IAP 5
5
Lun Luk Ku Gani'
1Kebala Tuhan ni Musa, 2“Do' ngecuk nelun Israil ngeruat amung lun luk mét susud idi amung lun luk mekebabpa' idi amung lun luk ku gani' ngaceku ngakem butung ratnan su luk inan lun mula' nelupo, 3do' decur idi deléi teh miak ruaten rat bang su luk inan nelupo, pad ideh na ngelutak su luk inan muyuh nelupo. Ngaceku Ui tudo arang muyuh.” 4Idi lun Israil nemaya' bala Tuhan idi nengecuk nedeh remuat rat su luk inandeh nelupo.
Ukum Ratnan Maré Ua' Ngaceku Mesala'
5 #
Uk 6.1–7
Kebala Tuhan ni Musa, 6“Do' mada' kuan lun Israil, kudeng idé-idé luk nganau' sala' pa kiung lun denganneh, pad ieh na lutep maya' Tuhan, 7idi do' ieh ngamo sala'neh, idi ngua' anun luk ilapneh rat nelun baken, idi naduk sebabpat limeh.#5.7 Sebabpat limeh, ieh ineh 1/5. 8Idi kudeng lemulun luk sinaluk ineh pangeh naté idi na pupuneh luk ngalap ua' ineh, idi ineh miak barén kuan Tuhan idi kuan imam, dengan dumba deléi luk nguit pedo'. 9Idi amung baré lun Israil luk meligan luk itendeh kuan imam, ieh ineh imam kuan. 10Idi luk biré kuan imam ineh miak lapenneh.”
Ukum Ratnan Deléi Luk Ngimaruh
11Kebala Tuhan ni Musa, 12“Do' mada' kuan amung lun Israil, kudeng seburur decur luk inan awan, idi ieh na lutep inan awanneh, 13idi pamung dengan deléi baken, dengan na kali' awanneh idi lun baken pana', ngaceku ieh pasét dengan lulem, 14idi kudeng awanneh museh neneh, ku ieh pasét, idi kudeng ieh museh neneh, sagan tu pana' ieh na pasét, 15idi do' ieh nguit awanneh amé' papu' imam, idi nguit baré luk petulu kuan awanneh, ieh ineh tudu' lio banak ikun luk na rinabur ku umau, idi na nganau' umau luk do' buen, ngaceku ieh ineh aceh baré ngimaruh luk ku ngegala' luk matu.
16“Idi do' imam nguit decur ineh amé' muneng, idi naped neneh pa kiung Tuhan. 17Idi do' imam ngalap abpa' luk meligan bang kuden, idi kipu luk luun tana' bang Lepo su luk inan papu' Tuhan, ruen bang kuden ineh teh. 18Do' ieh netang abpuk decur ineh, idi maré baré akan bang paladneh. Idi do' imam nguit abpa' luk mepét luk ngacing kediman. 19Idi do' imam ngecuk neneh pebulung, kebalaneh, ‘Kudeng iko na pasét, iko miak mepuit ratnan abpa' luk mepét luk ngacing kediman ini. 20-21Iamo' kudeng iko pangeh pasét nima' Tuhan nganau' namu ku kediman arang pupumu, idi Tuhan ngerugu' tipanmu idi nganau' batekmu tebuki'. 22Idi abpa' luk ngacing kediman ini miak semuet bang tinéi'mu pad batekmu tebuki', idi tipanmu merugu'.’
“Idi do' decur mala, ‘Mo.’
23“Idi do' imam ngayud kediman ini luun surat idi ngerereb ineh bang abpa' luk mepét ineh. 24Idi do' ieh ngecuk decur ineh ngirup abpa' ineh, pad ineh ngacing ét luk mebura' kuanneh. 25Idi do' imam ngalap baré akan rat bang palad decur ineh idi nicul ineh pa kiung Tuhan idi ngerareng ineh luun bubpun. 26Idi do' imam ngalap sengeragam baré akan ineh mangun ku aceh tanu', idi ngeseb ineh luun bubpun. Pangeh ineh, do' ieh maré abpa' ineh rupen decur ineh.
27“Idi kareb ieh pangeh nemaré abpa' ineh inirupneh, kudeng ieh pangeh pasét, idi abpa' luk ngacing kediman ineh miak semuet bang bururneh idi ngacing ét luk mebura', pad batekneh tebuki', idi tipanneh merugu', idi decur ineh mangun ku aceh kediman arang pupuneh. 28Iamo' kudeng decur ineh na pasét iamo' ieh do', idi ieh miak mepuit idi inan anak teh.
29“Idi ini ukum, kudeng aceh deléi ngimaruh idi nganu awanneh pangeh pasét. 30Decur ineh uen naped pa kiung Tuhan, pad imam nganau' lawé ini. 31Idi deléi ineh na mesala', iamo' kudeng sedecur mesala', ieh miak mabeh sala'neh.”
Currently Selected:
IAP 5: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.