YAHYA 19
19
1Pangeh ineh Pilatus pana' nenguit Yésus, idi nemebal Neneh. 2Idi lun pebunu' ineh nengapid tabpa' ku pata idi nengerareng ineh luun uluhNeh. Idi ideh nengayung Neneh ku kuyu' luk sia' merirem; 3idi ideh iné' Neneh, kebaladeh, “Tabi' Raca' lun Yahudi!” Idi ideh nemepag Neneh.
4Idi Pilatus neremuat idi nepebala nedeh, “Siruh, ui nguit Neneh kuan muyuh, pad muyuh kali' negku na kali' anun punneh ui ngukum Neneh.” 5Idi Yésus neremuat, dengan pata luk metabpa' idi kuyu' luk sia' merirem. Idi keburi' Pilatus kuan amung-amungdeh, “Siruh, lemulun ineh!”
6Kareb imam-imam rayeh idi lun pulis pana' nenier Neneh, idi ideh nengitang, keburi'deh, “Nalib Neneh, nalib Neneh!”
Idi keburi' Pilatus nedeh, “Do' muyuh ngalap Neneh, idi nalib Neneh! Ngaceku na ui kali' anun punneh ui ngukum Neneh.” 7Idi lun Yahudi nengor balaneh, keburi'deh, “Maya' Ukum kai do' Ieh mate, ngaceku Ieh nemala bururNeh Anak Allah.”
8Kareb Pilatus neninger bala ineh, idi ieh pelaba tot. 9Ieh nesemuet bang ruma' Lun luk Ngimet Ukum ineh sekua' teh, idi nepebala inan Yésus, “Rat iapehké iratMu?”
Iamo' Yésus na nengor balaneh. 10Idi keburi' Pilatus Neneh, “Naké Iko sikal pebala negku? Naké Iko kali' ui melalud muit Namu, idi melalud nalib Namu?”
11Idi kebala Yésus neneh, “Iko na melalud pa luunKu, kudeng na biré namu ratnan Allah. Ngaceku ineh lemulun luk nemaré Negku kuanmu meluun rayeh sala'.”
12Kareb Pilatus neninger bala ineh, idi ieh nenakap dalan sikal muit Yésus. Iamo' lun Yahudi nengitang, keburi'deh, “Kudeng Tuan muit lemulun ini, baken Tuan lun dengan raca' Rum. Idé-idé luk ngamo bururneh raca', ieh luk sikal metueh ratnan raca' Rum.”
13Pangeh Pilatus neninger bala ini, idi ieh neguit Yésus remuat, idi netudo luun kerusi besara', idi su ineh titen “Batu luk Mebalad.” (Bang buri' Iberani ieh ineh, “Gabata”.) 14Kareb ineh lélé muned aco, idi kenebpa Irau Paska. Idi kebala Pilatus nelun Yahudi, “Siruh, Raca' muyuh!”
15Iamo' ideh nengitang, keburi'deh, “Ngaté Neneh! Ngaté Neneh! Nalib Neneh!”
Idi keburi' Pilatus nedeh, “Do'ké ui nalib Raca' muyuh?”
Idi imam-imam rayeh nengor balaneh, keburi'deh, “Na luk idi raca' kai luk baken ratnan raca' Rum.”
16Idi Piltus nemaré Yésus nedeh, pad Ieh uen nalib.
Yésus Sinalib
(Mat 27.32–44; Mrk 15.21–32; Luk 23.26–43)
Idi ideh nenguti Yésus. 17Idi Ieh neremuat idi nemaan salibNeh sebuleng amé' matun. Su luk inan Perupuk Uluh (Bang buri' Iberani ieh ineh “Golgota.”) 18Déi' ideh nenalib Neneh dengan dueh burur lun baken, sebuleng selipa idi sebuleng selipa, iamo' Yésus arang uned didueh. 19Pilatus nengayud aceh surat, idi ieh nengerareng ineh pa luun salib ineh. Ieh nengayud kudeng ini, “Yésus, lun Nasarét, Raca' lun Yahudi.” 20Idi mula' lun Yahudi nemaca' ayud ineh, ngaceku su luk inan Yésus sinalib ineh muneng inan bawang, idi surat ineh inayud bang buri' Iberani, buri' Rum, idi buri' Grika. 21Idi kebala imam-imam rayeh lun Yahudi kuan Pilatus, “Aleg iko ngayud ‘Raca' lun Yahudi,’ iamo', ‘Ui ini Raca' lun Yahudi,’ mepad kudeng luk bilaNeh ineh.”
22Iamo' kebala Pilatus, “Luk pangeh inayudku pangehneh ineh.”
