UKUM 21
21
Ratnan Imam-Imam Mangun Meligan
1Kebala Tuhan ni Musa, “Do' iko mada' kuan amung imam idi anak Arun, pad sebuleng imam pana' na ngelutak bururneh ngaceku ngakem butung seburur pupuneh. 2Iamo' ngaceku pupuneh luk muneng, ieh ineh ngaceku tinanneh, tamanneh, anakneh luk deléi, kian anakneh luk decur, kian kinanakneh luk deléi, 3idi kinanakneh luk decur luk tudo denganneh kareb ieh na awan, ngaceku rat nedeh ieh miak ngelutak bururneh. 4Idi aleg ieh ngelutak bururneh ngaceku até kinanakneh luk decur luk inan awan. 5#Uk 19.27–28; Bad 14.1 Idi kareb lemulun maté, aleg imam ngiki uluhdeh idi mingit buluh adadeh, idi ngirit bururdeh. 6Idi do' ideh mangun meligan kuan Tuhan. Idi aleg ideh ngedat ngadan Allah. Ngaceku ideh maré baré akan kuan Tuhan. Idi ngaceku ineh do' ideh meligan. 7Aleg imam ngaweh decur luk mesawa' idi luk pangeh nengedat lawéneh. Idi aleg ieh ngaweh aceh decur luk pangeh ligkan deléineh. Ngaceku imam ineh meligan kuan Tuhan. 8Idi do' muyuh ngerawé imam ineh meligan. Ngaceku ieh maré baré akan kuan Allah muyuh. Ui ini Tuhan luk ngeligan nemuyuh, idi Ui ini meligan. 9Idi kudeng anak decur imam mangun ku aceh decur luk mesawa', idi ieh ngedat tamanneh. Na miak na decur ineh sabpen.
Ratnan Imam Luk Rayeh
10“Idi imam luk rayeh arang amung kinanakneh, luk pangeh inumau uluhneh ku umau luk ku ngumau, idi luk pangeh kinikit ngayung ku ayung luk meligan ineh, na miak ngesasung abpukneh, idi narak-narak ayungneh. 11Aleg ieh amé' muneng iring lun luk naté. Idi aleg ieh ngelutak bururneh, ngaceku taman idi tinanneh pana'. 12Idi aleg ieh remuat ratnan Su luk Meligan, pad ieh na ngelutak Su inan Allah luk Meligan, ngaceku umau Allah luk nekungumau neneh idi luunneh. Ui ini Tuhan. 13Idi do' ieh ngaweh aceh decur luk pun mebaruh. 14Aleg ieh ngalap aceh decur tinula', kian luk pangeh ligkan deléineh, idi luk mesawa', iamo' aceh anak luk pun mebaruh ratnan pupuneh sebuleng. Ineh luk apenneh ku awan, 15pad ieh na ngelutak inulneh arang pupuneh. Ui ini Tuhan luk ngeligan neneh.”
Ratnan Inul Imam-Imam Luk Dat Ayu
16Kebala Tuhan ni Musa, 17“Mada' kuan Arun kudeng ini: Idé-idé luk ratnan inulmu luk dat ayu, ieh ineh na miak amé' muneng maré baré akan Allah ineh. Ini aceh ukum luk meruked. 18Idi amung lun luk dat ayu ineh, sebuleng pana' nateh amé' muneng, do' lun luk mebuser, kian lun luk meliai idi luk dat ayu, idi luk pelaba rayeh idi luk pelaba isuut, 19idi lemulun luk nepueg kukud idi nepueg ticu', 20idi lun luk tebukut, idi luk mebuu, idi luk mesaweng, idi luk mebaké, idi luk nepuruh, idi luk melayat. 21Idé-idé luk dat ayu rat arang inul Arun luk imam ineh, na miak maré baré akan kuan Tuhan. 22Idi baré akan Allah miak kenenneh, do' luk meluun ligan, idi luk meligan. 23Iamo' na ieh miak amé' muneng iring alad dicing, idi na ieh miak amé' muneng iring bubpun, ngaceku bururneh dat, pad ieh na ngedat Su inanKu luk Meligan ineh. Ui ini Tuhan luk ngeligan nedeh.” 24Idi Musa nengacing amung bala ini kuan Arun idi kuan anak-anakneh idi kuan amung lun Israil teh.
Currently Selected:
UKUM 21: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.