pekedaluh idi seburur mitung seburur ku batu kian mukut neneh lek, kudeng ieh na maté, na lun luk ngedereh neneh ineh pitayen. Iamo' kudeng léi luk pidereh ineh mét, 19iamo' na mio teh ieh do', sagan pana' ieh ngerukud, idi lun luk nengedereh neneh ineh na miak na ngelibal aco serukedneh tudo, idi ngasa' neneh pad ieh do'.
20“Idi kudeng selemulun mebal demulunneh deléi, kian decur lek, pad ieh maté, na miak na ieh kumin. 21Iamo' kudeng demulun ineh mulun seaco kian dueh aco lek, idi na ieh kumin, ngaceku petap rugi' tuanneh ku ieh.
22“Kudeng inan lun luk pekedaluh idi necat sebuleng decur luk mali' pad anakneh musul, iamo' na uratneh baken, na miak na lun luk nenecat neneh ineh kumin maya' putuh awanneh, idi luk uen lun luk mutut besara' ngeletep. 23Iamo' kudeng decur ineh murat, idi lun luk nengurat neneh ineh kumin, ieh ineh niat libal niat, 24#Uk 24.19–20; Bad 19.21; Mat 5.38 mateh libal mateh, lipen libal lipen, ticu' libal ticu', kukud libal kukud, 25angur libal angur, balang libal balang, bara' libal bara'.
26“Kudeng selemulun necat mateh demulunneh luk deléi kian decur lek pad mateh demulunneh nedat, na miak na demulun ineh puatin ku ua' matehneh. 27Idi kudeng ieh mepag demulunneh, pad lipenneh merukep, na miak na demulun ineh puatin ku ua' lipenneh.
Ukum Ratnan Aya'
28“Kudeng aceh sapi' ngegkul aceh lemulun pad ieh maté, na miak na sapi' ineh bitungin ku batu macing maté. Uangneh na miak kenen. Iamo' luk kuan sapi' ineh na kumin. 29Iamo' kudeng sapi' ineh megéi' ngakat, idi nekali' lun luk kuanneh ineh, idi na ieh nginita neneh, idi kudeng sapi' ineh ngaté seburur lemulun, na miak na sapi' ineh bitungin ku batu macing maté, idi lemulun luk kuan ineh pana' pitayen. 30Iamo' kudeng léi luk kuan sapi' ineh simén mayar ukum pad ieh mulun, na miak na ieh mayar petap. 31Iamo' kudeng sapi' ineh ngegkul aceh anak deléi kian decur lek, ukum ineh mepad. 32Kudeng sapi' ineh ngegkul aceh demulun deléi kian decur lek, na miak na luk kuan sapi' ineh ngua' ku usin pirak teluh ngepulu' balad. Idi sapi' ineh pana' bitungin ku batu pad maté.
33“Idi kudeng aceh lubang bang tana' sinima' lun tekerubab, idi lemulun luk ngukat lubang na ngakeb ineh, idi petacu aceh sapi' kian keladai lek peturun bang ineh, 34idi na miak na luk kuan lubang ineh maré libalneh, idi mayar raganeh inan lemulun luk kuan aya' ineh. Iamo' butungneh kuanneh. 35Idi kudeng sapi' seburur ngurat sapi' lun denganneh pad ieh maté, na miak na sapi' luk mulun ineh pisuen, idi usin raganeh uen mabpat dueh. Kudeng ineh teh babpat uang sapi' seluk naté ineh. 36Iamo' kudeng sapi' ineh megéi' ngakat, idi na lemulun luk kuan ineh nginita neneh, na miak na ieh libalen dengan petap, sebuleng sapi' libal sebuleng sapi'. Iamo' luk naté ineh kuan dieh.
Currently Selected:
PURA' 21: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
