LUKAS 14
14
Yésus Ngedo' Seburur Lemulun Luk Mét
1Kareb Yésus iné' kuman bang ruma' seburur lun rayeh lun Parisi bang Aco luk inan Mudeng, idi lun mula' nier Neneh. 2Idi inan seburur lemulun luk mét mebuung iné' matun Yésus. 3Idi Yésus pana' nengitun guru-guru Ukum idi lun Parisi, keburi'Neh, “Miakké ngedo' lemulun bang Aco lun inan Mudeng, kian, na lek?”
4Iamo' ideh pirud. Idi Ieh nengimet lun mét ineh, idi nengedo' neneh. Idi Ieh nengecuk neneh nalan. 5#Mat 12.11 Idi Ieh nepebala nedeh, “Idéké rat arang muyuh luk na miket ngalap keladai idi sapi'neh luk pangeh nebpeh bang lubang bang Aco luk inan Mudeng?” 6Idi na ideh miak ngor amung-amung balaNeh ineh teh.
Ratnan Beneh Niat Idi Ngasa' Sakai
7Yésus nekali' kudeng apeh lun luk tinawar mili' su luk meluun do'. Ngaceku ineh Ieh nemada' aceh luk pinginud kuandeh, kebalaNeh, 8#Bal 25.6–7 “Kareb iko darin lemulun amé' ku irau paweh, aleg tudo su luk meluun do', ngaceku kian inan teh lemulun luk meluun buren rat namu darinneh, 9idi lemulun luk pangeh nenawar namu macing idi pebala namu, ‘Maré luk inan ineh kuan lemulun ini,’ idi dengan migu' mo' iko amé' tudo su luk pa beneh tu-tu. 10Iamo' kareb iko darin lemulun, do' iko amé' tudo su luk pa beneh tu-tu, pad lemulun luk nenawar namu macing idi pebala namu, ‘O Aca', do' umak tudo pa luun teh,’ idi iko miak ngalap rayeh pa kiung amung lemulun luk pamung kuman denganmu. 11#Mat 23.12; Luk 18.14 Ngaceku anid-anid lemulun luk ngedita' bururneh, ieh ineh miak uen ngebeneh, idi lemulun luk ngebeneh bururneh miak uen ngedita'.”
12Idi Yésus nepebala kuan lemulun luk nenawar Neneh, “Kareb iko nganau' irau kareb maco idi malem, aleg nawar nelun rurummu, kinanakmu, pupumu, idi lun do' luk bang bawangmu, pad ideh na ngua' tawarmu. 13Kareb iko nganau' irau, do' nawar lemulun luk masi', luk mepueg luk meliai, idi luk mebuser pana'; 14idi samal kuanmu teh, ngaceku na luk idi anun-anun luk inandeh miak ngua' namu; ngaceku iko miak uen ngua' kareb aco tui lemulun luk matu.”
Pinginud Irau Luk Rayeh
(Mat 22.1–10)
15Kareb seburur rat arangdeh luk kuman ineh neninger luk kudeng ini, idi ieh nepebala kuan Yésus, “Samal kuan lemulun luk kuman ruti bang Imet Allah.”
16Kebala Yésus neneh, “Inan seburur lemulun nenganau' aceh irau luk rayeh, idi ieh nenawar tuda'-tuda' ula' lemulun. 17Kareb lemulun sikal kuman, idi ieh nengecuk demulunneh amé' inan lemulun luk tinawar ineh idi pebala, ‘Amé' muyuh, ngaceku amung-amungneh pangeh temina'!’ 18Iamo' amung-amungdeh dengan sebuleng niat nemutuh do', keburi' seburur luk pun-pun kuanneh, ‘Ui pangeh nemelih tana' idi ui sikal amé' nier neneh, ui mutuh do'.’ 19Idi keburi' luk baken, ‘Ui pangeh nemelih pulu' sapi', idi ui sikal amé' nutun nedeh, ui mutuh do'.’ 20Idi seburur luk baken nepebala, ‘Ui pangeh nengaweh baruh, ngaceku ineh ui na miak macing.’ 21Idi demulun ineh nuli' idi nemaré kali' ratnan ineh kuan tuanneh. Idi tuan ruma' ineh pana' museh idi nepebala kuan demulun ineh, ‘Remuat iko amé' dengan mesaget su dalan-dalan idi lisangen, nguit amé' tungé' lemulun luk masi', luk mepueg, luk mebuser, idi luk meliai pana'.’ 22Idi keburi' demulun ineh kuanneh, ‘O tuan, anun luk icukmu ineh ui pangeh nenganau', iamo' inan teh su luk inan ketecan.’ 23Idi kebala tuan ineh kuan demulunneh, ‘Remuat iko amé' inan dalan-dalan ratis idi su luk mapet, idi ngubuk lemulun semuet pad ruma'ku mepanu'. 24Ui pebala nemuyuh, seburur pana' na luk idi rat arang amung-amung lemulun luk tinawar ineh miak kuman irauKu ineh.’ ”
Mikat Mangun Ku Anak Sekola' Tuhan
(Mat 10.37–38)
25Mula' lemulun nenalan maya' Yésus, idi Ieh nelumi idi nepebala nedeh, 26#Mat 10.37 “Lemulun luk amé' Negku na miak mangun ku anak sekola'Ku kudeng ieh na megateh inan tamanneh, tinanneh, awanneh, anakneh, kinanakneh luk deléi, kinanakneh luk decur, idi bururneh sebuleng pana'. 27#Mat 10.38; 16.24; Mrk 8.34; Luk 9.23 Idé-idé luk na maan salibneh idi maya' Negku, ieh na miak mangun ku anak sekola'Ku. 28Kudeng seburur rat arang muyuh sikal mudut aceh pudut luk medita', ieh tudo atun ngiap raganeh, kudeng ieh miak mangeh neneh. 29Kudeng na pieh kudeng ineh, ieh na miak mangeh pudut ineh, idi kareb ieh pangeh nenganau' dirineh, amung-amung lemulun luk nier luk kudeng ineh situnga-situnga neneh, 30keburi'deh, ‘Lemulun ini pangeh nengimun mudut ruma' luk medita', iamo' na miak mangeh neneh.’ 31Kudeng aceh raca' amé' munu' raca' baken luk macing munu' neneh dengan dueh ngepulu' ribu lemulun na miak na ieh tudo atun idi ngerawé kudeng ieh miak tuman dengan pulu' ribu lemulun luk maya' neneh. 32Kudeng na pieh kudeng ineh, ieh ngecuk lun dukenneh amé' papu' raca' baken kareb ieh mado, pad ngitun ratnan pedo'.” 33Kebala Yésus, “Kudeng ineh teh idé-idé rat arang muyuh luk na necan amung binawehneh, na ieh miak mangun ku anak sekola'Ku.
Tucu' Luk Metalang
(Mat 5.13; Mrk 9.50)
34“Tucu' ineh do'; iamo' kudeng tucu' ineh metalang, kudeng apehké ieh mepaci' baruh? 35Idi na ulekneh kuan tana' idi rimuk pana', iamo' miak talan. Lemulun luk inan lalid, do' ieh ninger.”
Currently Selected:
LUKAS 14: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
