IAP 10
10
Serupit Pirak
1Kebala Tuhan ni Musa, 2“Do' iko nuno dueh serupit pirak ku nawar nelun Israil idi ku ngecuk nedeh nalan. 3Idi kareb dueh serupit ineh muni amung lun Israil amé' namu pa atun tanga' Lepo su luk inan papu' Tuhan. 4Idi kudeng sebuleng serupit muni, do' amung lun rayeh pupu lun Israil amé' namu. 5Kareb muyuh ngiup serupit do' ngiup neneh pani'-pani', idi ideh luk tudo pa busat aco nalan. 6Idi kareb muyuh ngiup luk kedueh kua', idi ideh luk tudo pa kabing busat aco nalan. Idan-idan kareb iko ngiup kudeng ineh, idi ideh miak nalan. 7Iamo' kareb muyuh nawar nedeh pamung, muyuh miak ngiup serupit mo', iamo' aleg ngiup pani'-pani'. 8Idi luk ngiup serupit, ieh ineh anak-anak Arun luk imam.
“Idi ini aceh dalan luk meruked macing ku anak inul muyuh. 9Kareb muyuh amé' pebunu' inan bunu' luk ngedereh nemuyuh bang bawang muyuh, do' ngiup serupit ineh pani'-pani', pad Tuhan Allah muyuh miak ngerawé nemuyuh iding ulun nemuyuh ratnan bunu' muyuh. 10Kudeng ineh teh kareb irau muyuh, bang aco rayeh luk litep, idi pun bulan, do' muyuh ngiup serupit ineh kareb muyuh maré baré luk sabpen, idi baré luk nguit pedo', pad Allah miak ngerawé nemuyuh. Ui ini Tuhan Allah muyuh.”
Lun Israil Nalan Rat Sinai
11Idi dueh ngepulu' aco bulan dueh, bang lak luk kedueh, idi laput ineh nekemikit rat pa luun Lepo su luk inan papu' Tuhan ineh. 12Idi lun Israil nenalan rat Sinai déi' su luk ali-ali. Idi laput ineh nugka' déi' su luk ali-ali déi' Paran. 13Idi ini lawédeh luk pun-pun maya' ecuk Tuhan ni Musa. 14Idi baweh Yahuda dengan bedéra'deh nenalan atun; idi lun rayehdeh, Nason Aminadab. 15Idi lun rayeh baweh Iskar, ieh ineh Netanel Suar. 16Idi lun rayeh baweh Sebulon, ieh ineh Eliab Helon.
17Kareb Lepo ineh pangeh inusag, idi lun Gerson idi lun Merari luk nenguit Lepo ineh nenalan. 18Idi baweh Rubin dengan bedéra'deh nenalan. Idi lun rayehdeh, Elisur Sedur. 19Idi lun rayeh baweh Simion, Selumil Surisadai. 20Idi lun rayeh baweh Gad, Eliasap Ruel.
21Idi lun Kohat nenalan idi nenguit repapeh luk meligan. Idi Lepo su luk inan papu' Tuhan pangeh pinudut kareb nateh ideh nacing.
22Idi baweh Epraim dengan bedéra'deh nenalan idi lun rayehdeh, Elisama Amihud. 23Idi lun rayeh Manasé, ieh ineh Gamalil Pedasur. 24Idi lun rayeh Beniamin, ieh ineh Abidan Gidioni.
25Idi baweh Dan dengan bedéra'deh pa muci. Idi lun rayehdeh, Ahisar Amisadai. 26Idi lun rayeh Aser, ieh ineh Pagiel Okran. 27Idi lun rayeh Naptali, ieh ineh Ahira Enan. 28Kudeng ineh lawé baweh lun Israil.
29Idi kebala Musa ni Hobab luk anak ibanneh, Ruel lun Midian, “Kai nalan amé' inan bawang luk bida' Tuhan kuan kai. Ngaceku ineh do' amé' maya' nekai. Idi kai miak nganau' luk do' kuanmu. Ngaceku Tuhan pangeh nepejani' nganau' luk do' kuan lun Israil.”
30Iamo' Hobab nengor balaneh, “Na ui amé'. Ngaceku ui pian muli' amé' bawangku, idi nan pupuku sebuleng.”
31Idi kebala Musa, “Aleg iko necan nekai. Ngaceku iko kali' su luk inan tau lupo déi' su luk ali-ali. Idi iko luk nguyut nekai. 32Idi kudeng iko amé' maya' nekai, anun-anun luk do' luk ruen Tuhan kuan kai kudeng ineh teh luk ruen kai kuanmu.”
Lun Mula' Nalan
33Idi ideh nenalan rat pegkung Tuhan teluh aco kinioneh, idi Pati' Pejani' Tuhan iné' atun, pad nier su luk inandeh lupo. 34Idi laput Tuhan idi pa luundeh kareb macang, idan-idan kareb ideh nalan rat su luk inandeh nelupo.
35 #
Nani 68.1
Idi idan-idan, kareb Pati' Pejani' ineh nalan idi Musa pebala, “Miket, O Tuhan! Nima' amung bunu'Mu urap-urap, idi amung luk megateh Namu buro rat pa kiungMu.” 36Idi kareb Pati' Pejani' ineh ucu' ieh pebala, “Lemubed, O Tuhan, amé' inan pulu' ngeribu tetek ruma' lun Israil.”
Currently Selected:
IAP 10: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.