Lûk 15
15
Etám-Ebû nyí e/tánê
(Mátyuu 18:12-14)
1Nkéré obónge, bankoo akpuga-dyishí chwóó ne banchi byibî to chwóó ba/bê ebajwo byiraa ḿbyí Jisos mu o-sét ng. 2Banet-ncibi mú badakó Fárasyî ne bantánge Byije-Músis ba-kpet erime ké kyitông ba/fu, onyinchéng mún něen, banchi byibî ba-nyîn n ǎ, o-ryí i ne byiryíng ne mbé. 3Ne Jisos o-tím kámbé kâng dyitím-ekan ńdyín o/fu, 4ben â nang onet enen obónge nké o/mû ne bajam-etám-ebû batánge, ne ebónge e-ba-tánê ǎ, onet ámu o-chi i nǎ. O-man o-mîng nyí áku bajam banyii esim onyiryiká ne enyii ányi ké kyikit ńkyí nyi e-ryí i baryî, o-dim edakyé nyí e/tánê éné tete o-ri kányí. 5Ké nkéré mú oo/ri kányí, o-firi ng ké bunyîn-dyityém, o-kúng kányí o-twôom ké byikem. 6O-bwa esim ne nyǐ dyijê. O-ba-kó bacín emen ne barî-banet emen ba-ba-kyú kyikit kyibónge. O-sét kámbé o/fu, me n/firi ké bunyîn-dyityém. Bâ n̂g ba-jêe ne me, ké ebóng, nn/ri ebû ejí nyí e/mû e/tánê. 7Ne Jisos o-sét kámbé o/fu, me mu n-sét ng běn n/fu, eringe ebónge to nké bunyîn-dyityém bu/chi bu-jê chwóó kyíbóng, â nchi byibî obónge o/saa byiko o-mîng byibî echi, bu-shwôm ḿbú bajam-banet banyii esim onyiryiká ne banyii ḿbé mbe biǐtí-banet, ḿbé kyi*da/chîbát mú mbé badachîsaa byiko ké byibî ebe*.
Kóbo mú o/tánê
8Â nang onyinyi obónge to nké mu ne bakóbo diǐkpú, ne obónge o-ba-tánê ǎ, onyinyi ámu o-chi i nǎ. O-man o-mee okwâ, o-jwoo kyise emen, o-tún kanong kanong tete o-ri kámú. 9Ké nkéré mú oo/ri kámú, o-da ng ekó bacín emen ne barî-banet emen ba-ba-kyú kyikit kyibónge. O-sét kámbé o/fu, me n/firi ké bunyîn-dyityém. Bâ n̂g ba-jêe ne me, ké ebóng, nn/ri kóbo ejí mú o/mû o/tánê. 10Ne Jisos o-chîraa ne mbé o/fu, me mu n-sét ng běn n/fu, eringe ebónge to barím ḿbé banong ḿbé Osówo ba-jêe ng, â nchi byibî obónge o/saa byiko o-mîng byibî echi.
Wǎn-Onyinchéng mú o/tánê
11Jisos o-chîraa o-ca kashú o/fu, onyinchéng obónge o/mû ne bwǎn-banyinchéng ashí afee. 12Mú wǎsíng o-sét bonchí emen o/fu, kyítá, kyii byěm ḿbyí ejí a-kye mě kántîk. Ne bonchí o-kyii byěm emen o-kye bwǎn emen ámbe ashí afee. 13Ka*da/rí* wǎn emen mú wǎsíng ámu o-shee byěm ḿbyí emen. O-kúng akpuga o-dim ne nyǐ, o-jâ oshê okíri mú tíbítíbí, o-da-sâm akpuga emen ányi ké kyibî-dyikpen ekyú. 14O-bên kángkáng akpuga emen nyí o/mû ne nyǐ. Ne kyibî-esong kyi-ba-nung ké oshê ámu. Nang kaǎchwóm ka*fí ǎ to*. 15O-dim kâng bǎmkpóngé edachi ne onet obónge mú o/fím oshê ámu. Onyinchéng ámu o-twóm ǎ ké dyikán emen o/fu, mú mǔ okûdatún akûk emen. 16Esong e-nwa wǎn ámu nyí e/nwa ǎ! Ne o-kpet esaa byiko o/fu, kyi/bát nyǐ ori nang biinkwobe-byiryíng ḿbyí akûk nyi a-ryí i, nyǐ o-ryí. Nké onet o*fí nang obónge mú o/kye ǎ nang kaǎchwóm ńké odaryí*. 17Ké nkuli kyikû, o-ba-kabe ké dyityém emen dííng o/fu, kángkáng banet-bǎmkpóngé ḿbé bonchí ejí o/yámê mbe ba-ryí i byiryíng byi-waa ng kyísí, ne me mu nyín, n-kú m-bâ ekpú esong. 18N/chi m-bwa esim n-kâm bonchí ejí. N-da-sét ǎ n/fu, kyítá, me nn/chi kyibî ké bushú-Osówo ne ḿbú eyên. 19Me n*da/kwárê mú wo ada mě echîkó wǎn eyên*. Tî mě wǎ banet-bǎmkpóngé eyên ḿbé a/yámê. 20Ne wǎn ámu o-bûu nensang o-kpet ebwa esim dyijê kyikit-bonchí.
