Jǒn 8
8
Onyinyi mú ba/kám ǎ mu o-chi i Kyinam
1[Kángkáng banet kâng ba-bwa esim dyijê. Nké Jisos o/dim o-wâa ké kaku ńké badakó Ólif. 2Pirípirí ké orî-dyicí, Jisos o-bwa esim ké kiǐtí-kyise-kyifen-Osówo echi. Bujê-banet kángkáng ba-ba-bwom ba-wáp ǎ ba-fé ké kafâ. Nyǐ o-kyú me o-kpet etángê kámbé. 3Bantánge Byije-Músis ne banet-ncibi mú Fárasyî ba-bâ ne onyinyi obónge mú ba/kám ǎ mu o-chi i kyinam. Ba-sét mú onyinyi ámu ba/fu, obwom ányi ké bushú ebe. 4Ne ba-kó Jisos ba/fu, ntánge byiraa-Osówo, onyinyi mún ba/kám ǎ ké ochíchí-nkéré mú mu o-chi i kyinam. 5Ké byije eten, Músis o/kye bě busa o/fu, dyizong-onyinyi ńdyín něen, ba-man ba-tím ǎ aká tete o-kpú. Nké kántîk, wo a/kabe nǎ. 6Mbé ba/raa ńkyín, eringe nyí mbé badakan Jisos. Fím ányi mbé ba-kám ǎ. Nké Jisos o/tíngê kyísí o-yip kafwa o-kpet esáng byěm ké ecing. 7Ńdyí mbé ba/bwom éné, mbe ba-bí ng ǎ bǎmbím, Jisos o-bêem bushú kyíbóng, ne o-sét kámbé o/fu, nang yeě ké burwám enen mú o*da/chi ne kyibî* obwóp kashú o-tím ǎ buká. 8Ne nyǐ o-bwa o-chîtíngê kyísí, o-chîkpet esáng byěm ké ecing. 9Ké nkéré mú ba/jwo ńkyín, mbé ashí amúmú ba-kpet edim ké onet ké onet. Ḿbé bakínkán nké ba/bwóp kashú ba-dim. Jisos o-waa ányi kǎnchí ne mú onyinyi ámu ányi cip. 10Jisos o-bêem bushú kyíbóng, o-bí mú onyinyi ámu o/fu, banet ḿbé ba/mû nyín mbe nyá. Onet o*fí to nyín nang obónge mú odafu, baju ǒ*?
11Onyinyi ámu o-faa ǎ o/fu, nang onet obónge o*fí to, ǎ bonchí*. Ne Jisos o-sét ǎ kâng o/fu, nang me to n*da/fu, baju ǒ* cen a-ca, nké *dachîchi byibî*.]
Jisos mu Kiinwángé ńkyí Ejíí
12Jisos o-chîraa ne mbé o/fu, me n-chi i kiinwángé ńkyí ejíí. Nang yeě nké mu o-cen n ne me ké kyikû, onet ámu o/chi o-kyú ne kiinwángé ńkyí dyikpen, ne oo*ba/chi o-chîcen ké kyifip ne banyá*.
13Banet-ncibi mú Fárasyî ba-sét ǎ ba/fu, kántîk a-kú a-raa ng ké kakim ńké eyên. Ńkyí amu a-sét ng kyi*fí ntûntû*.
14Jisos o-faa kámbé o/fu, nang m/bwa mu n-sét ng ké kakim ńké ejí, ńkyí mu n-sét ng nkyi ntûntû, ké ebóng, me mu n-nyît ng kyicê ńkyí n/fím ne m-bâ, ne ńkyí mu n-wâa ng. Ben ba*fí ba-nyît ng kyicê ńkyí me n/fím* nang ńkyí mu n-wâa ng*. 15Ben bamu ba-kúng ng bukwóp ḿbú banet ba-pan n barî mpan. Me n*fí m-pan n onet nang obónge mpan*. 16Nké â me m/mû n/fu, m-pan n banet mpan, mpan ejí o/mû o-kyú u mú ntûntû, ké ebóng, *chí me kǎnchí nké mu m-pan n kámú*. Bonchí ejí mú o/twóm mě mu to ne me. 17Ba/sáng ké byije enen ba/fu, â ejá nyí bantûesé ashí afee e/tyeem, ńkyí ba/sét nkyi ntûntû. 18Me mu n-sét ng ké kakim ńké ejí, ne Bonchí ejí mú o/twóm mě mu o-sét ng to ké bubwô ejí.
