UKUM 10
10
Até Nadab Idi Abihu luk Ngelaba Ukum Tuhan
1Nadab idi Abihu, anak Arun ineh, nengalap su luk inan bareh apui didueh idi nenganau' apui bang ineh, idi didueh nengerareng umau luk do' buen luun apui ineh, idi bang ineh didueh nenguit apui luk na petulu iten pa kiung Tuhan, idi luk na icuk Tuhan. 2Denak-denak Tuhan nemaré apui luk nengeseb nedidueh, pad didueh naté pa kiung Tuhan. 3Idi kebala Musa ni Arun, “Ini luk pangeh bida' Tuhan, kebalaNeh, ‘Ui pian mada' liganKu siren lemulun luk muneng Negku, idi Ui pian uen ngerayeh pa kiung amung-amung lemulun.’ ” Idi Arun pirud.
4Idi Musa nenawar Misail idi Elsapan, anak-anak Usel taman pinaken Arun. Kebalaneh nedeh, “Amé' medueh nguit butung kinanak medueh remuat rat pa atun Su luk Meligan ini idi rat su luk inan nelupo.” 5Idi didueh iné' nguit butung didueh perapu dengan ayung didueh idi neremuat rat su luk inandeh nelupo, maya' kudeng luk icuk Musa.
6Idi kebala Musa ni Arun idi Eliasar idi Itamar, anakneh ineh, “Aleg nima' abpuk muyuh mesasung idi aleg ngerarak ayung muyuh, pad muyuh na mate' idi ngacing useh luk rayeh kuan lun mula' ini. Iamo' amung kinanak muyuh lun Israil miak temido ngaceku apui ini luk pangeh binudung Tuhan. 7Idi teh aleg muyuh buro rat pa atun tanga' Lepo su luk inan papu' Tuhan, pad muyuh na maté. Ngaceku muyuh pangeh inumau Tuhan.” Idi ideh nemaya' bala Musa.
Ukum-Ukum Kuan Imam
8Kebala Tuhan ni Arun, 9“Aleg iko idi anak-anakmu ngirup abpa' anggur idi luk megalih kareb muyuh semuet bang Lepo su luk inan papu' Tuhan, pad muyuh na maté. Idi ini aceh dalan luk meruked macing ku anak inul. 10Do' muyuh mili' arang luk meligan idi luk na meligan, idi arang luk melutak idi luk na melutak, 11pad muyuh miak mada' nelun Israil amung dalan luk bida' Tuhan nedeh dengan tang Musa.”
12Kebala Musa ni Arun idi anakneh Eliasar idi Itamar luk ketecan ineh, “Do' muyuh ngalap baré akan luk ketecan ratnan baré luk sabpen kuan Tuhan. Kuman ineh dengan na linamud muneng ku bubpun. Ngaceku ieh ineh meluun ligan. 13#Uk 6.14–18 Idi do' muyuh kuman ineh bang aceh su luk meligan. Ngaceku ieh ineh babpat luk litep kuanmu idi anakmu pana' ratnan amung baré luk sabpen kuan Tuhan. Ngaceku kudeng ini bala Tuhan kuanku. 14Iamo' ruuk baré luk tidulen, idi tipan baré luk iten ineh, miak muyuh kuman déi' su luk meligan, ieh ineh iko idi anak-anakmu luk deléi idi decur pana' luk denganmu. Ngaceku ineh pangeh biré kuanmu idi anakmu teh mangun ku babpatmu luk litep ratnan amung baré luk nguit pedo' nelun Israil. 15#Uk 7.30–34 Idi tipan baré luk iten idi ruuk baré luk tidulen ineh, do' ieh iten perapu dengan lemak ratnan baré luk sabpen, pad amung ineh tidulen pa kiung Tuhan. Idi ini mangun ku aceh dalan luk meruked kuanmu idi anakmu pana', maya' kudeng luk icuk Tuhan.”
16Idi Musa nengitun ratnan amék deléi luk barén ngaceku sala' ineh. Idi setuneh pangeh nabud iseb! Idi Musa pelaba useh ni Eliasar idi Itamar, anak Arun luk deléi luk ketecan ineh, kebalaneh, 17#Uk 6.24–26 “Ngudeh muyuh na kuman baré ngaceku sala' ineh bang Su luk Meligan? Ngaceku ieh ineh luk meluun ligan, idi pangeh biré kuan muyuh, pelé muyuh miak mabeh sala' lun mula' ineh idi muyuh nganau' luk nguit pedo' kuandeh pa kiung Tuhan? 18Idi setuneh dara'neh pana' na inuit semuet bang Su luk Meligan ineh. Do' muyuh kuman ineh bang Su luk Meligan maya' kudeng luk bida'ku.” 19Kebala Arun ni Musa, “Setuneh aco sini ideh pangeh nemaré barédeh ngaceku sala', idi barédeh luk sabpen pa kiung Tuhan. Idi susa' luk kudeng ini pangeh mangun kuanku. Idi kudeng ui nekuman luk biré ku sala' aco sini, do' ké ineh pa kiung Tuhan?” 20Kareb Musa neninger bala ini, idi do' ieh bang terawéneh.
Currently Selected:
UKUM 10: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.