O/waa kú tete, bonchí o-ri ǎ. Byiko byi-kpú bonchí, o-zóngê o-da-rwâm ǎ, o-kpárê ǎ o-bât ké kakim. 21Wǎn ámu o-sét bonchí o/fu, kyítá, me nn/chi kyibî ké bushú-Osówo ne ḿbú eyên. Me n*da/kwárê mú wo ada mě echîkó wǎn eyên*. 22Nké bonchí o/kó bǎmgbán emen o-sét kámbé o/fu, ca n̂g babap ba-bâ ne ágbádá nyí anong anong ba-fé ǎ. Ba-fé ǎ ókpâl ké kafwa ne abe ké byiká. 23Ba-ca kâng ba-da-kám mpong ejí mú oryên oryên ba-ju, byi-chi dyijî. 24Ké ebóng, wǎn ejí mún o/mû oo/kpú, nké kántîk oo/jwóbê. O/mû oo/tánê, nké kántîk oo/fyi. Ne dyijî dyi-kpet kâng.
25Nkéré ámu, wǎn emen mú okínkán o/mû o/tôong ké dyikán. Ké nkéré mú nyǐ o-kú o-fyi ng dyikán o-bâ, ńdyí oo/fárâng ké byise, o-jwo ekam nyí mbe ba-kim m ne ane nyí mbe ba-ne ng. 26Ne o-kó ḿgbán-bonchí emen obónge o-bí ǎ o/fu, ebóng kyi/chi kwán. 27Ḿgbán ámu o-sét ǎ o/fu, wǎn-ńchân oo/fyi, nké ńchân oo/ju ǎ mpong mú oryên oryên. Ké ebóng, o/fyi o-kâm ǎ kanong, nang chwǒm kyi*da ǎ echi*. 28Kafâ ka-sa mú okínkán emen ámu kanong kanong. O-né o/fu, nyǐ oo*nung ké kyise*. Ne bonchí emen kâng o-byí o-da-tîm ǎ arông o/fu, onung ké kyise. 29Ne wǎn ámu o-sét bonchí emen o/fu, kûri, kángkáng aje ńnyín, me mu n-chi i ǒ bǎmkpóngé wǎ ósóng. Nang kabónge n*da ǒ ené ne kyitwóm*. Wo aa/kye mě ebóng. Nang ebû ebónge a*da mě ekye ne a/fu, nchi dyijî ne bacín ejí*. 30Nké wǎn eyên mún oo/bên kángkáng byěm eyên ké dyishí-banyinyi. Ké oo/fyi kántîk, aa/ju ǎ mpong mú oryên oryên. 31Bonchí emen ámu o-faa ǎ o/fu, wǎn ejí, kángkáng nkéré wo amu nyín ne me. Ne kángkáng byěm ejí ḿbyí me mu ne mbyí ḿbyí eyên. 32Nké byi-man byi-chi dyijî byi-kyú ké bunyîn-dyityém. Ké ebóng, wǎn-ńnân mún o/mû oo/kpú, nké kántîk oo/jwóbê, o/mû oo/tánê, nké kántîk oo/fyi.
Currently Selected:
Lûk 15: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
