LUKAS 10
10
Yésus Ngecuk Tudu' Ngepulu' Dueh Anak Sekola' Nalan
1Pangeh ineh, idi Tuhan pana' nemili' tudu' ngepulu' dueh burur lemulun, idi nengecuk nedeh tedueh-tedueh amé' pa atunNeh bang anid-anid bawang idi su luk inanNeh pian amé'. 2#Mat 9.37–38 Idi kebalaNeh nedeh, “Mula' luk perinien, iamo' pawa' lun luk ngeranih. Do' mutuh ratnan Tuhan luk kuan perinien ineh, pad Ieh ngecuk lemulun amé' ngeranih uli' luk tinibuNeh ineh. 3#Mat 10.16 Amé' muyuh! Ui ngecuk nemuyuh mepad kudeng anak dumba arang uned bungalé. 4#Mat 10.7–14; Mrk 6.8–11; Luk 9.3–5 Aleg nguit kapil, tabpung, idi kasut; idi aleg petabi' dengan seburur lemulun pana' arang dalan. 5Kareb muyuh semuet bang ruma' iapeh-iapeh pana', do' muyuh pebala atun, ‘Samal kuan ruma' ini.’ 6Kudeng inan lemulun luk do' niat déi', idi tabi' muyuh ineh pana' miak lutep kuanneh; iamo' kudeng na, tabi' muyuh miak lemubed kuan muyuh. 7#1 Kor 9.14; 1 Tim 5.18 Do' muyuh tudo bang ruma' ineh idi kuman idi ngirup anun-anun luk baréndeh; ngaceku anid-anid lemulun luk ngakem, kali' rungen ngalap tabparneh. Aleg muyuh mubuh ratnan sebuleng ruma' amé' bang ruma' baken. 8Kareb muyuh semuet bang bawang iapeh-iapeh pana', idi lemulun nganak nemuyuh, do' muyuh kuman anun-anun luk baréndeh nemuyuh, 9idi ngedo' lemulun luk mét bang bawang ineh, idi mala kuandeh, ‘Imet Allah pangeh muneng nemuyuh.’ 10#Kek 13.51 Iamo' kareb muyuh semuet bang bawang iapeh-iapeh pana', iamo' lemulun na nganak nemuyuh, do' muyuh remuat amé' inan dalan-dalandeh idi mala, 11‘Abuh bawang muyuh luk nepedaket luun kukud kai ineh pana', kai ngegkar kuan muyuh; iamo' do' muyuh kali' idi Imet Allah pangeh muneng.’ 12Ui pebala nemuyuh, kareb Aco Ngukum, Allah meluun méi' nelun Sodom ratnan bawang ineh! #Pud 19.24–28; Mat 10.15; 11.24
Bawang Luk Na Manu
(Mat 11.20–24)
13 #
Yes 23.1–18; Yeh 26.1—28.26; Yo 3.4–8; Am 1.9–10; Sek 9.2–4 “Mesusa' kuanmu, O Korasin! Mesusa' kuanmu, O Baitsaida! Ngaceku kudeng kekamen luk melalud pangeh inau' bang bawang Sur idi Sidon, kudeng luk pangeh inau' bang nemedueh, kali' rungen ideh pangeh nuren mon dengan tudo bang abuh idi inayung ku guni. 14Kareb Aco Ngukum, Allah meluun méi nelun Sur idi Sidon rat nemuyuh. 15#Yes 14.13–15 Idi iko, O Kapernaum, iko pian uen ngedita' macing langit. Iamo' iko miak uen ngebeneh macing su inan até!”
16 #
Mat 10.40; Mrk 9.37; Luk 9.48; Yah 13.20 Idi Yésus nepebala kuan anak-anak sekola'Neh, “Lemulun luk neninger nemuyuh, ieh ineh ninger Negku, idi lemulun luk nala' nemuyuh, ieh ineh nala' Negku, idi lemulun luk nala' Negku, ieh ineh nala' Neneh luk nengecuk Negku.”
Tudu' Ngepulu' Dueh Anak Sekola' Ineh Lemubed
17Tudu' ngepulu' dueh anak sekola' ineh nelemubed dengan mawang niat idi nepebala, “O Tuhan, amung-amung ada' pana' maya' ukum kai bang ngadanMu.”
18Idi keburi' Yésus nedeh, “Ui nenier Sétan nebpeh mepad kudeng kilep rat bang langit. 19#Nani 91.13 Ninger do'-do', Ui pangeh nemaré nemuyuh lalud ngeradu' menipeh idi menipal kara', idi lalud pa luun amung-amung tueh Bunu' ineh, idi sebuleng pana' na miak ngesabeng nemuyuh. 20Iamo' aleg muyuh mawang niat ngaceku amung-amung ada' maya' ukum muyuh, iamo' do' muyuh mawang niat ngaceku ngadan muyuh pangeh inayud déi' surga.”
