Jǒn 4
4
Jisos ne Onyinyi mú o/fím Samérya
1Banet-ncibi mú badakó Fárasyî ba/jwo ba/fu, Jisos mu o-já ng bǎmgbán chwóó, ne mu o-kyâ kámbé osoo mú Osówo o-shwôm Jǒn. 2Ké ntûntû, Jisos oyén o*da/kye onet nang obónge osoo mú Osówo*. Bǎmgbán emen nké nke ba/kye. 3Ké nkéré Jisos o/jwo ńkyí ba/mû ba-raa ng, o/dim ké Judyâ o-bwa esim o-wâa Gályílyi. 4Nyǐ o-man o-nyáng Samérya ké bukwóp emen ámbu ḿbú mu o-câ.
5O-ba-byí ké oshê obónge mú mu ké Samérya, mú badakó Sáka, mú mu fáráng ne esí nyí Jekôp o/mû oo/kye wǎn emen mú odabángê Josêf. 6Dyijwáng ńdyí Jekôp dyi/mû ányi. Ké bucen ḿbú Jisos oo/cen o-kyee, o/dakyú me ké bukô-dyijwáng ándyi. Kyi/mû ké nkéré mú esû ee/kán.
7Onyinyi obónge mú o/fím Samérya o/bê omu etó. Ne Jisos o-sét ǎ o/fu, kye mě omu n-jwáp. 8Bǎmgbán emen ba/mû baa/dim ba-wâa ké oshê byiryíng edaré.
9Mú onyinyi ámu o-faa ǎ o/fu, wo a-chi i onet-Jûs, me onet-Samérya, aa kyi/cen nǎ ne wo a-bí mě a/fu, me nkye ǒ omu a-jwáp. Banet-Jûs baa*jwáp omu ké kyiféng kyibónge ne banet-Samérya*.
10Jisos o-faa o/fu, â wo a/mû a-nyît ng ńkyí Osówo mu o-kyâ, ne dyizong-onet to ńdyí ndyi dyi-bí ng ǒ omu mú ojwábáng, a/mû a/chi a-bí ǎ, ne nyǐ o/mû o/chi o-kye ǒ omu mú dyikpen.
11Onyinyi ámu o-raa o/fu, bonchí, wo chwǒm kyi*fí ǒ ńkyí adató omu*. Dyijwáng to dyi/ríbî. Wo a-ri ng omu mú dyikpen nyá. 12Bonchí eten mú kpákpá, mú odabángê Jekôp nké o/kye bě dyijwáng ńdyín. Nyǐ ne bwǎn emen ne byitú emen ba/jwáp omu ké ndyí mbé ashí amúmú. Wo a/rêe a-shwôm Jekôp dí.
13Jisos o-faa o/fu, nang yeě nké o/jwáp omu mún, omu o/chi o-chî ǎ ejê. 14Nké nang yeě nké o/jwáp omu mú me n/chi n-kye ǎ, omu oo*ba/chi o-chî ǎ ejê*. Ké ebóng, omu mú me n/chi n-kye ǎ o/chi o-firi ǎ ké enyam-byiko wǎ kace ńké nke ka-byí i ké mbwo, ńké ka/chi ka-kye ǎ omu mú dyikpen ne dyikpen ńdyí ne banyá.
15Mú onyinyi ámu o-raa o/fu, bonchí, kye mě dyizong-omu ándyi, eringe nyí omu oo*ba/chi o-chî mě ejê* n-chîbê nang nyín m-ba-tó omu*.
16Jisos o-sét ǎ o/fu, ca a-da-kó otyép eyên ba-bwa esim nyín.
17Onyinyi ámu o-faa ǎ o/fu, me n*fí ne otyép*.
Jisos o-faa o/fu, a/sét ntûntû ńkyí a/fu, wo a*fí ne otyép*. 18Wo aa/bé banyinchéng ashí atánge, nké mú wo amu a-kyú u ne nyǐ kántîk, *chí otyép eyên*. Wo a/sét mě ntûntû.
19Onyinyi ámu o-raa ne Jisos o/fu, bonchí, me n/kabe n/fu, wo a-chi i mkpábé mú odasét byiraa-Osówo. 20Banchí ejí ḿbé Samérya ḿbé kpákpá ba/mû ba-fâ Osówo ké kaku ńkén, nké ben banet-Jûs ba/fu, Jerúsélem nké mu kyikit ńkyí be byidaman byi-kûfé Osówo.
