Jénésis 23
23
Sirá o/kpú, Ébarahâm o-ré Kyikit o-ryii ǎ
1Sirá o/rí bajam-aje nyâchât esim-aje káchâtkányi. 2O/kpú ké Héboron, ké esí nyí Kínan, Ébarahâm o-tii ǎ.
3Ébarahâm o-dim o-mîng kyikit ńkyí ba/ren onyi emen o-wâa o-kâm banet ḿbé Hyítat, o-sét kámbé o/fu, 4me mu ocinónet mú mu n-kyú u nyín ne ben. Shee n̂g mě esí nyí ndaryii onyi ejí.
5Mbé ba-faa ǎ ba/fu, 6fwôo atông a-jwo bě, ǎ bonchí. Be byimu byi-ri ng ǒ wǎ onet-dyishí mú kiǐtí. Ryii onyi eyên ké dyikun eten ńdyí dyi/nwa dyi-shwôm. Nang yeě nyín o/kpá byiko ḿbyí oda ǒ ekye dyikun ńdyí adaryii onyi eyên.
7Ne Ébarahâm o-tíngê kyísí ké ofê 8o-raa o/fu, â ba/chi ba-bángê mě n-ryii onyi ejí nyín, bí n̂g Éforon mú wǎn-Zóha 9o-shee mě bucim ḿbú Makapyíla, ḿbú bu/fárâng ne bukô-kyifát emen. Bí n̂g ǎ o-shee mě ké nkuli kyikû-ocím mú o/tî o/fu, nyǐ o-shee ng kámbú, nyín ké bushú enen, eringe nyí ndakúng kámbú bu-firi kyikit-oryii ejí.
10Éforon oyén o/mû to ne burwám-banet ḿbé Hyítat ké kyikit ńkyí ba/mû ba/kyú ké ocím-dyifyi-oshê. Ne o-faa kángkáng banet ḿbé ba/mû ányi ba-jwo, o/fu, 11fwôo atông a-jwo, ǎ bonchí, me n-kyâ ǒ kyifát kyimúmú ne bucim ámbu ḿbú mbu ké nkyí. Ké bushú ḿbú banet ḿbé ejí ḿbén, me o-kyâ ǒ kámbú a-ryii onyi eyên.
12Nké Ébarahâm o/tíngê kyísí ké ofê o-kye banet-Hyítat, 13ne o-raa ne Éforon eringe nyí kángkáng banet badajwo, o/fu, kamgbe, fwôo atông a-jwo mě. Me n/chi n-ré kyifát ánkyi kyimúmú. Koo akpuga, n/chi n-ryii onyi ejí ányi.
14Éforon o-faa o/fu, 15bonchí, esí ányi nyi e-ryí i égot-akpuga-syílyíba efee nké nke. Ányi, *chí akpuga nyí ada bě ekye afaníkong*. Ryii onyi eyên ké nyǐ. 16Ébarahâm o-bángê, ne o-kan égot-akpuga ányi efee ké órúmá mú bancen kasî mbe ba-kan n akpuga o-kye ǎ.
17Něen nké esí nyí e/mû e/já Éforon ké Makapyíla, ké kyicê-Mámare ńkyí esû edabyí e/cen ne e-firi nyí Ébarahâm. Kyifát kyi/mû ké kafâ ne bucim ḿbú bu/mû ké nyǐ ne kángkáng byichí ḿbyí byi/mû ké kyifát tete kyi-ribi ké buti. 18Kángkáng banet ḿbé Hyítat ḿbé ba/mû ké ncibi ámu ba/nyît ba/fu, esí ányi e/firi nyí Ébarahâm.
19Ne Ébarahâm o-ryii Sirá mú onyi emen ké bucim ámbu, ké esí nyí Kínan. 20Ké bubwô ámbu, kyifát ńkyí kyi/mû kyi/já banet ḿbé Hyítat, ne bucim ḿbú mbu ké nkyí, kyi/bírî kyi-firi oryii mú Ébarahâm.
Currently Selected:
Jénésis 23: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
