PURA' 9
9
Susa' Luk Kelimeh: Até Aya'
1Kebala Tuhan ni Musa, “Amé' papu' raca', idi pebala neneh, ‘Kudeng ini bala Tuhan Allah lun Iberani: Nima' pupuKu nalan, pad ideh miak sembayang Negku. 2Iamo' kudeng iko mebpeng nedeh na nalan, 3kali' rungen Ui ngukum namu ku bulau luk macing inan amung aya'mu, ieh ineh kuda, keladai, unta, sapi', dumba, idi amék. 4Idi Ui ngatad amung aya' lun Israil ratnan aya' lun Masir, pad aya' lun Israil na maté. 5Ui ini Tuhan pangeh nengeletep karebneh, ieh ineh nebpa.”
6Idi kenebpa Tuhan nenganau' maya' kudeng luk bilaNeh, idi amung aya' lun Masir naté, iamo' ratnan aya' lun Israil sebuleng pana' nateh naté. 7Idi raca' nengitun anun luk mangun, idi kebaladeh neneh, “Sebuleng pana' nateh aya' lun Israil naté.” Iamo' niat raca' pelaba tueh, pad ieh na nima' nedeh nalan.
Susa' Luk Keanem: Kimuh
8Kebala Tuhan ni Musa idi Arun, “Lapenmu abuh rat luun tetel, panu' tuda'-tuda' ragam, idi do' i Musa ngisak ineh arang gawa' pa kiung raca'. 9Idi abuh ineh misu' ku kimuh maput bawang Masir. Idi luun lemulun idi luun pung ieh ineh misu' ku kimuh luk menana'.” 10#Lin 16.2 Idi didueh nengalap abuh luk ratnan tetel, idi iné' papu' raca'. Idi Musa nengisak abuh déi' arang gawa', idi abuh ineh nisu' ku kimuh luk menana' kuan lemulun idi pung. 11Idi amung lemulun luk mileh mangun na miak tuped pa kiung Musa ngaceku kimuh ineh. Idi inan kimuh luun amung lun luk mangun idi amung lun Masir teh. 12Iamo' Tuhan nengetueh niat raca', pad ieh na ninger bala didueh, maya' kudeng luk bila Tuhan ni Musa.
Susa' Luk Ketudu': Udan Batu
13Kebala Tuhan ni Musa, “Do' iko amé' papu' raca' pekak uka-uka, idi pebala neneh, Kudeng ini bala Tuhan Allah lun Iberani: Nima' pupuKu ini nalan, pad ideh sembayang Negku. 14Ngaceku sekua' ini Ui ngacing ukumKu kuanmu idi kuan amung tarehmu, idi amung anak itinmu, pad iko miak kali' na lun luk mepad kudeng Ui aput tana'. 15Kudeng Ui pangeh nengegenang langenKu, idi nenecat namu idi amung anak itinmu ku ét, kali' rungen muyuh mabud bang bawang ini. 16#Rum 9.17 Iamo' Ui nima' namu mulun, pad iko nier tuehKu, pelé ngadanKu tetanen aput tana' ini. 17Iko medita' niat, pad iko mebpeng pupuKu na nalan! 18Pekak nebpa, kareb luk kudeng ini, Ui ngacing udan batu luk pelaba ula', luk nateh nekali' Masir rat mon macing aco sini. 19Idi nekini ngecuk nelun ngamung amung aya'mu — idi anun-anun luk iko kuan bang laman, iamo' amung lemulun idi pung luk bal selipa luk na imung bang ruma', ideh miak maté kareb udan batu ineh!” 20Idi idé-idé rat arang lun tareh raca' luk matot inan bala Tuhan ineh, nengusu amung lun dukenneh idi amung aya'neh semuet bang ruma'. 21Iamo' amung lemulun luk na nginita bala Tuhan ineh, nenima' amung lun tebarinneh idi amung aya'neh bal selipa.
22Idi kebala Tuhan ni Musa, “Ngiding langenmu pad inan udan batu maput bawang Masir, idi pa luun lemulun, idi pung, idi amung-amung tibu aput bawang Masir.” 23Idi Musa nengegenang rukudneh, idi Tuhan nenganau' lalam, udan batu, idi kilep luun tana'. Idi Tuhan nenganau' 24#Lin 8.7; 16.21 udan batu ineh puar-puar ku kilep, idi na tu luk kudeng ineh mangun bang bawang Masir rat kareb ideh mangun ku sebuleng pupu. 25Idi aput bawang Masir amung-amung luk iléi rat bang ruma' nedat neketukan udan batu ineh, lemulun macing ku pung dengan amung-amung tibu, idi lawa kayuh pana'. 26Iamo' bawang Gosen, su luk inan lun Israil tebawang ineh, na udan batu.
27Idi raca' nengecuk nawar ni Musa idi Arun, idi kebalaneh nedidueh, “Idi ui sala' tu-tu sekua' ini. Tuhan ineh luk matu. Iamo' ui ini idi anak itinku mesala'. 28Do' sembayang inan Tuhan, pad lalam idi udan batu ini ugka'. Ui miak nima' nemuyuh nalan. Na ui ngimet nemuyuh peh.” 29Idi kebala Musa neneh, “Kareb ui remuat rat bang bawang ini, ui ngegenang ticu'ku mo' pa kiung Tuhan, pad uni lalam ineh ugka', idi udan batu ineh pana' mato, pad iko kali' tana' ini Tuhan kuan. 30Iamo' ui kali' namu idi amung lun tarehmu nateh muyuh matot pa kiung Tuhan Allah.”
31Idi amung lawa rami#9.31 Rami, ieh ineh aceh tibu luk ruen ku nuper. idi ikun nelapi ku udan batu ineh, ngaceku ikun ineh batek riut, idi rami ineh inan tulang. 32Iamo' amung dalé idi binamud na nelapi ngaceku nateh karebneh kebatek.
33Idi Musa neburo rat pa kiung raca', idi neremuat rat bang bawang ineh. Idi ieh nengegenang langenneh idi sembayang inan Tuhan, idi uni lalam ineh nugka', idi udan batu, idi udan pana' nato peh. 34Idi raca' nenier udan batu idi lalam pangeh nugka', idi ieh lemubed nganau' sala', pad niatneh metueh, do' ieh idi amung lun tarehneh pana'. 35Kudeng ineh tueh niat raca', pad ieh na nima' nelun Israil ineh nalan, maya' kudeng luk bila Tuhan dengan tang Musa.
Currently Selected:
PURA' 9: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
