PUDUT 46
46
Yakub Idi Amung Uang Ruma'neh Amé' Bawang Masir
1Idi Yakub nenipa amung-amung binawehneh, idi ieh iné' Birsiba, idi su ineh ieh nemaré tuda'-tuda' baré kuan Allah tamanneh, Isak. 2Idi Allah nepebala neneh bang aceh luk sinierneh kareb malem, kebalaneh, “O Yakub, Yakub!”
Idi kebala Yakub, “Anun idi, Tuhan?”
3Idi kebalaNeh, “Ui ini Allah tamanmu. Aleg iko matot amé' déi' Masir; ngaceku Ui sikal ngeletep namu mangun ku aceh pupu luk rayeh bang bawang ineh. 4Ui sebuleng maya' namu amé' Masir; idi Ui sebuleng nguit inulmu muli' teh. Idi Yusup pana' miak nier namu karebmu maté.”
5Idi Yakub nenalan rat Birsiba. Anak-anakneh nenuet neneh, dengan anak-anakdeh luk isuut, idi awandeh, bang tuda'-tuda' keréta luk biré raca'. 6#Kek 7.15 Idi ideh nenguit amung-amung aya' idi binawehdeh luk ilapdeh déi' bawang Kanaan. Idi ideh iné' Masir. Yakub nenguit amung inulneh maya' neneh, 7ieh ineh anak-anakneh idi mupunneh luk deléi, idi anak-anak idi mupunneh luk decur.
8Ini ngadan inul Yakub luk nemaya' neneh iné' Masir: anak Yakub luk atun, ieh ineh Rubin, 9idi anak Rubin luk deléi, ieh ineh Hanok, Palu, Hesron, idi Karmi. 10Idi anak Simion luk deléi, ieh ineh Yemuil, Yamin, Ohad, Yakin, Sohar, idi Saul luk anak ratnan seburur decur lun Kanaani. 11Idi anak Liwi luk deléi, ieh ineh Gerson, Kohat, idi Merari. 12Idi anak Yahuda luk deléi, ieh ineh Er, Onan, Sela, Paris, idi Sera (iamo' Er idi Onan ineh pangeh naté bang bawang Kanaan). Idi anak-anak deléi Paris, ieh ineh Hesron idi Hamul. 13Idi anak Iskar luk deléi, ieh ineh Tola, Pua, Yob, idi Simron. 14Idi anak Sebulon luk deléi, ieh ineh Sered, Elon, idi Yalil. 15Idi amung ini anak deléi Lia, luk tinganakneh kuan Yakub déi' Mesopotamia, idi teh Dina anakneh luk decur ineh. Idi amung inul Yakub rat ni Lia teluh ngepulu' teluh burur.
16Idi anak Gad luk deléi, ieh ineh Sipion, Hagi, Suni, Isbon, Eri, Arodi, idi Areli. 17Idi anak Aser luk deléi, ieh ineh Imna, Isua, Isui, Beria, idi Sera, kinanakdeh luk decur. Idi anak Beria luk deléi, ieh ineh Iber idi Malkiel. 18Amungdeh luk pulu' anem burur ni inul Yakub rat ni Silpa, luk biré Laban kuan anakneh Lia.
19Idi anak Rakel awan Yakub luk deléi, ieh ineh Yusup idi Beniamin. 20#Pud 41.50–52Idi Yusup pana' inan anak déi' Masir, ieh ineh Manasé idi Epraim, luk tinganak Asenat, ana Potipera, luk imam déi' On. 21Idi anak Beniamin luk deléi, ieh ineh Bela, Beker, Asibel, Gera, Naman, Iki, Rus, Mupim, Hupim, idi Ared. 22Idi amungdeh luk pulu' apat burur ini inul Yakub rat ni Rakel.
23Idi anak Dan luk deléi, ieh ineh Husim. 24Idi anak Naptali luk deléi, ieh ineh Yasil, Guni, Yeser, idi Silem. 25Idi amungdeh luk tudu' burur ini inul Yakub rat ni Bilha, luk biré Laban kuan Rakel.
26Idi kinula' inul Yakub luk iné' Masir, ieh ineh anem ngepulu' anem burur, baken ratnan amung awan anak Yakub ineh. 27#Kek 7.14 Idi anak Yusup luk deléi, luk pangeh tinganak kuanneh déi' Masir ineh, dueh burur; idi kinula' amung uang tetek ruma' Yakub luk iné' Masir ineh tudu' ngepulu' burur.
Yakub Idi Amung Uang Ruma'neh Déi' Masir
28Idi Yakub nengecuk ni Yahuda ame atun kidi ni Yusup, pad ieh papu' neneh déi' Gosen. Kareb ideh nacing déi' Gosen ineh, 29idi Yusup numak bang kerétaneh idi iné' déi' Gosen, pian papu' tamanneh. Kareb ieh nepapu' neneh, idi Yusup nengapel tamanneh, idi ieh nenangi'. 30Idi kebala Yakub ni Yusup, “Miak ui maté nekini, ngaceku ui pangeh nenier kiungmu idi kali' namu mulun teh.”
31Idi kebala Yusup kuan amung kinanakneh idi kuan amung uang ruma' tamanneh, “Do' ui amé' matun raca', idi mada' neneh ratnan acing kinanakku idi amung uang tetek ruma' tamanku, luk netudo bang bawang Kanaan. 32Idi ui mada' neneh ratnan kekamen muyuh, ieh ineh ngasa' aya', idi ratnan luk inuit muyuh, ieh ineh amék, dumba, idi sapi, idi teh amung-amung luk muyuh kuan. 33Idi kareb raca' nawar nemuyuh, idi ngitun kekamen muyuh, 34idi do' muyuh mala kudeng ini, ‘Idi amung kai ini pekalai ngasa' amék, dumba, idi sapi', rat kareb kai isuut pad macing nekini, do' kai idi do' tepun kai,’ pad muyuh miak tudo bang tana' Gosen. Ngaceku lun luk matar aya' ineh mangun ku ali' kuan lun Masir.”
Currently Selected:
PUDUT 46: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
