IAP 1
1
Iap Luk Pun-Pun
1 #
Iap 26.1–51
Kebala Tuhan ni Musa, déi' su luk ali-ali bang Lepo su luk inan papu' Tuhan, aceh aco bulan dueh bang lak luk kedueh, pangeh ideh neremuat rat bang bawang Masir, 2“Do' medueh Arun ngiap kinula' lun Israil dengan amung inul, idi tetek ruma'deh, perapu dengan ngadan anid-anid deléi, 3luk ulun dueh ngepulu' lak idi mela, ieh ineh amung lun Israil luk miak pebunu'. 4Idi do' medueh nguit lun rayeh ratnan anid-anid pupudeh.” 5-15Idi ngadan amung-amung lun luk pinili', ieh ineh:
| Pupu | Lun Rayeh Inul |
|---|---|
| Rubin | Elisur Sedur |
| Simion | Selumil Surisadai |
| Yahuda | Nasun Aminadab |
| Iskar | Netanel Suar |
| Sebulon | Eliab Helon |
| Epraim | Elisama Amihud |
| Manasé | Gamalil Pedasur |
| Beniamin | Abidan Gidioni |
| Dan | Ahisar Amisadai |
| Aser | Pagiel Okran |
| Gad | Eliasap Ruel |
| Naptali | Ahira Enan |
16Idi amung ini pinili' rat arang amung lun Israil mangun ku lun rayeh inuldeh idi lun rayeh tuda'-tuda' pupu lun Israil.
17Musa idi Arun nengalap lemulun luk titen ngadan ineh. 18Idi didueh nenawar amung lun Israil nepamung, aceh aco bulan dueh, pad ideh nemada' ngadandeh, maya' inuldeh, idi tetek ruma'deh, dengan ngadan amung deléi luk ulun dueh ngepulu' lak idi mela teh, 19mepad kudeng luk icuk Tuhan ni Musa. Kudeng ineh teh ieh nengiap nedeh déi' su luk ali-ali déi' Sinai.
20-46Idi ngadan amung deléi luk ulun dueh ngepulu' lak idi mela, luk miak amé' pebunu', inayud maya' inuldeh idi tetek ruma'deh, ngimun ratnan inul Rubin, anak Yakub luk atun. Ini kinula'deh:
| Pupu | Kinula'deh |
|---|---|
| Rubin | 46,500 |
| Simion | 59,300 |
| Gad | 45,650 |
| Yahuda | 74,600 |
| Iskar | 54,400 |
| Sebulon | 57,400 |
| Epraim | 40,500 |
| Manasé | 32,200 |
| Beniamin | 35,400 |
| Dan | 62,700 |
| Aser | 41,500 |
| Naptali | 53,400 |
| Kinula'deh: | 603,550 |
47Iamo' lun Liwi na iniap dengan inul baken, 48ngaceku kebala Tuhan ni Musa, 49“Aleg iko ngiap nelun Liwi idi aleg ngamung kinula'deh dengan amung lun Israil. 50Iamo' ngeletep nelun Liwi ineh mangun ku lun ngimet Lepo su luk inan papu' Tuhan idi amung repapehneh. Idi do' ideh nguit Lepo ineh idi amung repapehneh. Idi do' ngasa' neneh, idi lupo libut Lepo ineh. 51Idi kareb Lepo ineh uen mubuh, do' lun Liwi nata ineh. Kudeng Lepo ineh piduten, do' lun Liwi mudut neneh. Idi kudeng inan lun baken amé' muneng ku Lepo ineh, ieh miak pitayen. 52Idi do' anid-anid pupu lun Israil lupo su luk inan babpatdeh sebuleng idi muneng ku bedéra'deh. 53Iamo' do' lun Liwi lupo libut Lepo su luk inan papu' Tuhan ineh, pad na useh mangun kuan amung lun Israil. Idi do' Lepo ineh uen lun Liwi nginita.” 54Idi lun Israil nenganau' ineh maya' kudeng luk icuk Tuhan ni Musa.
Currently Selected:
IAP 1: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.