Jénésis 20
20
Ébarahâm ne Otu Abyímélek
1Ébarahâm o/dim ké Mámare o-jâ busyísen-Kínan o-da-kyú ké otyém ne otyém mú Kádyishi ne Shû. Ńdyí o/mû mu o-kyú u ké Géra, 2o/mû o/sét banet o/fu, Sirá mú onyi emen o-chi i nche emen. Ne Otu Abyímélek mú otu mú Géra o-twóm kâng o/fu, baca ne Sirá oshê emen. 3Buchú bubónge, Osówo o/byí o-kâm Otu Abyímélek ké burê, o-sét ǎ o/fu, wo a/chi a-kpú, ké nǎ, wo aa/kúng onyinyi mún mú oo/bé otyép.
4Nké Otu Abyímélek o/mû o*da/rí ne ne nyǐ* ne o-raa o/fu, Óburúkpâbí, me n*da/chi chwǒm*. Wo a-ju ng mě ne banet ejí? 5Ébarahâm oyén o/sét o/fu, mú mǔ o-chi i nche emen, ne mú onyinyi to o/raa eringe ebónge. Me n/chi ńkyín ne dyityém ejí wááng, ne n*da/chi kyibî*.
6Osówo o-faa ǎ ké burê o/fu, nkyi éné, me mu n-nyît ng n/fu, wo a/chi kánkyí ne dyityém wááng. Ké bubwô ámbu nké n*da ǒ ebángê a-chi kyibî ké bushú ejí* ne n*da ǒ ebángê a-ta ǎ*. 7Nké kántîk, yip onyinyi ámu a-kye otyép emen. Otyép emen o-chi i mkpábé mú odasét byiraa ejí, ne o/chi o-fé nshwam o-kye mě ké dyishí eyên eringe nyí aa*kpú to*. Nké â a*da/bwa ne nyǐ esim* me mu n-kuri ng ǒ ekó n/fu, a/chi a-kpú, wo ne kángkáng banet eyên.
8Ké dyicófóróng pirípirí, ké orî-dyicí, Otu Abyímélek o/kó bǎmgbán emen kángkáng o-sét kámbé ńkyí kyi/chi, ne bushî bu-kám kámbé. 9Ne Otu Abyímélek o-kó kâng Ébarahâm o-bí ǎ o/fu, ebóng ńkyí wo a/chi bě něen. Me n/chi ǒ ebóng kyibî ńkyí wo a/bê mě ne afaníkong ńnyín ne oshê ejí. Wo aa/chi mě chwǒm ńkyí a/mû aa*ba/chi a-chi mě*. 10Wo a/kabe nǎ ne a-chi dyizong-chwǒm ńdyín.
11Ébarahâm o-faa o/fu, me m/mû mu n-kabe ng n/fu, onet o*fí nyín mú mu o-shî ng Osówo* n/fu, ba/chi ba-ju mě ba-koo onyi ejí. 12Ké ntûntû, o-chi i wǎn-boné ejí. Byi/fím bonchí obónge, byi-pap ké boné, ne m/bé ǎ. 13Ńdyí Osówo o/fîm mě o/fu, me mbyí ké kyise ńkyí bonchí ejí n-jâ ké esí-banet, me n/sét ǎ n/fu, wo a-man n etông ofê mú amu a-kyâ mě ké banet esét a/fu, me n-chi i wǎn-boné eyên.
14Ne Otu Abyímélek kâng o-bwa esim ne Sirá o-kye Ébarahâm, o-kye ǎ to etám-ebû ne bampong ne básóng. 15O-sét Ébarahâm o/fu, esí ńnyín kángkáng e/já mě. Kyú nang nyá mú kyi/nyîn ǒ. 16O-sét Sirá o/fu, n-kyâ wǎn-boné eyên égot-akpuga etánge nyí ba/chi ké syílyíba kyi-tông kángkáng banet ḿbé mbe ne wo kyi/fu, wo a*da/chi chwǒm*. Nang yeě o/chi o-nyît o/fu, wo a*da/chi kyibî*.
17-18Ké bubwô ḿbú chwǒm ńkyín ńkyí kyi/chi Sirá mú onyi-Ébarahâm, Óburúkpâbí o/mû o*da/chîchi onyinyi nang obónge ké kyibám ńkyí Otu Abyímélek o-koo dyifít*. Ne Ébarahâm kâng o-fé nshwam ké bubwô ḿbú Otu Abyímélek, ne Osówo o-kye ǎ bufwon. O/chi to onyi emen ne básóng emen ḿbé banyinyi ba-kpet efwon.
Currently Selected:
Jénésis 20: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
