Jǒn 19

1Pálet o-kúng kâng Jisos o-kye o/fu, bamín ǎ. 2Ne basúja ba-chi etam-butu ké byire-byichí ḿbyí byiwong byíwong ba-cít ǎ ké dyishí. Ba-fé ǎ ágbádá-butu, 3ne ba-bâ ba-kâm ǎ, ba-kpet ǎ kyiraa eta ba/fu, kyi/bát otu mú banet-Jûs okpen o-wu. Ba-kpet ǎ edíp akwâ.

4Pálet o-chîbwa esim kyíjí kabónge o-da-raa ne banet-Jûs ámbe o/fu, kû n̂g eri, n/chi m-bâ ne nyǐ kyíjí ba-ri ǎ, eringe nyí ben ba/chi ba-nyît ba/fu, me n*da/ri dyishí-chwǒm ńdyí ndafu, baju ǎ*. 5Jisos o-byí kâng kyíjí ne etam-butu nyí byiwong byíwong ké dyishí cítcít ne ágbádá-butu ké byiko. Pálet o-sét kámbé o/fu, dǐi onet ámu i.

6Ké nkéré mú batu-banchi kyifen-Osówo ne bambâm kiǐtí-kyise-kyifen-Osówo echi ba/ri Jisos, ba-wonge ba/fu, mán ǎ ké kyikwap, mán ǎ ké kyikwap.

Pálet o-raa ne mbé o/fu, ben bayén kúng n̂g ǎ kâng ba-da-mán ké kyikwap ńkyí badashwân onet. Me n*da/ri dyishí-chwǒm ńdyí ndafu, baju ǎ*.

7Banet-Jûs ámbe ba-faa ba/fu, be byimu ne kyije ńkyí kyi/fu, nyǐ o-man o-kpú, ké ebóng, nyǐ o/fu, nyǐ o-chi i Wǎn-Osówo.

8Ké nkéré mú Pálet o/jwo ńkyí ba/raa něen, o-bwa o-kpet eshî o-shwôm oshwǒm. 9O-bwa esim ké kafâ-kyise o-da-bí Jisos o/fu, wo a/fím nyá.

Nké Jisos o*da/faa ojá*. 10Pálet o-bí ǎ o/fu, aa*faa mě ojá*? Nyît a/fu, me mu ne busa ḿbú nda ǒ ezú abwô a-dim, ne ḿbú ndafu to, bamán ǒ ké kyikwap ńkyí badashwân onet.

11Jisos o-faa ǎ o/fu, wo amu ne busa ámbu, ké ebóng, Osówo nké o/kye ǒ kámbú. Ké bubwô ámbu kâng, onet mú o/kám mě o-kye ǒ nké o/chi kyibî ńkyí kyi/rêe kyi-shwôm.

12Ké nkéré mú Pálet o/jwo ńkyín, o-kan ekyé bukwóp ḿbú nyǐ odazú Jisos abwô. Nké banet-Jûs ámbe ba-wonge ba/fu, â wo a/zú ǎ abwô, ányi kyi/byí, wo aa*chi ocín mú otu mú Rûm*. Nang yeě mú o/fu, nyǐ o-chi i otu, onet ámu o-chi i onet-bushwôn-otu mú Rûm.

13Ké nkéré mú Pálet o/jwo ńkyí ba/raa něen, o-kúng Jisos o-byí ne nyǐ kyíjí. Pálet o-kyú me ké kakyúng-bampan epan ńké nke ké dyibe-esí ńdyí ba/chi ké aká. Ké ejá-Hyíburu ba-kó ng kándyí Gábáta. 14Dyicí ándyi dyi/mû kyitwom-dyijî-kyifen ńkyí Shwôm, ne kyi/mû kii/byí égbáng diǐkpú ne efee nyí esû. Pálet o-sét banet-Jûs ámbe o/fu, dǐi otu enen něen i.

15Mbé ba-wonge ba/fu, ju ǎ, ju ǎ. Mán ǎ ké kyikwap.

Pálet o-bí kámbé o/fu, ben bamu ba-ryuu ng ba/fu, me mmán otu enen ké kyikwap ńkyí badashwân onet dí.

Batu-banchi kyifen-Osówo ba-faa ba/fu, otu mú be byimu ne mǔ kyi*da/shwôm otu mú Rûm*.

