LUKAS 12

Bada' Ratnan Lemulun Luk Siayu

(Mat 10.26–27)

1 # Mat 16.6; Mrk 8.15 Kareb tuda'-tuda' ngeribu lemulun nepamung, padideh meradu' seburur dengan lun baken, idi Yésus nepebala kuan anak-anak sekola'Neh atun, “Matar burur muyuh ratnan lamud lun Parisi, ieh ineh siayu. 2#Mrk 4.22; Luk 8.17 Anun-anun luk lininged miak uen ngegala', idi luk inalum miak kali' lemulun. 3Ngaceku ineh anun-anun luk bila muyuh bang dacem, miak pedingeren bang acang; idi anun-anun luk inayek muyuh bang lalid lemulun bang takep, miak badén rat pa luun buduk ruma'.

Idé Luk Inan Matot

(Mat 10.28–31)

4“Ui pebala nemuyuh, O Lun rurumKu, aleg matot nedeh luk ngaté burur mo', idi muci sebuleng pana' na miak ruendeh teh. 5Iamo' Ui sikal ngegala' kuan muyuh idé-idé luk miak inan muyuh matot, ieh ineh do' matot inan Allah, luk inan lalud nala' bang apui kareb Ieh pangeh nengaté. Matu, Ui pebala nemuyuh, do' muyuh matot inan Allah.

6“Bakenké suit pirit pisuen lemulun limeh buleng dueh sin? Idi pa kiung Allah sebuleng pana' na miak mekelupan. 7Iamo' abpuk luun uluk muyuh pana' amungneh pangeh iniap. Aleg muyuh matot; muyuh meluun raga ratnan suit pirit luk mula' ineh.”

Ratnan Ngamo Idi Ngalum Keristus

(Mat 10.32–33; 12.32; 10.19–20)

8“Ui pebala nemuyuh, anid-anid lemulun luk ngamo Negku pa kiung lemulun, idi Anak-Lemulun pana' sikal ngamo neneh pa kiung melaikat-melaikat Allah. 9Iamo' lemulun luk ngalum Negku pa kiung lemulun, idi ieh pana' miak lumin Anak-Lemulun pa kiung melaikat-melaikat Allah.

10 # Mat 12.32; Mrk 3.29 “Idé-idé luk mala bala luk sikal metueh ratnan Anak-Lemulun, ieh ineh miak inan maré do', iamo' kuan lemulun luk nguyo Roh Meligan, na tu-tu miak ngalap do' ratnan sala'deh.

11 # Mat 10.19–20; Mrk 13.11; Luk 21.14–15 “Kareb lemulun nguit nemuyuh amé' pa kiung tebubpun bang ruma' sembayang, idi pa kiung raca' idi lun rayeh bawang, aleg muyuh megagau ratnan kudeng apeh muyuh miak ngor baladeh idi ratnan anun-anun luk miak belén muyuh. 12Ngaceku Roh Meligan miak mada' nemuyuh bang kareb ineh teh ratnan anun luk do' belén muyuh.”

Pinginud Seburur Lun Do' Luk Mebacé

13Inan seburur rat arang lun mula' ineh nepebala Neneh, “O Guru, do' ngecuk kinanakku mabpet binaweh luk tican taman kai kuan kai.”

14Iamo' kebala Yésus neneh, “O Aca', idéké luk nenganau' Negku mangun ku lun luk mutut besara' idi lun mabpat binaweh muyuh?” 15Idi teh kebalaNeh nedeh, “Ngerawé do'-do', matar burur muyuh ratnan amung-amung lili, ngaceku ulun lemulun luk matu na macing ratnan ula' binawehneh, sagan tu pana' ieh lun do'.”

16Idi Yésus nemada' aceh luk pinginud kuandeh, keburi'Neh, “Inan aceh tana' seburur lun do' luk nengeruat mula' bua'. 17Idi ieh nengerawé bang niatneh, keterawéneh, ‘Na luk inanku nganug amung-amung padéku. Anunké luk miak ruenku?’ 18Idi keburi'neh, ‘Ini luk ruenku: do' ui ngusag amung-amung lepoku idi mudut luk meluun rayeh, idi déi' ui sikal nganug amung-amung padé idi binawehku. 19Idi ui sikal pebala kuan bururku sebuleng, Samal kuanmu! Iko inan mula' binaweh dinug kuan tuda'-tuda' lak. Do' ngato erurmu, kuman, ngirup, idi ngalap mawang niat.’ 20Iamo' Allah nepebala neneh, ‘O bacé! Malem ini teh ulunmu miak lapen rat namu; idéké luk ngalap amung binaweh luk dinugmu ineh?”

