UKUM 8
8
Ratnan Lawé Ngumau Imam
(Pur 29.1–37)
1Kebala Tuhan ni Musa, 2“Do' iko nated Arun idi anak-anakneh amé' munung tanga' Lepo su luk inan papu' Tuhan, idi nguit ayung imam, umau luk ku ngumau, aceh sapi' luk pegawa' luk barén ngaceku sala', dueh dumba deléi dengan aceh tayen pinaram luk na linamud ineh. 3Idi ngamung lun mula' tebubpun su ineh.”
4Idi Musa nenganau' maya' kudeng luk icuk Tuhan neneh. Idi kareb lun mula' ineh nepamung 5idi kebala Musa nedeh, “Kudeng ini luk icuk Tuhan.”
6Idi Musa nengecuk Arun idi anak-anakneh amé' muneng, pad ieh miak ngediu' nedeh. 7Idi ieh nengayung ni Arun ku kuyu' ineh idi nengabet awa'neh ku abet awa', idi nengayung neneh ku kuyu' buyor, idi kuyu' imam teh, luk inabet ku abet kuyu' imam luk tibaruh do'-do' i awa'neh. 8Idi ieh nenganau' kakeb ruuk ineh luunneh, idi nengabet Urim idi Tumim #8.8 Urim idi Tumim, ieh ineh luk ruen imam makai pad ieh kali' pian Allah. Lawedeh makai ineh na megala'. inan kakeb ruuk ineh. 9Idi ieh nengerareng sigar ineh nan uluhneh, idi nengabet luun sigar ineh balad amas ineh, ieh ineh pata luk meligan maya' kudeng luk icuk Tuhan ni Musa.
10Idi Musa nengalap umau luk ku ngumau ineh, idi nengumau nan Lepo su luk inan papu' Tuhan, idi amung repapeh luk bang ineh. Idi ieh nengeligan amung ineh kuan Tuhan. 11Idi ieh nenepek umau ineh tudu' kua' luun bubpun, idi ieh nengumau bubpun dengan amung repapehneh, idi pasu' luk inan sibaru' perapu dengan kukudneh, pad ngeligan ineh. 12Idi ieh nengukit umau luk ku ngumau ineh luun uluh Arun, idi ieh nengeligan neneh. 13Idi Musa nenguit anak-anak Arun amé' muneng idi nengayung nedeh ku kuyu', idi nengabet awa'deh ku abet awa', idi nengerareng sigar nan uluhdeh, maya' kudeng luk icuk Tuhan ni Musa.
14Idi Musa nenguit sapi' luk barén ngaceku sala'. Idi Arun idi anak-anakneh nengerareng ticu'deh luun uluhneh. 15Musa nengeret neneh, idi ieh nengalap sebuang dara'neh. Idi ieh nengisit amung unga bubpun ineh ku bua' ticu'neh. Kudeng ineh ieh nengeligan bubpun ineh. Idi dara' luk ketecan ineh inukitneh luun kukud bubpun ineh. Kudeng ineh ieh nengeligan ineh, idi ieh nenganau' luk nguit pedo' kuan ineh. 16Idi Musa nengalap amung lemak luk luun tinéi'neh, idi sebabpat luk meluun do' ratnan aténeh, idi dueh beterneh perapu dengan lemakneh. Idi Musa nengeseb ineh luun bubpun. 17Iamo' sapi' ineh perapu dengan kubilneh, idi amung uangneh, idi téi'neh isebneh mado ratnan amung-amung lepo, maya' kudeng luk icuk Tuhan ni Musa.
18Idi Musa nenguit dumba deléi ku baré luk sabpen ineh. Idi Arun dengan anak-anakneh nengerareng ticu'deh luun uluh dumba deléi ineh. 19Idi Musa nengeret neneh. Idi dara'neh inisakneh libut-libut bubpun ineh. 20-21Idi ieh nenetek burur dumba ineh. Idi ieh nemaru' tinéi' idi tipanneh. Idi ieh nengeseb uluhneh, lemakneh idi amung luk titek ineh luun bubpun, maya' kudeng luk icuk Tuhan ni Musa. Ieh ineh aceh baré luk sabpen luk mangun ku aceh luk do' buen kuan Tuhan.