23Pangeh lun pebunu' ineh nenalib Yésus, idi ideh nengalap ayungNeh, idi nemabpat neneh apat babpat, ieh ineh kuan anid-anid burur lun pebunu' sebuleng babpat. Idi teh ideh nengalap kuyu'Neh; iamo' kuyu' ineh na dirut, iamo' pekatu rat dita' macing pa beneh. 24#Nani 22.18 Idi ideh nepebala seburur inan seburur, “Aleg tau narak neneh, iamo' do' tau nala' udi ratnan ineh, pad tau kali' idé luk miak ngalap neneh,” pad ngacing bala bang Surat Allah ineh luk pebala,
“Ideh pangeh nemabpat ayungKu seburur dengan seburur,
Idi ideh nala' udi ratnan kuyu'Ku.”
Idi lun pebunu' ineh nenganau' kudeng ineh.
25Idi tinan Yésus idi kinanak tinanNeh luk decur, Mariam awan Kliopas, idi Mariam Magdalina netuped iring salib Yésus. 26Kareb Yésus nenier tinanNeh idi anak sekola' luk inanNeh mawa ineh tuped muneng, idi Ieh nepebala inan tinanNeh, “O Ina', siruh, anakmu!”
27Pangeh ineh Ieh nepebala inan anak sekola' ineh, “Siruh, tinanmu!” Idi rat kareb ineh anak sekola' ineh nengalap neneh tudo bang ruma'neh sebuleng.
Até Yésus
(Mat 27.45–56; Mrk 15.33–41; Luk 23.44–49)
28 #
Nani 69.21; 22.15 Pangeh neh Yésus nekali' idi amung-amung pangeh riniput, idi Ieh nepebala, “Ui meparing,” pad ngacing bala bang Surat Allah ineh.
29Idi déi' inan aceh sangkir luk rireng mepanu' ku abpa' luk malam; idi ideh nengerareng aceh lemut batu, luk mepanu' ku abpa' luk malam nan paped angat likudung, idi nenguit ineh macing inan tang Yésus. 30Kareb Yésus pangeh nengalap abpa' luk malam ineh, kebalaNeh, “Pangeh meriput!”
Idi Ieh nemunel idi niatNeh neputut.
Sigarang Yésus Tibpek
31Idi ngaceku aco sineh aco limeh, ieh ineh Aco Temina' kuan Irau Paska, pad butung lemulun luk sinalib ineh na ketecan luun salib, meluun teh ngaceku Aco luk inan Mudeng bang minggu ineh meluun ligan, idi lun Yahudi nemutuh Pilatus nima' nedeh mutul kukuddeh idi ngalap butungdeh ratnan salib. 32Idi lun pebunu' nacing, idi nemutul kukud lemulun luk pun-pun idi kukud lun baken luk sinalib dengan Yésus ineh. 33Iamo' kareb ideh nacing ni Yésus idi nenier Neneh pangeh naté, na ideh nemutul kukudNeh. 34Iamo' seburur lun pebunu' nenebpek sigarang Yésus ku busu, idi petacu dara' Yésus neremuat dengan abpa'.
(35Idi lemulun luk pangeh nenier ineh nemaré kali', pad muyuh miak manu. Luk nekali'neh ineh matu. Idi ieh kali' luk bilaneh ineh matu.) 36#Pur 12.46; Iap 9.12; Nani 34.20 Ini punneh ini mangun, pad ngacing bala bang Surat Allah ineh, “Sebuleng tulangNeh pana' na miak pitulen.” 37#Sek 12.10; Lin 1.7 Idi inan teh ayat bang Surat Allah luk mala, “Ideh miak nier Neneh luk pangeh tibpekdeh.”
Tanem Yésus
(Mat 27.57–61; Mrk 15.42–47; Luk 23.50–56)
38Pangeh ineh Yusup lun Arimatia nemutuh butung Yésus rat ni Pilatus. (Yusup ineh seburur anak sekola' Yésus teh, iamo' dengan lulem ngaceku matot nelun Yahudi.) Idi Pilatus nenima' neneh. Idi Yusup iné' ngalap butung Yésus. 39#Yah 3.1–2 Idi Nikodimus luk iné' atun matun Yésus kareb malem, nacing teh, idi nenguit mur#19.39 Mur, ieh ineh aceh ilu' luk do' buen ratnan kayuh. pinuar dengan tara ala, lélé anem ngepulu' kati beratneh. 40Idi didueh nengalap butung Yésus, idi nengelilib neneh ku kibung luk do' idi ku amung-amung luk do' buen ineh, maya' lawé nanem lun Yahudi. 41Muneng ku su luk inan Yésus sinalib ineh inan aceh kabun, idi bang kabun ineh inan aceh tanem luk mebaruh, su luk nateh inan ngerareng butung lemulun. 42Ngaceku aco sineh kareb nateh Aco luk inan Mudeng, idi ideh nengerareng butung Yésus bang ineh.
Currently Selected:
YAHYA 19: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