19Mbé ba-bí ǎ ba/fu, Bonchí eyên mu nyá.
Jisos o-faa kámbé o/fu, ben ba*fí ba-nyît ng mě me* nang Bonchí ejí ba*fí ba-nyît ng ǎ*. Â ben ba/mû ba-nyît ng mě, ben ba/mû ba/chi ba-nyît Bonchí ejí to.
20Jisos o/raa kángkáng byěm ḿbyín ké nkéré nyǐ mu o-tángê e ké kiǐtí-kyise-kyifen-Osówo echi, ké nfût mú ba/tî boomkpukpu-akpuga-eyáré. Nké onet nang obónge o*fí mú o/kám ǎ* ké ebóng, nkéré emen o/mû o*da/fyi ne*.
Jisos o/fu, Ben baa*man ece ké Kyikit ńkyí Me mu n-wâa ng*
21Jisos o-chîraa ne mbé o/fu, me n/chi n-dim. Ben ba/chi ba-kû mě ekyé, nké ben ba/chi ba-kpú ké byibî enen. Ben baa*man ece kyicê ńkyí me mu n-wâa ng*.
22Batu-ashí ḿbé banet-Jûs ba-kpet eraa kâng ba/fu, nyǐ mu o-raa ng o/fu, ben baa*man ece kyicê ńkyí me mu n-wâa ng*. Ányi ńkyín kyi/byí, nyǐ o/chi o-ju byiko emen aa.
23Jisos o-faa kámbé o/fu, ben ba/fím nyín kyísí, nké me n/fím kyíbóng. Ben ba/fím ké ejíí ńnyín něen, nké me n*da/fím ké ejíí ńnyín*. 24Ké bubwô ámbu nké me n/sét běn n/fu, ben ba/chi ba-kpú ké byibî enen. Ne ben ba/chi ba-kpú ké byibî enen, â ben ba*da/bángê ne atyém enen ba/fu, Me Mu Nyǐ Mú Me Mu*.
25Mbé ba-bí ǎ ba/fu, wo yeě.
Jisos o-faa kámbé o/fu, ńkyí me n/sét běn kyi-fím ké kiimkpet kyikû. 26Byěm byi/jê ḿbyí ndaraa, ne ḿbyí ndapan mpan kyi-kim ne ben. Nké nyǐ mú o/twóm mě mu ntûntû, ne me mu n-sét ng ejíí ńkyí me n/jwo ne nyǐ nkyí nkyi.
27Mbé ba*da/nyît ba/fu, nyǐ o/mû mu o-raa ng ne mbé kyi-kim ne Osówo mú Bonchí emen*. 28Ne Jisos kâng o-raa ne mbé o/fu, ké nkéré mú ben baa/bêem Wǎn-Onet kyíbóng, ben ba/chi ba-nyît ba/fu, Me Mu Nyǐ Mú Me Mu, ne ba/nyît kâng ba/fu, me n*fí n-chi i chwǒm nang kyibónge ké kakim ejí* nké mu n-sét ng ńkyí Bonchí ejí o/tángê mě nkyí nkyi. 29Nyǐ mú o/twóm mě mu to ne me. O*da mě emîng kǎnchí* ké ebóng, kángkáng nkéré, me mu n-chi i ńkyí nkyi kyi-nyîn n ǎ.
30Banet chwóó ḿbé ba/jwo ké nkéré mú Jisos mu o-raa ng byěm ḿbyín ba/bángê ne nyǐ.
