Jénésis 27
27
Ázik o/jware Jekôp
1Ázik o/mû oo/kâa, achi a-sêe. O-kó Éso mú wǎn emen mú mbwôp kashú o-sét ǎ o/fu, wǎn ejí.
Éso o-bángê.
2Ázik o-raa o/fu, wo amu a-nyît ng a/fu, me nn/kâa ne kaa*rí to ne m-kpú*. 3Yip búre eyên ne abán a-ca ké dyikán a-da-ju enyam a-ba-kye mě. 4Rám mě dyizong-byiryíng ándyi ńdyí dyida mě enyîn, a-bâ mě ne ndyí. Ké nkéré nn/ryí kámbyí, n/chi n-kye ǒ nkuli kyikû-ojware ejí ne n-kûkpú.
5Ké nkéré Ázik mu o-sét ng Éso, Rebéka o/mû mu o-jwo ng. Ké nkéré mú Éso o/dim dyikán eryuu, 6Rebéka o/raa ne Jekôp o/fu, me n/jwo ké Ázik o/sét Éso o/fu, 7bâ ne enyam a-rám a-kye mě. Ké nkéré nn/ryí, n/chi n-kye ǒ ojware ejí ké bushú ḿbú Óburúkpâbí ne n-kûkpú. 8Rebéka o-raa o-ca kashú o/fu, kántîk, ǎ wǎn ejí, jwo mě, a-chi ńkyí nda ǒ esét. 9Ca ké kyikit-byitú a-da-fîm byisu-ebúbǔu byifee ḿbyí mbyi súsú ké byiko eringe nyí ndarám kámbyí ké bukwóp ḿbú budajang enyîn ńchân. 10A-kúng a-da-kye ǎ, o-ryí, o-kye ǒ ojware emen ne o-kûkpú.
11Nké Jekôp o/raa ne boné emen o/fu, wo amu a-nyît ng a/fu, Éso mu ne eríp chwóó ké byiko, me eríp e*fí mě*. 12Katô bonchí ejí o/chi o-ta mě abwô ké byiko o-nyît o/fu, me mu n-nîm m ǎ, m-mîng ojware ekoo, m-bwa n-koo kyishû.
13Boné o-faa ǎ o/fu, kyishû ńkyí bada ǒ eshú kyikâm mě me oyén, ǎ wǎn ejí. Chi ochǐng ńkyí mu n-sét ng ǒ, a-da-kám ebû a-ba-kye mě. 14Ne o-da-kám ebû ányi o-ba-kye ǎ, ne o-rám kányí ké bukwóp ḿbú budanyîn bonchí emen. 15Ne Rebéka kâng o-kúng byídí ḿbyí Éso ḿbyí byinong, ḿbyí o/tî ké kyise, o-fé Jekôp. 16O-kúng ekwop-ebû o-cít ǎ ké abwô ne kyitông. 17O-kúng byiryíng ámbyi o-kye ǎ.
18Jekôp o-dim kâng o-kâm bonchí, o-kó, papá.
Ázik o-bángê, o-bí o/fu, wǎn ejí orá mu o-kó ng.
19Jekôp o-faa o/fu, me Éso mú wǎn eyên mú okínkán. Me nn/chi ńkyí a/sét mě. Bûu nensang a-ryí enyam nyí m/bê ǒ ne nyǐ eringe nyí ada mě ekye ojware eyên.
20Ázik o-bí ǎ o/fu, wo a/cen nǎ ne a-ri enyam ochéé óchee, ǎ wǎn ejí.
Jekôp o-faa o/fu, Óburúkpâbí mú mu Osówo eyên nké o/chwáp mě n-ri kányí.
21Ázik o-raa ne nyǐ o/fu, tín a-bâ kpá n-ta ǒ abwô ké byiko. Wo a-chi i Éso ké ntûntû? 22Jekôp o-tín o-kâm bonchí emen. O-tare ǎ abwô ké byiko, o-raa o/fu, ejá nyi wǎ nyí Jekôp, nké abwô nyi wǎ nyí Éso. 23Ázik o*da/cêe Jekôp* ké nǎ, abwô emen a/mû a/firi eríp érip wǎ nyí Éso. Ázik o/mû o-kú o-bâ ǎ ekye ojware emen, 24ne o-chî ǎ ebí o/fu, wo a-chi i Éso ntûntû?
Jekôp o-bángê o/fu, âa.