21Idi teh kebala Yésus, “Kudeng ineh teh ratnan lemulun luk ngamung binaweh kuan bururneh sebuleng, iamo' na ieh lun do' pa kiung Allah.”

Merapet Inan Allah

(Mat 6.25–34)

22Kebala Yésus kuan anak-anak sekola'Neh, “Ngaceku ineh Ui pebala nemuyuh, Aleg merapang ratnan ulun muyuh ieh ineh anunké luk miak kenen muyuh; idi ratnan burur muyuh, ieh ineh anunké luk miak iungen muyuh. 23Ngaceku ulun ineh meluun raga ratnan luk kenen, idi burur ineh meluun raga ratnan ayung. 24Ngerawé ratnan suit bungkak, na ideh ngisak idi ngeranih, na luk inandeh nganug akan, idi lepo. Allah teh ngasa' nedeh! Idi muyuh meluun raga ratnan suit! 25Idéké rat arang muyuh, miak ngekadang ulunneh sesuut pana' ngaceku merapang? 26Kudeng luk sesuut ini pana' na miak ruen muyuh, ngudehké muyuh merapang ratnan luk baken-baken ineh? 27#1 Rac 10.4–7; 2 In 9.3–6 Ngerawé ratnan busak, kudeng apeh ulundeh, na ideh ngakem, na ideh nguper gitian; iamo' Ui pebala nemuyuh, Selimun pana' dengan amung rayehneh, na nengayung ku luk do' ayu kudeng sebuleng rat arang busak ini. 28Iamo' kudeng Allah ngayung uduh natad kudeng ineh, luk mulun aco sini idi kenebpa ieh talan bang tetel apui, meluun teh Ieh sikal ngayung nemuyuh, O muyuh luk na petap anu. 29Idi aleg megagau ratnan luk kenen, idi luk rupen muyuh, idi aleg muyuh merapang. 30Ngaceku amung-amung ini tikap lun luk manu bang tana' ini, iamo' Taman muyuh meluun kali' ratnan amung-amung ini inan ulek kuan muyuh. 31Iamo' do' nakap ImetNeh, idi amung-amung ini pana' miak barén kuan muyuh.

Binaweh Déi' Surga

(Mat 6.19–20)

32“Aleg matot, O sengeriudan dumba luk isuut ini, ngaceku Taman muyuh pian maré Imet ineh nemuyuh. 33Do' muyuh masui binaweh muyuh idi maré kuan lun masi'. Idi nganau' kuan burur muyuh kapil-kapil luk na miak melu, idi ngamung binaweh muyuh déi' surga, ieh ineh su luk inan lun mano na semuet, idi kutang na miak kuman. 34Ngaceku iapeh-iapeh luk inan binaweh muyuh, su ineh teh luk inan niat muyuh.

Demulun Luk Nginita

35 # Mat 25.1–13 “Do' awa' muyuh uen ngabet idi lapung muyuh mebudung; 36#Mrk 13.34–36 idi do' muyuh mepad kudeng lemulun luk nginulat tuandeh kareb ieh muli' ratnan irau paweh; idi kareb ieh macing idi nateg tanga', ideh miak petacu ngukab tanga' kuanneh. 37Samal kuan amung-amung demulun, luk mekeribpeh tuandeh uned matar kareb ieh macing. Ui pebala nemuyuh, tuan ineh miak ngabet awa'neh sebuleng, idi nawar nedeh tudo kuman, idi ngasa' nedeh. 38Kudeng ieh macing kareb malé tangal dacem, kian kareb nateh lal ngekook lek, idi nier nedeh kudeng ineh, samal kuan amung-amung demulun ineh. 39#Mat 24.43–44 Iamo' ngerawé do'-do', kudeng tuan ruma' ineh pangeh nekali' karebneh luk inan lun mano macing, kali' rungen ieh matar, idi na nima' ruma'neh uen ngusag. 40Do' muyuh temina', ngaceku Anak-Lemulun sikal macing bang aceh kareb luk na muyuh kali'.”