Yésus Mawang Niat
(Mat 11.25–27; 13.16–17)
21Bang kareb ineh pana' Yésus mawang niat bang Roh Meligan idi nepebala, “O Ama', Tuhan langit idi tana', Ui ngubur Namu, ngaceku Iko pangeh nengalum amung ini ratnan lemulun luk mileh idi luk do' kali', idi pangeh nengegala' neneh kuan anak-anak. O Ama', amung ineh inau'Mu maya' pianMu.
22 #
Yah 3.35; 10.15 “Luk amung-amung pangeh biré Taman kuanKu, idi seburur pana' na miti Anak ineh, iamo' Taman mo', idi seburur pana' na miti Taman ineh, iamo' Anak mo', idi teh lemulun luk pinili' Anak, ieh luk miak badénNeh ratnan Allah.”
23Idi Yésus nelumi inan anak-anak sekola'Neh idi nepebala lulem, “Samal kuan muyuh luk nier amung-amung luk siren muyuh. 24Ui pebala nemuyuh, mula' nabi idi raca' geregan nier luk sinier muyuh, iamo' na ideh nenier ineh; idi ninger luk pedingeren muyuh ineh, iamo' na ideh neninger ineh.”
Pinginud Seburur Lun Samaria Luk Mekatu Niat
25 #
Mat 22.35–40; Mrk 12.28–34 Idi inan seburur guru Ukum netuped sikal nutun Neneh, keburi'neh, “O Guru, anunké luk ruenku, pelé ui miak ngalap ulun luk meruked?”
26Idi keburi' Yésus neneh, “Anunké luk inayud bang Ukum Musa? Kudeng apehké luk bica'mu?”
27 #
Bad 6.5; Uk 19.18 Idi ieh nepebala, “Do' iko mawa inan Tuhan Allahmu dengan amung-amung niatmu, amung-amung ulunmu, amung-amung tuehmu, idi amung-amung terawému; idi mawa inan lun denganmu mepad kudeng bururmu sebuleng.”
28 #
Uk 18.5
Idi kebala Yésus neneh, “Matu balamu ineh. Nganau' kudeng ini, idi kali' rungen iko miak mulun.”
29Iamo' guru Ukum ineh sikal ngamo bururneh mesiri, idi keburi'neh kuan Yésus, “Idéké lun denganku ineh?”
30Idi kebala Yésus, “Inan selemulun luk netemurun rat Yerusalim amé' Yeriko; idi ieh nepapu' lun mano, idi ideh nengalap ayungneh idi nemebal neneh lélé maté, idi ideh nenalan necan neneh. 31Idi inan seburur imam nenalan maya' dalan ineh teh; kareb ieh nenier neneh, ieh nesemisir lemaba neneh teh. 32Kudeng ineh teh, seburur lun Liwi nacing su luk inanneh ineh, idi nenier neneh idi nesemisir lemaba neneh. 33Iamo' seburur lun Samaria luk uned nalan nacing su luk inanneh telubid ineh. Idi kareb ieh nenier neneh, idi niatneh nesigio ngaceku méi' neneh. 34Ieh iné' matun neneh, idi nengutang umau idi abpa' anggur luunneh, idi nengabet uratneh. Pangeh ineh idi ieh nenganau' neneh tudo luun keladaineh sebuleng, idi nenguit neneh amé' ruma' sakai idi nengasa' neneh. 35Kenebpa ieh nengalap dueh rigit idi nemaré kuan tuan ruma' sakai ineh idi nepebala, ‘Do' iko ngasa' neneh, idi anun-anun luk iko maré meluun ratnan ini ui miak ngelibal kareb ui lemubed teh.’ ”
36Idi kebala Yésus, “Rat arang teluh burur ineh sapehké luk bang terawému, mangun ku rurum lemulun luk inurat lun mano ineh?”
37Idi kebala guru Ukum ineh, “Ieh luk nemada' éi' kuanneh.”
Idi kebala Yésus kuanneh, “Amé' iko, nganau' luk kudeng ineh teh.”
Yésus Ngikak Mariam Idi Marta
38 #
Yah 11.1
Kareb ideh nenalan, Yésus nesemuet bang aceh bawang; déi inan seburur decur luk ngadanneh Marta nenawar Neneh umak bang ruma'. 39Idi Marta ineh inan aceh kinanak decur, ngadanneh Mariam, luk tudo iring kukud Yésus, neninger balaNeh. 40Marta ineh megagau ku mula' kekamen bang ruma' ineh; idi ieh iné' matun Yésus idi kebalaneh, “O Tuhan, naké Iko ngerawé ratnan kinanakku nima' negku ngakem sebuleng mo'? Ngecuk neneh ngeruyung negku.”
41Idi kebala Tuhan neneh, “Marta, Marta, iko mesusa' idi merapang ratnan mula' kekamen; 42iamo' sebuleng mo' luk petulu tekapen. Mariam pangeh nemili' babpat luk do' luk na miak lapen rat neneh.”
Currently Selected:
LUKAS 10: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
