Lûk 17
17
Kyibî
(Mátyuu 18:6-7, 21-22; Mâk 9:42)
1Ne Jisos o-raa kâng ne bǎmgbán emen o/fu, byěm ḿbyí byidachi banet ba-róng ké byibî byi-man byi-bâ. Nké kyi/chi kyi-bên kanong kanong ne onet mú mbyi byi-cen n ké bubwô emen ne byi-bâ. 2Kyi-nwa ng ńkyí badatú dyizong-onet ándyi kiimbâng-kyirim-buká ké kyitông ba-yip ǎ ba-twóp ké kafâ-baya, kyi-shwôm ńkyí odachi onet nang orá mú mu kyeekyee o-róng ké kyibî. 3Bám m̂ byiko enen.
 wǎn-boné eyên o/chi ǒ kyibî, bîn ǎ.  byiko byi/kpú ǎ ké kyibî emen ńkyí o/chi, pwoo ǎ. 4 nang mu o-chi i ǒ kyibî kampén káchâtkányi ké dyicí dyibónge, nké ké kampén ánke kamúmú mu o-bâ ng ǒ esét o/fu, byiko byi/kpú mě, pwoo mě, a-man a-pwoo ǎ.
Dyityém efé ne Jisos
5Banet-kyitwóm-Otu Kyítá ba-sét ǎ ba/fu, chi dyityém eten ńdyí byi/fé ne wo dyi-jê dyi-shwôm eringe nyí byimu byi-fâ kántîk.
6Otu Kyítá o-faa kámbé o/fu, â dyityém ńdyí ben ba/fé ne me dyi/mû nang kaǎníngéníngê wǎ kaǎsáng-kyichí ńké badakó mósatat, ben ba-man n ekye busa ba/fu, kyichí ńkyí kyiryên kyibûu kyi-da-kwón byiko ké baya, kyi-chi to wǎ eringe nyí ba/sét.
Bǎmkpóngé ḿbé Ḿgbán
7Onet mu kô ké burwám enen mú mu ne ḿgbán mú mu o-kpang ng ǎ kyifát nang mu o-tún n ǎ ebû, â o-fyi ng o-bâ ké dyikán a-sét ǎ a/fu, shwôm babap a-da-yip byiryíng eyên a-ryí? 8Aa*chi éné*. A-sét ng ḿgbán eyên ámu a/fu, rám mě byiryíng ḿbyí ndaryí, a-kpá byiko, a-tî mě kámbyí ké ókpákpúrúk n-ryí, n-jwáp bato, ne wo oyén to a-kûryí byiryíng ḿbyí eyên, a-jwáp bato ḿbé eyên. 9Ba-kó ng to ḿgbán asǎma? â o/chi ńkyí bonchí emen o/sét ǎ dí. Baa*kó*. 10Nkyi eringe ebónge ne ben. Ké nkéré baa/chi kángkáng byěm ḿbyí ba/sét běn, raa n̂g ba/fu, be byi*da/kwárê mú bada bě ekó asǎma*. Be byi*da/chi kyikíri* kyi-cibi ne bǎmkpóngé ḿbé bǎmgbán badachi*.
Jisos o/chi Banet-Kyibî-Orwôm Ashí Diǐkpú ba-nyange
11Ké nkéré Jisos mu o-wâa ng Jerúsélem, o/cen ké buti-esí ḿbú Samérya ne Gályílyi. 12Ké nkéré mú o-kú o-bâ enung ké oshê obónge, o-kwárê ne banet-kyibî-orwôm-enyam-byiko ashí diǐkpú. Banet ámbe ba/bwom áku cát, 13ba-wonge ba/fu, Jisos bonchí, ri bě bafip.
14Jisos o-ri kámbé ne o-raa ne mbé o/fu, ca n̂g banchi kyifen-Osówo ba-jebe běn.
Ké nkéré ba/dim mbe ba-cen n ba-câ, orwôm ebe o-waa ányi o-man. 15Ké nkéré onet obónge ké burwám ebe ámbu o/ri o/fu, orwôm emen oo/man, o/bwa esim o-kpee ng Osówo o-bâ ne ejá kyíbóng kyíbóng. 16O-ba-myii Jisos ké byiká, o-fé bushú kyísí, o-kó ǎ asǎma. Onyinchéng ámu o/mû o/fím oshê mú badakó Samérya. 17Jisos o-raa kâng o/fu, *chí banet ashí diǐkpú nké n/chi kámbé ba-nyange*? Aa ḿbé áku ashí kátángekányi kâng. 18Onet o*fí mú o/bwa esim o/fu, nyǐ o-bâ ng ekye Osówo akpee*? kyi-cibi ne ocinónet mún*? 19Ne Jisos o-raa ne onyinchéng ámu o/fu, bûu nensang a-dim. Dyityém eyên ńdyí a/fé ne me dii/chi ǒ a-nyange.