Demulun Luk Lutep Idi Luk Na Lutep

(Mat 24.45–51)

41Idi keburi' Pétrus, “O Tuhan, Iko mada' luk pinginud ini kuan kaiké, kian kuan amung-amung lemulun lek?”

42Idi kebala Tuhan, “Idéké demulun luk lutep idi mileh, luk ruen tuanneh ngecuk matar uang ruma'neh, pad mabpat luk kenendeh bang kareb luk petulu? 43Samal kuan demulun ineh luk mekeribpeh tuan nganau' kudeng ineh kareb ieh muli'! 44Matu, Ui pebala nemuyuh, tuan ineh miak maré neneh ngimet amung binawehneh. 45Iamo' kudeng demulun ineh pebala bang niatneh, ‘Tuanku mio macing,’ idi ieh ngimun mebal demulun deléi idi decur pana', idi kuman idi ngirup macing mabuk, 46idi tuan demulun ineh miak macing kareb seaco luk ieh na nginulat neneh, idi bang aceh kareb luk na ieh kali'. Idi ieh miak mulu' neneh, idi nuet neneh dengan lun luk na manu.

47“Idi demulun luk pangeh nekali' pian tuanneh, iamo' na ieh netemina', idi na ieh nenganau' pian tuanneh ineh, ieh miak uen mebal mula' kua'. 48Iamo' demulun luk na nekali' pian tuanneh, idi ieh nenganau' luk na petulu, idi ieh miak uen mebal sesuut mo'. Ngaceku kuan anid-anid lemulun luk biré mula', rat neneh mula' luk miak tekapen, idi kuan lemulun luk biré mula' kekamen, ratnan neneh mula' luk miak pituen.

Yésus Matad Lemulun

(Mat 10.34–36)

49“Ui nacing pad nganau' apui luun tana' ini; Ui pelaba pian kudeng apui ineh pangeh mebudung! 50#Mrk 10.38 Ui na miak na rerebpen dengan aceh rereb, idi kudeng apehké susa' niatKu kareb nateh rereb ineh mangun! 51Inanké muyuh ngerawé Ui pangeh nacing nguit pedo' bang tana' ini? Na, iamo' bunu'. 52Rat kareb ini limeh burur lemulun bang aceh ruma' sikal metueh seburur ratnan seburur, ieh ineh teluh burur sikal metueh ratnan dueh, idi dueh sikal metueh ratnan teluh. 53#Mik 7.6 Taman sikal metueh ratnan anakneh luk deléi, idi anak deléi sikal metueh ratnan tamanneh; tinan sikal metueh ratnan anak decur, idi anak decur sikal metueh ratnan tinanneh; idi tinan deléi sikal metueh ratnan ibanneh luk decur, idi ibanneh luk decur sikal metueh ratnan tinan deléi ineh.”

Ratnan Miti Kareb

(Mat 16.2–3)

54Idi teh kebala Yésus kuan lun mula', “Kareb muyuh nier inan laput umak pa acep aco, muyuh petacu pebala, ‘Udan sikal mebpeh,’ idi mangun kudeng ineh teh. 55Idi kareb bui rat pa kabing busat aco ngiup, idi keburi' muyuh, ‘Aco miak mét idang napeh,’ idi mangun kudeng ineh teh. 56O muyuh lun luk siayu, muyuh kali' ngelio ratnan ayu tana' idi langit, iamo' kudeng apehké muyuh na miak kali' ngelio bang kareb ini?

Pedo' Dengan Lun Luk Ngadu' Namu

(Mat 5.25–26)

57“Ngudehké muyuh na miak mutut luk matu kuan burur muyuh sebuleng? 58Kudeng seburur lemulun ngadu' namu idi nguit namu besara', laba medueh nalan do' iko nakap dalan mepuit rat neneh; pad ieh na nguit namu amé' matun lun luk mutut besara', idi lun luk mutut besara' na maré namu nelun pulis, idi lun pulis ineh na nipa namu bang tutup. 59Ui pebala namu, na tu-tu iko miak remuat rat bang tutup ineh kudeng ketecan sesin pana' luk nateh binayarmu.”

Currently Selected:

LUKAS 12: BLD

Highlight

Copy