25Ázik o-sét ǎ o/fu, bâ mě ne enyam nyí a/rám n-ryí ne n-kye ǒ ojware ejí. Jekôp o-kúng kányí o-kye ǎ, o-kye ǎ to bato o-jwáp. 26Ne bonchí emen o-sét ǎ kâng o/fu, tín a-bâ a-rwâm mě. 27Ńdyí o/tín o-fárâng ǎ kâng o-fwôo kyinung-byídí emen ne o-kye ǎ ojware emen o/fu, kyinung ńkyí kyidanyîn, ńkyí wǎn ejí, nkyi wǎ kyifát ńkyí Óburúkpâbí oo/jware. 28Kyi/bát Osówo okye ǒ omu mú odafím kyíbóng o-chi byifát eyên byi-kûbát byiryíng. O-kye ǒ byiryíng ne bato chwóó. 29Kyi/bát eshê ekyú bǎmgbán eyên, banet bakûtíngê kyísí ba-fâ ǒ. Bwǎn-bané eyên kángkáng bakyú ké bubwô eyên, ne bwǎn ḿbé boné eyên batíngê kyísí ba-fé ǒ. Kyi/bát Osówo oshú banet ḿbé bada ǒ eshú, o-jware ḿbé bada ǒ ejware.
Éso o/tîm Arông o/fu, Ázik okye ǎ Ojware
30Ázik o/man ojware emen mú o/mû o/kye, ne Jekôp o-dim m o-bâ, wǎn-boné emen, Éso o-fyi dyikán eryuu. 31O-rám to byiryíng ḿbyí byidanyîn, o-kúng kámbyí o-ca ne mbyí ké kyikit ńkyí bonchí, o-raa o/fu, bonchí, bûu nensang a-ryí enyam nyí n/rám ǒ, eringe nyí ada mě ekye ojware eyên.
32Ázik o-bí ǎ o/fu, wo yeě.
Éso o-faa o/fu, me wǎn eyên mú okínkán.
33Ázik o-kpet etím banê byiko byimúmú o-bí o/fu, yeě kâng mú o/ju enyam o-ba-kye mě. Me n/ryí kányí n-kye ǎ ojware ne wo a-fyi. Me n/kye ǎ nkuli kyikû-ojware ne o-waa ng ne nyǐ ne banyá.
34Ńdyí Éso o/jwo ńkyín, o-kpet etii kakânkakân o/fu, bonchí, kye mě to ojware eyên.
35Ázik o-faa o/fu, wǎn-boné eyên o/ba mě enîm. Oo/koo ojware eyên.
36Éso o-raa o/fu, kampén ka/firi kafee ńké oo/ryí mě mpún. Éné nké ba/fé ǎ dyizîn, Jekôp. O/kúng kyikit ejí wǎ mbwôp kashú-wǎn ne kántîk oo/chîkoo ojware ejí. Wo a*da/tî onyin-ojware mú ada mě ekye*?
37Ázik o-faa ǎ o/fu, me nn/chi ǎ o-firi bonchí eyên ne nn/chi kángkáng bwǎn-bané emen ba-firi ké bubwô emen. Me nn/kye ǎ byiryíng ne bato. Chwǒm kyi*fí to* ǎ wǎn ejí* ńkyí nda ǒ echîkye*.
38Éso o-chînwa o-tîm bonchí arông o/fu, bonchí, wo amu ne ojware obónge nké nke? Bonchí, jware mě to. Ne o-kpet etii.
39Ne Ázik o-sét ǎ kâng o/fu, wo aa*koo omu mú odafím kyíbóng*. Byifát eyên bii*bát byiryíng*. 40Wo a/chi a-kpen ké kashwám eyên. Nké a-kyú u ósóng mú wǎn-boné eyên. Nké â [a/bírî bunwa ne nyǐ,] a/chi a-fem ǎ ké abwô.
41Jekôp o-kpet esa Éso kafâ, ké nǎ, bonchí emen oo/kúng ojware o-kye ǎ. O-kabe o/fu, nkéré mú bonchí ejí odakpú oo/fárâng. N/chi n-ju Jekôp.
42Nké ńdyí Rebéka o/jwo kyi-kim ne ńkyí Éso mu o-pám m, o-twóm Jekôp o-bâ, o-sét ǎ o/fu, fwôo atông a-jwo. Éso mú wǎn-boné eyên mu o-nam m ǒ dyiju. 43Kántîk, ǎ wǎn ejí, chi ńkyí nda ǒ esét. Dim babap a-jâ a-kâm Lában mú wǎn-boné ejí ké Háran, 44a-kyú áku ne nyǐ tete dyityém ńdyí wǎn-boné eyên dyi-chee, 45o-ráp ńkyí wo a/chi ǎ. Â ka/chee ǎ, n/chi n-twóm onet o-ba-kpî ǒ. Bwǎn ejí ba-cen n nǎ ne ba-kpú dyicí dyibónge.
Ázik o/twóm Jekôp o-kâm Lában
46Rebéka o/raa ne Ázik o/fu, me nn/kyee ne banyi-bacinbánet ḿbén ḿbé Éso. Â Jekôp to o/bé wǎn-onyinyi mú o/fím Hyítat, me m-kpú u.
Currently Selected:
Jénésis 27: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
