Lûk 13
13
 a*da/mîng Byibî Eyên echi* a-kpú u
1Ké nkéré ámu, banet bakíri ba/mû ányi ḿbé ba/sét Jisos kyi-kim ne banet-Gályílyi ḿbé Pálet o/mû o/ju ké nkéré mú mbe ba-chi i kyifen ba-kyâ Osówo. 2Jisos o-faa kámbé o/fu, ké ba/ju banet-Gályílyi ḿbén ké bukwóp ámbu, ben ba/kabe ba/fu, ńkyín kyi/tông kyi/fu, mbé nké ba/mû ba-chi i byibî ba-shwôm banet-Gályílyi ḿbé áku kángkáng? 3Kyi*fí éné*. Me mu n-sét ng běn n/fu, â ben ba*da/saa byiko ba-mîng byibî enen* ben ashí amúmú ba/chi ba-kpú to wǎ eringe nyí mbé ba/kpú. 4Aa ḿbé ba/mû ba/kpú to kâng ashí onyiryiká ne achât, fáráng ne dyijwáng ńdyí badakó Solôm, ḿbé enyóng e/myii e-ju kámbé. Ben ba/kabe ba/fu, ńkyín kyi/tông kyi/fu, banet ámbe nké ba/mû ba/bên ba-shwôm kángkáng banet ḿbé áku? ḿbé ba/mû ba-kyú u ké Jerúsélem? 5Kyi*fí éné*. Me mu n-sét ng běn n/fu, â ben ba*da/saa byiko ba-mîng byibî enen* ben ashí amúmú ba/chi ba-kpú to wǎ eringe nyí mbé ba/kpú.
Dyitím-Ekan kyi-kim ne Dyisín-Kyichí ńdyí dyi*fí dyi-zím m*
6Jisos o-tím kámbé kâng dyitím-ekan ńdyín o/fu, onyinchéng obónge o/mû ne dyisín-kyichí ké kyifát emen. Onyinchéng ámu o-dim byirim emen etún, nké o*da/ri nang kaarim*. 7Ne o-sét kâng ḿgbán emen mú mu o-tún n kyifát ánkyi o/fu, dǐi kwán i, aje aa/kwárê jangjang achât nyí me mu m-bâ nyín m-bâ ng etún byirim ké dyisín-kyichí ńdyín, nké n*da/ri ne nang kaarim*. Twom kándyí a-twóp. Dyi*dachîbên esí dyikáá*. 8Nké ḿgbán emen ámu o/faa ǎ o/fu, bonchí, mîng kándyí kyízîn nké nke. Me n/chi n-sím dyibíng n-wáp kyikû emen. N-fé bakye ḿbé badachi byíkwôn byi-nwa ányi ba-sú. 9Nké â dyi/zím ké orî-dyije, kyi/chi kyi-nwa kyi-shwôm. Nké â dyi*da/zím* a-fu kâng ba-twom kándyí ba-twóp.
Jisos o/chi Onyinyi mú Nkong o/nyîim ǎ o-nyange ké Dyicí-Ékwâbashi
10Ké dyicí-ékwâbashi dyibónge, Jisos o/mû mu o-tángê e ké kyise-ékwâbashi kyibónge ńkyí banet-Jûs. 11Onyinyi obónge o/mû ányi mú o/mû ne kyibî-bucí ńkyí kii/kye ǎ orwôm ké aje onyiryiká ne achât. Orwôm emen ámu oo/chi nkong emen o-nyîim, o*fí to o-man n ebwom dángdáng*. 12Ké nkéré Jisos o/ri ǎ, o-kó ǎ o/fu, otu-onyinyi, orwôm eyên oo/man. 13Jisos o-yip abwô emen o-twôom ǎ ké byiko, ne ké abe ányi, nkong emen o-nabe, ne mú onyinyi ámu o-kpet ekye Osówo akpee.
14Kafâ ka-kpet esa onet-dyishí-kyise-ékwâbashi ánkyi, ké ebóng, Jisos o/chi onet o-nyange ké dyicí-ékwâbashi. Ne o-raa kâng o-sét banet ḿbé ba/mû ányi o/fu, ací nyi nyâchât nyí badachi bǎmkpóngé. Kû n̂g ebê ké ací ányi ba-chi běn byirwóm enen byi-man, *chí ké dyicí-ékwâbashi*.
15Otu Kyítá o-faa ǎ o/fu, ben bannîm banet. Onet nang obónge mu nyín ké burwám enen mú o*fí o-firi ng mpong emen nang kaanyam-atû emen ké kaase, o-kúng kánké o-da-kye kánké omu ké dyicí-ékwâbashi*? 16Nyín něen wǎn mú o/fím ké kyikû ńkyí Ébarahâm, mú Sátan oo/fé ǎ kyirwóm ké aje jangjang onyiryiká ne achât. Kyi/mû kyi*da/nwa ńkyí nda ǎ echi o-nyange ké dyicí-ékwâbashi*? 17Ejá nyí nyǐ o/faa éné e/chi banet-bushwôn emen ba-firi ne éshwân ké byiko. Banet ḿbé kwán ba/jêe ké kiǐtí-akat nang kyirá ńkyí o/chi.