Nkéré mú Butu ḿbú Osówo bu/chi bu-byí Kyíjí Wááng
(Mátyuu 24:23-28, 37-41)
20Banet-ncibi mú badakó Fárasyî ba/bí Jisos ba/fu, osét kámbé nkéré mú Butu ḿbú Osówo bu/chi bu-byí kyíjí wááng. Jisos o-faa kámbé o/fu, Butu ḿbú Osówo boo*ba/chi bu-byí ne ekap nyí badari*. 21Onet o*fí mú odasét o/fu, nyín nké Osówo mu o-tún n banet* nang o-bwa o-sét o/fu, áku nké Osówo mu o-tún n banet*. Ké ebóng, Osówo oo/kpet etún banet nyín ké burwám enen.
22Ne Jisos o-raa kâng ne bǎmgbán emen o/fu, nkéré mu o-bâ mú ben ba/chi ba-kûryuu ba/fu, kyi-nwa ng ńkyí ben badari dyicí ńdyí Wǎn-Onet dyibónge, nké baa*ba/chi ba-ri kándyí*. 23Â banet ba/sét běn ba/fu, nyín nké Wǎn-Onet mu, nang ba-sét běn ba/fu, áku nké mu, *da n̂g echi ba-dim ba-ca ne banet ámbe ké kyikû*. 24Ké ebóng, eringe nyí kasabang nke ka-két ng ka-kyâ kiinwángé, kyi-fím ké kyicê-bubóng kyibónge tete kyi-ribi ké ńkyí kú, éné to nké Wǎn-Onet o/chi o-byí ké dyicí emen ńdyí ndyi dyi-bâ. 25Nké ké mbwôp kashú, nyǐ o-man o-ri afaníkong chwóó ne banet ḿbé kyikim-nkéré ńkyín ba-né ǎ. 26Eringe nyí kyi/mû ké nkéré mú Núwa, éné to nké kyi/chi kyi-kyú ké nkéré mú Wǎn-Onet. 27Kángkáng banet ba/mû mbe ba-ryí i byiryíng, ba-jwáp ng bato, banyinchéng ne banyinyi ba-bé ng barî, tete ké ochíchí-dyicí mú Núwa o/nung ké ńsukyíkang, ne omu o-ba-na, buce bu-sú bu-ju kámbé kángkáng. 28Kyi/chi kyi-kyú to wǎ eringe nyí kyi/mû kyi/chi ké nkéré mú Lôt. Nang yeě nang yeě o/mû mu o-ryí i, o-jwáp ng bato, o-ré ng byěm, o-shee ng ḿbyí byishěng, o-kwón n byěm, o-bi ng byise. 29Ké dyicí ńdyí Lôt o/mîng Sódom, Osówo o/twóm okwâ ne aká nyí aa/sóng okwâ a-bwam shéét byi-ba-ju kámbé kángkáng. 30Éné nké kyi/chi kyi-kyú ké dyicí ńdyí Wǎn-Onet o/chi o-tông byiko emen kyíjí.
31Ké dyicí ándyi, onet mú mu kyíbóng-kyise oo*man o-shû kyísí o/fu, nyǐ o-da ng eyip byěm emen ḿbyí mbyi ké kafâ-kyise*. Ké eringe ányi ebónge to, onet mú mu ké dyikán oo*man o-kabe kyi-kim ne byěm ḿbyí o/mîng ké kyise*. 32Zîim m̂ ńkyí kyi/chi onyi-Lôt. 33Nang yeě nké mu o-ryú u kyi-kim ne dyikpen emen, dyikpen emen dyi/chi dyi-tánê ǎ. Nké nang yeě nké dyikpen emen dyi/tánê ǎ, o/chi o-já kándyí. 34Me mu n-sét ng běn n/fu, ké buchú ḿbú dyicí ándyi, banyinchéng ashí afee ba/chi ba-rí sáre ké karíng kabónge mbe ba-rê ng. Barím ḿbé banong ba/chi ba-yip onyinchéng obónge, ba-mîng obónge. 35Banyinyi ashí afee ba/chi ba-kyú kyikit kyibónge mbe ba-kwa ng byěm. Barím ḿbé banong ba/chi ba-yip obónge, ba-mîng obónge. [ 36Banyinchéng ashí afee ba/chi ba-kyú ké dyikán mbe ba-chi i bǎmkpóngé kyikit kyibónge. Ba/chi ba-yip onyinchéng obónge, ba-mîng obónge.]
37Bǎmgbán emen ba-bí ǎ ba/fu, nyá, ǎ Otu Kyítá.
Jisos o-faa kámbé o/fu, kyikit ńkyí kyikwóm-enyam kyidakyú, ányi nké biinfuu akun byidacibi kyikit kyibónge.
Currently Selected:
Lûk 17: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
