Lûk 19

Jisos ne Zakyíyos

1Jisos o-nung ké oshê mú badakó Jéríku, mu o-shwôm m o-câ. 2Nfang-onyinchéng obónge mú o/mû otu-dyishí mú bankoo akpuga-dyishí o/mû ányi, mú o/mû o-bángê e Zakyíyos. 3Nyǐ o/mû mu o-kan n o/fu, nyǐ o-ri ng Jisos. Nké bujê-banet ba/ku ǎ, ké nǎ, nyǐ o/mû kaǎkím-onet. 4Zakyíyos o-byí kâng ne ochéé, o-bwóp bujê-banet ámbe kashú, o-da-yú kyíbóng-kyichí, eringe nyí nyǐ o/chi o-ri Jisos, ké ebóng, Jisos o/mû mu o-bâ eshwôm ké bukwóp ámbu. 5Ké nkéré Jisos o/ribi ké kyikit ánkyi, o-bírî achi kyíbóng, o-raa ne Zakyíyos o/fu, Zakyíyos, shû kyísí babap, ké nǎ, me m-man n-nung ǒ ocinónet kurún.

6Zakyíyos o-shû kyísí ochéé óchee o-da-koo Jisos o-nung ǎ ocinónet ké kyise emen ne bunyîn-dyityém. 7Kángkáng banet ḿbé ba/ri kánkyí ba-kpet erime ké kyitông ba/fu, Jisos oo/dim ocinónet edanung ké kyise-onyinchéng mú mu o-chi i byibî.

8Zakyíyos o-bûu nensang o-sét Otu Kyítá o/fu, fwôo atông a-jwo, ǎ bonchí. Me n/chi n-kúng byěm ejí ḿbyí me mu ne mbyí n-kyii byicê byifee, n-yip kyicê kyibónge n-yárê banet-byikpu. Â me m/mû nn/nîm onet n-koo ǎ chwǒm ké bukwóp ḿbú boo*nwa* me n/chi n-só onet ámu chwǒm ánkyi n-nye kampén kachât kyíbóng.

9Jisos o-sét Zakyíyos o/fu, kurún, Osówo oo/nyii kyikû-banet eyên, ké ebóng, wo to a/fím ké kyikû ńkyí Ébarahâm. 10Ké ebóng, Wǎn-Onet o/bê ebakyé banet ḿbé baa/tánê ké byibî, eringe nyí odanyii kámbé.

Dyitím-Ekan kyi-kim ne Akpuga

(Mátyuu 25:14-30)

11Ké nkéré banet mbe ba-jwo ng byiraa ḿbyín, Jisos o/chîce kashú o-tím kámbé dyitím-ekan ńdyín. Ké ebóng, nyǐ o/mû oo/fárâng Jerúsélem ne banet ba/mû ba-kú ba-kabe ng ba/fu, Butu ḿbú Osówo bu-kú bu-bâ ebyí kyíjí wááng. 12Ne o-sét kámbé kâng o/fu, kiǐtí-onet kyibónge kyi/dim ké oshê mú tíbítíbí o/fu, nyǐ o-da ng eryí butu o-bwa esim. 13Ne onyinchéng ámu o-kûdim, o/kó bǎmgbán emen ashí diǐkpú o-kye kámbé kyikim-akpuga-gûl kyibónge kyibónge o/fu, bakûcen kasî tete nyǐ o-fyi. 14Nké onyinchéng ámu o/mû o-sa ng banet-oshê emen kafâ. Ne ba-twóm banet ba/fu, baca onyinchéng ámu ké kyikû, ba-da-sét banet-oshê ámu ḿbé ba/chi ba-kúng ǎ butu, ba/fu, be byi*fí byi-ryuu ng onyinchéng mún byi/fu, okyú otu eten*.

