UKUM 26
26
Peruan Kuan Lun Luk Maya' Bala
(Bad 7.12–24; 28.1–14)
1“Idi aleg muyuh nganau' akang, ulung, idi batu luk inarit, idi munel sembayang nan ineh. Ui ini Tuhan Allah muyuh. #Uk 19.4; Pur 20.4; Bad 5.8; 16.21–22; 27.1 2Do' muyuh ngerayeh amung aco luk inanKu mudeng idi ngerayeh Su inanKu luk Meligan. Ui ini Tuhan.
3“Kudeng muyuh nginita ukumKu idi maya' balaKu, 4idi Ui nurun udanKu kuan muyuh maya' karebneh, idi tana' pana' ngeruat uli'neh idi amung tibu luk bang lati' pana' miak ngeruat bua'. 5#Bad 11.13–15 Idi pangeh muyuh rumik padé idi muyuh mureg bua' anggur. Idi pangeh ngamung bua' anggur idi muyuh nibu. Idi muyuh miak kuman luk kenen muyuh macing mebor, pad muyuh lutep tudo bang bawang muyuh.
6“Idi Ui maré do' bang bawang ineh, pad muyuh telubid dengan na gegapin idé-idé pana'. Idi Ui miak ngaté amung pung luk mesangit luk bang bawang muyuh. Idi bunu' pana' nateh. 7Idi muyuh miak metueh ratnan bunu' muyuh. 8Idi limeh burur rat arang muyuh miak ngelaya' meratu. Idi meratu muyuh miak ngelaya' pulu' ngeribu. 9Idi Ui méi nemuyuh, ngasa' nemuyuh, idi ngula' nemuyuh. Idi Ui ngeriput jani'Ku nemuyuh. 10Idi muyuh lakat kuman luk mon ineh, kareb muyuh ngeranih. Idi muyuh miak ngeruat luk mon ineh idi nipa luk mebaruh. 11Idi Ui tudo arang muyuh idi na Ui ara' nemuyuh. 12#2 Kor 6.16 Idi Ui nalan arang muyuh mangun ku Allah muyuh, idi muyuh mangun ku pupuKu. 13Ngaceku Ui ini Tuhan Allah muyuh, luk pangeh nenguit nemuyuh rat bang bawang Masir, pad muyuh na mangun ku demulundeh peh. Idi Ui nala' babeh muyuh pad muyuh nalan dengan do'.
Ukum Kuan Lemulun Luk Ngelaba BalaNeh
(Bad 28.15–68)
14“Iamo' kudeng muyuh na maya' amung ukumKu, 15idi kudeng muyuh ngelaba balaKu, idi niat muyuh musam ku bada'Ku, idi na ngerawé jani'Ku, 16idi Ui ngukum nemuyuh. Ui ngacing tot, idi ét luk mebura', dadem luk ngesaweng mateh, pad iko iuk-iuk melaya'. Idi mo'-mo' muyuh nganau' lati', ngaceku amung ineh kenen bunu' muyuh. 17Idi Ui na méi' nemuyuh, pad muyuh uen bunu' muyuh ngelaya'. Idi amung luk megateh nemuyuh miak metueh rat nemuyuh, pad muyuh buro sagan pana' na lemulun ngerada' nemuyuh.
18“Idi kudeng muci ratnan amung ini na muyuh sikal ninger balaKu, Ui miak ngedereh nemuyuh tudu' kua' ngaceku amung sala' muyuh. 19Idi Ui miak ngebeneh amung dita' idi tueh niat muyuh. Idi Ui nganau' langit mepad kudeng belawan, idi tana' mepad kudeng tekaling. 20Idi muyuh merur mo'-mo', idi tana' muyuh ineh na miak maré uli'neh kuan muyuh. Idi amung tibu luk bang lati' pana' nateh ngeruat bua'-bua'deh.
21“Idi kudeng muyuh na perurum Negku idi na ninger balaKu, kali' rungen Ui ngacing tuda'-tuda' dereh kuan muyuh, tudu' kua' maya' sala' muyuh. 22Idi Ui muit arang muyuh amung pung luk mesangit, pad ideh ngaté anak-anak muyuh, idi ideh miak ngaté aya' muyuh, pad muyuh masi' burur, idi dalan muyuh mali.