Banet ḿbé ba*fí Básóng* ne ḿbé mbe Básóng
31Ne Jisos o-raa kâng ne banet-Jûs ḿbé ba/bángê ne nyǐ o/fu, â ben bamu ba-chi i byěm ḿbyí me mu n-tángê e, ányi ben ntûntû ba/firi bǎmgbán ejí. 32Ben ba/chi ba-kûnyît ntûntû, ne ntûntû o/chi o-chi běn ba-fem.
33Mbé ba-faa ǎ ba/fu, be byi-chi i banet ḿbé ba/fím ké kyikû ńkyí Ébarahâm. Be byi*da/kyú ne básóng ḿbé onet nang obónge*. Kyi/byí nǎ kâng, ńkyí amu a-raa ng a/fu, ben ba/chi ba-fem.
34Jisos o-raa ne mbé o/fu, me mu n-sét ng běn ntûntû n/fu, nang yeě mú mu o-chi i byibî o-chi i ósóng mú byibî. 35Ósóng oo*kyú ké kyikû-dyibóng kyibónge kángkáng nkéré* nké wǎn o-kyú u ké nkyí ne banyá ne banyá. 36Â Wǎn-Osówo mu o-chi i o/fu, ben bafem, ben ba/chi ba-fem ntûntû. 37Me mu n-nyît ng n/fu, ben ba/fím ké kyikû-dyibóng ńkyí Ébarahâm. Nké nang ké nkyi éné, ben bamu ba-kan n ba/fu, ba-ju ng mě, ké ebóng, ba*fí ba-koo ng byěm ejí ḿbyí mu n-tángê e*. 38Me mu n-raa ng kyi-kim ne ńkyí Bonchí ejí o/tông mě, nké ben bamu ba-chi i ńkyí bonchí enen o/sét běn.
39Mbé ba-faa ǎ ba/fu, bonchí eten o-chi i Ébarahâm.
Jisos o-faa kámbé o/fu, â ben ntûntû ba/mû bwǎn ḿbé Ébarahâm, ba/mû ba/chi ba-kûchi byěm eringe ebónge ne ḿbyí nyǐ o/chi. 40Kángkáng ńkyí me n/chi kyi*da/shwôm ntûntû mú me mu n-sét ng běn* mú me n/jwo ne Osówo*. Nké nang ké nkyi éné, ben bamu ba-kan n ba/fu, ba-ju ng mě. Ébarahâm o*da/chi dyizong-chwǒm ńdyín*. 41Ben bamu ba-chi i ńkyí bonchí enen o/chi.
Mbé ba-faa ba/fu, Osówo oyén kǎnchí nké mu Bonchí mú be byimu ne mǔ. Be byi-chi i bachíchí-bwǎn emen.
42Jisos o-sét kámbé o/fu, â Osówo ntûntû o/mû Bonchí enen, něen me mu n-jê ng běn, ké ebóng, me n/fím ké abwô emen, ne n/firi nyín kántîk. Me n*da/bê ké kakim ńké ejí* nké nyǐ nké o/twóm mě. 43Ebóng kyi/chi ńkyí ba*fí ba-nyît ng ńkyí me mu n-raa ng*. Nkyi něen, ké ebóng, ben ba*fí ba-man n ecíp dyityém ba-jwo kyitwóm ejí*. 44Ben ba-chi i bwǎn ḿbé bonchí enen, ányi Otu-Byibî-Barím, ne ben bamu ba-ryuu ng to ba/fu, ba-câ kashú ne byěm ḿbyí bonchí enen mu o-ryuu ng. Kyi-fím ké kiimkpet kyikû chíchí, nyǐ mu kiinju banet. Nyǐ ne banyá o*da/bwom ne ké kyicê ńkyí ntûntû* ké ebóng, nyǐ o*fí ne ntûntû ké byiko*. Ké nkéré o-kú o-sét ng kyisédéng, ányi nyǐ mu o-chi i ochíchí-chwǒm mú mu ǎ ké baróng, ké ebóng, nyǐ o-chi i nsêt kyisédéng, ne mu bonchí mú kángkáng byisédéng. 45Me mu n-sét ng ntûntû, ké bubwô ámbu nké ben ba*fí ba-bángê e ne me ne atyém enen*. 46Yeě ké burwám enen odaman etông o/fu, me mu n-chi i byibî. Â me mu n-sét ng ntûntû, ebóng kyi/chi kâng ben ba*fí ba-bángê e ne me ne atyém enen*. 47Onet mú o/fím ké abwô nyí Osówo o-fwôo ng atông ké byiraa ḿbyí Osówo. Nké ben kâng ba*da/fím ké abwô nyí Osówo* nkyí nké ben ba*fí ba-fwôo ng atông*.
