PUDUT 42
42
Kinanak-Kinanak Yusup Amé' Mulé Bawang Masir
1Kareb Yakub neninger ratnan bawang Masir inan akan, idi kebalaneh nan anak-anakneh, “Ngudeh muyuh tudo mo'-mo'? 2#Kek 7.12 Ui pangeh neninger bala' déi' Masir inan akan. Do' muyuh amé' mulé kuan tau pad tau na maté.” 3Idi pulu' kinanak Yusup ineh iné' mulé déi' bawang Masir. 4Iamo' Beniamin, kinanak Yusup ineh, na icuk Yakub maya' nedeh, ngaceku ieh matot inan susa' macing neneh lek.
5Idi anak-anak Israil ineh nacing arang lun luk melih akan ineh, ngaceku iru' ineh pelaba rayeh déi' bawang Kanaan. 6Idi Yusup ineh lun rayeh bang tana' Masir. Idi ieh nemasui akan kuan lemulun rat aput tana'. Idi kinanak-kinanak Yusup ineh nacing idi netekunal pa kiung Yusup pad kiungdeh macing luun tana'. 7Idi Yusup nenier kinanak-kinanakneh idi miti nedeh, iamo' ieh siayu na miti nedeh, idi nepebala nedeh dengan metueh, kebalaneh, “Rat iapeh muyuh?” Idi kebaladeh, “Rat bawang Kanaan, idi kai sikal melih akan.”
8Idi Yusup miti kinanak-kinanakneh, iamo' ideh na miti neneh. 9#Pud 37.5–10 Idi Yusup nengerawé ratnan nupineh nedeh. Idi kebalaneh nedeh, “Muyuh ini lun luk amé' nier bawang, idi kudeng apeh laya' bawang ini.”
10Idi kebaladeh neneh, “Na, iamo' kai ini demulunmu luk macing sikal melih akan. 11Amung kai ini sebuleng taman mo', idi kai ini lun luk matu, baken kai ini lun luk amé' nier.”
12Idi kebala Yusup nedeh, “Na, iamo' muyuh nacing nier laya' bawang.”
13Idi kebaladeh, “Amung kai ini pulu' dueh dinganak luk sebuleng taman déi' bang bawang Kanaan. Iamo' luk isuut ineh idi dengan taman kai, idi sebuleng na idi.” 14Iamo' kebala Yusup nedeh, “Matu balaku nemuyuh, muyuh ini lun luk amé' nier. 15Kudeng ini lawéneh muyuh miak uen nutun: ui pebulung ku ngadan raca', muyuh na miak muli' rat ieni, kudeng kinanak muyuh luk isuut na amé' tungé'. 16Do' ngecuk seburur rat arang muyuh amé' ngalap neneh amé' tungé', iamo' muyuh ini tudo bang tutup, pad bala muyuh miak uen nutun, kudeng bala muyuh matu; kudeng na, ui pebulung ku ngadan raca', muyuh ini lun luk amé' nier.” 17Idi ieh nenipa nedeh bang tutup pad macing teluh aco kinioneh.
18Bang aco luk keteluh kebala Yusup nedeh, “Ui ini matot inan Allah, idi muyuh miak mulun kudeng muyuh nganau' kudeng ini: 19kudeng muyuh lun luk matu, do' seburur kinanak muyuh tudo bang tutup, idi muyuh luk baken muli' nguit akan, kuan tetek ruma' muyuh luk melau. 20Idi nguit kinanak muyuh luk isuut amé' negku, pelé ui kali' bala muyuh matu, pad ui na ngaté nemuyuh.”
Idi ideh nengamo nganau' kudeng ineh. 21Idi kebaladeh seburur dengan seburur, “Idi matu tau ini mesala' ratnan kinanak tau. Kareb tau nenier neneh bang dereh, idi kareb ieh nemutuh éi' rat netau, idi na tau neninger. Idi ini punneh dereh ini macing netau.”