21Jisos o-raa ne nyǐ o/fu, bángê ne me, ǎ mú onyinyi, nkéré mu o-bâ mú banet baa*ba/chi ba-chîfé Bonchí eten ké kaku ńkén* nang ké Jerúsélem*. 22Ben banet-Samérya bamu ba-fâ Osówo mú ba*fí ba-nyît ng* be banet-Jûs byimu byi-nyît ng Osówo mú byimu byi-fâ, ké ebóng, onyánge mú Osówo mu o-fím m ne banet-Jûs. 23Nké nkéré mu o-bâ, ne oo/fyi mú bachíchí-banet ḿbé badafé Osówo ké ntûntû ba/chi ba-fé Bonchí eten ké busun ne ké ntûntû. Azong-banet nyí mbe ba-fâ ǎ něen nké Bonchí eten mu o-ryuu ng o/fu, bakû ǎ efé. 24Osówo ányi Busun, ne banet ḿbé mbe ba-fâ ǎ kâng ba-man ba-kû ǎ efé ké busun ne ké ntûntû.
25Mú onyinyi ámu o-sét Jisos o/fu, me mu n-nyît ng n/fu, onet mú Osówo o/kúng ǎ butu, mú odabángê Karâs o/chi o-bâ. Ké nkéré mú nyǐ oo/bê, o/chi o-sét bě kángkáng byěm.
26Jisos o-faa o/fu, me nyǐ něen mú mu o-raa ng ne wo.
27Ké nkéré ámu, bǎmgbán emen baa/fyi. Kyi/yógê kámbé kanong kanong eringe nyí ba/ri ǎ mu o-pem m ne onyinyi. Nké onet o/mû o*fí nang obónge ké burwám ebe mú o/bí mú onyinyi o/fu, amu a-ryuu ng ebóng* o-bí nang Jisos o/fu, ebóng kyi/chi ne amu a-pem m ne nyǐ*.
28Mú onyinyi ámu o-mîng kâng katí-omu emen ányi, o-bwa esim ké oshê o-da-sét banet ḿbé mbe ányi o/fu, 29bâ n̂g ba-ba-ri onet mú o/sét mě kángkáng byěm ḿbyí nn/chi ké dyikpen ejí. Nang o-man n ekyú onet mú Osówo o/kúng ǎ butu o. 30Ne ba-dim kâng ba-kâm Jisos.
31Ké kyikim-nkéré ánkyi, bǎmgbán-Jisos ba/mû ba-tîm m Jisos arông ba/fu, ntánge byiraa-Osówo, ryí byiryíng.
32Nké nyǐ o/sét kámbé o/fu, me mu ne byiryíng ḿbyí ndaryí ḿbyí ben ba*fí ba-nyît ng chwǒm kyi-kim ne mbyí*.
33Bǎmgbán emen ba-kpet ebí barî kâng ba/fu, onet oo/bê ǎ ne byiryíng o-ryí?
34Jisos o-sét kámbé o/fu, byiryíng ejí byi-chi i ofê mú ndakye okabe mú nyǐ mú o/twóm mě, ne m-man to bǎmkpóngé ḿbé nyǐ o/kye mě o/fu, me nchi. 35Ben ba-fwam m eraa ba/fu, etukáku e/waa enyii, byiryíng efuu byi-fyi. Mu n-sét ng běn n/fu, bêem m̂ achi kyíbóng ké byifát ba-ri. Byiryíng bii/fé, ne byi/firi ḿbyí badafuu. 36Onet mú mu o-fuu ng byiryíng ámbyi, mbe ba-kyâ ǎ akpuga, ne mu o-wuri ng kámbyí o-tî ké dyikpen ńdyí ne banyá, eringe nyí onet mú o/kpang ne onet mú o/fuu ba/chi ba-jêe ashí amúmú. 37Ńkyí mbe ba-fwam m eraa to nkyi ntûntû, ba/fu, onet obónge o-kpang ng, onet okíri o-fuu. 38Me nn/twóm běn n/fu, bada-fuu byiryíng ké kyifát ńkyí ben ba*da/chi bǎmkpóngé*. Banet bakíri ba/chi bǎmkpóngé ké nkyí, ne ben ba-ryí mpún ké bǎmkpóngé ebe.