Dyitím-Ekan kyi-kim ne Kaǎsáng-Kyichí ńké badakó Mósatat
(Mátyuu 13:31-32; Mâk 4:30-32)
18Jisos o-bí o/fu, Butu ḿbú Osówo mbu wǎ ebóng. N-kúng ng ebóng ne n-kan kánkyí. 19Nkyi wǎ kaǎsáng-kyichí ńké badakó mósatat, ńké onyinchéng obónge o/kúng o-kwón ké kyifát emen. Ka-byí, ka-kán, ka-firi dyisín-kyichí, ne bunurung bu-ba-chi aju ké byire emen.
Dyitím-Ekan kyi-kim ne Bukye ḿbú badafé ké Berêt ne o-mut
(Mátyuu 13:33)
20Jisos o-chîbí o/fu, n-kúng ng ebóng ne n-kan Butu ḿbú Osówo. 21Mbu wǎ bukye ḿbú budachi berêt o-mut, ḿbú onyinyi odakúng o-fé ké ńcáng-esang-byichí nyí baa/kwa legelege, nyí badayip ba-chi berêt tete berêt ámu kángkáng o-mut.
Dyifyi ńdyí dyi*da/rêe*
(Mátyuu 7:13-14, 21-23)
22Jisos o/dim o-cen ké byire ne ké eshê, o-tángê e o-câ bukwóp búkwop ḿbú mu o-wâa ng Jerúsélem. 23Onet obónge o-bí ǎ o/fu, bonchí, boǒnyín-banet nké Osówo o/chi o-nyii kámbé dí.
Jisos o-faa kámbé o/fu, 24yip n̂g busa enen kángkáng ba-kan eringe nyí badashwôm ké dyifyi ńdyí dyi*da/rêe*. Ké ebóng, me mu n-sét ng běn ké ntûntû n/fu, banet chwóó ba/chi ba-kan ba/fu, mbé ba-nung ng, nké baa*ba/chi ba-man enung*. 25Oyén-kyise o/chi o-bûu nensang o-fín dyifyi. Ké nkéré ben baa/bwom kâng kyíjí ba-kpet ekíbî ké dyifyi, ba/fu, bonchí, kuu bě dyifyi, nyǐ o/chi o-faa běn o/fu, me n*fí n-nyît ng kyicê ńkyí ben ba/fím*. 26Ben ba/chi ba-bwa kâng ba-sét ǎ ba/fu, be byi/ryí byiryíng, byi-jwáp bato ne wo. Wo nké a/tángê bě ké oshê eten. 27Nyǐ o-chî ng běn esét o/fu, me n*fí n-nyît ng kyicê ńkyí ben ba/fím*. Dim m̂ mě me ányi, ben kángkáng ba-chi i banchi byibî. 28Bukyû etii ne asháng eryí bii*ba/chi byi-nwa eri* ké nkéré ben ba/chi ba-ri Ébarahâm ne Ázik ne Jekôp ne kángkáng bamkpábé ḿbé ba/mû ba-sét ng byiraa-Osówo ké kafâ Butu ḿbú Osówo, ba-bwa ba-yip běn ben ba-twóp kyíjí. 29Banet ba/chi ba-fím ké byicê-ejíí byimúmú ba-ba-kyú ké byikit ebe, ké dyijî, ké Butu ḿbú Osówo. 30Banet ḿbé ba/bwóp kashú kántîk kâng ba/chi ba-ryí esim, ne ḿbé ba/ryí esim kántîk ba/chi ba-bwóp kashú.
Kyijé ńkyí Jisos mu ne Oshê mú badakó Jerúsélem
(Mátyuu 23:37-39)
31Ké ochíchí-nkéré ámu, banet-ncibi mú badakó Fárasyî ba/bê ba-kâm Jisos, ba-sét ǎ ba/fu, a-man a-dim nyín a-ca kyicê kyikíri, ké nǎ, Otu Hérot mu o-ryuu ng o/fu, nyǐ o-ju ng ǒ.
32Jisos o-faa kámbé o/fu, ca n̂g ba-da-sét kaanet-byinyídíng-onyinchéng ámu wǎ kaǎjwám ba/fu, me mu n-ró ng byibî-bací, n-chi i to banet byirwóm byi-man n, kurún ne nencí, ne ké ací afee n/chi m-man bǎmkpóngé ejí. 33Nké me m-man n-kyú ké bukwóp-bucen ejí, kurún ne nencí ne ací afee. Kyi*fí kanong ńkyí badaju mkpábé mú odasét byiraa-Osówo ké kyikit kyikíri* kyi-cibi ne Jerúsélem*.
34Ô banet ḿbé mbe ké oshê mú Jerúsélem. Ben bamu ba-ju ng bamkpábé ḿbé badasét byiraa-Osówo. Ben bamu ba-tím m banet-kyitwóm ḿbé Osówo mu o-twóm m kyikit enen aká. Kampén kafěng ńké me m/mû n/ryuu n/fu, m-kpárê ng běn kángkáng m-bât ké kakim wǎ eringe ekwa nyi e-cít ng bwǎn emen ké abyibabang, nké ben ba*da mě ebángê*. 35Kántîk Osówo o/chi o-né byise enen kángkáng. Me mu n-sét ng běn ké ntûntû n/fu, ben baa*ba/chi ba-chî mě eri* tete nkéré o-fyi mú ben ba/chi ba-raa ba/fu, ojware okyú ne nyǐ mú o/bê ké bubwô ḿbú Otu Kyítá.
Currently Selected:
Lûk 13: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