Jisos ne Ébarahâm
48Banet-Jûs ámbe ba-faa ba-bí Jisos ba/fu, be byi/mû byi*da/sét ntûntû ké nkéré mú byimu byi-raa ng byi/fu, wo a-chi i onet-Samérya*? ne amu to ne kyibî-bucí*?
49Jisos o-faa o/fu, me n*fí ne kyibî-bucí*. Me mu n-kyâ Bonchí ejí ofê, nké ben ba*fí ba-fâ mě*. 50Nké me n*fí n-kyé ng ofê mú ndakye byiko ejí*. Oyén mu kô mú mu o-kyé ng kámú, ne mu o-két ng to mpan o-nwa mě. 51Me mu n-sét ng běn ntûntû n/fu, nang yeě nké mu o-chi i ńkyí kyitwóm ejí kyi/sét, onet ámu oo*ba/chi o-kpú ne banyá*.
52Banet-Jûs ámbe ba-raa ne nyǐ ba/fu, kántîk, bii/nyît ntûntû byi/fu, wo amu ne kyibî-bucí. Ébarahâm o/kpú, bamkpábé ḿbé badasét byiraa-Osówo ba-kpú, ne wo amu a-raa ng a/fu, nang yeě nké mu o-chi i ńkyí kyitwóm ejí kyi/sét, onet ámu oo*ba/chi o-kpú ne banyá*. 53Wo a/rêe a-shwôm Ébarahâm mú bonchí eten mú o/kpú? A/shwôm to bamkpábé ḿbé badasét byiraa-Osówo ḿbé ba/kpú? Wo amu a-kabe ng a/fu, wo amu ebóng dyizong-onet.
54Jisos o-faa o/fu, â me mu m-kpee ng byiko ejí, akpee ejí a*da/byí chwǒm*. Bonchí ejí mú ben bamu ba-raa ng ba/fu, nyǐ nké mu Osówo enen nké mu o-kpee ng mě me. 55Ben ba*da ǎ enyît ne* nké me mu n-nyît ng ǎ. Â me mu n-sét ng n/fu, me n*fí n-nyît ng ǎ* me to n-firi ng kiinsêt kyisédéng wǎ ben. Nké me mu n-nyît ng ǎ, ne me mu n-chi i eringe nyí ejá emen e/sét. 56Ébarahâm mú bonchí enen o/jêe ńdyí o/nyît o/fu, nyǐ o/chi o-ri dyicí ńdyí me ndabê. O/ri to kándyí, ne o/mû ké bunyîn-dyityém.
57Banet-Jûs ámbe ba-bí ǎ ba/fu, wo a*da/rí ne nang bajam-aje bafee esim diǐkpú* ne wo aa/ri Ébarahâm dí.
58Jisos o-faa kámbé o/fu, me mu n-sét ng běn ké ntûntû n/fu, me m/mû kpá ne ba-kûfwon Ébarahâm.
59Mbé ba-bwóp aká nyí bada ǎ etím, nké Jisos o/rem, ne o-byí o-mîng kiǐtí-kyise-kyifen-Osówo echi.
Currently Selected:
Jǒn 8: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