23“Idi kudeng muci ratnan amung dereh ini, muyuh na uren iamo' sikal metueh rat Negku, 24Ui teh sikal metueh rat nemuyuh, idi Ui sebuleng ngedereh nemuyuh tudu' kua' ngaceku sala' muyuh. 25Idi Ui ngacing bunu' kuan muyuh, pad ngua' dat muyuh, ngaceku pejani' ineh. Idi kareb muyuh mepamung bang bawang muyuh, idi Ui maré ét luk mebura' kuan muyuh, idi muyuh pana' barén inan bunu' muyuh. 26Idi kareb babpat ruti muyuh ineh lélé mabud ngaceku ukumKu, idi pulu' burur decur miak nganau' rutideh bang sebuleng tetel, idi ideh miak nganid ruti muyuh ineh maya' uadneh. Idi muyuh kuman, iamo' na miak mebor.
27“Idi kudeng muci ratnan ineh teh muyuh na ninger balaKu, idi sikal metueh rat Negku, 28idi Ui pana' sikal metueh rat nemuyuh dengan useh luk mebura', idi Ui ngedereh nemuyuh tudu' kua' ngaceku amung sala' muyuh, 29pad muyuh kuman uang anak muyuh sebuleng. 30Idi Ui miak ngusag su luk inan muyuh nawar Sétan idi nabpa amung su luk inan ngeseb umau luk do' buen, idi butung muyuh peten pa luun bila' akang muyuh. Idi Ui pana' musam teh nemuyuh. 31Idi amung bawang muyuh uenKu mangun dat ali, idi amung su luk inan muyuh sembayang ineh uenKu ngusag. Idi na Ui sikal muen buen luk do' ruen muyuh kuanKu. 32Idi tana' muyuh uenKu ngusag, pad bunu' muyuh luk tudo ieneh pelaba awa ku ineh. 33Idi muyuh sebuleng pana' uenKu ngatad parap-parap rat arang pupu baken, idi Ui munu' nemuyuh. Idi tana' muyuh mangun dat ali idi bawang muyuh uen ngusag. 34-35Idi seruked bawang ineh tacin, kareb muyuh tudo bang bawang bunu' muyuh, tana' muyuh na tupu ruen ku lati', pad tana' luk metugeh miak do'.
36“Idi Ui miak nganau' aceh tot kuan muyuh luk ketecan bang bawang bunu' muyuh, pad muyuh matot ku uni don luk mepalid. Idi muyuh miak buro mepad kudeng lun luk buro ku bunu'. Idi muyuh miak meluka' sagan tu pana' na lemulun luk ngerada'. 37Idi muyuh miak metebaceng kareb na lemulun ngerada' nemuyuh. Idi muyuh na miak tuman pa kiung bunu' muyuh. 38Muyuh miak maté arang pupu baken. Idi tana' bunu' muyuh miak nelen nemuyuh. 39Idi lun luk ketecan rat nemuyuh bang bawang bunu' muyuh, iuk-iuk melaya' ngaceku sala' muyuh idi ngaceku sala' tepun muyuh.
40“Idi kudeng ideh ngamo amung sala'deh idi sala' tepundeh pana', ngaceku ideh na maya' Negku idi sikal metueh rat Negku, 41idi pad Ui pana' sikal metueh rat nedeh, idi Ui nenala' nedeh bang bawang bunu'deh, idi kareb niatdeh luk dat ineh mebeneh, idi ideh uren ratnan amung sala'deh, 42#Pud 28.13–14; 26.3–4; 17.7–8 idi kareb ineh Ui ngerawé jani'Ku ni Yakub, Isak, idi Ibrahim. Idi Ui ngerawé nedeh, idi bawangdeh pana'. 43Idi tana' ineh tacindeh, idi na tupu ruen ku lati' seruked ieh tacin. Kudeng ineh ideh miak mabeh amung sala'deh. Ngaceku ideh nengelaba ukumKu idi ideh musam ku balaKu. 44Idi sagan tu pana' kudeng ineh, kareb ideh semuet bang bawang bunu'deh Ui na nala' nedeh, idi musam ku ideh, pad Ui na ngaté nedeh idi mekelupan jani'Ku nedeh ineh. Ui ini Tuhan Allahdeh. 45Iamo' ngaceku ideh ineh, Ui ngerawé jani'Ku dengan tepundeh, kareb Ui nguit nedeh remuat rat bang bawang Masir su siren mateh amung pupu baken, pian mangun ku Allahdeh. Ui ini Tuhan.”
46Idi amung ini ukum idi bala luk pangeh bida' Tuhan ni Musa kuan lun Israil luun Pegkung Sinai.
Currently Selected:
UKUM 26: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.