16Ne Pálet o-kúng kâng Jisos o-kye kámbé o/fu, bamán ǎ ké kyikwap ńkyí badashwân onet.

Ba/mán Jisos ké Kyikwap ńkyí badashwân Onet

(Mátyuu 27:32-44; Mâk 15:21-32; Lûk 23:26-43)

Jisos o-firi kâng ké abwô ebe. 17Jisos o-dim kâng o-tû ng kyikwap ńkyí bada ǎ eshwân, o-câ o-da-ribi ké kyikit ńkyí badakó kiǐfâa-dyishí-onet. Ké ejá-Hyíburu ba-kó ng kánkyí Gógúta. 18Ányi nké ba/mán ǎ ké kyikwap ńkyí badashwân onet. Ba/mán to banyinchéng bakíri ashí afee ké byikwap, obónge ké kyicê ńkyín, obónge ké kyicê ńkyín, Jisos ké otyém. 19Pálet o-sáng chwǒm o-kye ba-lák ké kyikwap ńkyí ba/mán Jisos. Ńkyí o/sáng nkyi něen, o/fu, Jisos mú o/fím Názáret, otu mú banet-Jûs. 20Banet-Jûs chwóó ba/kó kánkyí, ké nǎ, kyikit ńkyí ba/mán Jisos ké kyikwap kyi/mû kyi*da/tíbî ne oshê*. Ba/sáng chwǒm ńkyín ké ejá nyí banet-Jûs nyí badakó Hyíburu, ne nyí banet-Rûm nyí badakó Látin, ne nyí banet-Girîs nyí badakó Girîk. 21Batu-banchi kyifen-Osówo ḿbé banet-Jûs ba-raa ne Pálet ba/fu, *dasáng a/fu, otu mú banet-Jûs*. Nké sáng a/fu, onyinchéng mún o/fu, me n-chi i otu mú banet-Jûs.

22Pálet o-faa o/fu, ńkyí me nn/sáng kyi-waa ng eringe nyí n/sáng.

23Ké nkéré mú basúja baa/mán Jisos ké kyikwap ńkyí badashwân onet, ba-kúng byídí emen ba-kyii kámbyí ké byikit byinyii, súja ne súja o-kúng kyikit kyibónge. Ba/yip to ágbádá emen nyí ba/zim ké kyicê-kyídí kyibónge ńkyí ba/tím kyitím, nkyuryu nang obónge o*fí ké nyǐ*. 24Basúja ámbe ba-raa ne barî ba/fu, byi*daját kányí*. Bâ n̂g byi-twóp dyímám byi-ri onet mú o/chi o-koo kányí. Ńkyín kyi/chi, eringe nyí ejá-Osówo nyí ba/sáng kyísí edakyú ntûntû. Nyí e/fu, mbé ba/kyii barî byídí ejí, ne ba/twóp dyímám ké bubwô-ágbádá ejí. Basúja ámbe kâng ba/chi kánkyí.

25Boné-Jisos ne wǎn-boné-boné emen mú onyinyi ne Méryi mú onyi-Kyilúpas ne Méryi mú o/fím Mágádála ba/mû ba/bwom fáráng ne kyikwap ńkyí ba/mán Jisos. 26Jisos o-ri boné emen ne ḿgbán emen mú oda ǎ ejê ké ba/bwom ányi. Ne o-raa kâng ne boné emen o/fu, boné ejí, dǐi wǎn eyên něen i.

27Ne o-raa ne ḿgbán emen ámu o/fu, dǐi boné eyên něen i. Kyi-fím ké nkéré ámu, ḿgbán-Jisos ámu o/yip boné-Jisos o-kpet ekyú ne nyǐ ké kyise emen.

Bukyû ḿbú Jisos

(Mátyuu 27:45-56; Mâk 15:33-41; Lûk 23:44-49)

28Jisos o/nyît o/fu, kántîk kángkáng byěm bii/kwárê kerededet, ne eringe ejá-Osówo nyí ba/sáng kyísí edakyú ntûntû, nyǐ o-raa o/fu, omu o-kú o-jê ng mě.

29Dyicáng dyi/mû ányi ne biǐmyímyám-bato ké ndyí. Ba-yip oringe ba-lip ké bato ámbe, ba-fâp kámú ké kyire-kajang, ne ba-bêem kánkyí kyíbóng ba-tîm Jisos ké byibî-ocím. 30Jisos o-jwáp bato ámbe ne o-raa o/fu, kii/man.