22Pangeh ineh idi Musa nenguit dumba deléi luk kedueh ineh luk barén kareb ngumau imam. Idi Arun dengan anak-anakneh nengerareng ticu'deh luun uluhneh. 23Idi Musa nengeret neneh, idi ieh nengalap sebuang dara'neh, idi ieh nengisit ineh luun ribaran lalid Arun luk pa tinueh, idi bua' ticu' mebpuhneh luk pa tinueh, idi bua' kukud mebpuhneh luk pa tinueh teh. 24Idi ieh nenguit anak-anak Arun, idi ieh nengisit sebuang dara' ineh luun ribaran laliddeh luk pa tinueh, idi bua' ticu' mebpuhdeh luk pa tinueh, idi bua' kukud mebpuhdeh luk pa tinueh teh. Idi ela dara' ineh inisak Musa libut-libut bubpun ineh. 25Idi ieh nengalap lemakneh, idi iurneh luk melamu, idi amung lemak luk luun tinéi'neh, idi sebabpat luk meluun do' ratnan aténeh, idi beterneh luk dueh, perapu dengan lemakneh idi tipanneh luk pa tinueh. 26Idi ratnan tayen pinaram luk na linamud luk linigan kuan Tuhan ineh, ilapneh sebalad pinaram luk na linamud, idi aceh pinaram luk inan umau, idi sebuleng tinapé, idi ieh nengerareng amung ineh luun lemak idi luun tipan luk pa tinueh ineh. 27Idi amung ineh rirengneh bang palad Arun, idi anak-anakneh, pad mangun ku baré luk tidulen pa kiung Tuhan. 28Idi Musa nengalap amung ineh rat bang paladdeh. Idi isebneh luun bubpun, pa luun baré luk sabpen ineh, idi ieh ineh baré luk ku ngumau, ieh ineh aceh baré luk sabpen luk mangun ku luk do' buen kuan Tuhan. 29Idi Musa nengalap ruuk dumba ineh, idi ieh nemaré ineh ku aceh baré luk tidulen pa kiung Tuhan. Idi ieh ineh ku aceh babpat kuan Musa ratnan dumba deléi, ieh ineh baré luk ku ngumau, maya' kudeng luk icuk Tuhan ni Musa.
30Idi teh Musa nengalap sebuang umau luk ku ngumau, idi sebuang dara' luk pa luun bubpun idi ieh nemubpur ni Arun, idi ayungneh, idi anak-anakneh pana', dengan ayungdeh teh. Kudeng ineh Musa nengeligan ni Arun idi ayungneh, idi anak-anakneh dengan ayungdeh teh.
31Idi kebala Musa ni Arun idi anak-anakneh, “Nanek uang ini pa atun tanga' Lepo su luk inan papu' Tuhan, idi kuman ineh su ineh, perapu dengan pinaram luk bang tayen ineh, ku baré luk ku ngumau, maya' kudeng bala luk icuk Tuhan negku. 32Iamo' do' ngeseb teceh uang idi pinaram. 33Idi aleg muyuh buro ratnan munung tanga' Lepo su luk inan papu' Tuhan ineh, tudu' aco kinioneh pad macing mabud aco luk inan muyuh uen ngumau. 34Idi luk pangeh inau' tau aco sini, nemaya' ecuk Tuhan pelé nganau' luk inan pedo' kuan muyuh. 35Do' muyuh mudeng munung tanga' Lepo su luk inan papu' Tuhan tebaco kedangan tudu' aco kinioneh, maya' kudeng luk icuk Tuhan, pad muyuh na maté. Ngaceku kudeng ineh bala Tuhan negku.” 36Idi Arun idi anak-anakneh nemaya' amung bala luk icuk Tuhan ni Musa.
Currently Selected:
UKUM 8: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.