39Banet-Samérya chwóó ḿbé ké oshê ámu ba/bángê ne Jisos ne atyém ebe, ké ebóng, onyinyi ámu o/sét kámbé o/fu, nyǐ o/sét mě kángkáng byěm ḿbyí nn/chi ké dyikpen ejí. 40Ne ké nkéré banet-Samérya kâng ba/bê ba-kâm ǎ, ba-tîm ǎ arông ba/fu, orí ne mbé, ne Jisos o-rí ányi ací afee ne mbé.
41Banet ba/chîjê chwóó ḿbé ba/bángê ne nyǐ ne atyém ebe ké bubwô-bǎmpém emen ḿbé o/pem. 42Ne ba-sét onyinyi ámu ba/fu, be byi/bángê kántîk ne nyǐ ne atyém eten, *chí ké bubwô ḿbú ńkyí wo a/sét* nké ké bubwô ḿbú be bayén bii/jwo ǎ, ne byi-kú byi-nyît ng byi/fu, nyǐ ké ntûntû o-chi i Onet-Onyii mú ejíí.
Jisos o/chi Wǎn-Onet-Dyishí-Bǎmkpóngé-Okákárá o-nyange
43Ńdyí Jisos oo/rí ányi ací afee, o/dim o-wâa Gályílyi. 44Ké ebóng, nyǐ oyén o/sét o/fu, mkpábé mú odasét byiraa-Osówo baa*kye ǎ ofê ké oshê emen*. 45Ké nkéré nyǐ o/ribi ké Gályílyi, banet-Gályílyi ba/koo ǎ kanong, ké ebóng, mbé ba/ce dyijî-kyifen ńkyí Shwôm ké Jerúsélem, ne mbé ba/ri kángkáng byěm ḿbyí nyǐ o/chi ké nkéré-dyijî ándyi.
46Ne Jisos o-bwa esim ké Kína, ké Gályílyi. Ányi nké nyǐ o/mû o/chi omu o-bírî bato. Onet-dyishí-bǎmkpóngé-okákárá obónge o/mû ányi mú wǎn emen mú onyinchéng o/mû o-rwôm m ké Kapánum. 47Ké nkéré onyinchéng ámu o/jwo ba/fu, Jisos oo/fím Judyâ o-ribi Gályílyi, nyǐ o/dim o-da-bí Jisos o/fu, oca Kapánum o-da-chi wǎn emen mú o/mû o/firi ké bukwóp-bukyû o-nyange. 48Jisos o-raa ne onyinchéng ámu o/fu, onet enen o*fí nang obónge mú odabángê ne me ne dyityém emen* tete o-ri biǐtí ne biinkaa byiko-akat.
49Otu-onyinchéng ámu o-faa Jisos o/fu, bonchí, bâ ne me ké kyikû, ne wǎn ejí o-kûkpú.
50Jisos o-sét ǎ o/fu, ca a-dim, wǎn eyên o/chi o-nyange.
Onyinchéng ámu o-bángê ké ejá nyí Jisos o/sét ǎ éné ne dyityém emen, ne o-dim. 51Ké nkéré onyinchéng ámu o-kú o-bwa ng esim dyijê, o-kwárê ne bǎmgbán emen ké bukwóp ḿbé ba/bê ǎ esét ba/fu, wǎn eyên oo/nyange.
52Ne onyinchéng ámu o-waa ányi o-bí kámbé nkéré mú wǎn emen o/nyange. Ne mbé ba-sét ǎ ba/fu, kyísóng ké égbáng ebónge nyí esû nké mbyép-byiko o/mîng ǎ. 53Ne bonchí o-waa ányi o-zîim o/fu, ké ochíchí-nkéré ámu nké Jisos o/mû o/sét ǎ o/fu, wǎn eyên o/chi o-nyange. Kyi-fím ányi, nyǐ ne kyikû-banet emen kángkáng ba-bángê ké Jisos ne atyém ebe.
54Ńkyín kyi/mû nnyinyěng-kiǐtí-akat nyí Jisos o/chi ké nkéré mú o/fím Judyâ o-ribi Gályílyi.
Currently Selected:
Jǒn 4: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
