IAP 8
8
Ratnan Nutud Lapung
1 #
Pur 25.31–40; 37.17–24 Kebala Tuhan ni Musa, 2“Do' mada' kuan Arun, kareb ieh nutud lapung, idi do' lapung luk tudu' ineh ngacang pa atun kukud dawan ineh.” 3Idi Arun nenganau' kudeng ineh, maya' kudeng luk icuk Tuhan ni Musa. 4Idi kukud dawan ineh inau' ratnan amas luk tinuno, rat pa luun macing pa beneh maya' kudeng luk icuk Tuhan ni Musa.
Lawé Ngeligan Nelun Liwi
5Kebala Tuhan ni Musa, 6“Do' ngatad amung lun Liwi rat arang lun Israil idi ngeligan nedeh. 7Idi kudeng ini lawému ngeligan nedeh. Mubpur nedeh ku abpa' luk ku maru' nedeh ratnan sala'. Do' ideh mingit amung bururdeh idi mupu' ayungdeh pad ideh meligan. 8Do' lun Liwi ineh ngalap sebuleng sapi' deléi luk pegawa' perapu dengan banak luk rinabur ku umau mangun ku baré akan, idi iko ngalap sebuleng sapi' deléi teh mangun ku baré ngaceku sala'. 9Idi do' iko nguit nelun Liwi ineh pa atun Lepo su luk inan papu' Tuhan, idi do' iko ngamung amung lun Israil. 10Idi do' lun Israil ngerareng ticu'deh luun uluh lun Liwi ineh. 11Idi Arun miak maré nelun Liwi pa kiungKu, mepad kudeng baré luk tidulen rat nelun Israil, pad ideh miak ngakem kuanKu. 12Pangeh ineh lun Liwi miak ngerareng ticu'deh luun uluh dueh sapi' deléi ineh, idi do' iko maré sebuleng mangun ku baré ngaceku sala', idi sebuleng barén ku baré luk sabpen kuan Tuhan, pad nganau' luk nguit pedo' kuan lun Liwi ineh.
13“Idi do' iko nguit nelun Liwi ineh amé' pa kiung Arun idi anak-anakneh. Idi do' iko maré nedeh ineh mangun ku baré luk tidulen kuan Tuhan. 14Kudeng ini lawému ngatad nelun Liwi ineh rat arang lun Israil, pad amung lun Liwi ineh kuanKu. 15Kareb iko pangeh nengeligan nedeh idi pangeh nemaré nedeh mangun ku baré luk tidulen, do' lun Liwi amé' ngakem bang Lepo su luk inan papu' Tuhan. 16Ngaceku ideh pangeh biré kuanKu rat arang lun Israil ku libal amung lun Israil luk atun. 17#Pur 13.2 Ngaceku amung anak lun Israil luk atun Ui kuan, do' lemulun idi aya' pana'. Kareb aco luk inanKu nengaté amung anak luk atun déi bawang Masir, idi Ui pangeh nengeligan nedeh kuanKu. 18Idi Ui pangeh nengalap nelun Liwi ineh ku libal amung anak lun Israil luk atun. 19Idi Ui pangeh nemaré nelun Liwi rat arang lun Israil ineh kuan Arun idi anak-anakneh, pad ideh ngakem kuan lun Israil bang Lepo su luk inan papu' Tuhan, idi nganau' luk nguit pedo' kuandeh, pad na luk idi ét luk mebura' arang lun Israil kareb ideh amé' muneng ku Su luk Meligan.”
20Musa, Arun, idi amung lun Israil nenganau' amung ineh kuan lun Liwi, maya' kudeng luk icuk Tuhan ni Musa. 21Idi lun Liwi nengeligan bururdeh ratnan sala' idi nemupu' ayungdeh. Idi Arun nemaré nedeh mepad kudeng baré luk tidulen pa kiung Tuhan. Idi Arun nenganau' luk nguit pedo' kuandeh, pad ideh meligan. 22Pangeh ineh idi lun Liwi iné' ngakem bang Lepo su luk inan papu' Tuhan, pa liang imet Arun idi anak-anakneh, maya' kudeng luk icuk Tuhan ni Musa.
23Kebala Tuhan ni Musa, 24“Do' amung lun Liwi luk ulun dueh ngepulu' limeh lak idi mela, ngakem bang Lepo su luk inan papu' Tuhan. 25Iamo' do' amung lun luk ulun limeh ngepulu' lak ugka' ratnan kekamen ineh. 26Iamo' ideh miak ngedengan kinanakdeh luk ngakem bang Lepo su luk inan papu' Tuhan. Kudeng ineh luk ruenmu kuan lun Liwi.”
Currently Selected:
IAP 8: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.