Ne o-tíngê dyishí emen kyísí o-kpú.

Basúja ba/tím Jisos Kyíbye ké Ntô

31Banet-Jûs ba-bí kâng Pálet ba/fu, obángê kámbé ba-bún byiká ḿbyí banyinchéng ḿbé ba/mán kámbé ké byikwap, eringe nyí badakpú babap, ba-shû kámbé ba-ryii. Ba/bí ǎ ńkyín, ké ebóng, dyicí ándyi dyi/mû kyitwom-ékwâbashi ebe, ne mbé ba/mû ba*fí ba-ryuu ng ba/fu, byikwóm-enyam-byiko ámbyi byiwaa ké byikwap ké dyicí-ékwâbashi*. Ké nǎ, dyicí-ékwâbashi ńdyí ndyi dyi-bâ dyi/mû kiǐtí dyi-shwôm. 32Ne basúja kâng ba-dim ba-da-bún byiká ḿbyí mbwôp kashú-onet, ne ba-shwôm ba-da-bún ḿbyí mú obónge ḿbé ba/mán kámbé ne Jisos. 33Nké ké nkéré ba/baribi kyikit-Jisos, mbé ba/ri ba/fu, oo/kpú. Ké bubwô ámbu, ba*da/bún byiká emen*. 34Nké onet-súja obónge o-tím kyíbye ké ntô mú Jisos, ne ké abe ányi, baróng ne omu ba-kpet ebyí. 35Onet mú o/ri kánkyí nkéré kyi/chi oo/sét kánkyí, eringe nyí ben to badabángê ne atyém enen. Ńkyí nyǐ o/sét nkyi ntûntû, ne nyǐ mu o-nyît ng o/fu, nyǐ mu o-sét ng ntûntû. 36Ńkyín kyi/chi, eringe ejá-Osówo nyí ba/sáng kyísí edakyú ntûntû. Nyí e/fu, kyikúú emen nang kyibónge baa*ba/chi ba-bún*. 37Ejá-Osówo ekíri nyí ba/sáng kyísí nyi kô to nyí e/fu, banet ba/chi ba-kû ǎ etún, nyǐ mú mbé ba/tím ǎ ba-ribi.

Ba/ryii Jisos

(Mátyuu 27:57-61; Mâk 15:42-47; Lûk 23:50-56)

38Ké nkéré ńkyín kii/shwôm, Josêf mú o/fím Aramatyâ o-bí Pálet, â o-mîng ng ǎ nyǐ o-kúng kyikwóm-enyam-byiko-Jisos. Josêf o/mû onet mú o/mû o-cen n ne Jisos, nké ké kadip, ké ebóng, nyǐ o/mû mu o-shî ng batu-ashí ḿbé banet-Jûs. Pálet o-sét ǎ o/fu, oda-yip kyikwóm-enyam-byiko ánkyi. Josêf kâng o-da-yip kánkyí o-dim ne nkyí. 39Onyinchéng obónge mú odabángê Nyikodyímus, mú o/mû o/ce o-da-ri Jisos ne buchú, o/dim to ne Josêf ké kyikû. O-kám bakút-kyinung ḿbé badasú nang bajam-ékpúmá bafee esim diǐkpú. Ba/chwáp burwan ḿbú badakó mîi ne babî-eshǎan-kyichí ńkyí badakó álos, ne ba-chi bakút ámbe. 40Banyinchéng ámbe ashí ebe afee ba-kúng kyikwóm-enyam-byiko-Jisos ba-ním kánkyí byídí-okpówo ḿbyí ba/sabe bakút-kyinung ámbe. Ké nǎ, ké bukwóp ḿbún nké banet-Jûs badanap kyikwóm-enyam-byiko ne ba-ryii. 41Kyifát kyi/mû ányi ké kyikit ńkyí ba/ju Jisos. Dyikun ńdyí ba/sím ké dyifít-buká to dyi/mû ányi ńdyí ba*da/ryii ne onet nang obónge ké ndyí*. 42Ba-ryii Jisos ké ndyí, ké nǎ, dyicí ándyi dyi/mû kyitwom-ékwâbashi ebe, ne dyikun to dyi/mû ányi fáráng.

Currently Selected:

Jǒn 19: BKY

Highlight

Copy