PUDUT 50
50
1Idi Yusup nesiluka' luun tamanneh, idi nenangi' neneh, idi nemuen kiungneh. 2Idi Yusup nengecuk nelun luk mileh nganau' butung tamanneh na melu. 3Idi ideh nengakem apat ngepulu' aco kinioneh, maya' lawédeh luk pekalai. Idi lun Masir netemido neneh tudu' ngepulu' aco kinioneh.
4Kareb aco temido pangeh nepelaba, idi kebala Yusup nelun tareh raca', “Do' nated balaku ini kuan raca': 5#Pud 47.29–31 ‘Kareb tamanku lélé maté, ieh nengecuk negku penaji' neneh, pad ui nanem neneh bang lengutan luk tinina'neh déi' bawang Kanaan ineh. Ngaceku ineh, do' nima' negku nalan, pad ui miak nanem tamanku, idi ui miak lemubed teh.’ ”
6Idi kebala raca', “Nalan iko idi nanem tamanmu, maya' kudeng jani'mu neneh.”
7Idi Yusup iné' nanem tamanneh. Idi amung lun tareh raca', amung-amung lun rayeh ruma' raca', idi amung-amung lun rayeh déi' bawang Masir nemaya' neneh. 8Idi amung uang tetek ruma' Yusup, dengan kinanak-kinanakneh, idi lun bang ruma' tamanneh nemaya' neneh teh. Iamo' anak-anakdeh, idi aya'deh ticandeh déi' bawang Gosen. 9Idi inan tuda'-tuda' keréta idi lun luk maya' kuda luk nemaya' neneh teh. Idi amungdeh ineh pelaba ula'.
10Kareb ideh nacing su luk inan rumik déi' Atad, luk pa busat aco Abpa' Yarden, idi su ineh ideh netemido tu-tu, idi nenganau' aceh tebubpun. Idi Yusup netemido tamanneh tudu' aco kinioneh. 11Kareb lun luk bang bawang Kanaan nekali' tidodeh déi' Atad, kebaladeh, “Ini aceh tido lun Masir luk pelaba rayeh.” Ngaceku ineh ideh neneten su ineh Abel Misraim.
12Idi anak-anak Yakub nenganau' maya' kudeng bala tamandeh. 13#Kek 7.16 Idi ideh nenated butungneh macing déi' bawang Kanaan. Idi ideh nenanem neneh déi' bang lubang batu luun natad Makpéla pa busat aco Mamré, luk bilih Ibrahim rat ni Epron lun Hiti ineh, miak mangun ku lengutandeh. 14Kareb Yusup pangeh nenanem tamanneh, idi ieh nelemubed iné' bawang Masir dengan kinanak-kinanakneh idi amung-amung lemulun luk nemaya' neneh nanem tamanneh.
Yusup Ngubuk Kinanak-Kinanakneh
15Kareb tamandeh pangeh naté, idi kebala kinanak-kinanak Yusup, “Kian, Yusup megateh netau lek idi pian ngua' netau ngaceku amung-amung dat tau neneh.” 16Idi ideh nemaré bala ni Yusup, kebaladeh, “Kareb nateh tamanmu naté, kebalaneh kuanmu, 17‘Do' maré do' ku sala' kinanak-kinanakmu namu.’ Iamo' nekini kai mutuh namu maré do' ku sala' demulun-demulun Allah tamanmu ineh.” Idi Yusup nenangi' kareb ieh nengalap baladeh.
18Pangeh ineh amung-amung kinanak Yusup nacing idi netekeradung pa kiungneh, kebaladeh, “Nekini pian kai ini mangun ku demulunmu.”
19Idi kebala Yusup nedeh, “Aleg muyuh matot! Miakké ui ini mangun ku libal Allah? 20Matu muyuh ini pangeh nenganau' dat kuanku. Iamo' Allah nengisu' ineh mangun ku peruan, pad Ieh ngulun mula' pupu. 21Aleg muyuh matot. Ui miak ngasa' nemuyuh idi amung-amung anak muyuh.” Idi ieh nengubuk nedeh dengan bala luk do' luk nengegio niatdeh.
Até Yusup
22Yusup netudo déi' Masir dengan amung uang tetek ruma' tamanneh. Idi ulunneh meratu pulu' lak kareb ieh naté. 23Idi ieh nekali' anak Epraim, idi mupun Epraim pana'. Idi teh kareb anak-anak Makir luk anak Manasé pangeh tinganak, idi ideh nengerareng nedeh bang abin Yusup. 24Idi kebalaneh nan kinanak-kinanakneh, “Ui lélé maté, iamo' Allah miak ngasa' nemuyuh, idi nguit nemuyuh remuat rat bang bawang ini amé' inan tana' luk pinaji'Neh kuan Ibrahim, Isak idi Yakub.” 25#Pur 13.19; Yus 24.32; Ibr 11.22 Idi Yusup nemutuh nelun Israil pebulung, kebalaneh, “Do' muyuh pejani' nguit tulangku kareb Allah nated nemuyuh amé' bang bawang ineh.” 26Idi Yusup naté kareb ulunneh meratu pulu' lak. Idi ideh nenganau' butungneh temina' déi bawang Masir, idi nengerareng neneh bang lungun.
Currently Selected:
PUDUT 50: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
