LUKAS 7
7
Yésus Ngedo' Seburur Demulun Lun Rayeh Baweh Rum
(Mat 8.5–13)
1Kareb Yésus nemangeh amung-amung balaNeh luk pindenger lun mula' ineh, idi Ieh nesemuet bang bawang Kapernaum. 2Idi inan seburur demulun lun rayeh baweh Rum luk inan tuanneh pelaba awa, idi ieh mét lélé maté. 3Kareb lun rayeh baweh ineh neninger ratnan Yésus, idi ieh nengecuk lun rayeh lun Yahudi mutuh Neneh macing ngedo' demulunneh ineh. 4Ideh nacing inan Yésus, idi ideh nemutuh tu-tu Neneh, keburi'deh, “Mayu ieh ruenMu ngedengan. 5Ieh mawa kuan pupu tau, idi ieh luk nemudut ruma' sembayang tau.”
6Idi Yésus iné' maya' nedeh. Kareb Ieh pangeh muneng inan ruma' ineh, idi lun rayeh baweh ineh nengecuk tuda'-tuda' lun rurumneh amé' papu Neneh, kebaladeh, “O Tuhan, aleg mesusa' ngaceku ui na mayu uen Tuhan ngikak bang ruma'ku. 7Ngaceku ineh, ayuneh ui sebuleng pana' na mayu macing papu' nan Tuhan. Iamo do' Iko mala sebila' bala mo' idi demulunku miak do' peh. 8Ngaceku ui ini pana' seburur lemulun luk pa liang ukum, idi pa liang ukum dui pana' inan tuda'-tuda' lun pebunu'; idi ui mala kuan sebururdeh, ‘Amé' iko',’ idi ieh pana' amé'; idi kuan seburur luk baken teh, ‘Amé' tungé,’ idi ieh pana' macing; idi kuan demulunku, ‘Do' nganau' ini,’ idi ieh pana' nganau'.”
9Kareb Yésus neninger balaneh idi Ieh mawa, idi nelumi nelun mula' luk nemaya' Neneh, kebalaNeh, “Ui pebala nemuyuh, rat arang lun Israil pana' nateh Ui nekali' anu luk kudeng ineh rayeh.” 10Kareb lun luk icuk ineh nelemubed iné' ruma', idi ideh nenier demulun ineh pangeh nedo'.
Yésus Nui Anak Decur Tinula'
11Na mio ratnan ineh teh Yésus iné' bawang Nain, idi anak-anak sekola'Neh idi lun mula' nemaya' Neneh. 12Kareb Ieh macing nan tanga' bawang ineh idi inan lun mirir lungun. Idi lun luk naté ineh anak buleng. Idi tinanneh tinula'. Idi mula' lun bang bawang ineh nemaya' neneh. 13Kareb Tuhan nenier decur ineh, idi Ieh méi' neneh, kebalaNeh, “Aleg iko nangi'.” 14Idi Ieh iné ngakem lungun ineh, idi lemulun luk nemirir ineh nugka'. Idi kebala Yésus, “O anak adi', Ui pebala namu, do' iko tumui!” 15Idi lun luk naté ineh netudo, idi nengimun pebala-pebala. Idi Yésus nemaré neneh nan tinanneh.
16Idi lun mula' ineh pelaba tot idi nengerayeh Allah, keburi'deh, “Aceh nabi luk rayeh pangeh nacing arang tau,” idi “Allah pangeh nengikak pupuNeh.”
17Idi bala ratnan Yésus nepiar aput tana' Yudia idi amung bawang libut-libut ineh teh.
Itun Yahya Luk Ngerereb Rat Bang Tutup
(Mat 11.2–19)
18-19Idi anak-anak sekola' Yahya nemada' neneh ratnan amung ineh. Idi Yahya nenawar dueh anak sekola'neh, idi nengecuk nedidueh ngitun Tuhan, “Iko iniké Luk miak macing, kian, miak kai nginulat seburur lun baken?”
20Kareb didueh nacing inan Yésus idi didueh nepebala, “Yahya luk Ngerereb nengecuk nekai amé' inan Tuhan idi ngitun, ‘Iko iniké Luk miak macing ineh, kian, miak kai nginulat seburur lun baken?’ ”
21Kareb ineh teh Yésus nengedo' mula' lemulun luk inan luk mét idi kaca, idi luk sinuet ada'. Idi Ieh nengedo' mateh mula' lun luk nebuser. 22#Yes 35.5–6; Yes 61.1 Idi Yésus nengor bala didueh, keburi'Neh, “Amé medueh idi mada' kuan Yahya ratnan anun-anun luk pangeh sinier idi pindenger medueh; ieh ineh lun mebuser kulat mateh, lun meliai nalan, lun mét susud pangeh biru', idi lun mebengel ninger peh, lun naté pana' tinui, idi Bala luk Do' pangeh bida' kuan lun masi'. 23Samal kuan lemulun luk na mesabeng ku Ui.”
