PURA' 7
7
1Idi kebala Tuhan, “Ui ngikit namu mepad kudeng Allah kuan raca'. Idi Arun kinanakmu miak mangun ku nabimu. 2Iko mada' neneh ratnan amung luk belénKu namu. Idi Arun miak ngecuk ni raca' maré lun Israil remuat rat bang bawangneh. 3#Kek 7.36 Iamo' Ui ngetueh niat raca', sagan tu pana' Ui nganau' mula' tanu' luk melalud bang bawang Masir. 4Idi Ui miak ngedereh bawang Masir. Idi Ui ngeruat bawehKu, ieh ineh pupu Israil, rat bawang Masir. 5Kareb ineh lun Masir kali' idi Ui ini Tuhan, kareb Ui ngegenang langenKu pa luun bawang Masir, idi nguit nelun Israil remuat rat arangdeh.” 6Musa idi Arun nenganau' luk bila Tuhan Allah nedidueh. 7Ulun Musa kareb idi 80 lak, idi Arun 83 lak, kareb didueh pegayam ni raca'.
Rukud Arun
8Idi kebala Tuhan ni Musa idi Arun, 9“Kudeng raca' ngecuk nemedueh nganau' aceh tanu' luk melalud, idi do' iko ngecuk ni Arun mepet rukudneh pa kiung raca', pad ineh misu' ku menipeh.” 10Musa idi Arun iné' ni raca', idi nenganau' maya' kudeng luk icuk Tuhan. Arun nemepet rukudneh pa kiung raca' idi lun tarehneh, idi rukud ineh nisu' ku menipeh. 11Pangeh ineh raca' nenawar nelun luk mileh idi lun luk mangun. Idi dengan bangundeh ideh pana' nenganau' kudeng ineh teh. 12Anid-aniddeh nemepet rukuddeh, idi rukud-rukuddeh nisu' ku menipeh. Idi rukud Arun nenelen rukud-rukuddeh. 13Iamo' niat raca' metueh teh, pad ieh na ninger bala didueh, maya' kudeng luk pangeh bila Tuhan.
Susa' Luk Pun-Pun: Dara'
14Kebala Tuhan ni Musa, “Niat raca' pelaba tueh. Na ieh nima' pupu ini nalan. 15Amé' iko papu' raca' kareb pekak, kareb ieh remuat amé' tangeb abpa'. Nganét neneh tangeb Abpa' Nil ineh. Do' iko nguit rukud luk misu' amé' ku menipeh ineh. 16Idi pebala neneh, ‘Tuhan, ieh ineh Allah lun Iberani, nengecuk negku amé' namu dengan bala ini, “Nima' pupuKu ini nalan idi amé' sembayang Negku déi' su luk ali-ali.” Iamo' macing nekini nateh iko neninger balaku. 17#Lin 16.4 Idi teh kebala Tuhan, O raca', ratnan ini miak iko kali' Ui ini Tuhan. Nier rukud ini luk bang paladku uenku mabpet Abpa' Nil ini, idi abpa' ineh misu' ku dara'. 18Idi amung lawid luk bang Abpa' Nil ineh maté, pad Abpa' Nil ineh pelaba dat buen. Idi lun Masir pana' na miak ngirup abpa' ineh.’ ”
19Idi teh kebala Tuhan ni Musa, “Ngecuk ni Arun ngalap rukudneh idi ngegenang ineh pa luun amung abpa' bawang Masir — ieh ineh pa luun abpa'deh, turukdeh, takungdeh, idi amung su luk apu' abpa'deh — pad amungneh misu' ku dara'. Idi medara', maput amung bawang Masir, do' bang bau' idi bang rubi pana'.”
20Musa idi Arun nenganau' maya' kudeng luk bila Tuhan. Idi Arun nengegenang rukudneh, idi nemabpet Abpa' Nil pa kiung raca', idi pa kiung amung lun tarehneh. Idi amung abpa' nisu' ku dara'. 21Idi amung lawid bang abpa' ineh naté. Idi abpa' pelaba dat buen, pad na miak rupen lun Masir. Idi dara' maput amung bawang Masir. 22Iamo' amung lun luk mileh mangun kuan raca' Masir nenganau' luk kudeng ineh dengan ileh bangundeh pad niat raca' meluun tueh, pad ieh na ninger bala didueh, maya' kudeng luk bila Tuhan. 23Idi raca' nelumi idi petacu nuli' dengan na merapang ratnan ineh. 24Iamo' lun Masir ineh nengukat libut Abpa' Nil pian nakap abpa' rupen. Ngaceku Abpa' Nil na miak rupen.
25Idi pangeh tudu' aco rat Tuhan nemabpet Abpa' Nil ineh, inan aceh susa' luk baken.
Currently Selected:
PURA' 7: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
