PURA' 4
4
Allah Maré Lalud Ni Musa
1Idi kebala Musa, “Iamo' kudeng lun Israil na manu negku, idi na ninger balaku, anunké luk ruenku, kudeng ideh pebala, ‘Na Tuhan nesilagan namu'?” 2Idi kebala Tuhan ni Musa, “Anunké luk bang paladmu?”
Idi kebala Musa, “Rukud.”
3Idi kebala Tuhan neneh, “Patuh ieh luun tana'.” Idi ieh nemepet ineh luun tana'. Petacu ieh nisu' ku menipeh. Idi Musa neburo rat ieneh. 4Idi kebala Tuhan ni Musa, “Ngimet iurneh.” Idi Musa nengimet iurneh, idi ieh nisu' ku rukud baruh peh. 5Idi kebala Tuhan, “Nganau' kudeng ini pad ideh manu Tuhan pangeh nesilagan namu, ieh ineh Allah tepundeh, Ibrahim, Isak, idi Yakub.”
6Idi teh kebala Tuhan ni Musa, “Nuet ticu'mu pa liang kuyu'mu.” Idi ieh nenganau' kudeng ineh. Pangeh ineh ieh nenginat ticu'neh. Idi ticu'neh nekaneh ku ét susud idi mebuda' mepad kudeng salju. 7Idi kebala Tuhan neneh, “Nuet ticu'mu pa liang kuyu'mu teh.” Idi ieh nenganau' kudeng ineh teh. Idi ieh nenginat neneh, idi ticu'neh mepad kudeng ayuneh luk atun. 8Idi kebala Tuhan, “Kudeng ideh na manu namu idi na merapet ku tanu' seluk pun ineh, idi ideh miak manu ku tanu' luk muci. 9Idi kudeng ideh na manu ku tanu' luk dueh ini idi na ninger balamu, do' iko ngalap abpa' rat Abpa' Nil idi tangenmu ieh luun tana'. Idi abpa' ineh miak misu' ku dara'.”
10Idi kebala Musa, “Mutuh do' Tuhan, ui ini lemulun luk na mileh pebala rat mon idi macing nekini. Kareb Tuhan pebala negku pana' meteh teh balaku.”
11Idi kebala Tuhan neneh, “Idéké luk nenganau' tang lemulun? Idéké luk nenganau' lun mebegkeh idi mebengel, nganau' lemulun nier idi mebuser? Ieh ineh Ui ini Tuhan. 12Idi nekini do' iko amé'. Ui miak nengan tangmu, idi Ui mada' namu ratnan luk belénmu.”
13Idi kebala Musa, “Mutuh do' Tuhan, ngecuk nelun baken.”
14Idi Tuhan museh ni Musa, kebalaNeh, “Kudeng apeh kinanakmu Arun lun Liwi ineh? Ui kali' neneh mileh pebala. Idi nekini ieh amé' papu' namu. Kareb ieh nier namu, kali' rungen ieh mawang niat. 15Iko miak mada' neneh ratnan luk belénneh nedeh. Idi Ui miak ngedengan nemedueh kareb medueh pebala, idi mada' nemedueh anun luk ruen medueh. 16Idi ieh miak pebala inan pupu ineh ku libalmu. Idi teh ieh mangun ku libal tangmu, idi iko mangun ku aceh bala Allah kuanneh. 17Ngalap rukud ini bang paladmu, ngaceku ratnan ini iko miak nganau' tuda'-tuda' tanu'.”
Musa Lemubed Amé' Bawang Masir
18Idi Musa nelemubed iné' nan ibanneh Yitro, kebalaneh, “Nima' negku lemubed amé' inan kinanakku luk déi' Masir, ku idi teh ideh mulun.” Idi kebala Yitro ni Musa, “Mesaget iko amé'.”
19Idi kebala Tuhan ni Musa, kareb ieh idi déi' Midian, “Muli' iko amé' bawang Masir. Amung lemulun luk pian ngaté namu ineh pangeh naté.” 20Idi Musa nengalap awan idi anak-anakneh, idi nenguit nedeh maya' keladai idi nuli' iné' bawang Masir. Idi rukud Allah ineh inuitneh.
21Idi kebala Tuhan ni Musa, “Kareb iko lemubed amé' bawang Masir, do' iko nganau' tanu' luk pangeh biréKu namu pa kiung raca'. Iamo' Ui ngetueh niatneh pad ieh na maré pupu ini nalan. 22Do' iko pebala ni raca', ‘Kudeng ini bala Tuhan, Israil, ieh ineh anakKu seluk rayeh. 23#Pur 12.29 Idi Ui pebala namu, nima' anakKu ineh nalan, pad ieh miak sembayang Negku. Iamo' kudeng iko na nima' neneh nalan Ui miak ngaté anakmu luk rayeh.’ ”
24Idi tangal dalan su luk inan nelupo, idi Tuhan nesilagan ni Musa ayuneh sikal ngaté neneh. 25Idi Sipora nengalap aceh iyu batu idi ieh nenunat anakneh luk deléi, idi nemepet kubilneh luun kukud Musa, kebalaneh, “Iko nepaweh negku ratnan dara' ineh.” 26Sipora nepebala kudeng ineh ngaceku sunat ineh. Idi Tuhan nenima' Musa mulun.
27Idi kebala Tuhan ni Arun, “Amé' iko ni Musa déi' su luk ali-ali.” Idi ieh iné' neneh déi' luun pegkung Allah, idi ieh nemuen neneh. 28Idi Musa nemada' ni Arun ratnan amung bala Tuhan neneh, idi amung tanu' luk bida'Neh neneh luk miak ruen. 29Musa idi Arun iné' Masir, idi nengamung lun rayeh-rayeh Israil. 30Idi Arun nemada' bala luk bila Allah ni Musa. Idi Musa nenganau' tanu'-tanu' pa kiung pupu ineh. 31Idi ideh manu kareb ideh neninger Tuhan pangeh méi' kuan lun Israil idi nenier derehdeh, pad ideh netekeradung idi sembayang Neneh.
Currently Selected:
PURA' 4: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