15Ké nkéré kiǐtí-onet ánkyi kii/daryí butu ámbu kyi-fyi, kyi-kye busa kyi/fu, bakó bǎmgbán emen ḿbé nyǐ o/mû o/kye kámbé akpuga ba-bâ, eringe nyí nyǐ odanyît mpún mú baa/ryí ké kasî ńké baa/cen ké nyǐ. 16Mú mbwôp kashú o/babwom ké bushú-otu ámu o/fu, bonchí, kyikim-akpuga-gûl eyên kyibónge kii/gbinge akpuga akíri diǐkpú. 17Otu ámu o-sét ḿgbán emen ámu o/fu, a/man echi. Wo a-chi i ḿgbán mú onong. Ké bubwô ḿbú a/fé mě ké boǒnyín-byěm ḿbú n/kye ǒ, me n/chi n-kye ǒ busa ḿbú adakûtún eshê diǐkpú. 18Nnyinyěng-ḿgbán o-ba-bwom o-sét otu ámu o/fu, bonchí, kyikim-akpuga-gûl eyên kyibónge kii/gbinge akpuga akíri atánge. 19Otu ámu o-sét ḿgbán emen ámu o/fu, wo a/chi a-kûtún eshê etánge. 20Ḿgbán mú obónge o-ba-bwom o-sét ǎ o/fu, bonchí, di kyikim-akpuga-gûl eyên kyibónge i. N/yip kánkyí m-bwá ké áfáré, n-rôo. 21Ké ebóng, me m/mû mu n-shî ng ǒ, ké nǎ, édúú eyên e-jang ng esóng. Wo amu wǎ onet mú odakoo ńkyí kyi*fí ńkyí emen* ne wǎ mú odafuu byiryíng ké kyifát ńkyí o*da/kpang*. 22Otu ámu o-raa ne ḿgbán emen ámu o/fu, kyibî-ḿgbán wǎ wo. N/chi n-yip ejá eyên m-pan mpan o-bên ǒ. Wo amu a-nyît ng a/fu, édúú ejí e-sóng ng. Me n-koo ng byěm ḿbyí byi*fí ḿbyí ejí* n-fuu ng kyifát ńkyí n*da/kpang*. 23Wo ebóng kâng ńkyí wo a*da/yip akpuga ejí a-fé ké kyikit ńkyí okákárá o/tî o/fu, bakûfé akpuga* eringe nyí m/mû n/fyi něen kántîk, m/mû n/chi n-da-fîm kányí ne mpún kyíbóng. 24Ne otu ámu o-raa ne banet ḿbé ba/bwom ányi o/fu, koo n̂g akpuga ányi ké abwô emen ba-kye ḿgbán ejí mú mu ne akpuga diǐkpú. 25Banet ámbe ba-sét otu ámu ba/fu, bonchí, nyǐ oo/níbî akpuga diǐkpú. 26Otu ámu o-faa kámbé o/fu, me mu n-sét ng běn n/fu, nang yeě nké mu ne chwǒm ba-chî ng ǎ enye kyikíri, nké onet mú o*fí ne nkyí* nang kaǎnyín ńké mu ne nké ba/chi ba-bam ǎ ba-koo. 27Nké kyi-kim ne banet-bushwôn ejí ḿbé ba*fí ba-ryuu ng ba/fu, me nkyú kámbé otu* bâ n̂g ne mbé nyín ba-ju kámbé ké bushú ejí.

Jisos o/nung ké Jerúsélem ne Akpee

(Mátyuu 21:1-11; Mâk 11:1-11; Jǒn 12:12-19)

28Jisos o/raa ńkyín ne o-bwóp kámbé kashú o-dim ḿbú Jerúsélem. 29Ké nkéré mú oo/fárâng Bét-Féje ne Bétányi, ké kaku ńké badakó Ólif, nyǐ o/twóm bǎmgbán emen ashí afee. 30O-sét kámbé o/fu, ca n̂g ké oshê mú mu běn ányi ké kashú. Â ba/nung áku, ba/chi ba-ri kyisu-kabyî-orá ńké ba/tú ányi, ńké ba*da/yú ne nang kabónge*. Firi n̂g kánké ba-bâ ne nké kwán. 31Â onet o/bí běn o/fu, ebóng bamu ba-firi ng kánké, sét n̂g ǎ ba/fu, bonchí eten mu o-ryuu ng kánké.

