LUKAS 18
18
Pinginud Seburur Decur Tinula' Idi lun Luk Mutut Besara
1Idi Yésus nemada kuandeh aceh luk pinginud, pad ideh megéi' sembayang dengan na melawa', 2kebalaNeh, “Idi bang aceh bawang inan seburur lun luk mutut besara' luk na matot inan Allah, idi luk na ngerawé lemulun pana'. 3Bang bawang ineh teh inan aceh decur tinula' luk megéi' kua' macing neneh, kebalaneh, ‘Ngedengan negku bang besara'ku pa kiung lemulun luk ngadu' negku.’ 4Idi tuda'-tuda' io lun luk mutut besara' ineh na sikal, iamo' kekipedneh ieh ngerawé bang niatneh, ‘Sagan pana ui na matot inan Allah idi na ngerawé lemulun, 5iamo' ngaceku decur tinula' ineh ngesusa' negku, miak ui ngedengan neneh pelé ieh na megéi macing ngerur negku.’ ”
6Idi kebala Tuhan, “Do' ninger luk bila lun luk mutut besara' luk na matu ineh! 7Naké Allah miak, ngedengan anid-anid lemulun luk pinili'Neh luk nawar Neneh tebaco kedangan? Miakké Ieh nginiuk ngedengan nedeh? 8Ui pebala nemuyuh, dengan mesaget Ieh ngedengan lemulun ineh. Iamo' kareb Anak-Lemulun macing, miakké Ieh papu' anu bang tana' ini?”
Pinginud Lun Parisi Idi lun Luk Ngamung Pupuk
9Idi Yésus nemada' luk pinginud ini teh kuan tuda'-tuda' lemulun luk ngerawé bururdeh matu, idi luk nengebeneh lemulun baken. 10KebalaNeh, “Inan dueh burur lemulun nesemuet bang Ruma' Allah sikal sembayang, ieh ineh seburur lun Parisi, idi seburur lun luk ngamung usin pupuk. 11Lun Parisi ineh netuped idi nesembayang bang niatneh kudeng ini, ‘O Allah, ui maré ubur kuanMu, ngaceku ui baken kudeng lemulun luk baken, ieh ineh lemulun luk mano, lemulun luk na mesiri, lemulun luk pasét, idi lun luk ngamung usin pupuk ini pana'. 12Ui mawa' dueh kua' bang seminggu, idi ui maré babpat pulu' ratnan amung-amung luk ilapku.’ 13Iamo' lun luk ngamung usin pupuk ineh netuped mado. Na ieh mekuu' tukag déi' langit, iamo' mepag ruukneh, kesembayangneh, ‘O Allah, méi' negku, lemulun luk mesala' ini.’ 14Idi Ui pebala nemuyuh, lemulun ini muli' imo Allah matu baken ratnan lun Parisi ineh; ngaceku anid-anid lemulun luk ngedita' bururneh miak uen ngebeneh; iamo' lemulun luk ngebeneh bururneh miak uen ngedita'.”
Yésus Ngeperuan Anak-Anak
(Mat 19.13–15; Mrk 10.13–16)
15Tuda'-tuda' lemulun nenguit anakdeh luk isuut amé' matun Yésus, pelé Ieh miak ngakem nedeh. Iamo' kareb anak-anak sekola' ineh nekali' ratnan ineh, idi ideh nemebpeng nedeh. 16Iamo' Yésus nenawar anak-anak ineh amé' Neneh, kebalaNeh, “Nima' anak-anak luk isuut amé' Negku, aleg mebpeng nedeh, ngaceku lemulun luk kudeng ini luk kuan Imet Allah. 17Ngerawé do'-do'! Idé-idé luk na ngalap Imet Allah mepad kudeng anak luk isuut ineh, na ieh miak semuet bang ineh.
Seburur Lun Do'
(Mat 19.16–30; Mrk 10.17–31)
18Seburur lun rayeh nengitun Yésus, keburi'neh, “O Guru luk do', anunké luk miak ruenku, pad ui miak ngalap ulun luk meruked?”