22 #
Pud 37.21–22
Idi kebala Rubin nedeh, “Ui nemebpeng nemuyuh na ngesusa' anak ineh. Iamo' na muyuh neninger. Siruh nekini ua' dara'neh macing.” 23Idi Yusup kali' baladeh, iamo' na ideh kali', ngaceku Yusup nepegayam nedeh dengan seburur lun luk ngatum buri'. 24Idi Yusup neburo rat nedeh idi nangi'. Kareb ieh miak pebala nedeh teh, idi ieh nelemubed, idi nengalap ni Simion rat arangdeh, idi ieh nengaling neneh pa kiungdeh.
Kinanak-Kinanak Yusup Muli' Amé' Kanaan
25Idi Yusup nengecuk muang amung-amung tebpung kinanakneh ku padé, idi ngelubed usindeh anid-anid bang tebpung ineh, idi maré balu'deh. Idi kudeng ineh teh luk inau' kuandeh. 26Idi ideh nenganau' padé ineh luun keted keladaideh, idi ideh nenalan. 27Idi seburur rat arangdeh nengukab tebpungneh, ngaceku sikal maman keladaineh nan natad luk inan ucu'. Idi ieh nenier usinneh munung tebpungneh ineh. 28Idi kebalaneh nan kinanak-kinanakneh, “Usinku ini linubed. Ini ieh munung tebpungku!” Idi ideh pelaba rapang peh, idi ideh megegker, ekbaladeh seburur dengan seburur, “Kudeng apehké luk inau' Allah ini kuan tau?”
29Kareb ideh nacing ni Yakub tamandeh déi' tana' Kanaan, idi ideh nemada' ratnan amung-amung luk pangeh nangun ineh, kebaladeh, 30“Lun rayeh bawang ineh pelaba tueh balaneh nekai, ieh nengerawé nekai lun luk iné' ier bawang. 31Iamo' kebala kai neneh, ‘Kai ini lemulun luk matu, baken kai lun luk iné' nier. 32Kai ini pulu' dueh dinganak, luk sebuleng taman; idi seburur rat arang kai luk na idi, idi luk isuut déi' dengan taman kai bang bawang Kanaan.’ 33Idi kebala lun rayeh ineh nekai, ‘Kudeng ini lawéneh ui kali' nemuyuh lemulun luk matu: do' seburur rat arang muyuh ketecan negku, idi do' muyuh nguit akan kuan uang tetek ruma' muyuh luk melau, idi nalan. 34Nguit kinanak muyuh luk isuut ineh amé' negku, pad ui kali' nemuyuh baken lun luk iné' nier, iamo' lemulun luk matu, idi muci ui ngelubed kinanak muyuh ineh amé' nemuyuh, idi muyuh pana' miak pepua' bang bawang ini.’ ”
35Kareb ideh nengeruat uang tebpungdeh, anid-anid bururdeh inan usin bang tebpungdeh. Idi kareb ideh nenier usin ineh idi ideh matot, dengan tamandeh. 36Idi kebala Yakub nedeh, “Muyuh ngesusa' negku. Na mio teh mabud anakku. Ngaceku Yusup na idi, idi Simion pana' na idi teh. Nekini muyuh sikal ngalap Beniamin teh. Ui luk medereh ku ineh.”
37Idi kebala Rubin nan tamanneh, “Miak iko ngaté dueh anakku luk deléi, kudeng ui na ngelubed anak ini kuanmu. Do' maré neneh kuanku mo' kali' rungen ui nguit neneh lemubed amé' namu.”
38Iamo' kebala Yakub, “Anakku na miak maya' nemuyuh, ngaceku kinanakneh luk rayeh pangeh naté, idi ieh ketecan sebuleng denganku. Kian, ieh pitayen arang dalan lek. Kali' rungen ui maté kudeng muyuh ngedereh negku kudeng ineh. Ngaceku ui mengered.”
Currently Selected:
PUDUT 42: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