32Ne ba-dim kâng ba-da-ri kángkáng byěm kerededet, wǎ eringe nyí Jisos o/mû o/sét kámbé. 33Ké nkéré mú mbe ba-firi ng kabyî-orá ánke, bayén ba-bí kámbé ba/fu, ebóng bamu ba-firi ng kánké.

34Mbé ba-faa ba/fu, bonchí eten mu o-ryuu ng kánké. 35Ne ba-níbî kánké ba-ba-kye Jisos. Ba-pii bankyû ebe kâng ba-tát kánké ké byiko. Ba-chwáp Jisos o-yú o-kyú ké nké. 36Ké nkéré Jisos mu o-cen n o-câ ké nké, banet ba-pii bankyû ebe ba-tát ké bukwóp.

37Ké nkéré mú nyǐ oo/fárâng ké Jerúsélem, ké kyikit ńkyí bukwóp bu/shû kaku ńké badakó Ólif, bujê-bǎmgbán emen ba-kpet ekó Osówo asǎma, ba-kpee ng ǎ ne ejá kyíbóng kyíbóng, ké kángkáng biǐtí-byěm ḿbyí mbé baa/ri. 38Ba/fu, ojware okyú ne otu mú mu o-bâ ké bubwô ḿbú Otu Kyítá. Bunyîn-dyityém bukyú kyíbóng, ne akpee akyú ne Osówo.

39Banet-ncibi mú badakó Fárasyî bakíri kâng ḿbé ba/mû ké burwám-bujê-banet ámbe ba-raa ne Jisos ba/fu, ntánge byiraa-Osówo, nyán bǎmgbán eyên ba-cíbî pyêp.

40Jisos o-faa kámbé o/fu, me mu n-sét ng běn n/fu, â mbé ba/cíbî pyêp, nang aká ayén a/chi a-wonge.

Jisos o/tii Oshê mú Jerúsélem

41Ké nkéré mú Jisos oo/fárâng Jerúsélem, o-ri kámú, o-tii kámú 42o/fu, â banet ḿbé ké oshê mún ba/mû ba-nyît ng nang kurún ńkyí kyidacen ne bunyîn-dyityém bu-bâ, nké kántîk baa*man eri to kánkyí*. 43Ací nyi a-bâ nyí nkéré mú banet-bushwôn enen ba/chi ba-wâng běn ba-fé ké otyém. Ba-tim běn akwóp amúmú, ba-kye běn bunwa ké byicê byimúmú. 44Ba/chi ba-bên oshê omúmú, ba-ju běn kángkáng ne bwǎn enen. Nang buká bubónge ḿbú ba/mû ba/kúng kámbú ba-bi kyise boo*ba/chi bu-chîwaa ké kyikit emen* ké ebóng, ben ba*da/cêe ké nkéré mú Osówo o/bê běn ebanyii*.

Jisos o/ce ké Kiǐtí-Kyise-Kyifen-Osówo echi

(Mátyuu 21:12-17; Mâk 11:15-19; Jǒn 2:13-22)

45Ne Jisos o-da-nung ké kafâ-kiǐtí-kyise-kyifen-Osówo echi, o-kpet eró bancen kasî ḿbé ba/mû ányi. 46O-sét kámbé o/fu, ejá-Osówo nyí ba/sáng kyísí e/fu, Osówo o/fu, kyise ejí ba/chi ba-kûkó kánkyí kyise-nshwam efé. Nké ben baa/yángê kánkyí kyi-firi kyikit ńkyí banet-kajii badarem.

47Jisos o/mû mu o-tángê e ké kiǐtí-kyise-kyifen-Osówo echi kángkáng dyicí. Batu-banchi kyifen-Osówo ne bantánge Byije-Músis ne banet-ashí-oshê ba/mû mbe ba-kyé ng bukwóp ḿbú bada ǎ eju. 48Nké ba*da/man ejá mpât mú bada ǎ eju* ké ebóng, kángkáng banet kyi/mû nkyi kyi-nyîn n kámbé byiraa ḿbyí Jisos ejwo.

Currently Selected:

Lûk 19: BKY

Highlight

Copy