19Kebala Yésus neneh, “Anunké punneh iko mala Negku do'? Seburur pana' na luk do', inan Sebuleng mo', Ieh ineh Allah. 20Kali' rungen iko kali' ratnan ukum Allah, ieh ineh, ‘Aleg iko pasét; aleg iko ngaté lemulun; aleg iko mano; aleg iko mangun ku lun nekali' luk mebalih; ngedita' taman-tinanmu.’ ”
21Idi keburi'neh, “Amung ini ui pangeh nemaya' rat kareb ui suut.”
22Kareb Yésus neninger balaneh, idi Ieh nepebala neneh, “Sebuleng mo' luk nateh inau'mu. Masui amung-amung binawehmu idi maré kuan lun masi', pad iko ngalap binaweh déi' surga, idi amé' maya' Negku.” 23Kareb ieh neninger kudeng ini idi ieh pelaba dat niat ngaceku ieh pelaba ula' binaweh.
24Yésus nekali' neneh mesusa' niat, idi ieh nepebala, “Mikat tu-tu kuan lemulun luk mula' binaweh semuet bang Imet Allah! 25Meluun malé aceh pung unta semuet bang lubang pinu ratnan seburur lemulun luk mula' binaweh semuet bang Imet Allah.”
26Lemulun luk neninger ineh nepebala, “Kudeng pieh kudeng ineh, idéké luk miak ngalap ulun?”
27Iamo' kebala Yésus, “Anun-anun luk na miak mangun kuan lemulun miak mangun kuan Allah.”
28Idi keburi' Pétrus, “Kai ini pangeh nenecan ruma' kai pad maya' Namu.” 29Idi keburi' Yésus kuandeh, “Matu, Ui pebala nemuyuh, na luk idi seburur pana' luk nenecan ruma', awan, kinanak, taman-tinan, idi anak-anak, ngaceku ratnan Imet Allah, 30luk na miak ngalap mula' kua' kinula'neh bang kareb ini, idi kekipedneh ulun luk meruked.”
Yésus Mada' Luk Keteluh Kua' Ratnan AtéNeh
(Mat 20.17–19; Mrk 10.32–34)
31Idi Yésus nenguit pulu' dueh anak sekola' ineh, idi nepebala nedeh, “Nekini tau amé' déi' Yerusalim, idi amung-amung luk inayud nabi-nabi miak uen ngacing kuan Anak-Lemulun. 32Ieh miak barén bang palad lun pupu baken, idi Ieh miak inan situnga, idi uen ngediman, idi uen lemulun ngelica'. 33Ideh pana' miak mebal idi ngaté Neneh, idi aco luk keteluh Ieh miak tumui teh.”
34Iamo' na ideh kali' sesuut pana' ilungneh; idi bala ini inalum rat nedeh, na ideh kali' ratnan luk pangeh bila Yésus ineh.
Yésus Ngedo' Seburur Lun Mebuser Luk Mutuh Mo'
(Mat 20.29–34; Mrk 10.46–52)
35Idi kareb Ieh macing muneng ku Yeriko, inan selemulun luk mebuser tudo iring dalan mutuh mo'. 36Idi kareb ieh neninger lun mula' ineh lemaba, ieh nengitun, “Anunké ini?”
37Idi keburi'deh neneh, “Yésus lun Nasarét lemaba.”
38Idi ieh nengitang, keburi'neh, “O Yésus, Anak Daud, méi' negku!”
39Idi lemulun luk pa atun nemebpeng neneh, idi nengecuk neneh pirud, iamo' meluun rayeh arodneh, “O Anak Daud, méi' negku!”
40Idi Yésus nugka' idi nengecuk lemulun nated lun mebuser amé' matun Neneh. Kareb ieh muneng, idi Yésus nengitun neneh, 41“Anunké luk pianmu Ui nganau' kuanmu?”
Kebalaneh, “O Tuhan, ui mutuh miak nier.”
42Idi kebala Yésus neneh, “Do' iko nier! Anumu pangeh nengedo' namu.”
43Idi petacu ieh miak nier peh, idi nemaya' Yésus idi nengerayeh Allah. Kareb lun mula' nenier ineh, idi ideh nengubur Allah.
Currently Selected:
LUKAS 18: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
