Jénésis 25
25
Bwǎn Bakíri ḿbé Ébarahâm
(1 Korónyíkil 1:32-33)
1Ébarahâm o/bé onyi okíri mú o/mû o-bángê e Ketúra. 2Ketúra o-fwon ǎ Zímaran ne Jókashan ne Médan ne Médyan ne Eshíbak ne Shwâ. 3Jókashan o/mû bonchí mú Shéba ne Dyídan, ne kyikû-banet ńkyí Dyídan kyi/mû banet ḿbé Ashurím ne ḿbé Letushím ne ḿbé Lumím. 4Bwǎn ḿbé Médyan ba/mû Éfa ne Éfe ne Hánok ne Abída ne Éda. Ḿbén kángkáng ba/mû bwǎn-Ketúra.
5Ébarahâm o/bwa ne kángkáng byěm ḿbyí o/mû ne mbyí o-kye Ázik o-ryí bukyû. 6Nké ké nkéré o/mû o/tôong okpó, o/mû o-kyâ bwǎn ḿbé o/fwon ne banyi emen bakíri byěm. Ne o-ró bwǎn ámbe ba-dim ké esí nyí kyicê ńkyí esû nyi e-byí i, ba-mîng Ázik kǎnchí.
Bukyû ne Oryii mú Ébarahâm
7-8Ébarahâm o/rí bajam-aje nyíryinyi esim onyiryiká ne o-kpú. 9Bwǎn emen, Ázik ne Éshimal ba-ryii ǎ ké bucim ḿbú Makapyíla, ké kyifát ńkyí nkyi ké kyicê ńkyí Mámare ńkyí esû nyi e-byí i. Kyifát ánkyi kyi/mû kyi/já Éforon mú wǎn-Zóha, mú onet-Hyítat. 10Kyifát ánkyi nké Ébarahâm o/mû o/ré ne banet ḿbé Hyítat. Ba/ryii Ébarahâm ne onyi emen Sirá ányi. 11Ńdyí Ébarahâm o/kpú, Osówo o/jware wǎn emen Ázik mú o/mû o-kyú u fáráng ne dyijwáng ńdyí badakó, Dyijwáng ńdyí Nyǐ mú mu Okpó, mú mu o-ri ng Mě.
Bwǎn ḿbé Éshimal
(1 Korónyíkil 1:28-31)
12Éshimal mú Héga, mú ósóng-Sirá, mú o/ré ké Éjip, 13o/fwon bwǎn ḿbé něen ké bunye ké bunye. Nebáyot ne Kéda ne Ádibil ne Myíbasam 14ne Myíshima ne Dúma ne Mása 15ne Hádat ne Téma ne Jétu ne Náfyishi ne Kedéma. 16Mbé nké ba/mû banchí ḿbé byikim-banet diǐkpú ne byifee, ne ba/mû ba/fé eshê ne byikit ḿbyí ba/mû ba-kyú u azîn ebe. 17Éshimal o/rí bajam-aje nyâchât esim onyiryiká ne afee ne o-kpú. 18Bwǎn ḿbé Éshimal ba/mû ba-kyú u ké esí nyí e/mû ké otyém ne otyém mú Habyíla ne Shû, ké bukwóp ḿbú Asyírya, ké kyicê ńkyí Éjip ńkyí esû edabyí. Mbé ba/mû ba-kyú u cát ne bwǎn-Ébarahâm ḿbé áku.
Ba/fwon Éso ne Jekôp
19Nyín kiǐshwô kyi-kim ne Ázik mú wǎn-Ébarahâm. 20Ázik o/mû oo/rí bajam-aje bafee ké nkéré o/bé Rebéka mú wǎn-Bétwel, mú o/fím Áram ké Mesopotémya, ne o/mû to wǎn-boné-Lában. 21Ké nǎ, Rebéka o/mû o*fí o-fwon n* Ázik o/fé nshwam o-kye Óburúkpâbí ké bubwô emen. Óburúkpâbí o/jwo nshwam emen, ne Rebéka o-koo dyifít. 22O/mû mu o-bâ efwon afúng, ne o-fwon kámbé, ba/mû mbe ba-nyii ng kyikit ne barî ké kafâ-dyifít. Rebéka o-kpet ebí byiko emen o/fu, ebóng kyibî-chwǒm nkyi kyi-chi i mě něen. Ne o-dim o-da-bí Óburúkpâbí o/fu, osét ǎ dyishí.
23Óburúkpâbí o-faa ǎ o/fu, eshê efee nyi ǒ ké dyifít. Wo a/chi a-fwon bwǎn bafee ḿbé baa*ba/chi ba-kwárê ne barî*. Obónge o/chi o-shwane o-shwôm óbe. Mú okínkán o/chi o-kyú ḿgbán mú mú wǎsíng.
24Nkéré o-fyi mú Rebéka odafwon, ne o-fwon afúng, banyinchéng bányincheng. 25Mbwôp kashú o/mû o-bwam m ne o/mû ne eríp chwóó ké byiko. Ne ké bubwô ámbu, ba-fé ǎ kâng dyizîn, Éso. 26O-fwon n nnyinyěng ne bubwô níbiníbi ké kyiká ńkyí Éso, ne ba-fé ǎ kâng dyizîn, Jekôp. Ázik o/mû oo/rí bajam-aje bachât ńdyí ba/fwon kámbé.
Éso o/shee Bukínkán Emen wǎ Mbwôp Kashú-Wǎn
27Bwǎn ámbe ba-kán, Éso o-firi nryuu dyikán. Nyǐ o/mû onet mú dyikpen ńdyí kyíjí ebyí dyida ǎ enyîn. Nké Jekôp o/mû mu dííng, oo*byí kyíjí*. 28Éso o/mû o-nyîn n Ázik o-shwôm, ké nǎ, enyam nyí Éso o/mû o-ju ng e/mû e-nyîn n ǎ eryí. Nké Jekôp o/mû o-nyîn n Rebéka o-shwôm.
29Dyicí dyibónge, ké nkéré Jekôp mu o-rám m osén, Éso o/fyi dyikán eryuu. Esong e/mû nyi e-nwa ng ǎ, 30ne o-sét Jekôp o/fu, n-kú m-bâ ejwâa esong. Kye mě onyin-mbít mú amu a-rám m. Nkyí nké mbe ba-kó ng Éso, Édom.
31Jekôp o-faa ǎ o/fu, n-kyâ ǒ, â a/kye mě bukínkán eyên wǎ mbwôp kashú-wǎn.
32Éso o-sét ǎ o/fu, me n-kú m-bâ ekpú esong. Mbwôp kashú-wǎn ekyú o-kyâ mě ebóng.
33Jekôp o-faa ǎ o/fu, ké mbwôp kashú, ryí mě ocím a-sem Osówo a/fu, wo aa/bwa ne bukínkán ḿbú mbwôp kashú-wǎn a-kye mě.
Éso o-ryí ocím o-sem Osówo o-bwa ne bukínkán o-kye ǎ. 34Ne Jekôp kâng o-kye ǎ berêt ne kasu. Éso o-ryí o-jwáp bato, o-bûu o-dim. Éné nké Éso o/cen ne o-tông o/fu, nyǐ o*fí o-kérê ng kyi-kim ne bukínkán emen wǎ mbwôp kashú-wǎn*.
Currently Selected:
Jénésis 25: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
