Jénésis 35
35
Osówo o/jware Jekôp ké Bétel
1Osówo o/raa ne Jekôp o/fu, dim a-jâ Bétel a-da-kyú áku. Bi kyikit-kyifen echi áku a-tî mě, me Osówo mú o/byí o-kâm ǒ ké nkéré a/mû a-chêe ng Éso mú wǎn-boné eyên.
2Ne Jekôp o-sét kyikû-banet emen ne kángkáng banet ḿbé ba/mû ne nyǐ o/fu, pwó n̂g kángkáng erím-bakye nyí bamu ne nyǐ. Soo n̂g byiko enen, ba-yángê byídí. 3Byi-kú byi-bâ edim nyín byi-jâ Bétel, ké kyikit ńkyí n/chi m-bi kyikit-kyifen echi n-tî Osówo mú o/chwáp mě ké nkéré mú afaníkong ejí, ne mu ne me ké kyikû ké kángkáng byikit ḿbyí nn/cen. 4Ne mbé kâng ba-kye Jekôp kángkáng erím-bakye nyí ba/mû ne nyǐ ne boǒré-atông ḿbú ba/mû ba-fâ. Jekôp o-kúng kámbyí o-rôo ké kyikû-kyichí-ociring fáráng ne Shékem.
5Ké nkéré mú Jekôp ne bwǎn emen ba/kpet edim, kiǐtí-bushî kyi/róng banet ḿbé eshê nyí e/mû ányi fáráng, ne ba*da/rim ne mbé ké kyikû*. 6Jekôp o/cen ne banet emen kángkáng o-ba-ribi ké Lûz mú ba-kú ba-kó ng kámú kántîk Bétel, ké esí nyí Kínan. 7O-bi kyikit-kyifen echi ányi, o-fé kyikit ánkyi dyizîn, Osówo mú Bétel, ké nǎ, Osówo o/mû oo/tông ǎ byiko ányi, ké nkéré o/mû o-chêe ng wǎn-boné emen. 8Ḿgbán-Rebéka mú o/mû o-bángê e Dyibóra, mú o/mû o-kám m ǎ bwǎn, o/kpú, ba-ryii ǎ ké kyikû-kyichí, ké kyicê-Bétel ńkyí busyísen. Ne ba-fé kyichí ánkyi dyizîn, Kyichí-Bukyû etii.
9Ké nkéré mú Jekôp o/fyi Mesopotémya, Osówo o/chîbyí o-kâm ǎ, o-jware ǎ. 10O-sét ǎ o/fu, dyizîn eyên dyi-bángê e Jekôp, nké kyi-fím kántîk kyi-câ kashú, dyi/chi dyi-firi Ézerel. Ne Osówo o-fé ǎ dyizîn, Ézerel. 11Ne Osówo o-sét ǎ o/fu, me n-chi i Osówo mú o/rêe o-shwôm. Fwon bwǎn chwóó. Bwǎn eyên ba/chi ba-firi eshê chwóó, ne wo a/chi a-firi bonchí-batu. 12Me n/chi n-kye ǒ esí nyí n/kye Ébarahâm ne Ázik ne n/chi n-kye to bwǎn eyên kányí ké nkéré aa/kpú. 13Ne Osówo o-dim o-mîng ǎ. 14Ké kyikit ánkyi ńkyí Osówo o/raa ne nyǐ, Jekôp o/bi buká ḿbú buda ǎ ekûzîim, o-sháng kámbú o-pwó bakút-ólif ne bato. 15O-fé kyikit ánkyi dyizîn, Bétel.
Ríchel o/kpú
16Jekôp ne kyikû-banet emen ba/dim ké Bétel, ne ńdyí ba/cen ba-fárâng Éfarat, nkéré o/mû oo/fyi mú Ríchel odafwon, ne kyibî-bufwon kyi-kpet ǎ enwa. 17Ké nkéré bufwon bu-kú bu-jang ng ǎ enwa, onet mú o/mû o-kám m ǎ bufwon o/sét ǎ o/fu, Ríchel, *dashî* aa/chîfwon wǎn-onyinchéng. 18Nké Ríchel o/mû o-kú o-kpú u, ne ne o-shû kiǐnjáng ńkyí nkuli kyikû, o/fé wǎn emen dyizîn, Bénónyi, ányi kyi/byí, wǎn-bafip ejí, nké bonchí emen o/fé ǎ dyizîn, Běnjámin, ányi kyi/byí, wǎn mú dyishí dyi/chi dyi-nwa ǎ.
19Ńdyí Ríchel o/kpú, ba/ryii ǎ ké bukô-bukwóp ḿbú mbu bu-jâ Éfarat, nyí ba-kú ba-kó ng kántîk Bételehêm. 20Jekôp o/bi buká ké kyikit ánkyi, ne tete kurún bu/tôong bu-tông ng dyikun ńdyí Ríchel. 21Jekôp o/dim o-ca kashú o-da-bi boompyep ké kyicê-kiǐnyáám-kyise-mbâm ńkyí Éde, ńkyí áku.
Bwǎn ḿbé Jekôp
(1 Korónyíkil 2:1-2)
22Ńdyí Jekôp mu o-kyú u ké esí ányi, Rúben o/rí ne Byíla mú onyi mú bonchí emen mú wǎsíng. Jekôp o/jwo kyi-kim ne nkyí, [ne kyi-sa ǎ!]
Jekôp o/mû ne bwǎn-banyinchéng ashí diǐkpú ne afee. 23Bwǎn ḿbé Lyâ ba/mû Rúben, mú o/mû kámbé okínkán, ne Syímyon ne Lyíva ne Júda ne Ézaka ne Zébélon. 24Ḿbé Ríchel ba/mû Josêf ne Běnjámin. 25Ḿbé ósóng mú Ríchel, Byíla, ba/mû Dǎn ne Nafatályi. 26Ḿbé ósóng mú Lyâ, Zípa, ba/mû Gât ne Ásha. Bwǎn ḿbén ba/fwon kámbé ké Mesopotémya.
Ázik o/kpú
27Jekôp o/dim o-kâm Ázik mú bonchí ké Mámare, fáráng ne Héboron, ké oshê mú Ébarahâm ne Ázik ba/kyú. 28Ázik o/rí bajam-aje kátángekányi, 29ne o/kâa kanong kanong ne o-kpú. Bwǎn emen, Éso ne Jekôp, ba-ryii ǎ.
Currently Selected:
Jénésis 35: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