24Kareb lun duken Yahya ineh nenalan, idi Yésus nengimun pebala kuan lun mula' ratnan Yahya, keburi'Neh, “Anunké luk amé muyuh sira' déi' su luk ali-ali? Selawa bulu'ké luk megio ku bui? 25Kian, anunké luk amé muyuh sira'? Selemulun luk ngayung ku ayung luk do' saludké? Setuneh lemulun luk ngayung ku ayung luk do' salud idi mulun dengan petap anun-anun, ieh ineh mudeng bang ruma' raca'-raca'. 26Iamo' anunké luk amé' muyuh sira'? Seburur nabiké? Matu, idi Ui pebala nemuyuh, idi ieh selemulun luk meluun ratnan nabi. 27Ngaceku ini pangeh inayud ratnan lawé Yahya, ‘Ui ngecuk lun dukenKu amé pa atunMu, ieh ineh luk nganau' temina' dalanMu.’ #Mal 3.1
28Ui pebala nemuyuh, idi rat arang amung-amung lemulun luk tinganak ratnan decur, na luk idi seburur pana' luk meluun rayeh ratnan Yahya, iamo' luk isuut tu bang Imet Allah, ieh ineh luk meluun rayeh rat neneh.”
29Idi amung-amung pupu luk neninger Neneh, idi lemulun luk ngamung usin pupuk ineh pana' nemaya' ukum-ukum Allah luk matu, ngaceku ideh pangeh rireb dengan rereb Yahya. 30Iamo' lun Parisi, idi guru-guru Ukum nengarung pian Allah kuan bururdeh sebuleng, ngaceku ideh na rireb Yahya. #Mat 21.32; Luk 3.12
31Kebala Yésus, “Dengan anunké Ui miak maad inul ini, idi anunké luk mepinud nedeh ineh? 32Ideh mepad kudeng anak-anak luk tudo déi' kadai idi ngitang seburur kuan seburur, keburi'deh, ‘Kai pangeh nengiup suling kuan muyuh, idi na muyuh nengalai! Idi kai pangeh netemido, amo' nateh muyuh nenangi'.’ 33Yahya luk Ngerereb nacing dengan na kuman ruti idi ngirup abpa' anggur, idi kebala muyuh, ‘Ieh sinuet ada'!’ 34Anak-Lemulun nacing dengan kuman idi ngirup, idi kebala muyuh, ‘Siruh, selemulun luk manga idi luk ngirup abpa' anggur! Ieh perurum teh dengan lemulun luk ngamung usin pupuk idi lun mesala'.’ 35Iamo' ileh Allah uen lemulun luk ngalap ineh ngegala'.”
Yésus Déi' Ruma' Simun Lun Parisi Ineh
36Seburur lun Parisi nenawar Yésus kuman. Idi Yésus numak ruma' lun Parisi ineh idi netudo kuman. 37Idi bang bawang ineh inan seburur decur luk mesala'. Kareb ieh nekali' Yésus uned tudo kuman bang ruma' lun Parisi ineh, idi ieh nenguit sebuleng seréi umau luk do' buen. 38Idi ieh netuped pa keted Yésus muneng ku kukudNeh idi nangi', idi ieh nengeba' kukud Yésus ku abpa' matehneh. Idi ieh nemiid kukudNeh ku abpukneh, idi nemuen kukud Yésus, idi nengumau kukudNeh ku umau luk do' buen ineh. #Mat 26.7; Mrk 14.3; Yah 12.3 39Kareb lun Parisi nenier ineh, idi ieh nepebala bang niatneh, “Kudeng lemulun ini seburur nabi, kali' rungen Ieh kali' idé' decur luk ngakem Neneh ineh, idi Ieh kali' neneh mesala'!” 40Idi Yésus nengor balaneh, keburi'Neh, “O Simun, inan luk balénKu namu.”
Idi keburi' Simun, O Guru, do' mada' negku nekini.”
41“Inan dueh burur lemulun luk pebaleh nan seburur luk nemaré usin kebiten, idi luk kuan seburur baleh limeh ngeratu rigit, idi luk baken limeh ngepulu'. 42Didueh ineh na luk idi anun-anun luk ku ngua' baleh ineh, idi ieh nemuit nedidueh ratnan baleh didueh ineh. Nekini idéké rat arang didueh ineh luk meluun mawa neneh?”
43Idi kebala Simun, “Ui ngerawé lemulun luk pinuit ratnan baleh luk meluun ula'.”
Idi kebala Yésus neneh, “Matu terawému ineh.” 44Idi Yésus nelumi inan decur ineh idi nepebala ni Simun, “Iko kali' decur iniké? Ui nesemuet bang ruma'mu, na iko nemaré abpa' ku maru' kukudKu, iamo' decur ini nengeba' kukudKu ku abpa' matehneh idi nemiid ku abpukneh. 45Na iko nemuen Negku, iamo' decur ini rat pun Ui nesemuet bang ruma'mu na ieh nugka' nemuen kukudKu. 46Na iko nengumau uluhKu, iamo' decur ini ngenumau kukudKu ku umau luk do' buen. 47Ngaceku ineh Ui pebala namu, ieh pangeh nengalap do' ratnan sala'neh luk mula' ineh, ngaceku awaneh pelaba rayeh; iamo' kuan lemulun luk pangeh nengalap do' ratnan sala'neh luk sesuut, idi awaneh pana' sesuut teh.”
48Idi kebala Yésus kuan decur ineh, “Iko pangeh nengalap do' ratnan sala'mu.”
49Idi lemulun luk tudo kuman denganNeh nengimun pebala bang niatdeh sebuleng, “Idéké lemulun ini luk miak maré do' ratnan sala' peh?”
50Idi kebala Yésus nan decur ineh, “Anumu pangeh nengulun namu, nalan iko dengan awang.”
Currently Selected:
LUKAS 7: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
